ਮਹਿਲ ਕਲਾਂ 16 ਅਗਸਤ (ਜਸਵੰਤ ਸਿੰਘ ਲਾਲੀ)-
ਸਬ ਡਵੀਜਨ ਮਹਿਲ ਕਲਾਂ ਵਿਖੇ ਬੀਬੀ ਕਿਰਨਜੀਤ ਕੌਰ ਸੀਨੀਅਰ ਸੈਕੰਡਰੀ ਸਕੂਲ ਵਿਖੇ ਪ੍ਰਸ਼ਾਸਨ ਵੱਲੋਂ ਆਜ਼ਾਦੀ ਦਿਵਸ ਮਨਾਇਆ ਗਿਆ। ਇਸ ਮੌਕੇ ਸ੍ਰੀ ਸਿਵਾਂਸ਼ ਰਾਠੀ IAS (SDM) ਮਹਿਲ ਕਲਾਂ ਨੇ ਝੰਡਾ ਲਹਿਰਾਉਣ ਦੀ ਰਸਮ ਅਦਾ ਕੀਤੀ। ਸਬ ਡਵੀਜਨ ਅਧੀਨ ਆਉਦੇ ਸਕੂਲਾਂ ਦੇ ਬੱਚਿਆਂ ਵੱਲੋ ਗਿੱਧਾ ਭੰਗੜਾ, ਲੋਕ ਬੋਲੀਆਂ ਅਤੇ ਕੋਰੀਓਗ੍ਰਾਫੀ ਦੀ ਪੇਸ਼ਕਾਰੀ ਕੀਤੀ। ਇਸ ਵਾਰ ਇਹ ਸਮਾਗਮ ਸਥਾਨ ਬਦਲੇ ਜਾਣ ਕਰਕੇ ਮਾੜੇ ਪ੍ਰਬੰਧਾਂ ਅਤੇ ਮੀਹ ਦੀ ਭੇਂਟ ਚੜ ਗਿਆ। ਜ਼ਿਕਰਯੋਗ ਹੈ ਕਿ ਸਬ ਡਿਵੀਜ਼ਨ ਮਹਿਲ ਕਲਾਂ ਦਾ ਗਣਤੰਤਰਤਾ ਦਿਵਸ ਅਤੇ ਸੁਤੰਤਰਤਾ ਦਿਵਸ ਹੁਣ ਤੱਕ ਅਨਾਜ ਮੰਡੀ ਦੇ ਵੱਡੇ ਸੈੱਡ ਹੇਠਾਂ ਮਨਾਇਆ ਜਾਂਦਾ ਰਿਹਾ ਹੈ ਪਰੰਤੂ ਇਸ ਵਾਰ ਸਥਾਨ ਤਬਦੀਲ ਕਰਕੇ ਸਕੂਲ ਵਿੱਚ ਇਹ ਸਮਾਗਮ ਮਨਾਇਆ ਗਿਆ ਜਿੱਥੇ ਮੀਂਹ ਆਉਣ ਕਾਰਨ ਕੋਈ ਬਦਲਵਾਂ ਪ੍ਰਬੰਧ ਨਹੀਂ ਸੀ। ਜਦੋਂ ਪੱਤਰਕਾਰਾਂ ਨੇ ਪ੍ਰਸ਼ਾਸਨਿਕ ਅਧਿਕਾਰੀਆਂ ਨੂੰ ਸਮਾਗਮ ਦਾ ਸਥਾਨ ਬਦਲਣ ਲਈ ਪੁੱਛਿਆ ਤਾਂ ਅਧਿਕਾਰੀਆਂ ਨੇ ਚੁੱਪ ਵੱਟ ਲਈ। ਮੀਂਹ ਕਾਰਨ ਕੁਝ ਸਕੂਲਾਂ ਦੇ ਬੱਚਿਆਂ ਦੀਆਂ ਪੇਸ਼ਕਾਰੀਆਂ ਹੀ ਸਟੇਜ ‘ਤੇ ਹੋ ਸਕੀਆਂ ਜਦਕਿ ਪਿਛਲੇ ਕਈ ਦਿਨਾਂ ਤੋਂ ਆਪਣੀਆਂ ਪੇਸ਼ਕਾਰੀਆਂ ਦੀ ਰਿਹਰਸਲ ਕਰ ਰਹੇ ਬਹੁਤੇ ਸਕੂਲਾਂ ਦੇ ਬੱਚਿਆਂ ਨੂੰ ਨਿਰਾਸ਼ ਹੀ ਮੁੜਨਾ ਪਿਆ।
