ਪੁਲਿਸ ਅਧਿਕਾਰੀ ਬਣਿਆ ਫਰਿਸ਼ਤਾ : ਰੇਪ ਪੀੜ੍ਹਤਾ ਨਾਬਾਲਿਗ ਲੜਕੀ ਦੇ ਇਲਾਜ, ਸਿੱਖਿਆ ਅਤੇ ਵਿਆਹ ਤੱਕ ਦਾ ਸਾਰਾ ਖਰਚਾ ਚੁੱਕਿਆ

ਚੰਡੀਗੜ੍ਹ, 01 ਅਕਤੂਬਰ-ਉਜੈਨ ਵਿੱਚ ਇੱਕ ਨਾਬਾਲਗ ਲੜਕੀ ਨਾਲ ਬਲਾਤਕਾਰ ਦੇ ਮਾਮਲੇ ਵਿੱਚ ਇਨਸਾਨੀਅਤ ਦੇ ਤੌਰ ‘ਤੇ ਮੱਧ ਪ੍ਰਦੇਸ਼ ਪੁਲਿਸ ਦੇ ਇੱਕ ਅਧਿਕਾਰੀ ਅਜੈ ਵਰਮਾ ਨੇ ਪੀੜ੍ਹਤ ਲੜਕੀ ਦੇ ਡਾਕਟਰੀ ਇਲਾਜ, ਸਿੱਖਿਆ ਅਤੇ ਵਿਆਹ ਲਈ ਸਹਾਇਤਾ ਦੀ ਪੇਸ਼ਕਸ਼ ਕੀਤੀ ਹੈ। ਪੁਲਿਸ ਅਧਿਕਾਰੀ ਅਜੇ ਵਰਮਾ ਸਮੇਤ ਕੁਝ ਹੋਰ ਲੋਕਾਂ ਨੇ ਵੀ ਇਸ ਕਾਰਜ ਵਿੱਚ ਯੋਗਦਾਨ ਪਾਉਣ ਦੀ ਇੱਛਾ ਜ਼ਾਹਰ ਕੀਤੀ ਹੈ। ਮਹਾਕਾਲ ਪੁਲਿਸ ਸਟੇਸ਼ਨ ਦੇ ਜਾਂਚ ਅਧਿਕਾਰੀ ਅਤੇ ਇੰਚਾਰਜ ਅਜੇ ਵਰਮਾ ਨੇ ਟਵੀਟ ਕੀਤਾ “ਮੈਂ ਲੜਕੀ ਦੇ ਇਲਾਜ, ਪੜ੍ਹਾਈ ਅਤੇ ਵਿਆਹ ਵਿੱਚ ਮੱਦਦ ਕਰਨ ਦੀ ਜ਼ਿੰਮੇਵਾਰੀ ਲਈ ਹੈ ਇਸ ਮਤੇ ਵਿੱਚ ਬਹੁਤ ਸਾਰੇ ਲੋਕ ਮੇਰੇ ਸਮਰਥਨ ਲਈ ਅੱਗੇ ਆਏ ਹਨ। ਮੈਨੂੰ ਵਿਸ਼ਵਾਸ ਹੈ ਕਿ ਸਾਰੀਆਂ ਜ਼ਿੰਮੇਵਾਰੀਆਂ ਨੂੰ ਚੰਗੇ ਤਰੀਕੇ ਨਾਲ ਪੂਰਾ ਕੀਤਾ ਜਾਵੇਗਾ । ਪੀੜਤ ਸਤਨਾ ਜ਼ਿਲ੍ਹੇ ਦਾ ਰਹਿਣ ਵਾਲੀ ਹੈ ਜੋ ਉਜੈਨ ਆਈ ਸੀ, ਜਿੱਥੇ ਉਸ ਨਾਲ ਬਲਾਤਕਾਰ ਦੀ ਦਿਲ ਦਹਿਲਾ ਦੇਣ ਵਾਲੀ ਘਟਨਾ ਵਾਪਰੀ । ਬਲਾਤਕਾਰ ਤੋਂ ਬਾਅਦ ਪੀੜਤ ਲੜਕੀ ਨੂੰ ਦਰਿੰਦੇ ਛੱਡ ਕੇ ਭੱਜ ਗਏ ਜਿਸ ਤੋਂ ਬਾਅਦ ਉਹ ਲਹੂ ਲੂਹਾਨ ਗਲੀਆਂ ‘ਚ ਮਦਦ ਲਈ ਚੀਖਦੀ ਰਹੀ ਪ੍ਰੰਤੂ ਕਿਸੇ ਨੇ ਉਸਦੀ ਮਦਦ ਨਹੀਂ ਕੀਤੀ, ਪੀੜ੍ਹਤ ਲੜਕੀ ਦੀ ਗਲੀਆਂ ‘ਚ ਫਿਰਦੀ ਦੀ ਵਾਇਰਲ ਵੀਡੀਓ ਨੇ ਸਮੁੱਚੇ ਦੇਸ਼ ਨੂੰ ਸ਼ਰਮਸਾਰ ਕੀਤਾ । ਇਸ ਮਾਮਲੇ ਵਿੱਚ ਦੋ ਆਟੋਰਿਕਸ਼ਾ ਚਾਲਕਾਂ ਨੂੰ ਗ੍ਰਿਫ਼ਤਾਰ ਕੀਤਾ ਗਿਆ ਹੈ। ਲੜਕੀ ਦਾ ਇੰਦੌਰ ਦੇ ਇੱਕ ਹਸਪਤਾਲ ਵਿੱਚ ਇਲਾਜ ਚੱਲ ਰਿਹਾ ਹੈ। ਮਹਾਕਾਲ ਪੁਲਿਸ ਸਟੇਸ਼ਨ ਦੇ ਇੰਚਾਰਜ ਅਜੈ ਵਰਮਾ ਨੇ ਉਸ ਦੇ ਸਾਰੇ ਇਲਾਜ, ਸਿੱਖਿਆ ਅਤੇ ਵਿਆਹ ਤੱਕ ਦਾ ਖਰਚਾ ਚੁੱਕਣ ਦੀ ਗੱਲ ਕਹੀ ਹੈ।