ਬਰਨਾਲਾ, 06 ਫਰਵਰੀ (ਨਿਰਮਲ ਸਿੰਘ ਪੰਡੋਰੀ) : ਵਿਧਾਨ ਸਭਾ ਹਲਕਾ ਬਰਨਾਲਾ ਦੀ ਚੋਣ ਦਿਲਚਸਪ ਪੜਾਅ ’ਚ ਪਹੁੰਚਦੀ ਨਜ਼ਰ ਆ ਰਹੀ ਹੈ। ਕਾਂਗਰਸ ਪਾਰਟੀ ਵੱਲੋਂ ਮੈਦਾਨ ’ਚ ਉਤਾਰੇ ਉਮੀਦਵਾਰ ਮੁਨੀਸ ਬਾਂਸਲ ਦੀ ਚੋਣ ਮੁਹਿੰਮ ਦੀ ਯੋਜਨਾ ਨੇ ਅਕਾਲੀ ਦਲ-ਬਸਪਾ ਅਤੇ ਆਮ ਆਦਮੀ ਪਾਰਟੀ ਦੇ ਉਮੀਦਵਾਰਾਂ ਦਾ ਵੀ ਧਿਆਨ ਖਿੱਚਿਆ ਹੈ। ਮੁਨੀਸ ਬਾਂਸਲ ਕੋਲ ਸਮਾਂ ਘੱਟ ਹੋਣ ਦੀ ਗੱਲ ਕਰਕੇ ਵਿਰੋਧੀ ਪਾਰਟੀਆਂ ਬਾਂਸਲ ਨੂੰ ਕਮਜ਼ੋਰ ਉਮੀਦਵਾਰ ਸਮਝ ਰਹੀਆਂ ਸਨ, ਪ੍ਰੰਤੂ ਕਾਂਗਰਸ ਹਾਈਕਮਾਂਡ ਵਿੱਚ ਮੁਨੀਸ ਬਾਂਸਲ ਦੇ ਪਿਤਾ ਸ੍ਰੀ ਪਵਨ ਬਾਂਸਲ ਦੀ ਲੱਤ ਫਸੀ ਹੋਣ ਕਰਕੇ ਸੂਬਾ ਕਾਂਗਰਸ ਹਾਈਕਮਾਂਡ ਦੇ ਚੋਟੀ ਦੇ ਲੀਡਰਾਂ ਨੇ ਮੁਨੀਸ ਬਾਂਸਲ ਦੀ ਚੋਣ ਮੁਹਿੰਮ ਵੱਲ ਧਿਆਨ ਦੇਣਾ ਸ਼ੁਰੂ ਕਰ ਦਿੱਤਾ ਹੈ। ਕਾਂਗਰਸ ਵੱਲੋਂ ਮੁੱਖ ਮੰਤਰੀ ਦਾ ਚਿਹਰਾ ਐਲਾਨੇ ਚਰਨਜੀਤ ਸਿੰਘ ਚੰਨੀ ਨੇ ਪਾਰਟੀ ਦੇ ਕੁਝ ਦਿੱਗ਼ਜ ਆਗੂਆਂ ਨੂੰ ਮੁਨੀਸ ਬਾਂਸਲ ਦੀ ਚੋਣ ਮੁਹਿੰਮ ’ਚ ਥਾਪੜਾ ਦੇ ਕੇ ਭੇਜਿਆ ਹੈ, ਇਨਾਂ ਆਗੂਆਂ ‘ਚੋਂ ਇੱਕ ਤਜ਼ਰਬੇਕਾਰ ਆਗੂ ਸੁਰਿੰਦਰਪਾਲ ਸਿੰਘ ਸਿਬੀਆਂ ਨੇ ਮੁਨੀਸ ਬਾਂਸਲ ਦੀ ਚੋਣ ਮੁਹਿੰਮ ਨੂੰ ਰਫ਼ਤਾਰ ਦਿੱਤੀ ਹੈ। ਜ਼ਿਕਰਯੋਗ ਹੈ ਕਿ ਸਿਬੀਆ ਦਾ ਬਰਨਾਲਾ ਸ਼ਹਿਰ ਸਮੇਤ ਹਲਕੇ ਦੇ ਪਿੰਡਾਂ ’ਚ ਨਿੱਜੀ ਅਸਰ ਰਸੂਖ਼ ਹੈ। ਪਿੰਡਾਂ ਵਿੱਚ ਕਾਂਗਰਸ ਪਾਰਟੀ ਨਾਲ ਜੁੜੇ ਅਜੇ ਵੀ ਕੁਝ ਆਗੂ ਅਜਿਹੇ ਹਨ ਜਿਹੜੇ ਸਿਬੀਆ ਦੇ ਇਸ਼ਾਰੇ ’ਤੇ ਕੰਮ ਕਰ ਰਹੇ ਹਨ। ਮੁਨੀਸ ਬਾਂਸਲ ਲਈ ਇਹ ਸੁਖ਼ਦ ਪਲ ਹਨ ਕਿ ਸਿਬੀਆ ਦੀ ਐਂਟਰੀ ਤੋਂ ਬਾਅਦ ਪੇਂਡੂ ਖ਼ੇਤਰ ’ਚ ਉਕਤ ਆਗੂ ਉਸ ਦੀ ਚੋਣ ਮੁਹਿੰਮ ਦਾ ਹਿੱਸਾ ਬਣੇ ਹੋਏ ਹਨ। ਜਿਸ ਤੋਂ ਬਾਅਦ ਮੁਨੀਸ ਬਾਂਸਲ ਬਰਨਾਲਾ ਹਲਕੇ ’ਚ ਗੁਰਮੀਤ ਸਿੰਘ ਮੀਤ ਹੇਅਰ ਅਤੇ ਕੁਲਵੰਤ ਸਿੰਘ ਕੀਤੂ ਦੇ ਬਰਾਬਰ ਦੀ ਦੌੜ ਵਿੱਚ ਸ਼ਾਮਲ ਹੋਇਆ ਹੈ।
