ਬਰਨਾਲਾ,06 ਅਗਸਤ (ਨਿਰਮਲ ਸਿੰਘ ਪੰਡੋਰੀ) : ਪੰਜਾਬ ਸਰਕਾਰ ਦੇ ਰਿਕਾਰਡ ਵਿੱਚ ਬਰਨਾਲਾ ਜ਼ਿਲ੍ਹੇ ’ਚ ਸਮਾਜਿਕ ਸੁਰੱਖਿਆ, ਇਸਤਰੀ ਅਤੇ ਬਾਲ ਵਿਕਾਸ ਵਿਭਾਗ ਦਾ ਨਾਮ ਦਰਜ ਨਹੀਂ ਹੈ। ਇਹ ਅਤਿਕਥਨੀ ਨਹੀਂ ਹੈ ਕਿਉਂਕਿ ਜੋ ਹਾਲਾਤ ਬਰਨਾਲਾ ਜ਼ਿਲ੍ਹੇ ਵਿੱਚ ਉਕਤ ਵਿਭਾਗ ਦੇ ਬਣੇ ਹੋਏ ਹਨ, ਉਨਾਂ ਹਾਲਾਤਾਂ ਅਨੁਸਾਰ ਇਹੀ ਕਿਹਾ ਜਾ ਸਕਦਾ ਹੈ ਕਿ ਪੰਜਾਬ ਸਰਕਾਰ ਦੇ ਵਿਭਾਗਾਂ ਦੀ ਸੂਚੀ ਵਿੱਚ ਜ਼ਿਲ੍ਹਾ ਬਰਨਾਲਾ ਨਾਲ ਸੰਬੰਧਿਤ ਸਮਾਜਿਕ ਸੁਰੱਖਿਆ, ਇਸਤਰੀ ਅਤੇ ਬਾਲ ਵਿਕਾਸ ਵਿਭਾਗ ਦੀ ਕੋਈ ਹੋਂਦ ਨਹੀਂ ਹੈ। ਜੇਕਰ ਪੰਜਾਬ ਸਰਕਾਰ ਦੇ ਰਿਕਾਰਡ ਵਿੱਚ ਬਰਨਾਲਾ ਜ਼ਿਲ੍ਹੇ ’ਚ ਉਕਤ ਵਿਭਾਗ ਦੀ ਹੋਂਦ ਹੋਵੇ ਤਾਂ ਇੱਥੇ ਕੰਮ ਕਰ ਰਹੇ ਅਧਿਕਾਰੀਆਂ/ਕਰਮਚਾਰੀਆਂ ਦੀ ਜਾਨ ਕੰਮ ਕਰਦੇ ਵਕਤ ਕੁੜਿੱਕੀ ਵਿੱਚ ਨਾ ਫ਼ਸੀ ਰਹੇ ।
ਬਾਕਸ ਆਈਟਮ
ਬਰਨਾਲਾ ਜ਼ਿਲ੍ਹੇ ’ਚ ਤਿੰਨ ਬਲਾਕ ਬਰਨਾਲਾ, ਸ਼ਹਿਣਾ ਅਤੇ ਮਹਿਲ ਕਲਾਂ ਹਨ, ਜਿਨਾਂ ਵਿੱਚੋਂ ਸਿਰਫ਼ ਬਰਨਾਲਾ ਬਲਾਕ ’ਚ ਹੀ ਸੀਡੀਪੀਓ ਦੀ ਪੋਸਟ ਭਰੀ ਹੋਈ ਹੈ ਜਦਕਿ ਬਾਕੀ ਦੋਵੇਂ ਬਲਾਕ ਖਾਲੀ ਹਨ। ਬਰਨਾਲਾ ਦੇ ਸੀਡੀਪੀਓ ਨੂੰ ਹੀ ਸ਼ਹਿਣਾ ਤੇ ਮਹਿਲ ਕਲਾਂ ਦਾ ਵਾਧੂ ਚਾਰਜ ਦਿੱਤਾ ਹੋਇਆ ਹੈ। ਇਹ ਕੋਈ ਦੱਸਣ ਵਾਲੀ ਗੱਲ ਨਹੀਂ ਕਿ ਇੱਕ ਅਫ਼ਸਰ ਨੂੰ ਤਿੰਨ ਅਫ਼ਸਰਾਂ ਦਾ ਕੰਮ ਕਰਨ ਵਿੱਚ ਕਿਹੜੀਆਂ ਸਮੱਸਿਆਵਾਂ ਦਾ ਸਾਹਮਣਾ ਕਰਨਾ ਪੈਂਦਾ ਹੋਵੇਗਾ। ਉਹ ਵੀ ਅਜਿਹੇ ਹਾਲਾਤਾਂ ਵਿੱਚ ਜਦੋਂ ਇੱਕੋ ਅਫ਼ਸਰ ਨੇ ਤਿੰਨ ਬਲਾਕਾਂ ਦੀਆਂ ਰਿਪੋਰਟਾਂ ਜ਼ਿਲ੍ਹਾ ਹੈੱਡਕੁਆਟਰ ’ਤੇ ਪੇਸ਼ ਕਰਨੀਆਂ ਹੋਣ, ਸਾਰੀਆਂ ਮੀਟਿੰਗਾਂ ਖ਼ੁਦ ਅਟੈਂਡ ਕਰਨੀਆਂ ਹੋਣ ਅਤੇ ਨਾਲ ਹੀ ਦਫ਼ਤਰੀ ਕੰਮ ਕਾਜ ਵੀ ਨਿਬੇੜਨਾ ਹੋਵੇ।
ਬਾਕਸ ਆਈਟਮ
ਜ਼ਿਲੇ ਦੇ ਤਿੰਨਾਂ ਬਲਾਕਾਂ ’ਚ ਹੋਰ ਕਰਮਚਾਰੀਆਂ ਦੀ ਨਫ਼ਰੀ ਦੇ ਹਾਲਾਤ ਵੀ ਬਹੁਤੇ ਚੰਗੇ ਨਹੀਂ ਹਨ। ਬਲਾਕ ਬਰਨਾਲਾ ਵਿੱਚ 14 ਸੁਪਰਵਾਈਜ਼ਰਾਂ ’ਚੋ 9 ਅਸਾਮੀਆਂ ਖਾਲੀ ਹਨ, ਬਲਾਕ ਮਹਿਲ ਕਲਾਂ ’ਚ 5 ਵਿੱਚੋਂ 3 ਅਤੇ ਬਲਾਕ ਸ਼ਹਿਣਾ ਵਿੱਚ 8 ਵਿੱਚੋਂ 6 ਅਸਾਮੀਆਂ ਖਾਲੀ ਹਨ। ਕਲੈਰੀਕਲ ਅਸਾਮੀਆਂ ਵਿੱਚ ਵੀ ਤਿੰਨੇ ਬਲਾਕਾਂ ’ਚ 1-1 ਅਸਾਮੀ ਖਾਲੀ ਹੈ। ਤਿੰਨਾਂ ਬਲਾਕਾਂ ’ਚ ਸਿਰਫ਼ ਬਰਨਾਲਾ ਵਿਖੇ ਇੱਕ ਚਪੜਾਸੀ ਹੈ ਜਦ ਕਿ ਮਹਿਲ ਕਲਾਂ ਤੇ ਸ਼ਹਿਣਾ ਵਿੱਚ ਇਹ ਅਸਾਮੀ ਖਾਲੀ ਹੈ। ਇਨਾਂ ਦਫ਼ਤਰਾਂ ਵਿੱਚ ਕੀਮਤੀ ਸਮਾਨ ਤੋਂ ਇਲਾਵਾ ਆਂਗਣਵਾੜੀ ਸੈਟਰਾਂ ਰਾਹੀ ਲਾਭਪਾਤਰੀਆਂ ਨੂੰ ਦਿੱਤੀ ਜਾਣ ਵਾਲੀ ਖੁਰਾਕ ਵੀ ਰੱਖੀ ਜਾਂਦੀ ਹੈ ਪਰ ਤਿੰਨਾਂ ਬਲਾਕਾਂ ’ਚ ਕਿਤੇ ਵੀ ਚੌਕੀਦਾਰ ਨਹੀਂ ਹੈ। ਇਸ ਤੋਂ ਇਲਾਵਾ ਕਿਸੇ ਬਲਾਕ ਵਿੱਚ ਸਰਕਾਰੀ ਗੱਡੀ ਨਹੀਂ ਹੈ ਅਤੇ ਨਾ ਹੀ ਕੋਈ ਡਰਾਈਵਰ ਦੀ ਅਸਾਮੀ ਭਰੀ ਹੋਈ ਹੈ।
