ਜਲੰਧਰ : ਵੱਡੇ ਸ਼ਹਿਰਾਂ ਵਿੱਚ ਖੁੱਲ੍ਹੇ ਅਤਿ ਆਧੁਨਿਕ ਮਸਾਜ ਕੇਂਦਰਾਂ ਵਿੱਚ ਦਿਖਾਵੇ ਦੇ ਤੌਰ ‘ਤੇ ਭਾਵੇਂ ਗ੍ਰਾਹਕਾਂ ਨੂੰ ਮਸਾਜ ਕਰਵਾਉਣ ਲਈ ਬੁਲਾਇਆ ਜਾਂਦਾ ਹੈ ਪ੍ਰੰਤੂ ਇਹਨਾਂ ਵਿੱਚੋ ਬਹੁਤੇ ਮਸਾਜ ਕੇਂਦਰਾਂ ਵਿੱਚ ਚਕਾਚੌਂਧ ਦੇ ਹਨੇਰੇ ਵਿੱਚ ਜਿਸਮਫਰੋਸ਼ੀ ਦੀ ਖਿਚੜੀ ਖ਼ੂਬ ਪੱਕ ਰਹੀ ਹੈ ਜਿਸ ਦਾ ਖ਼ੁਲਾਸਾ ਜਲੰਧਰ ਦੇ ਰਹਿਣ ਵਾਲੀ ਇਕ ਕੁੜੀ ਨੇ ਪੁਲਿਸ ਕੋਲ ਕੀਤਾ । ਸ਼ਹਿਰ ਦੇ ਚੁਨਚੁਨ ਮਾਲ ਦੇ ਗਰਾਂਊਂਡ ਫਲੋਰ ‘ਤੇ ਖੁੱਲ੍ਹੇ ਇਕ ਮਸਾਜ ਕੇਂਦਰ ਵਿਚ ਕੰਮ ਕਰਨ ਵਾਲੀ ਲੜਕੀ ਨੇ ਪੁਲਸ ਨੂੰ ਸ਼ਿਕਾਇਤ ਦਿੱਤੀ ਹੈ ਉਸ ਨੂੰ ਕੇਂਦਰ ਦੀ ਮਾਲਕਣ ਨੇ ਇੱਕ ਗ੍ਰਾਹਕ ਨਾਲ ਜ਼ਬਰਦਸਤੀ ਸਰੀਰਕ ਸੰਬੰਧ ਬਣਾਉਣ ਲਈ ਮਜ਼ਬੂਰ ਕੀਤਾ ਅਤੇ ਇਸ ਦੌਰਾਨ ਮਾਲਕਣ ਨੇ ਉਸ ਦੀ ਅਸ਼ਲੀਲ ਵੀਡੀਓ ਵੀ ਬਣਾ ਲਈ ਜੋ ਹੁਣ ਉਸ ਨੂੰ ਬਲੈਕਮੇਲ ਕਰ ਰਹੀ ਹੈ । ਲੜਕੀ ਦੀ ਸ਼ਿਕਾਇਤ ਤੋਂ ਬਾਅਦ ਥਾਣਾ ਨੰਬਰ 6 ਦੀ ਪੁਲਿਸ ਨੇ ਪੂਰੀ ਤਿਆਰੀ ਨਾਲ ਮਸਾਜ ਕੇਂਦਰ ‘ਤੇ ਰੇਡ ਕੀਤੀ। ਮਸਾਜ ਕੇਂਦਰ ਦੇ ਬਾਹਰ ਪੁਲਿਸ ਪਾਰਟੀ ਪਹੁੰਚਣ ਦੀ ਭਿਣਕ ਲੱਗਣ ‘ਤੇ ਕੇਂਦਰ ਦੀ ਮਾਲਕਣ ਅਤੇ ਉੱਥੇ ਕੰਮ ਕਰਨ ਵਾਲੀਆਂ ਉਸਦੀਆਂ ਹਮਮਸ਼ਵਰਾ ਹੋਰ ਕੁੜੀਆਂ ਚੋਰ ਦਰਵਾਜ਼ੇ ਰਾਹੀਂ ਭੱਜ ਨਿਕਲੀਆਂ ਜਿਨ੍ਹਾਂ ਨੂੰ ਪੁਲਿਸ ਪਾਰਟੀ ਨੇ ਸੜਕ ‘ਤੇ ਪਿੱਛਾ ਕਰਦਿਆਂ ਦਬੋਚਿਆ ਅਤੇ ਵਾਪਸ ਮਸਾਜ ਕੇਂਦਰ ਵਿੱਚ ਲਿਆਂਦਾ । ਪੁਲਿਸ ਨੇ ਮੌਕੇ ਤੋਂ 6 ਨੌਜਵਾਨ ਕੁੜੀਆਂ ਅਤੇ ਤਿੰਨ ਮੁੰਡਿਆਂ ਨੂੰ ਹਿਰਾਸਤ ਵਿੱਚ ਲੈ ਕੇ ਅਗਲੀ ਕਾਰਵਾਈ ਸ਼ੁਰੂ ਕੀਤੀ ।
