ਚੰਡੀਗੜ੍ਹ,25 ਨਵੰਬਰ-ਬਿਜਲੀ ਦਾ ਟਰਾਂਸਫਾਰਮਰ ਲਗਾਉਣ ਬਦਲੇ ਰਿਸ਼ਵਤ ਲੈਣ ਦੇ ਮਾਮਲੇ ਵਿੱਚ ਲੁਧਿਆਣਾ ਦੀ ਇੱਕ ਅਦਾਲਤ ਨੇ ਪਾਵਰ ਕਾਮ ਦੇ ਲਾਈਨਮੈਨ ਨੂੰ ਕਾਨੂੰਨੀ ਕਰੰਟ ਲਗਾਇਆ ਹੈ। ਵਧੀਕ ਸੈਸ਼ਨ ਜੱ਼ਜ ਅਜੀਤ ਅਤਰੀ ਦੀ ਵਿਸ਼ੇਸ਼ ਅਦਾਲਤ ਨੇ ਪੰਜਾਬ ਰਾਜ ਪਾਵਰ ਕਾਰਪੋਰੇਸ਼ਨ ਲਿਮਟਿਡ ਦੇ ਲਾਈਨਮੈਨ ਮਾਧੋ ਰਾਮ ਸਿੰਘ ਉਰਫ਼ ਰਾਮਾ ਵਾਸੀ ਪਿੰਡ ਜੋਧਾਂ ਪੱਤੀ ਮਸਤਾਨ ਨੂੰ ਧਾਰਾ 7 ਤਹਿਤ 5 ਸਾਲ ਦੀ ਸਖ਼ਤ ਸਜ਼ਾ ਸੁਣਾਈ ਹੈ | ਅਦਾਲਤ ਵਲੋਂ ਦੋਸ਼ੀ ਨੂੰ 10 ਹਜ਼ਾਰ ਜੁਰਮਾਨਾ ਵੀ ਕੀਤਾ ਗਿਆ ਹੈ | ਹਾਲਾਂਕਿ ਦੋਸ਼ੀ ਨੇ ਅਦਾਲਤੀ ਸੁਣਵਾਈ ਦੌਰਾਨ ਆਪਣੇ ਆਪ ਨੂੰ ਬੇਕਸੂਰ ਦੱਸਿਆ ਪ੍ਰੰਤੂ ਅਦਾਲਤ ਨੇ ਸਬੂਤਾਂ ਦੇ ਆਧਾਰ ‘ਤੇ ਲਾਈਨਮੈਨ ਨੂੰ ਦੋਸ਼ੀ ਮੰਨਦੇ ਹੋਏ ਉਕਤ ਸਜ਼ਾ ਸੁਣਾਈ। ਇਸ ਮਾਮਲੇ ਦੇ
ਇਸਤਗਾਸਾ ਪੱਖ ਦੇ ਅਨੁਸਾਰ 7 ਜਨਵਰੀ, 2020 ਨੂੰ ਵਿਜੀਲੈਂਸ ਬਿਊਰੋ ਦੁਆਰਾ ਭਿ੍ਸ਼ਟਾਚਾਰ ਰੋਕੂ ਐਕਟ ਦੀ ਧਾਰਾ 7 ਤਹਿਤ ਪੀ.ਐਸ.ਪੀ.ਸੀ.ਐਲ. ਦੇ ਦੋਸ਼ੀ ਲਾਈਨਮੈਨ ਖ਼ਿਲਾਫ਼ ਮੁਕੱਦਮਾ ਦਰਜ ਕੀਤਾ ਗਿਆ ਸੀ | ਸ਼ਿਕਾਇਤਕਰਤਾ ਅਨੁਸਾਰ ਉਹ ਕਿੱਤੇ ਵਜੋਂ ਖੇਤੀਬਾੜੀ ਕਰਦਾ ਸੀ ਤੇ ਉਹ ਖੇੜੀ-ਦੋਲੋਂ ਕਲਾਂ ਰੋਡ ‘ਤੇ ਸਥਿਤ ਮੈਸਰਜ਼ ਗਰੇਵਾਲ ਵਾਸ਼ਿੰਗ ਪੁਆਇੰਟ ਦੇ ਨਾਮ ਹੇਠ ਇਕ ਵਰਕਸ਼ਾਪ ਵੀ ਚਲਾ ਰਿਹਾ ਹੈ, ਜਿਸ ਦੀ ਦੇਖ-ਰੇਖ ਉਸ ਦਾ ਭਰਾ ਮਨਦੀਪ ਸਿੰਘ ਕਰ ਰਿਹਾ ਸੀ | ਉਕਤ ਵਰਕਸ਼ਾਪ ਦੇ ਨਾਲ ਲੱਗਦੇ ਇਕ ਬਿਜਲੀ ਦਾ ਟਰਾਂਸਫ਼ਾਰਮਰ ਸੀ, ਜੋ ਕਿ ਖ਼ਰਾਬ ਹੋ ਗਿਆ ਸੀ ਅਤੇ ਇਸ ਸੰਬੰਧੀ ਮਨਦੀਪ ਸਿੰਘ ਨੇ ਐਸ.ਡੀ.ਓ., ਬਿਜਲੀ ਬੋਰਡ ਲਲਤੋਂ ਕਲਾਂ ਨੂੰ ਦਰਖਾਸਤ ਦਿੱਤੀ ਅਤੇ ਇਹ ਕੰਮ ਦੋਸ਼ੀ ਮਾਧੋਰਾਮ ਉਰਫ਼ ਰਾਮ ਨੂੰ ਸੌਂਪਿਆ ਗਿਆ ਸੀ | ਸ਼ਿਕਾਇਤਕਰਤਾ ਨੇ ਮੁਲਜ਼ਮ ਮਾਧੋ ਰਾਮ ਸਿੰਘ ਉਰਫ਼ ਰਾਮਾ ਨਾਲ ਸੰਪਰਕ ਕੀਤਾ | ਲਾਈਨਮੈਨ ਮਾਧੋ ਰਾਮ ਉਰਫ਼ ਰਾਮਾ ਨੇ ਟਰਾਂਸਫ਼ਾਰਮਰ ਬਦਲਣ ਬਦਲੇ ਸ਼ਿਕਾਇਤਕਰਤਾ ਤੋਂ 6 ਹਜ਼ਾਰ ਰੁਪਏ ਦੀ ਰਿਸ਼ਵਤ ਦੀ ਮੰਗ ਕੀਤੀ | ਸ਼ਿਕਾਇਤਕਰਤਾ ਵਲੋਂ ਰਿਸ਼ਵਤ ਨਾ ਦੇਣ ਕਾਰਨ ਲਾਈਨਮੈਨ ਮਾਧੋ ਰਾਮ ਸਿੰਘ ਉਰਫ਼ ਰਾਮਾ ਨੇ ਆਪਣੀ ਵਰਕਸ਼ਾਪ ਦਾ ਟਰਾਂਸਫ਼ਾਰਮਰ ਨਹੀਂ ਬਦਲਿਆ | ਅਖੀਰ ਸੌਦਾ 4 ਹਜ਼ਾਰ ਰੁਪਏ ਵਿਚ ਤੈਅ ਹੋਇਆ, ਜਿਸ ‘ਤੇ ਸ਼ਿਕਾਇਤਕਰਤਾ ਵਲੋਂ ਇਸ ਦੀ ਸੂਚਨਾ ਵਿਜੀਲੈਂਸ ਬਿਊਰੋ ਨੂੰ ਦਿੱਤੀ ਤਾਂ ਬਿਊਰੋ ਵਲੋਂ ਫੌਰੀ ਕਾਰਵਾਈ ਕਰਦਿਆਂ ਉਕਤ ਦੋਸ਼ੀ ਨੂੰ 4 ਹਜ਼ਾਰ ਰਿਸ਼ਵਤ ਲੈਂਦੇ ਰੰਗੇ ਹੱਥੀ ਕਾਬੂ ਕੀਤਾ ਸੀ।
Menu
