–ਪੁਲਿਸ ਦੀਆਂ ਗੱਡੀਆਂ ਤੋਂ ਦੁੱਗਣੀ ਪਾਵਰ ਹੈ ਮਰਸੀਡੀਜ਼ ਕਾਰ ਦੀ
ਚੰਡੀਗੜ੍ਹ 21 ਮਾਰਚ ( ਜੀ98 ਨਿਊਜ਼ ਸਰਵਿਸ)-
“ਵਾਰਿਸ ਪੰਜਾਬ ਦੇ” ਜਥੇਬੰਦੀ ਦੇ ਮੁਖੀ ਅੰਮ੍ਰਿਤਪਾਲ ਸਿੰਘ ਦੀ ਮਰਸੀਡੀਜ਼ ਗੱਡੀ ਦੀ ਤਾਕਤ ਦੇ ਕਾਰਨ ਹੀ ਪੁਲਿਸ 18 ਮਾਰਚ ਸ਼ਨਿੱਚਰਵਾਰ ਨੂੰ ਅੰਮ੍ਰਿਤਪਾਲ ਸਿੰਘ ਨੂੰ ਗ੍ਰਿਫ਼ਤਾਰ ਨਹੀਂ ਕਰ ਸਕੀ । ਸੂਤਰਾਂ ਅਨੁਸਾਰ ਪੁਲੀਸ ਨੇ ਮੋਗਾ-ਜਲੰਧਰ ਨੈਸ਼ਨਲ ਹਾਈਵੇ ‘ਤੇ ਪਿੰਡ ਕਮਾਲਕੇ ਦੇ ਨੇੜੇ ਇੱਕ ਨਾਕੇ ਉਪਰ ਅੰਮ੍ਰਿਤਪਾਲ ਸਿੰਘ ਨੂੰ ਗ੍ਰਿਫ਼ਤਾਰ ਕਰਨ ਦੀ ਯੋਜਨਾ ਬਣਾਈ ਸੀ ਜਿੱਥੇ ਪੰਜਾਬ ਪੁਲਿਸ ਦੇ ਉੱਚ ਅਧਿਕਾਰੀਆਂ ਸਮੇਤ ਵੱਡੀ ਗਿਣਤੀ ਵਿਚ ਕੇਂਦਰੀ ਸੁਰੱਖਿਆ ਬਲਾਂ ਦੇ ਜਵਾਨ ਵੀ ਤਾਇਨਾਤ ਹਨ । ਅਕਸਰ ਅੰਮ੍ਰਿਤਪਾਲ ਸਿੰਘ ਆਪਣੇ ਕਾਫ਼ਲੇ ਵਿਚ ਆਪਣੀ ਗੱਡੀ ਦੂਜੇ ਨੰਬਰ ‘ਤੇ ਰੱਖਦਾ ਹੈ, ਪੁਲਿਸ ਅਧਿਕਾਰੀ ਇਸੇ ਹਿਸਾਬ ਨਾਲ ਨਾਕੇ ਉਪਰ ਅੰਮ੍ਰਿਤਪਾਲ ਦੇ ਕਾਫ਼ਲੇ ਨੂੰ ਰੋਕ ਕੇ ਪਹਿਲੀਆਂ ਦੋ ਗੱਡੀਆਂ ਦੇ ਨੇੜੇ ਹੋਏ ਪਰੰਤੂ ਓਸ ਦਿਨ ਇਤਫ਼ਾਕਨ ਅੰਮ੍ਰਿਤਪਾਲ ਸਿੰਘ ਦੀ ਗੱਡੀ ਕਾਫ਼ਲੇ ਵਿੱਚ ਤੀਜੇ ਨੰਬਰ ‘ਤੇ ਸੀ । ਮੌਕੇ ਦੀ ਨਜ਼ਾਕਤ ਨੂੰ ਵੇਖਦੇ ਹੋਏ ਅੰਮ੍ਰਿਤਪਾਲ ਸਿੰਘ ਦੇ ਡਰਾਈਵਰ ਨੇ ਤੁਰੰਤ ਫੁਰਤੀ ਨਾਲ ਗੱਡੀ ਘੁਮਾਈ ਅਤੇ ਸੜਕ ਦੀ ਗਲਤ ਸਾਈਡ ਤੋਂ ਗੱਡੀ ਤੇਜ ਭਜਾ ਦਿੱਤੀ । ਪੁਲਿਸ ਪਾਰਟੀ ਨੇ ਵੀ ਤੁਰੰਤ ਆਪਣੀਆਂ ਗੱਡੀਆਂ ਅੰਮ੍ਰਿਤਪਾਲ ਦੀ ਗੱਡੀ ਦੇ ਪਿੱਛੇ ਲਗਾ ਦਿੱਤੀਆਂ । ਪੁਲਿਸ ਦੀਆਂ ਗੱਡੀਆਂ ਨੂੰ ਨਿਕਲਣ ਵਿੱਚ ਕੁੱਝ ਮਿੰਟਾਂ ਦੀ ਦੇਰੀ ਹੋਈ ਕਿਉਂਕਿ ਅੰਮ੍ਰਿਤਪਾਲ ਸਿੰਘ ਦੇ ਕਾਫ਼ਲੇ ਦੀਆਂ ਗੱਡੀਆਂ ਸੜਕ ਦੇ ਵਿਚਕਾਰ ਸਨ, ਬੱਸ ਇੰਨੇ ਕੁ ਸਮੇਂ ਵਿੱਚ ਹੀ ਅੰਮ੍ਰਿਤਪਾਲ ਸਿੰਘ ਦੀ ਤਾਕਤਵਰ ਗੱਡੀ ਕਾਫ਼ੀ ਫਰਕ ਪਾ ਗਈ ਅਤੇ ਅੱਗੇ ਜਾ ਕੇ ਅੰਮ੍ਰਿਤਪਾਲ ਸਿੰਘ ਨੇ ਲਿੰਕ ਰੋਡ ‘ਤੇ ਗੱਡੀ ਮੋੜ ਦਿੱਤੀ । ਪੁਲਿਸ ਨੇ ਸਕਾਰਪੀਓ ਗੱਡੀਆਂ ਵਿਚ ਅੰਮ੍ਰਿਤਪਾਲ ਸਿੰਘ ਦੀ ਮਰਸੀਡੀਜ਼ ਕਾਰ ਦਾ ਪਿੱਛਾ ਕੀਤਾ ਜਿਨ੍ਹਾਂ ਦੀ ਤਾਕਤ ਅੰਮ੍ਰਿਤਪਾਲ ਸਿੰਘ ਵੱਲੋਂ ਵਰਤੀ ਜਾ ਰਹੀ ਗੱਡੀ ਦੇ ਮੁਕਾਬਲੇ ਬਹੁਤ ਘੱਟ ਹੈ । ਪੁਲਿਸ ਨੇ ਆਪਣੀਆਂ ਗੱਡੀਆਂ ‘ਤੇ ਕਈ ਕਿਲੋਮੀਟਰ ਤਕ ਅੰਮ੍ਰਿਤਪਾਲ ਦੀ ਗੱਡੀ ਦਾ ਪਿੱਛਾ ਕੀਤਾ ਪ੍ਰੰਤੂ ਉਸ ਦੀ ਗੱਡੀ ਤਾਕਤਵਰ ਹੋਣ ਦਾ ਲਾਭ ਮਿਲਿਆ।
ਅੰਮ੍ਰਿਤਪਾਲ ਸਿੰਘ ਦੀ ਗੱਡੀ ਦੀਆਂ ਵਿਸ਼ੇਸ਼ਤਾਵਾਂ
ਘਟਨਾ ਵਾਲੇ ਦਿਨ ਅੰਮ੍ਰਿਤਪਾਲ ਸਿੰਘ ਜਿਸ ਕਾਰ ਵਿੱਚ ਸਵਾਰ ਸੀ ਉਹ ਮਰਸੀਡੀਜ਼ GLS 350D ਦੱਸੀ ਜਾ ਰਹੀ ਹੈ, ਜਿਸ ਦੀ ਕੀਮਤ ਲਗਭਗ ਇੱਕ ਕਰੋੜ ਹੈ। 7 ਸੀਟਾਂ ਵਾਲੀ ਇਸ ਗੱਡੀ ਵਿਚ 2987cc ਦਾ ਡੀਜ਼ਲ ਇੰਜਣ ਹੈ। 