-ਪਵਨ ਬਾਂਸਲ ਨੇ ਕਦੇ ਹਾਈਕਮਾਂਡ ਤੱਕ ਮੁਨੀਸ ਦੀ ਟਿਕਟ ਲਈ ਪਹੁੰਚ ਨਹੀ ਕੀਤੀ
ਬਰਨਾਲਾ, 07 ਫਰਵਰੀ (ਨਿਰਮਲ ਸਿੰਘ ਪੰਡੋਰੀ) : ਕਾਂਗਰਸ ਹਾਈਕਮਾਂਡ ਵੱਲੋਂ ਨਿਯੁਕਤ ਪੰਜਾਬ ਕਾਂਗਰਸ ਦੇ ਇੰਚਾਰਜ ਹਰੀਸ਼ ਚੌਧਰੀ ਨੇ ਬਰਨਾਲਾ ਹਲਕੇ ਤੋਂ ਉਮੀਦਵਾਰ ਮੁਨੀਸ ਬਾਂਸਲ ਦੇ ਹੱਕ ’ਚ ਇੱਕ ਜਨਸਭਾ ਨੂੰ ਸੰਬੋਧਨ ਕੀਤਾ। ਇਸ ਮੌਕੇ ਉਨਾਂ ਕਿਹਾ ਕਿ ਬਰਨਾਲਾ ਹਲਕੇ ਤੋਂ ਮੁਨੀਸ ਬਾਂਸਲ ਨੂੰ ਪਾਰਟੀ ਟਿਕਟ ਬਾਂਸਲ ਦੀ ਕਾਬਲੀਅਤ ਨੂੰ ਦੇਖਦੇ ਹੋਏ ਦਿੱਤੀ ਗਈ ਹੈ। ਹਰੀਸ਼ ਚੌਧਰੀ ਨੇ ਇਸ ਪੱਖ ਨੂੰ ਨਕਾਰ ਦਿੱਤਾ ਕਿ ਮੁਨੀਸ ਬਾਂਸਲ ਨੂੰ ਉਨਾਂ ਦੇ ਪਿਤਾ ਪਵਨ ਬਾਂਸਲ ਦੇ ਕਰਕੇ ਕਾਂਗਰਸ ਦੀ ਟਿਕਟ ਦਿੱਤੀ ਗਈ ਹੈ। ਉਨਾਂ ਕਿਹਾ ਕਿ ਪਵਨ ਬਾਂਸਲ ਨੇ ਇਕ ਵਾਰ ਵੀ ਕਾਂਗਰਸ ਹਾਈਕਮਾਂਡ ਕੋਲ ਮੁਨੀਸ ਬਾਂਸਲ ਦੀ ਟਿਕਟ ਲਈ ਪਹੁੰਚ ਨਹੀਂ ਕੀਤੀ, ਸਗੋਂ ਹਾਈਕਮਾਂਡ ਨੇ ਬਰਨਾਲਾ ਹਲਕੇ ਦੇ ਕਾਂਗਰਸੀ ਵਰਕਰਾਂ ਦੀਆਂ ਭਾਵਨਾਵਾਂ ਅਤੇ ਪਾਰਟੀ ਵੱਲੋਂ ਨਿਯੁਕਤ ਕੀਤੇ ਅਬਜਰਬਰਾਂ ਦੀ ਫੀਡਬੈਕ ਅਨੁਸਾਰ ਮੁਨੀਸ ਬਾਂਸਲ ਨੂੰ ਚੋਣ ਮੈਦਾਨ ਵਿੱਚ ਉਤਾਰਿਆ ਗਿਆ ਹੈ। ਹਰੀਸ਼ ਚੌਧਰੀ ਨੇ ਮੁਨੀਸ ਬਾਂਸਲ ਦੀ ਚੋਣ ਨੂੰ ਹਾਈਕਮਾਂਡ ਦਾ ਬਿਲਕੁਲ ਸਹੀ ਫ਼ੈਸਲਾ ਦੱਸਿਆ। ਬਰਨਾਲਾ ਹਲਕੇ ਤੋਂ ਟਿਕਟ ਦੇ ਮਜ਼ਬੂਤ ਦਾਅਵੇਦਾਰ ਕੇਵਲ ਸਿੰਘ ਢਿੱਲੋਂ ਦੀ ਮੁਨੀਸ ਬਾਂਸਲ ਦੀ ਚੋਣ ਮੁਹਿੰਮ ਤੋਂ ਦੂਰੀ ਸੰਬੰਧੀ ਸਵਾਲ ਦੇ ਜਵਾਬ ’ਚ ਹਰੀਸ਼ ਚੌਧਰੀ ਨੇ ਕਿਹਾ ਕਿ ਜਿਹੜਾ ਕਾਂਗਰਸੀ ਆਗੂ/ਵਰਕਰ ਪੰਜਾਬ ’ਚ ਕਾਂਗਰਸ ਦੀ ਸਰਕਾਰ ਚਾਹੁੰਦਾ ਹੈ, ਉਹ ਇਮਾਨਦਾਰੀ ਨਾਲ ਆਪਣੀ ਜ਼ਿੰਮੇਵਾਰੀ ਸਮਝਦਾ ਹੋਇਆ ਪਾਰਟੀ ਲਈ ਕੰਮ ਕਰੇਗਾ। ਹਰੀਸ਼ ਚੌਧਰੀ ਨੇ ਦੋ-ਟੁੱਕ ਆਖ਼ ਦਿੱਤਾ ਕਿ ਉਹ ਕਿਸੇ ਨੂੰ ਮਨਾਉਣ ਨਹੀਂ ਜਾਣਗੇ ਪ੍ਰੰਤੂ ਨਾਲ ਹੀ ਉਮੀਦ ਵੀ ਪ੍ਰਗਟ ਕੀਤੀ ਕਿ ਕੇਵਲ ਸਿੰਘ ਢਿੱਲੋਂ ਬਰਨਾਲਾ ਹਲਕੇ ਤੋਂ ਕਾਂਗਰਸ ਨੂੰ ਜਿਤਾਉਣ ਲਈ ਸਹਿਯੋਗ ਕਰਨਗੇ। ਸਮੇਂ ਦੀ ਨਜ਼ਾਕਤ ਅਨੁਸਾਰ ਹਰੀਸ਼ ਚੌਧਰੀ ਨੇ ਡੇਰਾ ਸਿਰਸਾ ਦੇ ਮੁੱਖੀ ਗੁਰਮੀਤ ਰਾਮ ਰਹੀਮ ਸਿੰਘ ਨੂੰ 21 ਦਿਨਾਂ ਦੀ ਪੈਰੋਲ ਦਿੱਤੇ ਜਾਣ ’ਤੇ ਕੋਈ ਟਿੱਪਣੀ ਕਰਨ ਤੋਂ ਨਾਂਹ ਕਰ ਦਿੱਤੀ। ਚਰਨਜੀਤ ਸਿੰਘ ਚੰਨੀ ਦੀ ਮੁੱਖ ਮੰਤਰੀ ਚਿਹਰੇ ਦੀ ਚੋਣ ਉੱਪਰ ਅਕਾਲੀ ਦਲ ਤੇ ਆਮ ਆਦਮੀ ਪਾਰਟੀ ਵੱਲੋਂ ਕੀਤੀਆਂ ਟਿੱਪਣੀਆਂ ਨੂੰ ਹਰੀਸ਼ ਚੌਧਰੀ ਨੇ ਬੇਬੁਨਿਆਦ ਦੱਸਦੇ ਹੋਏ ਕਿਹਾ ਕਿ ਕਾਂਗਰਸ ਚੰਨੀ ਦੀ ਅਗਵਾਈ ਹੇਠ ਸੂਬੇ ’ਚ ਸਰਕਾਰ ਬਣਾਏਗੀ। ਇਸ ਮੌਕੇ ਸਾਬਕਾ ਕੇਂਦਰੀ ਮੰਤਰੀ ਪਵਨ ਬਾਂਸਲ, ਚੇਅਰਮੈਨ ਮੱਖਣ ਸ਼ਰਮਾ, ਕੁਲਦੀਪ ਸਿੰਘ ਕਾਲਾ ਢਿੱਲੋਂ, ਜ਼ਿਲਾ ਪ੍ਰਧਾਨ ਲੱਕੀ ਪੱਖੋਂ ਅਤੇ ਵੱਡੀ ਗਿਣਤੀ ’ਚ ਕਾਂਗਰਸੀ ਵਰਕਰ ਹਾਜਰ ਸਨ ।
ਬਾਕਸ ਆਈਟਮ
ਜ਼ਿਕਰਯੋਗ ਹੈ ਕਿ ਹਰੀਸ਼ ਚੌਧਰੀ ਦਿੱਤੇ ਹੋਏ ਸਮੇਂ ਤੋਂ ਕਰੀਬ 3 ਘੰਟੇ ਲੇਟ ਪੁੱਜੇ ਜਿਸ ਕਾਰਨ ਉਡੀਕ-ਉਡੀਕ ਕੇ ਅੱਕੇ ਲੋਕ ਹਰੀਸ਼ ਚੌਧਰੀ ਦੇ ਆਉਣ ਤੋਂ ਪਹਿਲਾਂ ਹਾਲ ‘ਚੋਂ ਉੱਠ ਕੇ ਬਾਹਰ ਆ ਗਏ ਅਤੇ ਜ਼ਿਆਦਾ ਗਿਣਤੀ ’ਚ ਲੋਕ ਖਾਣਾ ਖਾ ਕੇ ਤੁਰਦੇ ਬਣੇ। ਹਰੀਬ ਚੌਧਰੀ ਜਿਸ ਵੇਲੇ ਮੰਚ ’ਤੇ ਪੁੱਜੇ ਤਾਂ ਹਾਲ ਵਿੱਚ ਲੱਗੀਆਂ ਅੱਧੇ ਤੋਂ ਵੱਧ ਕੁਰਸੀਆਂ ਖਾਲੀ ਸਨ। ਹਰੀਸ ਚੌਧਰੀ ਦੀ ਆਮਦ ਮੌਕੇ ਉਮੀਦਵਾਰ ਮੁਨੀਸ ਬਾਂਸਲ ਵੀ ਹਾਜ਼ਰ ਨਹੀਂ ਸਨ, ਉਹ ਹਰੀਸ਼ ਚੌਧਰੀ ਤੋਂ ਕਾਫੀ ਸਮਾਂ ਬਾਅਦ ਮੰਚ ’ਤੇ ਪੁੱਜੇ। ਕਾਂਗਰਸ ਦੇ ਸਮਾਗਮ ਵਿੱਚ ਇੱਕ ਹੋਰ ਵਿਸ਼ੇਸ਼ਤਾ ਦੇਖਣ ਨੂੰ ਮਿਲੀ ਕਿ ਖਾਣਾ ਪਰੋਸਣ ਵਾਲੇ ‘ਵੇਟਰਾਂ’ ਨੂੰ ਸਪੈਸ਼ਲ ਤੌਰ ’ਤੇ ਕਾਂਗਰਸ ਪਾਰਟੀ ਵੱਲੋਂ ਦਿੱਤੀਆਂ ਜਾਕਟਾਂ ਪਹਿਨਾਈਆਂ ਗਈਆਂ ਸਨ, ਜਿਨਾਂ ਉੱਪਰ ਅੱਗੇ ਤੇ ਪਿੱਛੇ ‘ਸਾਡਾ ਚੰਨੀ’ ਲਿਖਿਆ ਹੋਇਆ ਸੀ।