ਬਾਕਸ ਆਈਟਮ
ਬਰਨਾਲਾ ਜ਼ਿਲ੍ਹੇ ’ਚ ਕੁਲ 669 ਆਂਗਣਵਾੜੀ ਸੈਂਟਰ ਹਨ ਜ਼ਿਨਾਂ ਵਿਚੋਂ ਬਰਨਾਲਾ ਬਲਾਕ ’ਚ 342, ਮਹਿਲ ਕਲਾਂ 124 ਅਤੇ ਸ਼ਹਿਣਾ 203 ਸੈਂਟਰ ਹਨ। ਇਨਾਂ ਸਾਰੇ ਸੈਂਟਰਾਂ ਨੂੰ ਸਿਰਫ਼ ਇੱਕੋ ਸੀਡੀਪੀਓ ਰਤਿੰਦਰਪਾਲ ਕੌਰ ਧਾਲੀਵਾਲ ਸੰਭਾਲ ਰਹੀ ਹੈ। ਜੇਕਰ ਕਿਸੇ ਵਿਭਾਗ ਦਾ ਮੁੱਖ ਅਫ਼ਸਰ ਸਹੂਲਤਾਂ ਦੀ ਘਾਟ ਅਤੇ ਹੋਰ ਅਨੇਕਾਂ ਸਮੱਸਿਆਵਾਂ ਦੇ ਬਾਵਜੂੁਦ ਵੀ ਵਿਭਾਗ ਨਾਲ ਜੁੜੇ ਕੰਮਾਂ ਨੂੰ ਬਾਖ਼ੂਬੀ ਨਿਬੇੜ ਰਿਹਾ ਹੋਵੇ ਅਤੇ ਸੰਬੰਧਿਤ ਲਾਭਪਾਤਰੀਆਂ ਦੀ ਸੰਤੁਸ਼ਟੀ ਵੀ ਕਰਵਾ ਰਿਹਾ ਹੋਵੇ ਤਾਂ ਇਹੋ ਜਿਹੇ ਅਫ਼ਸਰ ਦੀ ਕਾਬਲੀਅਤ ਨੂੰ ਸ਼ਬਦਾਂ ਵਿੱਚ ਬਿਆਨ ਨਹੀਂ ਕੀਤਾ ਜਾ ਸਕਦਾ ਪਰ ਸਵਾਲ ਇਹ ਵੀ ਉਠਦਾ ਹੈ ਕਿ ਬਰਨਾਲਾ ਜ਼ਿਲੇ ਨਾਲ ਸੰਬੰਧਿਤ ਲੋਕਾਂ ਦੇ ਚੁਣੇ ਹੋਏ ਨੁਮਾਇੰਦਿਆਂ ਦਾ ਆਸ਼ਰਿਤ ਬੱਚਿਆਂ, ਵਿਧਵਾਵਾਂ, ਅੰਗਹੀਣਾਂ ਅਤੇ ਬਜ਼ੁਰਗਾਂ ਨਾਲ ਸੰਬੰਧਿਤ ਦਫ਼ਤਰਾਂ ਦੀ ਬਦ ਤੋਂ ਬਦਤਰ ਹਾਲਤ ਵੱਲ ਧਿਆਨ ਕਿਉਂ ਨਹੀਂ ਜਾ ਰਿਹਾ। ਹੈਰਾਨੀ ਇਸ ਗੱਲ ਦੀ ਵੀ ਹੈ ਕਿ ਬਰਨਾਲਾ ਦੇ ਤੇਜ਼ਤਰਾਰ ਵਿਧਾਇਕ ਕਹੇ ਜਾਣ ਵਾਲੇ ਗੁਰਮੀਤ ਸਿੰਘ ਮੀਤ ਹੇਅਰ ਦੀ ਸਵੱਲੀ ਨਜ਼ਰ ਵੀ ਇਨਾਂ ਦਫ਼ਤਰਾਂ ਵੱਲ ਨਹੀਂ ਹੋਈ ਲੱਗਦੀ।
ਬਰਨਾਲਾ ਬਲਾਕ ਦੇ ਸੀਡੀਪੀਓ ਦਫ਼ਤਰ ਵਿੱਚ ਥੋੜੀ ਜਿਹੀ ਬਰਸਾਤ ਹੋਣ ’ਤੇ ਪਾਣੀ ਕਮਰਿਆਂ ਵਿੱਚ ਭਰ ਜਾਂਦਾ ਹੈ। ਇਮਾਰਤ ਦੀ ਹਾਲਤ ਨਾਜ਼ੁਕ ਹੋਣ ਕਰਕੇ ਸੱਪ ਵੀ ਅਕਸਰ ਦਫਤਰ ਦੇ ਕਮਰਿਆਂ ’ਚ ਚੱਕਰ ਲਗਾ ਜਾਂਦੇ ਹਨ। ਹਲਕਾ ਮਹਿਲ ਕਲਾਂ ਦੇ ਵਿਧਾਇਕ ਨੂੰ ਵੀ ਮਹਿਲ ਕਲਾਂ ਦੇ ਦਫ਼ਤਰ ਦੀ ਮਾੜੀ ਹਾਲਤ ਬਾਰੇ ਬਾਖ਼ੂਬੀ ਜਾਣਕਾਰੀ ਹੈ ਪਰ ਇਸ ਦੇ ਬਾਵਜੂਦ ਵੀ ਦਫਤਰ ਨਾਲ ਸੰਬੰਧਿਤ ਸਮੱਸਿਆਵਾਂ ਦੂਰ ਨਹੀਂ ਹੋ ਰਹੀਆਂ। ਇਹੋ ਨਜ਼ਰੀਆ ਸ਼ਹਿਣਾ ਬਲਾਕ ਦੇ ਦਫ਼ਤਰ ਸੰਬੰਧੀ ਹਲਕਾ ਵਿਧਾਇਕ ਭਦੌੜ ਦਾ ਹੈ।
ਸ਼ਹਿਣਾ ਬਲਾਕ ਦੇ ਦਫ਼ਤਰ ਦੇ ਕਮਰਿਆਂ ’ਚ ਮੀਂਹ ਪੈਣ ਤੋਂ ਬਆਦ ਕਰੰਟ ਆ ਜਾਂਦਾ ਹੈ ਜਿਸ ਨਾਲ ਕਈ ਵਾਰ ਮਾੜੀ ਘਟਨਾ ਵਾਪਰਨ ਤੋਂ ਬਚਾਅ ਹੋਇਆ ਹੈ। ਹੁਣ ਇਹ ਤਾਂ ਮੰਨਿਆ ਨਹੀਂ ਜਾ ਸਕਦਾ ਕਿ ਉਕਤ ਵਿਧਾਇਕਾਂ ਨੂੰ ਬਰਨਾਲਾ ਜ਼ਿਲ੍ਹੇ ’ਚ ਵਿਭਾਗ ਦੇ ਮਾੜੇ ਹਾਲਾਤਾਂ ਦੀ ਜਾਣਕਾਰੀ ਨਹੀਂ ਹੋਵੇਗੀ ਪਰ ਹੈਰਾਨੀ ਇਸ ਗੱਲ ਦੀ ਹੈ ਸਭ ਕੁਝ ਧਿਆਨ ਵਿੱਚ ਹੁੰਦੇ ਹੋਏ ਵੀ ਆਰਥਿਕ ਤੌਰ ’ਤੇ ਕਮਜ਼ੋਰ ਵਰਗਾਂ ਨਾਲ ਸੰਬੰਧਿਤ ਲਾਭਪਾਤਰੀਆਂ ਨੂੰ ਸਹੂਲਤਾਂ ਦੇਣ ਵਾਲੇ ਵਿਭਾਗ ਵੱਲ ਜ਼ਿਲ੍ਹੇ ਦੇ ਉੱਚ ਅਧਿਕਾਰੀਆਂ ਅਤੇ ਲੋਕ ਨੁਮਾਇੰਦਿਆਂ ਦਾ ਧਿਆਨ ਕਿਉਂ ਨਹੀਂ ਜਾ ਰਿਹਾ।
