ਚੰਡੀਗੜ੍ਹ,21 ਅਕਤੂਬਰ (Gee98 news service)-ਪੰਜਾਬ ਦੇ ਸਮਾਜਿਕ ਸੁਰੱਖਿਆ ਅਤੇ ਇਸਤਰੀ ਤੇ ਬਾਲ ਵਿਕਾਸ ਵਿਭਾਗ ਵੱਲੋਂ ਹੈਲਪਰਾਂ ਤੋਂ ਵਰਕਰਾਂ ਦੀ ਤਰੱਕੀ ਦੇ ਮਾਮਲੇ ‘ਚ ਜਾਰੀ ਕੀਤੇ ਇੱਕ ਪੱਤਰ ਨੇ ਕਰੀਬ 10 ਮਹੀਨੇ ਪਹਿਲਾਂ ਹੈਲਪਰਾਂ ਤੋਂ ਵਰਕਰ ਪ੍ਰਮੋਟ ਹੋਈਆਂ ਆਂਗਨਵਾੜੀ ਵਰਕਰਾਂ ਦੀ ਪ੍ਰਮੋਸ਼ਨ ‘ਤੇ ਤਲਵਾਰ ਲਟਕਾ ਦਿੱਤੀ ਹੈ। ਵਿਭਾਗ ਦੀਆਂ ਨਵੀਆਂ ਹਦਾਇਤਾਂ ਅਨੁਸਾਰ ਜਿਹੜੀਆਂ ਹੈਲਪਰਾਂ ਤੋਂ ਵਰਕਰ ਪ੍ਰਮੋਟ ਹੋਈਆਂ ਆਂਗਨਵਾੜੀ ਵਰਕਰਾਂ ਨਵੇਂ ਨਿਯਮਾਂ ਦੇ ਘੇਰੇ ਵਿੱਚ ਨਹੀਂ ਆਉਂਦੀਆਂ ਉਹਨਾਂ ਨੂੰ ਹੁਣ ਵਾਪਸ ਹੈਲਪਰ ਦੇ ਅਹੁਦੇ ‘ਤੇ ਹੀ ਕੰਮ ਕਰਨਾ ਪਵੇਗਾ। ਜ਼ਿਕਰਯੋਗ ਹੈ ਕਿ ਪਹਿਲਾਂ 3 ਜਨਵਰੀ 2023 ਨੂੰ ਜਾਰੀ ਹਦਾਇਤਾਂ ਅਨੁਸਾਰ ਤਰੱਕੀਆਂ ਦਿੱਤੀਆਂ ਗਈਆਂ ਪ੍ਰੰਤੂ ਫਿਰ 7 ਫਰਵਰੀ 2023 ਨੂੰ ਨਵੀਆਂ ਹਦਾਇਤਾਂ ਜਾਰੀ ਕੀਤੀਆਂ ਗਈਆਂ। ਇਸ ਦੌਰਾਨ 3 ਜਨਵਰੀ ਤੋਂ ਲੈ ਕੇ 6 ਫਰਵਰੀ ਤੱਕ ਤਰੱਕੀਆਂ ਦੇ ਕੇਸਾਂ ਨੂੰ ਹੋਲਡ ਕੀਤਾ ਅਤੇ ਫੇਰ ਹੁਕਮ ਜਾਰੀ ਕੀਤੇ ਗਏ ਕਿ 7 ਫਰਵਰੀ 2023 ਨੂੰ ਜਾਰੀ ਨਵੀਆਂ ਹਦਾਇਤਾਂ ਅਨੁਸਾਰ ਹੈਲਪਰਾਂ ਤੋਂ ਵਰਕਰਾਂ ਦੀ ਪਦਉੱਨਤੀ ਦੇ ਕੇਸਾਂ ਨੂੰ ਵਿਚਾਰਿਆ ਜਾਵੇ । ਹੁਣ ਵਿਭਾਗ ਦੇ ਡਿਪਟੀ ਡਾਇਰੈਕਟਰ ਵੱਲੋਂ 19 ਅਕਤੂਬਰ ਨੂੰ ਜਾਰੀ ਕੀਤੇ ਪੱਤਰ ਮੁਤਾਬਕ ਇਹਨਾਂ ਹੋਲਡ ਕੀਤੇ ਕੇਸਾਂ ਦਾ ਤਜਰਬਾ ਜੇਕਰ ਮਿਤੀ 7 ਫਰਵਰੀ 23 ਤੋਂ ਪਹਿਲਾਂ ਪੰਜ ਸਾਲ ਤੋਂ ਘੱਟ ਹੈ ਤਾਂ ਉਹਨਾਂ ਕੇਸਾਂ ਵਿੱਚ ਸੰਬੰਧਤ ਪਦਉਨਤ ਵਰਕਰ ਨੂੰ ਹੈਲਪਰ ਦੀ ਪੋਸਟ ‘ਤੇ ਹੀ ਵਾਪਸ ਰੱਖਿਆ ਜਾਵੇਗਾ । ਜੇਕਰ ਇੱਕ ਤੋਂ ਵੱਧ ਹੈਲਪਰਾਂ ਪਦਉਨਤੀ ਲਈ ਯੋਗ ਹਨ ਤਾਂ ਪਦਉਨਤੀ ਕਰਨ ਦੀ ਮਿਤੀ ਨੂੰ ਵੱਧ ਤਜਰਬਾ ਰੱਖਣ ਵਾਲੀ ਹੈਲਪਰ ਨੂੰ ਪਦਉਨਤ ਰੱਖਿਆ ਜਾਵੇਗਾ ਬਸ਼ਰਤੇ ਕੇ ਉਹ ਵਿਦਿਕ ਅਤੇ ਰਿਹਾਇਸ਼ ਦੀਆਂ ਸਾਰੀਆਂ ਸ਼ਰਤਾਂ ਪੂਰੀਆਂ ਕਰਦੀ ਹੋਵੇ। ਜੇਕਰ ਕਿਸੇ ਪਦਉਨਤੀ ਅਧੀਨ ਵਰਕਰ ਵੱਲੋਂ ਪਦਉਨਤ ਕਰਨ ਦੀ ਮਿਤੀ ਨੂੰ ਪੰਜ ਸਾਲ ਦਾ ਤਜਰਬਾ ਪੂਰਾ ਨਹੀਂ ਕੀਤਾ ਜਾਂਦਾ ਤੇ ਹੋਰ ਕੋਈ ਹੈਲਪਰ ਪਦਉਨਤੀ ਲਈ ਵਿਚਾਰ ਅਧੀਨ ਨਹੀਂ ਹੈ ਤਾਂ ਵੀ ਪਦਉਨਤੀ ਅਧੀਨ ਵਰਕਰ ਨੂੰ ਵਾਪਸ ਹੈਲਪਰ ਵਜੋਂ ਹੀ ਕੰਮ ਕਰਨਾ ਪਵੇਗਾ ਅਤੇ ਉਸ ਵੱਲੋਂ ਯੋਗਤਾ ਪੂਰੀ ਹੋਣ ਉਪਰੰਤ ਨਵੇਂ ਸਿਰੇ ਤੋਂ ਅਰਜ਼ੀ ਲੈ ਕੇ 7 ਫਰਵਰੀ 2023 ਨੂੰ ਜਾਰੀ ਹਦਾਇਤਾਂ ਅਨੁਸਾਰ ਨਵੇਂ ਸਿਰੇ ਤੋਂ ਕਾਰਵਾਈ ਕੀਤੀ ਜਾਵੇ। ਇਹਨਾਂ ਨਵੇਂ ਨਿਯਮਾਂ ਤਹਿਤ ਬਹੁਤ ਸਾਰੀਆਂ ਅਜਿਹੀਆਂ ਪਦਉਨਤ ਆਂਗਨਵਾੜੀ ਵਰਕਰਾਂ ਨੂੰ ਹੁਣ ਦੁਬਾਰਾ ਫੇਰ ਹੈਲਪਰ ਦੀ ਪੋਸਟ ‘ਤੇ ਹੀ ਕੰਮ ਕਰਨਾ ਪਵੇਗਾ । ਕਰੀਬ 10 ਮਹੀਨੇ ਬਤੌਰ ਆਂਗਨਵਾੜੀ ਵਰਕਰ ਨੌਕਰੀ ਕਰਨ ਤੋਂ ਬਾਅਦ ਦੁਬਾਰਾ ਫਿਰ ਹੈਲਪਰ ਦੀ ਪੋਸਟ ‘ਤੇ ਕੰਮ ਕਰਨ ਕਰਕੇ ਅਜਿਹੀਆਂ ਵਰਕਰਾਂ ਨੂੰ ਨਮੋਸ਼ੀ ਦਾ ਸਾਹਮਣਾ ਵੀ ਕਰਨਾ ਪਵੇਗਾ । ਵਿਭਾਗ ਦੇ ਡਿਪਟੀ ਡਾਇਰੈਕਟਰ ਵੱਲੋਂ ਸੂਬੇ ਦੇ ਸਾਰੇ ਸੀਡੀਪੀਓਜ਼ ਨੂੰ 19 ਅਕਤੂਬਰ ਦੇ ਪੱਤਰ ‘ਤੇ ਨਵੀਆਂ ਹਦਾਇਤਾਂ ਅਨੁਸਾਰ ਕਾਰਵਾਈ ਕਰਨ ਲਈ ਸਖ਼ਤ ਹੁਕਮ ਜਾਰੀ ਕਰਕੇ ਕਿਹਾ ਗਿਆ ਹੈ ਕਿ ਜਿਹੜੀਆਂ ਪੳਉੱਨਤ ਹੋਈਆਂ ਆਂਗਨਵਾੜੀ ਵਰਕਰਾਂ ਨਵੇਂ ਨਿਯਮਾਂ ਦੀ ਪਾਲਣਾ ਨਹੀਂ ਕਰਦੀਆਂ ਉਹਨਾਂ ਨੂੰ ਇੱਕ ਹਫ਼ਤੇ ਦੇ ਵਿੱਚ-ਵਿੱਚ ਵਾਪਸ ਹੈਲਪਰ ਦੀ ਪੋਸਟ ‘ਤੇ ਲਿਆਂਦਾ ਜਾਵੇ ।
