ਬਰਨਾਲਾ,05 ਸਤੰਬਰ (ਨਿਰਮਲ ਸਿੰਘ ਪੰਡੋਰੀ) :
ਐਸ. ਡੀ. ਕਾਲਜ ਆਫ ਐਜੁਕੇਸ਼ਨ ਬਰਨਾਲਾ ਵਿਖੇ ਸਿਰਜਣਾ ਅਤੇ ਸੰਵਾਦ ਸਾਹਿਤ ਸਭਾ ਬਰਨਾਲਾ ਵਲੋਂ ਆਪਣਾ ਪਲੇਠਾ ਸਾਹਿਤਕ ਸਮਾਗਮ ਅਧਿਆਪਕ ਦਿਵਸ ਨੂੰ ਸਮਰਪਿਤ ਜ਼ਿਲ੍ਹਾ ਭਾਸ਼ਾ ਵਿਭਾਗ ਬਰਨਾਲਾ ਦੇ ਸਹਿਯੋਗ ਨਾਲ ਕਰਵਾਇਆ ਗਿਆ। ਇਸ ਸਮਾਗਮ ਦੀ ਪ੍ਰਧਾਨਗੀ ਪੰਜਾਬੀ ਸਾਹਿਤ ਰਤਨ ਓਮ ਪ੍ਰਕਾਸ਼ ਗਾਸੋ ਨੇ ਕੀਤੀ ਅਤੇ ਡਾ. ਤਪਨ ਕੁਮਾਰ ਸਾਹੂ ਪਿ੍ਰੰਸੀਪਲ ਐਸ. ਡੀ. ਕਾਲਜ ਆਫ ਐਜੁਕੇਸ਼ਨ ਅਤੇ ਸ੍ਰੋ੍ਰਮਣੀ ਕਵਿੱਤਰੀ ਮਨਜੀਤ ਇੰਦਰਾ ਵਿਸ਼ੇਸ਼ ਮਹਿਮਾਨ ਦੇ ਤੌਰ ਤੇ ਸ਼ਾਮਲ ਹੋਏ। ਪ੍ਰਧਾਨਗੀ ਮੰਡਲ ਵਿਚ ਐਸ. ਨਸੀਮਲੂ, ਮਨਜੀਤ ਇੰਦਰਾ, ਜ਼ਿਲਾ ਭਾਸ਼ਾ ਅਫਸਰ ਸੁਖਵਿੰਦਰ ਸਿਘ ਗੁਰਮ,ਤੇਜਾ ਸਿੰਘ ਤਿਲਕ, ਹਰਬੰਸ ਸਿੰਘ ਮਾਲਵਾ ਅਤੇ ਲੇਖਕ ਪਾਠਕ ਸਾਹਿਤ ਸਭਾ ਬਰਨਾਲਾ ਦੇ ਪ੍ਰਧਾਨ ਤੇਜਿੰਦਰ ਚੰਡਿਹੋਕ ਸੁਸ਼ੋਭਿਤ ਸਨ। ਇਸ ਸਮਾਗਮ ਵਿਚ ਕਵਿੱਤਰੀ ਅਤੇ ਅਧਿਆਪਕਾ ਅੰਜਨਾ ਮੈਨਨ ਦੁਆਰਾ ਸੰਪਾਦਿਤ ਅਧਿਆਪਕਾਂ ਦਾ ਸਾਂਝਾ ਕਾਵਿ ਸੰਗ੍ਰਹਿ ‘ਪੈੜਾਂ ਦੇ ਪੈਂਡੇ’ ਮਨਜੀਤ ਇੰਦਰਾ ਅਤੇ ਪ੍ਰਧਾਨਗੀ ਮੰਡਲ ਵਲੋਂ ਲੋਕ ਅਰਪਣ ਕੀਤਾ ਗਿਆ। ਪੁਸਤਕ ਦੇ ਮੁੱਖ ਬੁਲਾਰਿਆਂ ਵਿਚ ਹਰਬੰਸ ਸਿੰਘ ਮਾਲਵਾਲੂ, ਤੇਜਾ ਸਿੰਘ ਤਿਲਕ ਅਤੇ ਤੇਜਿੰਦਰ ਚੰਡਿਹੋਕ ਵਲੋਂ ਪੁਸਤਕ ਵਿਚ ਸ਼ਾਮਲ ਕਵੀ ਅਧਿਆਪਕਾਂ ਦੀਆਂ ਰਚਨਾਵਾਂਲੂ ਉਹਨਾਂ ਦੀ ਲਿਖਣ ਸ਼ੈਲੀਲੂ ਵਿਸ਼ੇ ਬਾਰੇ ਵਿਚਾਰ ਪੇਸ਼ ਕੀਤੇ। ਓਮ ਪ੍ਰਕਾਸ਼ ਗਾਸੋ ਨੇ ਪ੍ਰਧਾਨਗੀ ਭਾਸ਼ਨ ਵਿਚ ਆਖਿਆ ਕਿ ਸਾਡੇ ਪਾਸ ਵਿਸ਼ਾਲ ਸ਼ਬਦ ਭੰਡਾਰ ਹੈ ਪ੍ਰੰਤੂ ਇਸ ਨੂੰ ਅਰਥ ਭਰਪੂਰ ਢੱੁਕਵੀਂ ਤਰਤੀਬ ਦੇ ਕੇ ਇਕ ਅਰਥ ਭਰਪੂਰ ਰਚਨਾ ਬਣਾਉਣਾ ਵਿਰਲੇ ਦੇ ਹਿੱਸੇ ਆਉਂਦਾ ਹੈ। ਉਹਨਾਂ ਇਹ ਵੀ ਆਖਿਆ ਕਿ ਜ਼ਿਲ੍ਹਾ ਬਰਨਾਲਾ ਨੂੰ ਪਹਿਲਾਂ ਹੀ ਲਿਖਾਰੀਆਂ ਅਤੇ ਸਾਹਿਤਕਾਰਾਂ ਦਾ ਮੱਕਾ ਮੰਨਿਆ ਜਾਂਦਾ ਹੈ ਪੰਤੂ ਸਿਰਜਣਾ ਅਤੇ ਸੰਵਾਦ ਸਾਹਿਤ ਸਭਾ ਬਰਨਾਲਾ ਵਲੋਂ ਅਧਿਆਪਨ ਦੇ ਕਿੱਤੇ ਦੇ ਨਾਲ ਨਾਲ ਸਮਾਜਿਕ ਸੁਧਾਰਾਂ ਦੇ ਅਮਲਾਂ ਦੀ ਬਾਤ ਪਾਉਂਦੀਆਂ ਖ਼ੂਬਸੂਰਤ ਖਿਆਲ ਲਿਖਣ ਦਾ ਵਿਸ਼ੇਸ਼ ਉਪਰਾਲਾ ਕੀਤਾ ਹੈ। ਤੇਜਿੰਦਰ ਚੰਡਿਹੋਕ ਨੇ ਪਰਚਾ ਪੜਦਿਆਂ ਕਿਹਾ ਕਿ ਪ੍ਰਸੰਸਾ ਨੂੰ ਕਿਸੇ ਦੀ ਸ਼ੋਭਾ ਵਧਾਉਣ ਦਾ ਆਧਾਰ ਮੰਨਿਆ ਜਾਂਦਾ ਹੈ ਜਦ ਕਿ ਅਜਿਹਾ ਨਹੀਂ ਬਲਕਿ ਇਹ ਜਿੰਮੇਵਾਰੀਆਂ ਨਿਭਾਉਣ ਦਾ ਵਿਸ਼ੇਸ਼ ਧਰਾਤਲ ਹੈ। ਸਮਾਗਮ ਦੇ ਦੂਜੇ ਦੌਰ ਵਿੱਚ ਹਾਜ਼ਰ ਕਵੀਆਂ ਅਤੇ ਪੁਸਤਕ ਵਿਚਲੇ ਕਵੀਆਂ ਨੇ ਆਪਣੀਆਂ ਕਵਿਤਾਵਾਂ ਦਾ ਗਾਇਨ ਕੀਤਾ। ਮੰਚ ਸੰਚਾਲਨ ਗ਼ਜ਼ਲਗੋ ਗੁਰਪਾਲ ਸਿੰਘ ਬਿਲਾਵਲ ਨੇ ਬਾਖ਼ੂਬੀ ਨਿਭਾਇਆ।
