ਬਰਨਾਲਾ 31 ਮਾਰਚ (ਜੀ98 ਨਿਊਜ਼ ਸਰਵਿਸ)-
ਸਿਰਸਾ ਦੇ ਵਰਨਾਲਾ ਰੋਡ ‘ਤੇ ਦੋ ਕਾਰਾਂ ਦੀ ਹੋਈ ਆਪਸੀ ਟੱਕਰ ਕਾਰਨ ਵਾਪਰੇ ਸੜਕ ਹਾਦਸੇ ਵਿੱਚ 2 ਬੱਚਿਆਂ ਸਮੇਤ 5 ਵਿਅਕਤੀਆਂ ਦੀ ਮੌਤ ਹੋ ਜਾਣ ਦੀ ਦੁਖਦ ਖਬਰ ਮਿਲੀ ਹੈ । ਮ੍ਰਿਤਕ ਸਰਦੂਲਗੜ ਨਾਲ ਸੰਬੰਧਿਤ ਸਨ, ਜਿਨਾਂ ਵਿੱਚ ਇੱਕੋ ਪਰਿਵਾਰ ਦੇ 4 ਮੈਂਬਰ ਸਨ । ਮਿਲੀ ਜਾਣਕਾਰੀ ਅਨੁਸਾਰ ਹਰਿਆਣਾ ਨੰਬਰ ਦੀ ਸਕੋਡਾ ਕਾਰ ਜੋ ਕਿ ਸਰਦੂਲਗੜ੍ਹ ਤੋਂ ਸਿਰਸਾ ਆ ਰਹੀ ਸੀ ਅਤੇ ਆਲਟੋ ਕਾਰ ਸਿਰਸਾ ਤੋਂ ਸਰਦੂਲਗੜ੍ਹ ਨੂੰ ਜਾ ਰਹੀ ਸੀ। ਦੋਵਾਂ ਕਾਰਾਂ ਦੀ ਆਪਸੀ ਭਿਆਨਕ ਟੱਕਰ ਹੋ ਗਈ। ਦੋਵਾਂ ਗੱਡੀਆਂ ਵਿੱਚ 8 ਵਿਅਕਤੀ ਸਵਾਰ ਸਨ, ਜਿਨ੍ਹਾਂ ਵਿੱਚੋਂ 5 ਦੀ ਮੌਤ ਹੋ ਗਈ। ਮ੍ਰਿਤਕ ਦੀ ਪਹਿਚਾਣ ਵਾਰਡ ਨੰਬਰ 6 ਸਰਦੂਲਗੜ੍ਹ ਦੇ ਰਹਿਣ ਵਾਲੇ ਗੁਰਤੇਜ ਸਿੰਘ ਉਮਰ 35 ਸਾਲ, ਪਰਮਜੀਤ ਕੌਰ ਉਮਰ 35 ਸਾਲ ਪਤਨੀ ਗੁਰਤੇਜ ਸਿੰਘ, 6 ਸਾਲਾ ਗੁਣਾਂ, 6 ਮਹੀਨੇ ਦਾ ਸੁਖਤਾਜ ਵਜੋਂ ਹੋਈ ਹੈ। ਇਕ ਮ੍ਰਿਤਕ ਦੀ ਪਹਿਚਾਣ ਨਿਊ ਹਾਊਸਿੰਗ ਬੋਰਡ ਕਲੋਨੀ ਸਿਰਸਾ ਦੇ 20 ਸਾਲਾ ਰਾਹੁਲ ਵਜੋਂ ਹੋਈ ਹੈ। ਇਸ ਹਾਦਸੇ ਵਿੱਚ 3 ਵਿਅਕਤੀ ਗੰਭੀਰ ਜ਼ਖਮੀ ਹਨ, ਜੋ ਵੱਖ-ਵੱਖ ਹਸਪਤਾਲਾਂ ਵਿੱਚ ਦਾਖਲ ਹਨ ।
