ਚੰਡੀਗੜ੍ਹ,17 ਫਰਵਰੀ, Gee98 news service
ਅਯੁੱਧਿਆ ਵਿਖੇ ਸ੍ਰੀ ਰਾਮ ਮੰਦਰ ‘ਚ ਆਰਤੀ ਦਰਸ਼ਨ ਪਾਸ ਦੀ ਪ੍ਰਣਾਲੀ ਲਾਗੂ ਕੀਤੀ ਗਈ ਹੈ। ਮੰਗਲਾ ਆਰਤੀ ਅਤੇ ਸ਼ਯਾਨ ਆਰਤੀ ਲਈ 100-100 ਲੋਕਾਂ ਨੂੰ ਪਾਸ ਜਾਰੀ ਕੀਤੇ ਜਾ ਰਹੇ ਹਨ। ਇਹ ਪਾਸ ਆਨਲਾਈਨ ਅਤੇ ਆਫ-ਲਾਈਨ ਦੋਵਾਂ ਤਰ੍ਹਾਂ ਉਪਲਬਧ ਹੈ।ਅਯੁੱਧਿਆ ਦੇ ਰਾਮ ਮੰਦਰ ‘ਚ ਰਾਮ ਲੱਲਾ ਦੇ ਸਵੇਰੇ ਜਾਗਰਣ ਤੋਂ ਬਾਅਦ ਪਹਿਲੀ ਆਰਤੀ, ਜਿਸ ਨੂੰ ਮੰਗਲਾ ਆਰਤੀ ਕਿਹਾ ਜਾਂਦਾ ਹੈ, ਪਹਿਲੀ ਵਾਰ ਪਰਦਾ ਹਟਾ ਕੇ ਸ਼ੁਰੂ ਕੀਤੀ ਗਈ ਹੈ। ਇਹ ਪਰੰਪਰਾ ਕਿਸੇ ਵੀ ਵੈਸ਼ਨਵ ਮੰਦਰ ਵਿੱਚ ਮੌਜੂਦ ਨਹੀਂ ਹੈ। ਸ਼੍ਰੀ ਰਾਮ ਦੇ ਜਨਮ ਸਥਾਨ ਵਿੱਚ ਵੀ ਮੰਗਲਾ ਆਰਤੀ 6 ਦਸੰਬਰ 92 ਤੋਂ ਪਹਿਲਾਂ ਅਤੇ ਬਾਅਦ ਵਿੱਚ ਪਰਦੇ ਪਿੱਛੇ ਕੀਤੀ ਗਈ ਸੀ। ਰਾਮ ਲੱਲਾ ਦੇ ਮੁੱਖ ਸੇਵਾਦਾਰ ਆਚਾਰੀਆ ਸਤੇਂਦਰ ਦਾਸ ਸ਼ਾਸਤਰੀ ਨੇ ਦੱਸਿਆ ਕਿ ਸਾਰੇ ਵੈਸ਼ਨਵ ਮੰਦਰਾਂ ਵਿੱਚ ਭਗਵਾਨ ਰਾਮ ਦਾ ਦਰਬਾਰ ਹੈ ਜਿਸ ਵਿੱਚ ਭਗਵਾਨ ਰਾਮ ਦੇ ਨਾਲ, ਲਕਸ਼ਮਣ ਜੀ, ਮਾਤਾ ਸੀਤਾ ਤੇ ਹਨੂੰਮਾਨ ਜੀ ਹਨ। ਕਈ ਥਾਵਾਂ ‘ਤੇ ਮਾਤਾ ਸੀਤਾ ਚਾਰ ਭਰਾਵਾਂ ਦੇ ਨਾਲ ਹੈ ਅਤੇ ਕਈ ਥਾਵਾਂ ‘ਤੇ ਕੇਵਲ ਰਾਮ ਅਤੇ ਸੀਤਾ ਹੀ ਹਨ। ਉਨ੍ਹਾਂ ਕਿਹਾ ਕਿ ਮਾਤਾ ਸੀਤਾ ਦੇ ਨਾਲ ਹੋਣ ਕਾਰਨ ਇੱਕ ਮਰਿਆਦਾ ਦਾ ਬੰਧਨ ਹੈ। ਇਸ ਕਰਕੇ ਜਦੋਂ ਤੱਕ ਪੂਰਾ ਸਿੰਗਾਰ ਨਹੀਂ ਹੁੰਦਾ ਉਦੋਂ ਤੱਕ ਪਰਦਾ ਨਹੀਂ ਹਟਾਇਆ ਜਾ ਸਕਦਾ। ਇਸ ਦੇ ਉਲਟ ਸ਼੍ਰੀ ਰਾਮ ਜਨਮ ਭੂਮੀ ਵਿੱਚ ਰਾਮ ਲੱਲਾ ਪੰਜ ਸਾਲ ਦੇ ਬੱਚੇ ਦੇ ਰੂਪ ਵਿੱਚ ਮੌਜੂਦ ਹੈ, ਇੱਥੇ ਮਾਤਾ ਸੀਤਾ ਨਹੀਂ ਹਨ।