ਸ਼ਹਿਰ ਦੀ ਤਾਂ ਗੱਲ ਛੱਡੋ, ਇੱਥੇ ਤਾਂ ਪੁਲਿਸ ਥਾਣੇ ਸਾਹਮਣੇ ਹੀ ਜਾਮ ਲੱਗ ਜਾਂਦੈਂ….!
ਬਰਨਾਲਾ 11 ਦਸਬੰਰ (ਨਿਰਮਲ ਸਿੰਘ ਪੰਡੋਰੀ)-
ਬਰਨਾਲਾ ਵਿੱਚ ਟਰੈਫਿਕ ਦੀ ਸਮੱਸਿਆ ਨੇ ਲੋਕਾਂ ਦੇ ਨੱਕ ‘ਚ ਦਮ ਕੀਤਾ ਹੋਇਆ ਹੈ । ਸ਼ਹਿਰ ਦੇ ਕੁਝ ਅਜਿਹੇ ਏਰੀਏ ਹਨ ਜਿੱਥੇ ਮਿੰਟਾਂ- ਸਕਿੰਟਾਂ ਵਿੱਚ ਜਾਮ ਲੱਗ ਜਾਂਦਾ ਹੈ । ਟਰੈਫਿਕ ਪੁਲਿਸ ਆਪਣੇ ਪੱਧਰ ‘ਤੇ ਟ੍ਰੈਫਿਕ ਦੇ ਪ੍ਰਬੰਧਾਂ ਨੂੰ ਸੁਚਾਰੂ ਰੂਪ ਨਾਲ ਚਾਲੂ ਰੱਖਣ ਲਈ ਯਤਨਸ਼ੀਲ ਹੈ ਪ੍ਰੰਤੂ ਇਸਦੇ ਬਾਵਜੂਦ ਵੀ ਬਰਨਾਲਾ ਵਿਖੇ ਟਰੈਫਿਕ ਦੀ ਸਮੱਸਿਆ ਜਿਉਂ-ਦੀ-ਤਿਉਂ ਬਣੀ ਹੋਈ ਹੈ । ਪ੍ਰੈਸ ਕਾਨਫਰੰਸ ਦੌਰਾਨ ਕਈ ਵਾਰ ਕੁਝ ਪੱਤਰਕਾਰਾਂ ਨੇ ਜ਼ਿਲ੍ਹਾ ਪੁਲੀਸ ਮੁੱਖੀ ਨਾਲ ਵੀ ਟਰੈਫਿਕ ਦੀ ਸਮੱਸਿਆ ਸਾਂਝੀ ਕੀਤੀ ਹੈ, ਅਕਸਰ ਜ਼ਿਲ੍ਹਾ ਪੁਲੀਸ ਮੁਖੀ ਵੱਲੋਂ “ਧਿਆਨ ਦਿੱਤਾ ਜਾਵੇਗਾ” ਸ਼ਬਦ ਵਰਤੇ ਜਾਂਦੇ ਹਨ ਪ੍ਰੰਤੂ “ਧਿਆਨ” ਸ਼ਬਦ ਵੀ ਸ਼ਹਿਰ ਵਿੱਚ ਲੱਗ ਰਹੇ ਲੰਮੇ ਜਾਮ ਤੋਂ ਲੋਕਾਂ ਦਾ ਛੁਟਕਾਰਾ ਨਹੀਂ ਦਿਵਾ ਸਕਿਆ। ਸ਼ਹਿਰ ਦੇ ਸਦਰ ਬਜਾਰ, ਕੱਚਾ ਕਾਲਜ ਰੋਡ, ਪੱਕਾ ਕਾਲਜ ਰੋਡ, ਸੇਖਾ ਫਾਟਕ, ਭਗਵਾਨ ਵਾਲਮੀਕ ਚੌਂਕ, ਅਗਰਸੈਨ ਚੌਂਕ ਅਤੇ ਹੋਰ ਤੰਗ ਥਾਵਾਂ ‘ਤੇ ਜਾਮ ਲੱਗਣ ਦੀ ਗੱਲ ਤਾਂ ਸਮਝ ਆਉਂਦੀ ਹੈ ਪ੍ਰੰਤੂ ਕਈ ਵਾਰ ਖੁੱਲ੍ਹੀਆਂ ਥਾਵਾਂ ਉੱਪਰ ਵੀ ਜਾਮ ਲੱਗ ਜਾਂਦੇ ਹਨ । ਅਜਿਹੀ ਇਕ ਮਿਸਾਲ ਐਤਵਾਰ ਸਵੇਰੇ 11 ਦਸੰਬਰ ਵਕਤ ਕਰੀਬ 9:30 ਵਜੇ ਥਾਣਾ ਸਿਟੀ- 2 ਦੇ ਗੇਟ ਦੇ ਬਿਲਕੁਲ ਸਾਹਮਣੇ ਵੇਖਣ ਨੂੰ ਮਿਲੀ ਜਦ ਥਾਣੇ ਦੇ ਗੇਟ ਦੇ ਬਿਲਕੁਲ ਸਾਹਮਣੇ ਹੀ ਗੇਟ ਦੇ ਦੋਵੇਂ ਪਾਸੇ ਲੰਮਾ ਜਾਮ ਲੱਗ ਗਿਆ ।
