-Gee98 news exclusive
- ਨਿਰਮਲ ਸਿੰਘ ਪੰਡੋਰੀ ਦੀ ਵਿਸ਼ੇਸ਼ ਰਿਪੋਰਟ
-ਲੋਕ ਸਭਾ ਚੋਣਾਂ ਲਈ ਮੈਦਾਨ ਹੌਲੀ-ਹੌਲੀ ਭਖ ਰਿਹਾ ਹੈ। ਕੁਝ ਪਾਰਟੀਆਂ ਨੇ ਆਪਣੇ ਪਹਿਲਵਾਨ ਮੈਦਾਨ ਵਿੱਚ ਉਤਾਰ ਦਿੱਤੇ ਹਨ ਅਤੇ ਕੁਝ ਅਜੇ ਕਸਰਤ ਕਰ ਰਹੀਆਂ ਹਨ। ਜੇਕਰ ਲੋਕ ਸਭਾ ਹਲਕਾ ਸੰਗਰੂਰ ਦੀ ਗੱਲ ਕਰੀਏ ਤਾਂ ਇੱਥੋਂ ‘ਆਪ’ ਨੇ ਗੁਰਮੀਤ ਸਿੰਘ ਮੀਤ ਹੇਅਰ ਅਤੇ ਸ਼੍ਰੋਮਣੀ ਅਕਾਲੀ ਦਲ ਅੰਮ੍ਰਿਤਸਰ ਨੇ ਸਿਮਰਨਜੀਤ ਸਿੰਘ ਮਾਨ ਨੂੰ ਮੈਦਾਨ ਵਿੱਚ ਉਤਾਰ ਦਿੱਤਾ ਹੈ। ਦੂਜੀਆਂ ਮੁੱਖ ਪਾਰਟੀਆਂ ਭਾਜਪਾ, ਅਕਾਲੀ ਦਲ, ਕਾਂਗਰਸ ਅਤੇ ਬਸਪਾ ਦੇ ਦਾਅਵੇਦਾਰ ਸਾਹਮਣੇ ਆ ਰਹੇ ਹਨ। ਇਹਨਾਂ ਦਾਅਵੇਦਾਰਾਂ ਵਿੱਚੋਂ ਇੱਕ ਨੇਤਾ ਕਾਂਗਰਸ ਦੇ ਕੁਲਦੀਪ ਸਿੰਘ ਕਾਲਾ ਢਿੱਲੋਂ ਦੀਆਂ ਗਤੀਵਿਧੀਆਂ ਧਿਆਨ ਖਿੱਚ ਰਹੀਆਂ ਹਨ। ਕਾਲਾ ਢਿੱਲੋਂ ਨੇ ਸੰਗਰੂਰ ਤੋਂ ਕਾਂਗਰਸ ਵੱਲੋਂ ਦਾਅਵਾ ਠੋਕਿਆ ਹੋਇਆ ਹੈ। ਕਾਂਗਰਸੀ ਸੂਤਰਾਂ ਅਨੁਸਾਰ ਕਾਲਾ ਢਿੱਲੋਂ ਦੀ ਦਾਅਵੇਦਾਰੀ ਨੇ ਸੰਗਰੂਰ ਹਲਕੇ ਤੋਂ ਉਮੀਦਵਾਰ ਦੀ ਚੋਣ ਕਰਨ ਸਬੰਧੀ ਕਾਂਗਰਸ ਹਾਈਕਮਾਂਡ ਨੂੰ ਸੋਚਾਂ ਵਿੱਚ ਪਾਇਆ ਹੋਇਆ ਹੈ ਕਿਉਂਕਿ ਕਾਲਾ ਢਿੱਲੋਂ ਦੀ ਆਮ ਲੋਕਾਂ ਤੱਕ ਪਹੁੰਚ ਨੂੰ ਨਜ਼ਰ ਅੰਦਾਜ਼ ਨਹੀਂ ਕੀਤਾ ਜਾ ਸਕਦਾ। ਸਿਆਸੀ ਮਾਹਿਰ ਇਸ ਗੱਲ ਨੂੰ ਮੰਨ ਰਹੇ ਹਨ ਕਿ ਆਪ ਛੱਡ ਕੇ ਕਾਂਗਰਸ ਵਿੱਚ ਸ਼ਮੂਲੀਅਤ ਕਰਨ ਤੋਂ ਬਾਅਦ ਕਾਲਾ ਢਿੱਲੋਂ ਨੇ ਬਰਨਾਲਾ ਜ਼ਿਲ੍ਹੇ ਵਿੱਚ ਮਰੀ ਹੋਈ ਕਾਂਗਰਸ ਨੂੰ ਆਕਸੀਜਨ ਦਿੱਤੀ। ਇੱਥੇ ਇਸ ਗੱਲ ਦਾ ਜ਼ਿਕਰ ਕਰਨਾ ਜ਼ਰੂਰੀ ਬਣਦਾ ਹੈ ਕਿ ਇਹ ਕਾਲਾ ਢਿੱਲੋਂ ਹੀ ਹੈ ਜਿਸ ਨੇ 2017 ਦੀਆਂ ਵਿਧਾਨ ਸਭਾ ਚੋਣਾਂ ‘ਚ ਮੀਤ ਹੇਅਰ ਦੇ ਸਿਰ ‘ਤੇ ਜਿੱਤ ਦਾ ਸਿਹਰਾ ਬੰਨਿਆ ਸੀ ਅਤੇ ਅੱਜ ਉਸੇ ਮੀਤ ਹੇਅਰ ਦੀ ਗੱਡੀ ‘ਤੇ ਝੰਡੀ ਲੱਗੀ ਹੋਈ ਹੈ। ਕਾਲਾ ਢਿੱਲੋਂ ਦੀਆਂ ਗਤੀਵਿਧੀਆਂ ਦੇ ਮੱਦੇਨਜ਼ਰ ਅਤੇ ਉਸਦੀ ਲੋਕਪ੍ਰਿਯਤਾ ਨੂੰ ਵੇਖਦੇ ਹੋਏ ਕਾਂਗਰਸ ਨੇ ਉਸ ਨੂੰ ਜ਼ਿਲ੍ਹਾ ਪ੍ਰਧਾਨ ਥਾਪਿਆ ਜਿਸ ਤੋਂ ਬਾਅਦ ਕਾਲਾ ਢਿੱਲੋਂ ਨੇ ਆਮ ਲੋਕਾਂ ਦੇ ਮਨਾਂ ਵਿੱਚ ਬਤੌਰ ਨੇਤਾ ਇੱਕ ਖ਼ਾਸ ਜਗ੍ਹਾ ਬਣਾਈ। ਲੋਕਾਂ ਵਿੱਚ ਵਿਚਰਨ ਸਮੇਂ ਕਾਲਾ ਢਿੱਲੋਂ ਦੀ ਸ਼ਖਸ਼ੀਅਤ ਦਾ ਇੱਕ ਅਹਿਮ ਪੱਖ ਇਹ ਵੀ ਹੈ ਕਿ ਉਹ ਜਦ ਵੀ ਕਿਸੇ ਨੂੰ ਮਿਲਦਾ ਹੈ ਤਾਂ ਉਸ ਦੀ ਨਿਮਰਤਾ ਅਤੇ ਮੁਸਕਰਾਹਟ ਵਿਰੋਧੀ ਦਾ ਵੀ ਮਨ ਕੀਲ ਲੈਂਦੀ ਹੈ।
ਕਾਲਾ ਢਿੱਲੋਂ ਕਾਂਗਰਸ ਦੇ ਮੁਹਾਜ਼ ‘ਤੇ ਇੱਕ ਅਜਿਹੇ ਸਿਆਸੀ ਜੋਗੀ ਦੀ ਤਰ੍ਹਾਂ ਵਿਚਰ ਰਿਹਾ ਜੋ ਆਪਣੇ ਸ਼ਬਦਾਂ ਦੀ ਬੀਨ ਨਾਲ ਆਪਣੇ ਆਲੇ ਦੁਆਲੇ ਲੋਕਾਂ ਦੇ ਇਕੱਠ ਨੂੰ ਜੋੜਨ ਵਿੱਚ ਕਾਮਯਾਬ ਹੋ ਰਿਹਾ ਹੈ। ਕੁਲਦੀਪ ਸਿੰਘ ਕਾਲੇ ਢਿੱਲੋਂ ਦੀ ਸੰਗਰੂਰ ਹਲਕੇ ਤੋਂ ਦਾਅਵੇਦਾਰੀ ਨੇ ਜਿੱਥੇ ਕਾਂਗਰਸ ਹਾਈ ਕਮਾਂਡ ਦਾ ਧਿਆਨ ਖਿੱਚਿਆ ਉੱਥੇ ਉਸ ਦੀ ਦਾਅਵੇਦਾਰੀ ਨੇ ਵਿਰੋਧੀ ਪਾਰਟੀਆਂ ਦੇ ਉਮੀਦਵਾਰਾਂ ਅਤੇ ਦਾਅਵੇਦਾਰਾਂ ਦੇ ਮੱਥੇ ‘ਤੇ ਵੀ ਚਿੰਤਾ ਦੀਆਂ ਰੇਖਾਵਾਂ ਉਲੀਕੀਆਂ ਹੋਈਆਂ ਹਨ। ਕਾਲਾ ਢਿੱਲੋਂ ਦੀ ਸਿਆਸੀ ਸ਼ਖਸ਼ੀਅਤ ਅਤੇ ਕਾਬਲੀਅਤ ਬਾਰੇ ਜਦੋਂ ਆਮ ਆਦਮੀ ਪਾਰਟੀ ਦੇ ਇੱਕ ਸੰਵਿਧਾਨਿਕ ਅਹੁਦੇ ‘ਤੇ ਬੈਠੇ ਆਗੂ ਨਾਲ ਗੱਲ ਕੀਤੀ ਤਾਂ ਉਹਨਾਂ ਬੇਬਾਕੀ ਨਾਲ ਕਿਹਾ ਕਿ “ਕਾਲਾ ਢਿੱਲੋਂ, ਮਰਹੂਮ ਮਲਕੀਤ ਸਿੰਘ ਕੀਤੂ ਵਾਂਗ ਲੋਕਾਂ ਵਿੱਚ ਜਲਦੀ ਹਰਮਨ ਪਿਆਰਾ ਹੋ ਰਿਹਾ ਅਤੇ ਉਸਦੀ ਇਮੇਜ਼ ਲੋਕਾਂ ਦੇ ਮਨਾਂ ‘ਚ ਕੀਤੂ ਵਾਂਗ ਹੀ ਬਣਦੀ ਜਾ ਰਹੀ ਹੈ,ਹਰ ਖੁਸ਼ੀ-ਗਮੀ ਦੇ ਸਮਾਗਮ ‘ਤੇ ਉਸਦੀ ਹਾਜ਼ਰੀ ਲੱਗ ਰਹੀ ਹੈ”। ਅਜੋਕੇ ਦੌਰ ‘ਚ ਜੇਕਰ ਸਿਆਸੀ ਲੀਡਰਾਂ ਦੇ ਪ੍ਰਤੀ ਲੋਕਾਂ ਦੇ ਮਨਾਂ ਵਿੱਚ ਸਤਿਕਾਰ ਦੀ ਭਾਵਨਾ ਦੀ ਗੱਲ ਕਰੀਏ ਤਾਂ ਲੋਕ ਵਿਕਾਸ ਕੰਮਾਂ ਤੋਂ ਜ਼ਿਆਦਾ ਆਪਣੀ ਪਾਰਟੀ ਦੇ ਵਰਕਰਾਂ ਦੇ ਮੋਢੇ ‘ਤੇ ਹੱਥ ਰੱਖਣ ਵਾਲੇ ਅਤੇ ਗਰੀਬਾਂ ਦੇ ਵਿਹੜੇ ਵਿੱਚ ਬਾਣ ਦੇ ਮੰਜਿਆਂ ‘ਤੇ ਬੈਠਣ ਵਾਲੇ ਲੀਡਰ ਨੂੰ ਜ਼ਿਆਦਾ ਪਸੰਦ ਕਰਦੇ ਹਨ… ਤੇ ਕਾਲਾ ਢਿੱਲੋ ਵਿੱਚ ਇਹ ਕਾਬਲੀਅਤ ਦੇਖੀ ਜਾ ਰਹੀ ਹੈ। ਬਹਰਹਾਲ ! ਲੋਕ ਸਭਾ ਹਲਕਾ ਸੰਗਰੂਰ ਤੋਂ ਕਾਂਗਰਸ ਦੀ ਟਿਕਟ ਸਬੰਧੀ ਕਾਂਗਰਸ ਹਾਈ ਕਮਾਂਡ ਦਾ ਫੈਸਲਾ ਅਜੇ ਸਮੇਂ ਦੀ ਬੁੱਕਲ ਵਿੱਚ ਹੈ ਪ੍ਰੰਤੂ ਜੇਕਰ ਕਾਲਾ ਢਿੱਲੋਂ ਨੂੰ ਮੈਦਾਨ ਵਿੱਚ ਉਤਾਰਿਆ ਜਾਂਦਾ ਹੈ ਤਾਂ ਉਸਦੀ ਚੋਣ ਮੁਹਿੰਮ ਬਰਾਬਰ ‘ਤੇ ਖੜੇ ਵੱਡੇ ਮਹਾਰਥੀਆਂ ਦੀ ਸਿਆਸੀ ਬੇੜੀ ‘ਚ ਵੱਟੇ ਪਾਉਣ ਵਾਲੀ ਸਾਬਤ ਹੋ ਸਕਦੀ ਹੈ।
