ਬਰਨਾਲਾ 27 ਮਾਰਚ (ਸੋਨੀ ਧਨੌਲਾ)-
ਪਿਛਲੇ ਦਿਨੀਂ ਲਗਾਤਾਰ ਹੋਈ ਬੇਮੌਸਮੀ ਬਰਸਾਤ ਨਾਲ ਜਿ਼ਲ੍ਹਾ ਬਰਨਾਲਾ ਅੰਦਰ ਨੁਕਸਾਨੀਆਂ ਗਈਆਂ ਫ਼ਸਲਾਂ ਦੇ ਮੁਆਵਜ਼ੇ ਸਬੰਧੀ ਭਾਰਤੀ ਕਿਸਾਨ ਯੂਨੀਅਨ ਕਾਦੀਆਂ ਦੇ ਜ਼ਿਲ੍ਹਾ ਪ੍ਰਧਾਨ ਜਗਸੀਰ ਸਿੰਘ ਸੀਰਾ ਛੀਨੀਵਾਲ ਦੀ ਅਗਵਾਈ ਹੇਠ ਡਿਪਟੀ ਕਮਿਸ਼ਨਰ ਪੂਨਮਦੀਪ ਕੌਰ ਨੂੰ ਮੰਗ ਪੱਤਰ ਸੌਂਪਿਆ ਗਿਆ। ਇਸ ਮੌਕੇ ਕਿਸਾਨ ਆਗੂਆਂ ਜਿ਼ਲ੍ਹਾ ਮੀਤ ਪ੍ਰਧਾਨ ਊਦੈ ਸਿੰਘ ਹਮੀਦੀ, ਬਲਾਕ ਸੀਨੀਅਰ ਮੀਤ ਪ੍ਰਧਾਨ ਰਣਧੀਰ ਸਿੰਘ ਸੇਖਾ, ਜ਼ਿਲ੍ਹਾ ਆਗੂ ਬਲਦੇਵ ਸਿੰਘ ਬਿੱਟੂ ਝਲੂਰ ਆਦਿ ਨੇ ਕਿਹਾ ਕਿ ਪੰਜਾਬ ‘ਚ ਇੱਕ ਵਾਰ ਫਿ਼ਰ ਬੇਮੌਸਮੀ ਬਰਸਾਤ, ਹਨ੍ਹੇਰੀ, ਝੱਖੜ, ਗੜੇਮਾਰੀ ਨੇ ਕਿਸਾਨਾਂ ਦੀ ਪੱਕੀ ਫ਼ਸਲ,ਕਣਕ, ਸਰ੍ਹੋ ਤੇ ਸਬਜੀਆਂ ਆਦਿ ‘ਤੇ ਕਹਿਰ ਢਾਹ ਦਿੱਤਾ ਹੈ। ਜਿਸ ਕਾਰਨ ਅਨੁਮਾਨ ਲਗਭਗ 4 ਲੱਖ ਏਕੜ ਤੋਂ ਵੱਧ ਰਕਬੇ ਵਿੱਚ ਕਣਕ ਦੀ ਫ਼ਸਲ ਤਬਾਹ ਹੋ ਚੁੱਕੀ ਹੈ ਤੇ ਕੁੱਝ ਖ਼ਰਾਬ ਹੋ ਚੁੱਕੀ ਹੈ।ਇਸ ਨਾਲ ਬਿਨ੍ਹਾਂ ਸ਼ੱਕ ਕਣਕ ਦਾ ਝਾੜ ਵੀ ਘਟੇਗਾ ਤੇ ਕਣਕ ਦਾ ਉਤਪਾਦਨ ਵੀ ਘੱਟ ਹੋਵੇਗਾ, ਕਈ ਥਾਵਾਂ ਤੇ ਇਸ ਆਫ਼ਤ ਕਾਰਨ ਪੂਰੀ ਕਣਕ ਤਾਂ ਖ਼ਰਾਬ ਨਹੀਂ ਹੋਈ ਪਰ ਬੇਮੌਸਮੀ ਹਨ੍ਹੇਰੀ ਤੇ ਝੱਖੜ ਕਾਰਨ ਕਣਕ ਧਰਤੀ ਉੱਪਰ ਵਿਛ ਗਈ ਹੈ। ਜਿਸ ਕਾਰਨ ਕਣਕ ਦੀ ਕਟਾਈ ‘ਚ ਮੁਸ਼ਕਿਲ ਪੇਸ਼ ਆਵੇਗੀ ਤੇ ਇਸ ਤੋਂ ਪ੍ਰਾਪਤ ਹੋਣ ਵਾਲਾ ਝਾੜ ਵੀ ਘੱਟ ਨਿੱਕਲੇਗਾ, ਪੱਕੀ ਹੋਈ ਕਣਕ ਦੋ ਹੇਠਾਂ ਵਿਛ ਗਈ ਹੈ ਤੇ ਉਹ ਮਿੱਟੀ ਤੇ ਪਾਣੀ ਨਾਲ ਭਿੱਜਣ ਕਾਰਨ ਕਣਕ ਦਾ ਦਾਣਾ ਖ਼ਰਾਬ/ਕਾਲਾ ਵੀ ਪੈ ਸਕਦਾ ਹੈ। ਆਗੂਆਂ ਕਿਹਾ ਕਿ ਕਿਸਾਨਾਂ ਦੀ ਫ਼ਸਲ ਦੇ ਹੋਏ ਨੁਕਸਾਨ ਦੀ ਪੂਰਤੀ ਲਈ ਕਿਸਾਨਾਂ ਦੀ ਮੰਗ ਅਨੁਸਾਰ ਸਰਕਾਰ ਤੁਰੰਤ ਗਿਰਦਾਵਰੀ ਕਰਕੇ ਸਮਾਂਬੱਧ 10 ਦਿਨਾਂ ਅੰਦਰ ਪ੍ਰਤੀ ਏਕੜ 50 ਹਜ਼ਾਰ ਬਣਦਾ ਮੁਆਵਜ਼ਾ ਕਿਸਾਨਾਂ ਨੂੰ ਦਿੱਤਾ ਜਾਵੇ ਤਾਂ ਜੋ ਆਰਥਿਕ ਤੰਗੀ ਤੇ ਮੌਸਮ ਕਾਰਨ ਪਈ ਮੁਸੀਬਤ ਕਾਰਨ ਕਿਸਾਨਾਂ ਦੀ ਆਰਥਿਕ ਸਹਾਇਤਾ ਹੋ ਸਕੇ।ਆਗੂਆਂ ਚਿਤਾਵਨੀ ਦਿੰਦਿਆਂ ਕਿਹਾ ਕਿ ਜੇਕਰ ਉਨ੍ਹਾਂ ਦੀ ਸਮੱਸਿਆ ਦਾ ਹੱਲ ਜਲਦ ਨਾ ਹੋਇਆ ਤਾਂ ਸੰਘਰਸ਼ ਨੂੰ ਹੋਰ ਤੇਜ਼ ਕੀਤਾ ਜਾਵੇਗਾ। ਇਸ ਮੌਕੇ ਚੇਅਰਮੈਨ ਯਾਦਵਿੰਦਰ ਸਿੰਘ ਰਾਜਗੜ੍ਹ, ਬਲਾਕ ਪ੍ਰਘਾਨ ਸ਼ਹਿਣਾ ਜ਼ਸਵੀਰ ਸਿੰਘ ਸੁਖਪੁਰਾ ਮੌੜ, ਬਲਾਕ ਪ੍ਰਘਾਨ ਮਹਿਲ ਕਲਾਂ ਗੁਰਧਿਆਨ ਸਿੰਘ ਸਹਿਜੜਾ, ਕੁਲਦੀਪ ਸਿੰਘ ਹਮੀਦੀ, ਬੇਅੰਤ ਸਿੰਘ ਸੁਖਪੁਰਾ, ਅਮਰੀਕ ਸਿੰਘ ਰਾਜਗੜ੍ਹ ਆਦ ਵੀ ਹਾਜ਼ਰ ਸਨ।
Menu
