Sunday Special…..!
ਚੰਡੀਗੜ੍ਹ,17 ਦਸੰਬਰ ( ਨਿਰਮਲ ਸਿੰਘ ਪੰਡੋਰੀ )-ਪਿੰਡ ਦੇ ਦੋ ਭਰਾਵਾਂ ਦੀ ਨਿੱਜੀ ਮਲਕੀਅਤ ਵਾਲੀ ਜ਼ਮੀਨ ਨੂੰ ਪੰਚਾਇਤੀ ਜ਼ਮੀਨ ਦਰਸਾ ਕੇ ਮੁਆਵਜ਼ਾ ਲੈਣ ਦੇ ਦੋਸ਼ਾਂ ਤਹਿਤ ਪਿੰਡ ਦੀ ਮਹਿਲਾ ਸਰਪੰਚ, ਮਹਿਲਾ ਬੀਡੀਪੀਓ, ਸੰਮਤੀ ਪਟਵਾਰੀ ਅਤੇ ਚਾਰ ਪੰਚਾਂ ‘ਤੇ ਸਖ਼ਤ ਧਾਰਾਵਾਂ ਤਹਿਤ ਮੁਕੱਦਮਾ ਦਰਜ ਕੀਤਾ ਗਿਆ ਹੈ। ਲੁਧਿਆਣਾ ਜ਼ਿਲ੍ਹੇ ਦੇ ਸੁਧਾਰ ਥਾਣਾ ਵਿਖੇ ਪਿੰਡ ਲੀਲ ਦੀ ਸਰਪੰਚ ਸਤਵੰਤ ਕੌਰ, ਪੰਚ ਪਰਮਜੀਤ ਕੌਰ, ਪੰਚ ਇੰਦਰਜੀਤ ਕੌਰ, ਪੰਚ ਹਰਵਿੰਦਰ ਸਿੰਘ, ਪੰਚ ਜਗਦੇਵ ਸਿੰਘ, ਦਲਜੀਤ ਸਿੰਘ ਸੰਮਤੀ ਪਟਵਾਰੀ ਅਤੇ ਰੁਪਿੰਦਰਜੀਤ ਕੌਰ ਬੀਡੀਪੀਓ ਦੇ ਖ਼ਿਲਾਫ਼ FIR ਨੰਬਰ 0116 ਮਿਤੀ 16-12-2023 ਆਈਪੀਸੀ ਧਾਰਾ 420, 465, 467, 468, 471 ਅਤੇ 120-B ਤਹਿਤ ਦਰਜ ਕੀਤਾ ਗਿਆ ਹੈ। ਪ੍ਰਾਪਤ ਜਾਣਕਾਰੀ ਅਨੁਸਾਰ ਲਖਵੰਤ ਸਿੰਘ ਪੁੱਤਰ ਕਰਨੈਲ ਸਿੰਘ ਵਾਸੀ ਪਿੰਡ ਲੀਲ ਤਹਿਸੀਲ ਰਾਏਕੋਟ ਨੇ ਇੱਕ ਦਰਖਾਸਤ ਐਸਐਸਪੀ ਜਗਰਾਉਂ ਨੂੰ ਦਿੱਤੀ ਸੀ ਕਿ ਪਿੰਡ ਦੀ ਪੰਚਾਇਤ ਸਰਪੰਚ, ਕੁਝ ਪੰਚਾਂ ਨੇ ਸੰਮਤੀ ਪਟਵਾਰੀ ਅਤੇ ਬੀਡੀਪੀਓ ਨਾਲ ਮਿਲੀਭੁਗਤ ਕਰਕੇ ਉਸਦੀ ਅਤੇ ਉਸਦੇ ਭਰਾ ਗੁਰਮੀਤ ਸਿੰਘ ਦੀ ਕਰੀਬ ਦੋ ਏਕੜ ਨਿੱਜੀ ਮਲਕੀਅਤ ਵਾਲੀ ਜਾਇਦਾਦ ਖੁਰਦ ਬੁਰਦ ਕਰਨ ਸਬੰਧੀ ਜੁਰਮ ਕੀਤਾ ਹੈ। ਲਖਵੰਤ ਸਿੰਘ ਨੇ ਦੋਸ਼ ਲਗਾਇਆ ਕਿ ਉਸਦੇ ਅਤੇ ਉਸਦੇ ਭਰਾ ਦੇ ਨਾਮ ਮਾਲ ਰਿਕਾਰਡ ਅਨੁਸਾਰ ਮਲਕੀਅਤ ਵਾਲੀ ਜ਼ਮੀਨ ਭਾਰਤ ਮਾਲਾ ਪਰਿਯੋਜਨਾ ਅਧੀਨ ਲੁਧਿਆਣਾ ਦੱਖਣੀ ਬਾਈਪਾਸ ਪ੍ਰੋਜੈਕਟ ਅਧੀਨ ਆ ਗਈ ਸੀ, ਜਿਸ ਨੂੰ ਉਕਤਾਨ ਦੋਸ਼ੀਆਂ ਨੇ ਪੰਚਾਇਤੀ ਜ਼ਮੀਨ ਐਲਾਨ ਕੇ NHAI ਤੋਂ ਮਿਲਣ ਵਾਲਾ ਮੁਆਵਜ਼ਾ ਹੜੱਪਣ ਲਈ ਆਪਣਾ ਬੈਂਕ ਖਾਤਾ ਨੰਬਰ ਦਿੱਤਾ ਗਿਆ। ਐਸਐਸਪੀ ਜਗਰਾਓਂ ਨੇ ਇਹ ਦਰਖ਼ਾਸਤ ਡੀਐਸਪੀ ਦਾਖਾ ਨੂੰ ਭੇਜੀ ਅਤੇ ਡੀਐਸਪੀ ਦਾਖਾ ਨੇ ਅੱਗੇ ਐਸਐਚਓ ਸੁਧਾਰ ਨੂੰ ਇਸ ਮਾਮਲੇ ਦੀ ਪੜ੍ਹਤਾਲ ਲਈ ਇਹ ਦਰਖ਼ਾਸਤ ਭੇਜੀ ਜਿਸ ਤੋਂ ਬਾਅਦ ਐਸਐਚਓ ਸੁਧਾਰ ਨੇ ਇਸ ਮਾਮਲੇ ਦੀ ਡੁੰਘਾਈ ਨਾਲ ਪੜ੍ਹਤਾਲ ਕੀਤੀ। ਪੜ੍ਹਤਾਲ ਦੌਰਾਨ ਮਹਿਲਾ ਸਰਪੰਚ, ਪੰਚਾਂ ਅਤੇ ਹੋਰ ਦੋਸ਼ੀਆਂ ਨੂੰ ਪੜ੍ਹਤਾਲੀਆ ਅਫ਼ਸਰ ਵੱਲੋਂ ਤਿੰਨ ਮੌਕੇ ਆਪਣਾ ਪੱਖ ਰੱਖਣ ਲਈ ਦਿੱਤੇ ਗਏ ਪ੍ਰੰਤੂ ਉਕਤਾਨ ਦੋਸ਼ੀਆਂ ਵਿੱਚੋਂ ਕਿਸੇ ਨੇ ਵੀ ਪੜਤਾਲੀਆ ਅਫ਼ਸਰ ਸਾਹਮਣੇ ਪੇਸ਼ ਹੋ ਕੇ ਆਪਣਾ ਪੱਖ ਨਹੀਂ ਰੱਖਿਆ। ਐਸ ਐਚ ਓ ਸੁਧਾਰ ਅੰਮ੍ਰਿਤਪਾਲ ਸਿੰਘ ਅਨੁਸਾਰ ਦੋਸ਼ੀ ਮਾਮਲੇ ਦੀ ਸਮੁੱਚੀ ਪੜਤਾਲ ਦੌਰਾਨ ਕਿਸੇ ਨਿੱਜੀ ਵਿਅਕਤੀ ਦੀ ਜਾਇਦਾਦ ਨੂੰ ਪੰਚਾਇਤੀ ਜਾਇਦਾਦ ਐਲਾਨਣ ਦੇ ਦੋਸ਼ੀ ਪਾਏ ਗਏ ਹਨ ਜਿਸ ਤੋਂ ਬਾਅਦ ਦੋਸ਼ੀਆਂ ਦੇ ਖ਼ਿਲਾਫ਼ ਕਾਨੂੰਨ ਅਨੁਸਾਰ ਬਣਦੀ ਕਾਰਵਾਈ ਕੀਤੀ ਗਈ ਹੈ। ਪੜ੍ਹਤਾਲੀਆ ਅਫ਼ਸਰ ਅਨੁਸਾਰ ਇਸ ਸਮੁੱਚੇ ਮਾਮਲੇ ਦੀ ਪੜ੍ਹਤਾਲ ਸਿਰਫ਼ ਪੁਲਿਸ ਨੇ ਹੀ ਨਹੀਂ ਕੀਤੀ ਸਗੋਂ ਪੰਚਾਇਤ ਵਿਭਾਗ ਦੇ ਅਧਿਕਾਰੀਆਂ ਤੋਂ ਵੀ ਇਸ ਸਬੰਧੀ ਫੀਡਬੈਕ ਪ੍ਰਾਪਤ ਕੀਤੀ ਗਈ ਹੈ ਜਿਸ ਤੋਂ ਬਾਅਦ ਉਕਤ ਮਾਮਲੇ ਵਿੱਚ ਬੀਡੀਪੀਓ, ਸੰਮਤੀ ਪਟਵਾਰੀ, ਮਹਿਲਾ ਸਰਪੰਚ ਅਤੇ ਇਸ ਸਬੰਧੀ ਪੰਚਾਇਤੀ ਰਜਿਸਟਰ ਵਿੱਚ ਪਾਏ ਗਏ ਮਤੇ ਉੱਪਰ ਦਸਤਖ਼ਤ ਕਰਨ ਵਾਲੇ ਪੰਚਾਂ ਦੀ ਖ਼ਿਲਾਫ਼ ਕਾਰਵਾਈ ਕੀਤੀ ਗਈ ਹੈ।
Menu
