ਚੰਡੀਗੜ੍ਹ,12 ਜੂਨ-ਪੰਜਾਬ ਦੇ ਮੁੱਖ ਮੰਤਰੀਆਂ/ਮੰਤਰੀਆਂ ਦੇ ਪ੍ਰਹੁਣਚਾਰੀ ਦੇ ਖਰਚੇ ਅਕਸਰ ਚਰਚਾ ਵਿੱਚ ਰਹਿੰਦੇ ਹਨ । ਸੂਚਨਾ ਅਧਿਕਾਰ ਐਕਟ ਅਧੀਨ ਸਾਹਮਣੇ ਆਏ ਮੁੱਖ ਮੰਤਰੀ/ਮੰਤਰੀਆਂ ਦੇ ਚਾਹ-ਪਾਣੀ ਅਤੇ ਪਕੌੜਿਆਂ ਦੇ ਖਰਚੇ ਆਮ ਆਦਮੀ ਨੂੰ ਸੋਚਣ ਲਈ ਮਜਬੂਰ ਕਰਦੇ ਹਨ ਕਿ ਅਕਸਰ ਇਹ “ਚਾਹ” ਕਿਸ ਤਰ੍ਹਾਂ ਬਣਦੀ ਹੋਵੇਗੀ ਅਤੇ ਇਨ੍ਹਾਂ “ਪਕੌੜਿਆਂ” ਵਿੱਚ ਅਜਿਹਾ ਕੀ ਹੋਵੇਗਾ, ਜੋ ਐਨੇ ਮਹਿੰਗੇ ਹੁੰਦੇ ਹਨ । ਆਰਟੀਆਈ ਦੀ ਤਾਜ਼ਾ ਜਾਣਕਾਰੀ ਮੁਤਾਬਕ ਮੁੱਖ ਮੰਤਰੀ ਭਗਵੰਤ ਮਾਨ ਦੇ ਦਫ਼ਤਰ ਦੇ 14 ਮਹੀਨਿਆਂ ਦਾ ਚਾਹ ਅਤੇ ਪਕੌੜਿਆਂ ਦਾ ਖਰਚਾ 31 ਲੱਖ ਤੋਂ ਵੱਧ ਹੋਇਆ ਹੈ । ਇਹ ਸਿਰਫ ਮੁੱਖ ਮੰਤਰੀ ਦਫ਼ਤਰ ਦਾ ਖਰਚਾ ਹੈ, ਜਦਕਿ ਮੁੱਖ ਮੰਤਰੀ ਦੀ ਰਿਹਾਇਸ਼ ‘ਤੇ ਚਾਹ-ਪਕੌੜਿਆਂ ਦਾ ਖਰਚਾ 25 ਲੱਖ ਦੇ ਕਰੀਬ ਬਣਦਾ ਹੈ । ਇਹ ਆਰਟੀਆਈ ਗੁਰਜੀਤ ਸਿੰਘ ਗੋਪਾਲਪੂਰੀ ਵਾਸੀ ਪਟਿਆਲਾ ਨੇ ਪ੍ਰਾਪਤ ਕੀਤੀ ਹੈ । ਕੁਝ ਸਮਾਂ ਪਹਿਲਾਂ ਸਾਬਕਾ ਮੁੱਖ ਮੰਤਰੀ ਚਰਨਜੀਤ ਸਿੰਘ ਚੰਨੀ ਦੇ ਕਾਰਜਕਾਲ ਦੌਰਾਨ ਪਰੌਂਠਿਆਂ ਅਤੇ ਹੋਰ ਖਾਣੇ ਦਾ ਖਰਚਾ ਭਗਵੰਤ ਮਾਨ ਸਰਕਾਰ ਨੇ ਸਾਹਮਣੇ ਲਿਆਂਦਾ ਸੀ ਜਿਸ ਉਪਰ ਮਾਨ ਸਰਕਾਰ ਦੇ ਮੰਤਰੀਆਂ ਅਤੇ ਵਿਧਾਇਕਾਂ ਨੇ ਖ਼ੂਬ ਚਟਖਾਰੇ ਲਾਏ ਸਨ ਪ੍ਰੰਤੂ ਹੁਣ ਮੁੱਖ ਮੰਤਰੀ ਦੇ ਦਫ਼ਤਰ ਅਤੇ ਰਿਹਾਇਸ਼ ‘ਤੇ ਚਾਹ-ਪਕੌੜਿਆਂ ਦੇ ਖਰਚੇ ਸਬੰਧੀ ਕਿਸੇ ਮੰਤਰੀ ਦੀ ਕੋਈ ਟਿੱਪਣੀ ਨਹੀਂ ਆਈ । ਇਸ ਤੋਂ ਪਹਿਲਾਂ ਬਾਦਲ ਅਤੇ ਕੈਪਟਨ ਸਰਕਾਰ ਮੌਕੇ ਵੀ ਅਜਿਹੇ ਖਰਚਿਆਂ ਉਪਰ ਉਂਗਲ ਉੱਠਦੀ ਰਹੀ ਹੈ ਪ੍ਰੰਤੂ “ਆਮ ਆਦਮੀ” ਦੀ ਸਰਕਾਰ ਵਿੱਚ ਵੀ ਇਸ ਮਾਮਲੇ ‘ਚ ਕੋਈ ਬਦਲਾਅ ਨਜ਼ਰ ਨਹੀਂ ਆ ਰਿਹਾ । ਆਰਟੀਆਈ ਐਕਟੀਵਿਸਟ ਗੁਰਜੀਤ ਸਿੰਘ ਨੇ ਮਾਰਚ 2022 ਤੋਂ ਲੈ ਕੇ ਅਪ੍ਰੈਲ 2023 ਮੁੱਖ ਮੰਤਰੀ ਦੀ ਚਾਹ ਤੇ ਪਕੌੜਿਆਂ ਦੇ ਖਰਚੇ ਦਾ ਵੇਰਵਾ ਨਸ਼ਰ ਕੀਤਾ ਹੈ, ਜਿਸ ਅਨੁਸਾਰ ਇਸ ਆਰਟੀਆਈ ਮੁਤਾਬਕ ਮਾਰਚ 2022 ਲਈ ਚਾਹ-ਨਾਸ਼ਤੇ ਦਾ ਬਿੱਲ 3.38 ਲੱਖ ਰੁਪਏ ਸੀ।ਮਾਰਚ ਤੋਂ ਬਾਅਦ ਅਪ੍ਰੈਲ 2022 ‘ਚ 2 ਲੱਖ 73 ਹਜ਼ਾਰ 788, ਮਈ ‘ਚ 3 ਲੱਖ 55 ਹਜ਼ਾਰ 795, ਜੂਨ ‘ਚ 3 ਲੱਖ 25 ਹਜ਼ਾਰ 248, ਜੁਲਾਈ ‘ਚ 2 ਲੱਖ 58 ਹਜ਼ਾਰ 347, ਅਗਸਤ ‘ਚ 2 ਲੱਖ 33 ਹਜ਼ਾਰ 305, ਸਤੰਬਰ, ਅਕਤੂਬਰ ‘ਚ 2 ਲੱਖ 82 ਹਜ਼ਾਰ 347 1 ਲੱਖ 64 ਹਜ਼ਾਰ 573, 1 ਨਵੰਬਰ 1 ਲੱਖ 39 ਹਜ਼ਾਰ 630, ਦਸੰਬਰ 1 ਲੱਖ 54 ਹਜ਼ਾਰ 594 ਰੁਪਏ ਖਰਚ ਕੀਤੇ ਗਏ ਹਨ। ਜਨਵਰੀ 2023 ‘ਚ ਚਾਹ ‘ਤੇ 1 ਲੱਖ 56 ਹਜ਼ਾਰ 720 ਰੁਪਏ, ਫਰਵਰੀ ‘ਚ 1 ਲੱਖ 62 ਹਜ਼ਾਰ 183, ਮਾਰਚ ‘ਚ 1 ਲੱਖ 73 ਹਜ਼ਾਰ 208 ਅਤੇ ਅਪ੍ਰੈਲ ‘ਚ 1 ਲੱਖ 24 ਹਜ਼ਾਰ 451 ਰੁਪਏ ਖਰਚ ਕੀਤੇ ਗਏ ਹਨ । ਚੇਤੇ ਰਹੇ ਕਿ ਸਰਕਾਰ ਬਣਨ ਤੋਂ ਤੁਰੰਤ ਬਾਅਦ ਮੁੱਖ ਮੰਤਰੀ ਭਗਵੰਤ ਮਾਨ ਨੇ ਆਪਣੇ ਸਾਥੀ ਮੰਤਰੀਆਂ, ਵਿਧਾਇਕਾਂ ਅਤੇ ਅਫਸਰਸ਼ਾਹੀ ਨੂੰ ਮੀਟਿੰਗਾਂ ਦੌਰਾਨ ਨਾਜਾਇਜ਼ ਖਰਚੇ ਤੋਂ ਵਰਜਿਆ ਸੀ ਅਤੇ ਖੁਦ ਵੀ ਮੁੱਖ ਮੰਤਰੀ ਦਫ਼ਤਰ ਦੇ ਖ਼ਰਚੇ ਘਟਾਉਣ ਦਾ ਦਾਅਵਾ ਕੀਤਾ ਸੀ ਪ੍ਰੰਤੂ ਸਿਰਫ 14 ਮਹੀਨਿਆਂ ‘ਚ 31 ਲੱਖ ਦੇ ਪਕੌੜੇ ਦੱਸਦੇ ਹਨ ਕਿ ਮੁੱਖ ਮੰਤਰੀ ਦੇ ਅਜਿਹੇ ਸਾਰੇ ਦਾਅਵੇ ਫੁਰਰ ਹੋ ਗਏ ।
Menu
