ਬਰਨਾਲਾ 22 ਨਵੰਬਰ ( ਨਿਰਮਲ ਸਿੰਘ ਪੰਡੋਰੀ)-
ਆਂਗਨਵਾੜੀ ਵਰਕਰਾਂ ਨੇ ਆਟਾ-ਦਾਲ ਸਕੀਮ ਦੇ ਸਮਾਰਟ ਕਾਰਡਾਂ ਦੀ ਜਾਂਚ ਪੜਤਾਲ ਦਾ ਕੰਮ ਵਰਕਰਾਂ ਤੋਂ ਕਰਵਾਉਣ ਦੇ ਖਿਲਾਫ਼ ਝੰਡਾ ਚੁੱਕ ਲਿਆ ਹੈ। ਸਮਾਰਟ ਕਾਰਡਾਂ ਦੀ ਪੜਤਾਲ ਦਾ ਕੰਮ ਆਂਗਨਵਾੜੀ ਵਰਕਰਾਂ ਤੋਂ ਨਾ ਕਰਵਾਏ ਜਾਣ ਸਬੰਧੀ ਇਕ ਮੰਗ ਪੱਤਰ ਆਂਗਨਵਾੜੀ ਮੁਲਾਜ਼ਮ ਯੂਨੀਅਨ (ਸੀਟੂ) ਦੇ ਜ਼ਿਲ੍ਹਾ ਪ੍ਰਧਾਨ ਬਲਰਾਜ ਕੌਰ ਦੀ ਅਗਵਾਈ ਹੇਠ ਡਿਪਟੀ ਕਮਿਸ਼ਨਰ ਨੂੰ ਦਿੱਤਾ। ਗੱਲਬਾਤ ਕਰਦੇ ਹੋਏ ਯੂਨੀਅਨ ਦੇ ਜ਼ਿਲ੍ਹਾ ਸਕੱਤਰ ਰੁਪਿੰਦਰ ਬਾਵਾ ਨੇ ਕਿਹਾ ਕਿ ਆਟਾ-ਦਾਲ ਸਕੀਮ ਦੇ ਕਾਰਡਾਂ ਦੀ ਪੜਤਾਲ ਦਾ ਕੰਮ ਵਰਕਰਾਂ ਤੋਂ ਕਰਵਾਈ ਜਾਣਾ ਗ਼ਲਤ ਹੈ। ਉਨ੍ਹਾਂ ਕਿਹਾ ਕਿ ਪੈਨਸ਼ਨਾਂ ਦੀ ਪੜਤਾਲ ਸਮੇਂ ਲੋਕਾਂ ਨੇ ਪਿੰਡਾਂ ਵਿੱਚ ਆਂਗਣਵਾੜੀ ਵਰਕਰਾਂ ਨਾਲ ਦੁਰਵਿਹਾਰ ਕੀਤਾ ਕਿਉਂਕਿ ਲੋਕ ਪੈਨਸ਼ਨ ਕੱਟੇ ਜਾਣ ਦਾ ਦੋਸ਼ ਆਂਗਣਵਾੜੀ ਵਰਕਰਾਂ ‘ਤੇ ਲਗਾਉਂਦੇ ਹਨ। ਉਹਨਾਂ ਕਿਹਾ ਕਿ ਜਦ ਕਾਰਡ ਬਣਾਉਣ ‘ਤੇ ਆਂਗਣਵਾੜੀ ਵਰਕਰਾਂ ਦੀ ਡਿਊਟੀ ਨਹੀਂ ਸੀ ਤਾਂ ਕਾਰਡ ਕੱਟੇ ਜਾਣ ‘ਤੇ ਵੀ ਨਹੀਂ ਲਗਾਉਣੀ ਚਾਹੀਦੀ। ਯੂਨੀਅਨ ਵੱਲੋਂ ਇਸ ਸਬੰਧੀ ਐਸਡੀਐਮ ਬਰਨਾਲਾ ਜ਼ਿਲਾ ਪ੍ਰੋਗਰਾਮ ਅਫਸਰ ਬਰਨਾਲਾ ਅਤੇ ਸੀਡੀਪੀਓ ਬਰਨਾਲਾ ਨੂੰ ਵੀ ਵੱਖਰੇ ਤੌਰ ‘ਤੇ ਮੰਗ ਪੱਤਰ ਦਿੱਤੇ ਗਏ। ਇਸ ਮੌਕੇ ਬਲਜੀਤ ਕੌਰ ਸੇਖਾ, ਕਰਮਜੀਤ ਕੌਰ ਭੱਦਲਵਡ, ਰੂਹੀ ਬਾਂਸਲ, ਪ੍ਰਭਜੋਤ ਕੌਰ ਬਰਨਾਲਾ, ਪਰਮਜੀਤ ਕੌਰ ਬਰਨਾਲਾ, ਕਰਮਜੀਤ ਕੌਰ ਬਰਨਾਲਾ, ਸੁਖਪਾਲ ਕੌਰ ਬਰਨਾਲਾ, ਅੰਗਰੇਜ਼ ਕੌਰ ਚੀਮਾ ਅਤੇ ਬੀਰਪਾਲ ਕੌਰ ਚੀਮਾ ਵੀ ਹਾਜ਼ਰ ਸਨ।