8 ਏਅਰਬੈਗਾਂ ਵਾਲੀ ਇਹ ਆਟੋਮੈਟਿਕ ਗੱਡੀ 3400RPM ‘ਤੇ 255 BHP ਦੀ ਪਾਵਰ ਜਨਰੇਟ ਕਰਦੀ ਹੈ। ਅਮ੍ਰਿਤਪਾਲ ਸਿੰਘ ਵੱਲੋਂ ਵਰਤੀ ਜਾਂਦੀ ਗੱਡੀ ਦਾ ਡੀਜ਼ਲ ਟੈਂਕ 100 ਲੀਟਰ ਹੈ ਅਤੇ ਇਸ ਦੀ ਟੌਪ ਸਪੀਡ 222 ਕਿਲੋਮੀਟਰ ਪ੍ਰਤੀ ਘੰਟਾ ਹੈ।
-ਪੁਲਿਸ ਪਾਰਟੀ ਕੋਲ ਕਿਹੜੀਆਂ ਗੱਡੀਆਂ ਸਨ
ਦੂਜੇ ਪਾਸੇ ਪੁਲਿਸ ਪਾਰਟੀਆਂ ਮਹਿੰਦਰਾ ਦੀਆਂ ਸਕਾਰਪੀਓ ਗੱਡੀਆਂ ਵਿੱਚ ਅੰਮ੍ਰਿਤਪਾਲ ਸਿੰਘ ਦੀ ਗੱਡੀ ਦਾ ਪਿੱਛਾ ਕਰ ਰਹੀਆਂ ਸਨ ਜਿਨ੍ਹਾਂ ਦਾ ਇੰਜਣ 2184 CC ਹੈ। ਲਗਭਗ 15 ਲੱਖ ਦੀ ਕੀਮਤ ਵਾਲੀਆਂ ਇਹਨਾਂ ਸਕਾਰਪੀਓ ਗੱਡੀਆਂ ਦਾ ਪੰਜ ਮੈਨੂਅਲ ਗੇਅਰ ਸਿਸਟਮ ਦਾ ਇੰਜਣ ਜਿੰਨੀ ਪਾਵਰ ਜਨਰੇਟ ਕਰਦਾ ਹੈ ਉਹ ਅੰਮ੍ਰਿਤਪਾਲ ਸਿੰਘ ਵੱਲੋਂ ਵਰਤੀ ਜਾਂਦੀ ਗੱਡੀ ਦੇ ਮੁਕਾਬਲੇ ‘ਚ ਅੱਧੀ ਹੈ।
ਅੰਮ੍ਰਿਤਪਾਲ ਸਿੰਘ ਵੱਲੋਂ ਵਰਤੀ ਜਾਂਦੀ ਇਹ ਮਰਸੀਡੀਜ਼ ਕਾਰ ਦੀ ਕੁਝ ਸਮਾਂ ਪਹਿਲਾਂ ਜਦ ਚਰਚਾ ਹੋਈ ਤਾਂ ਅੰਮ੍ਰਿਤਪਾਲ ਸਿੰਘ ਨੇ ਕਿਹਾ ਸੀ ਕਿ ਉਸ ਦੇ ਇਕ ਸਮਰਥਕ ਨੇ ਇਹ ਮਰਸੀਡੀਜ਼ ਕਾਰ ਹਰਿਆਣਾ ਦੇ ਇਕ ਵਪਾਰੀ ਤੋਂ (ਸੈਕਿੰਡ ਹੈਂਡ) ਖਰੀਦ ਕੇ ਦਿੱਤੀ ਹੈ। ਦੂਜੇ ਪਾਸੇ ਪੁਲਿਸ ਦਾ ਕਹਿਣਾ ਹੈ ਕਿ ਇਸ ਗੱਡੀ ਦੇ ਕਾਗਜ਼ਾਤ ਅਜੇ ਟਰਾਂਸਫਰ ਨਹੀਂ ਹੋਏ। ਸੂਤਰਾਂ ਅਨੁਸਾਰ ਹਰਿਆਣਾ ਦੇ ਵਪਾਰੀ ਤੋਂ ਅੰਮ੍ਰਿਤਪਾਲ ਸਿੰਘ ਨੂੰ ਗੱਡੀ ਖਰੀਦ ਕੇ ਦੇਣ ਵਾਲਾ ਵੀ ਨਸ਼ਾ ਤਸਕਰੀ ਦੇ ਮਾਮਲੇ ‘ਚ ਗ੍ਰਿਫ਼ਤਾਰ ਹੋ ਚੁੱਕਾ ਹੈ।