ਅਸਲ ਵਿੱਚ ਇਸ ਥਾਣੇ ਦੇ ਗੇਟ ਦੇ ਬਿਲਕੁਲ ਸਾਹਮਣੇ ਸੜਕ ਦੇ ਦੋਵੇਂ ਪਾਸੇ ਬੈਰੀਕੇਡ ਰੱਖੇ ਹੋਏ ਹਨ । ਥਾਣੇ ਦੇ ਗੇਟ ਦੇ ਬਾਹਰ ਬੈਰੀਕੇਡ ਰੱਖਣ ਦੀ ਗੱਲ ਸਮਝ ਤੋਂ ਬਾਹਰ ਹੈ, ਵੈਸੇ ਵੀ ਜਿੱਥੇ ਬੈਰੀਕੇਡ ਰੱਖੇ ਹੁੰਦੇ ਹਨ ਉੱਥੇ ਪੁਲਿਸ ਮੁਲਾਜ਼ਮ ਹਾਜ਼ਰ ਰਹਿੰਦੇ ਹਨ ਪ੍ਰੰਤੂ ਐਤਵਾਰ ਸਵੇਰੇ ਥਾਣੇ ਥਾਣਾ ਸਿਟੀ-2 ਦੇ ਗੇਟ ਦੇ ਬਾਹਰ ਬੈਰੀਕੇਡ ਕੋਲ ਕੋਈ ਮੁਲਾਜ਼ਮ ਨਾ ਹੋਣ ਕਾਰਨ ਗੇਟ ਦੇ ਦੋਵੇਂ ਪਾਸੇ ਦੂਰ-ਦੂਰ ਤੱਕ ਜਾਮ ਲੱਗ ਗਿਆ । ਜਾਮ ਵਿੱਚ ਫਸੇ ਵੱਡੇ ਵਹੀਕਲਾਂ ਦੇ ਪ੍ਰੈਸ਼ਰ ਹਾਰਨਾਂ ਤੋਂ ਬਾਅਦ ਇੱਕ ਮਹਿਲਾ ਪੁਲੀਸ ਮੁਲਾਜ਼ਮ ਥਾਣੇ ਤੋਂ ਬਾਹਰ ਆਈ ਤਾਂ ਇੱਕ ਗੱਡੀ ਦੇ ਡਰਾਈਵਰ ਨੇ ਕੁਝ ਸਮੇਂ ਲਈ ਬੈਰੀਕੇਡ ਹਟਾਉਣ ਲਈ ਕਿਹਾ ਤਾਂ ਜੋ ਜਾਮ ਖੁੱਲ੍ਹ ਜਾਵੇ ਪ੍ਰੰਤੂ ਮਹਿਲਾ ਪੁਲੀਸ ਮੁਲਾਜ਼ਮ ਨੇ ਬੈਰੀਕੇਡ ਨਹੀਂ ਹਟਾਉਣ ਦਿੱਤਾ ਅਤੇ ਕਿਹਾ ਕਿ “ਆਪਣੀ ਆਪਣੀ ਵਾਰੀ ਮੁਤਾਬਕ ਲੰਘ ਜਾਵੋ”, ਜਿਸ ਤੋਂ ਬਾਅਦ ਲੋਕਾਂ ਨੇ ਔਖੇ-ਸੌਖੇ ਹੋ ਕੇ ਬੁੜ੍ਹ-ਬੁੜ੍ਹ ਕਰਦਿਆਂ ਜਾਮ ਵਿਚੋਂ ਆਪਣੇ-ਆਪਣੇ ਵਹੀਕਲ ਕਿਸੇ ਤਰੀਕੇ ਨਾਲ ਕੱਢੇ। ਹੁਣ ਜੇਕਰ ਪੁਲਿਸ ਦੇ ਘਰ ( ਥਾਣੇ) ਦੇ ਸਾਹਮਣੇ ਹੀ ਟ੍ਰੈਫਿਕ ਦੇ ਅਜਿਹੇ ਹਾਲਾਤ ਹਨ ਤਾਂ ਸ਼ਹਿਰ ਵਿੱਚ ਬਾਕੀ ਥਾਵਾਂ ‘ਤੇ ਟ੍ਰੈਫਿਕ ਦੀ ਸਮੱਸਿਆ ਦਾ ਅੰਦਾਜ਼ਾ ਸਹਿਜੇ ਹੀ ਲਗਾਇਆ ਜਾ ਸਕਦਾ ਹੈ।
