ਬਰਨਾਲਾ, 15 ਸਤੰਬਰ (ਨਿਰਮਲ ਸਿੰਘ ਪੰਡੋਰੀ) : ਬਰਨਾਲਾ ਜ਼ਿਲੇ ਨਾਲ ਸੰਬੰਧਿਤ ਭਾਜਪਾ ਵਿੱਚ ਸ਼ਾਮਲ ਹੋਣ ਵਾਲੇ ਸਰਪੰਚ ,ਸਾਬਕਾ ਸਰਪੰਚ ਅਤੇ ਦਰਜਨ ਭਰ ਹੋਰ ਵਿਅਕਤੀਆਂ ਵਿੱਚੋਂ ਕੁਝ ਇੱਕ ਸਮੇਂ ਦੀ ਨਬਜ਼ ਪਹਿਚਾਣਦੇ ਹੋਏ ਵਾਪਸ ਪਰਤ ਆਏ ਹਨ। ਇਨਾਂ ਵਿੱਚੋਂ ਕੁਝ ਵਿਅਕਤੀਆਂ ਨੇ ਸੋਸ਼ਲ ਮੀਡੀਆ ਉੱਪਰ ਵੀਡੀਓ ਕਲਿੱਪ ਪਾ ਕੇ ਇਹ ਮੰਨਿਆ ਹੈ ਕਿ ਉਹ ਭਾਜਪਾ ਦੇ ਸਥਾਨਕ ਆਗੂਆਂ ਨਾਲ ਮਿਲਣ ਤੋਂ ਬਾਅਦ ਪ੍ਰੇਰਿਤ ਹੋ ਕੇ ਭਾਜਪਾ ਵਿੱਚ ਸ਼ਾਮਲ ਹੋ ਗਏ ਸਨ। ਵਾਪਸ ਆਉਣ ਵਾਲੇ ਕੁਝ ਆਗੂ ਕੋਰਾ ਝੂਠ ਵੀ ਬੋਲ ਰਹੇ ਹਨ ਕਿ ਉਨਾਂ ਨੂੰ ਧੱਕੇ ਨਾਲ ਭਾਜਪਾ ’ਚ ਸ਼ਾਮਲ ਕੀਤਾ ਗਿਆ। ਅਸਲ ਵਿੱਚ ਸੱਚਾਈ ਇਹੋ ਹੈ ਕਿ ਭਾਜਪਾ ਵਿੱਚ ਸ਼ਾਮਲ ਹੋਣ ਵਾਲੇ ਇਹ ਸਾਰੇ ਆਗੂ ਯੋਜਨਾ ਅਨੁਸਾਰ ਹੀ ਚੰਡੀਗੜ ਜਾ ਕੇ ਭਾਜਪਾ ’ਚ ਸ਼ਾਮਲ ਹੋਏ ਸਨ। ਇਨਾਂ ਆਗੂਆਂ ਵਿੱਚੋਂ ਹੀ ਕੁਝ ਆਗੂਆਂ ਨੇ ਦੱਸਿਆ ਕਿ ‘‘ਕਿਸੇ ਨਾਲ ਕੋਈ ਧੱਕਾ ਨਹੀਂ ਕੀਤਾ ਗਿਆ, ਅਸੀਂ ਸਾਰੇ ਪਹਿਲਾਂ ਬਣੀ ਯੋਜਨਾ ਅਨੁਸਾਰ ਹੀ ਚੰਡੀਗੜ ਗਏ ਸੀ’’। ਇਨਾਂ ਵਿੱਚੋਂ ਕੁਝ ਆਗੂ ਵਿਰੋਧ ਹੋਣ ਦੇ ਬਾਵਜੂਦ ਵੀ ਭਾਜਪਾ ’ਚ ਹੀ ਡੱਟੇ ਹੋਏ ਹਨ। ਬੀਕੇਯੂ ਡਕੌਂਦਾ ਦੇ ਸੂਬਾ ਆਗੂ ਮਨਜੀਤ ਸਿੰਘ ਧਨੇਰ ਦਾ ਮੱਤ ਹੈ ਕਿ ਭਾਜਪਾ ’ਚ ਸ਼ਾਮਲ ਹੋਣ ਵਾਲੇ ਕਿਸੇ ਵੀ ਵਿਅਕਤੀ ਨੂੰ ਜ਼ੋਰ-ਜ਼ਬਰਦਸਤੀ ਜਾਂ ਸਮਾਜਿਕ ਬਾਈਕਾਟ ਦੀਆਂ ਧਮਕੀਆਂ ਦੇਣ ਵਰਗੇ ਤਰੀਕੇ ਠੀਕ ਨਹੀਂ ਹਨ, ਬਲਕਿ ਅਜਿਹੇ ਲੋਕਾਂ ਨੂੰ ਪਿਆਰ ਨਾਲ ਵਾਪਸ ਲਿਆਉਣਾ ਚਾਹੀਦਾ ਹੈ। ਪੰਜਾਬੀ ਦੀ ਇੱਕ ਕਹਾਵਤ ਹੈ ਕਿ ‘‘ਜੇਕਰ ਸਵੇਰ ਦਾ ਭਟਕਿਆ ਸ਼ਾਮ ਨੂੰ ਘਰ ਆ ਜਾਵੇ ਤਾਂ ਉਸ ਨੂੰ ਭੁਲੱਕੜ ਨਹੀਂ ਕਹਿੰਦੇ’’। ਖੇਤੀ ਕਾਨੂੰਨ ਰੱਦ ਕਰਵਾਉਣ ਲਈ ਲੜੇ ਜਾ ਰਹੇ ਸੰਘਰਸ਼ ਦੀ ਜਿੱਤ ਜਿੰਨੀ ਜ਼ਰੂਰੀ ਹੈ, ਪਿੰਡਾਂ ਵਿੱਚ ਭਾਈਚਾਰਕ ਏਕਤਾ, ਸਾਂਝ ਵੀ ਕਾਇਮ ਰੱਖਣੀ ਸਮਾਜਿਕ ਆਗੂਆਂ ਦੀ ਹੀ ਜ਼ਿੰਮੇਵਾਰੀ ਹੈ ,ਕਿਉਂਕਿ ‘ਰਾਜਨੀਤੀ’ ਕਦੇ ਲੋਕਾਂ ਦੀ ਭਾਈਚਾਰਕ ਏਕਤਾ ਦੇ ਹੱਕ ਵਿੱਚ ਨਹੀਂ ਰਹੀ ਅਤੇ ਅਜੋਕੇ ਦੌਰ ਦੀ ਰਾਜਨੀਤੀ ਦਾ ਮੁਹਾਂਦਰਾ ਵੀ ਇਹੋ ਹੈ ਕਿ ਲੋਕਾਂ ਦਾ ਮੂੰਹ ਚਾਰੇ ਦਿਸ਼ਾਵਾਂ ਵੱਲ ਹੋਵੇ।