ਪ੍ਰਸ਼ਾਸਨ ਨੇ ਸਨਮਾਨਿਤ ਸ਼ਖਸ਼ੀਅਤਾਂ ਦਾ ਸਨਮਾਨ ਵੀ ਸਕੂਲ ਦੀ ਲਾਈਬ੍ਰੇਰੀ ਹਾਲ ਵਿੱਚ ਕੀਤਾ ਜਿੱਥੇ ਸ਼ਖਸ਼ੀਅਤਾਂ ਨੇ ਸਨਮਾਨਿਤ ਦੀ ਬਜਾਏ ਅਪਮਾਨਿਤ ਮਹਿਸੂਸ ਕੀਤਾ। ਇਥੇ ਇਹ ਵੀ ਜ਼ਿਕਰਯੋਗ ਹੈ ਕਿ ਪੰਜਾਬ ਦੀ ਸੱਤਾਧਾਰੀ ਪਾਰਟੀ ਦੇ ਆਗੂ ਭਾਵੇਂ ਪਿਛਲੀਆਂ ਰਵਾਇਤੀ ਪਾਰਟੀਆਂ ‘ਤੇ ਪਰਿਵਾਰਵਾਦ ਦਾ ਦੋਸ਼ ਲਗਾਉਂਦੇ ਰਹੇ ਹਨ ਪ੍ਰੰਤੂ ਸਮਾਗਮ ਦੌਰਾਨ ਵਿਧਾਇਕ ਦੀ ਗੈਰ ਹਾਜ਼ਰੀ ਵਿੱਚ ਵਿਧਾਇਕ ਦੇ ਨਾਬਾਲਿਗ ਪੁੱਤਰ ਦੀ ਅਧਿਕਾਰੀਆਂ ਨਾਲੋ ਵੱਧ ਪੁੱਛਗਿੱਛ ਨੇ ਹਾਜ਼ਰੀਨ ਦਾ ਧਿਆਨ ਖਿੱਚਿਆ। ਵਿਧਾਇਕ ਦੇ ਨਾਬਾਲਿਗ ਪੁੱਤਰ ਨਾਲੋਂ ਉਮਰ ਅਤੇ ਰੁਤਬੇ ਵਿੱਚ ਵੱਡੇ ਅਧਿਕਾਰੀ ਵੀ ਵਿਧਾਇਕ ਦੇ ਪੁੱਤਰ ਦੀ ਖ਼ਾਤਰਦਾਰੀ ਕਰਦੇ ਨਜ਼ਰ ਆਏ, ਜਦ ਕਿ ਇਸ ਸਟੇਜ ‘ਤੇ ਪੇਸ਼ਕਾਰੀ ਕਰਨ ਵਾਲੇ ਬੱਚਿਆਂ ਨੂੰ ਚੰਗੀ ਰਿਸੈਪਸ਼ਨ ਵੀ ਨਹੀਂ ਦਿੱਤੀ ਗਈ। ਇਸ ਮੌਕੇ ਪਿੰਡਾਂ ਤੋਂ ਆਏ ਸਰਪੰਚਾਂ ਨੂੰ ਵੀ ਨਿਰਾਸ਼ਾ ਦੇਖਣ ਨੂੰ ਮਿਲੀ ਕਿਉਕਿ ਸਨਮਾਨ ਲਈ ਬੁਲਾਏ ਬਹੁਤੇ ਸਰਪੰਚ ਸਨਮਾਨ ਤੋੰ ਵਾਂਝੇ ਰਹਿ ਗਏ। ਕੁਝ ਸਰਪੰਚਾਂ ਨੇ ਰੋਸ ਪ੍ਰਗਟ ਕੀਤਾ ਕਿ ਸੱਤਾਧਾਰੀ ਧਿਰ ਦੇ ਕੁਝ ਸਰਪੰਚਾਂ ਨੂੰ ਹੀ ਸਨਮਾਨ ਦਿੱਤਾ ਗਿਆ ਹੈ। ਇਸ ਮੌਕੇ ਇੱਕ ਅਧਿਆਪਕ ਨੇ ਆਪਣਾ ਨਾਮ ਗੁਪਤ ਰੱਖਣ ਦੀ ਸ਼ਰਤ ‘ਤੇ ਕਿਹਾ ਕਿ ਇਸ ਅਜ਼ਾਦੀ ਦਿਵਸ ਮੌਕੇ ਸਨਮਾਨਿਤ ਕੀਤੇ ਜਾਣ ਵਾਲੇ ਅਧਿਆਪਕਾਂ ਦੀ ਸੂਚੀ ਤਿਆਰ ਕਰਨ ਵੇਲੇ ਵੀ ਪੱਖਪਾਤ ਕੀਤਾ ਗਿਆ। ਉਹਨਾਂ ਕਿਹਾ ਕਿ ਜਿਹੜੇ ਅਧਿਆਪਕਾਂ ਨੇ ਆਪਣੀ ਸਖ਼ਤ ਮਿਹਨਤ ਨਾਲ ਬੱਚਿਆਂ ਨੂੰ ਪੜ੍ਹਾਈ ਦੇ ਨਾਲ ਨਾਲ ਜ਼ਿਲ੍ਹਾ ਪੱਧਰੀ ਅਤੇ ਸਟੇਟ ਪੱਧਰੀ ਖੇਡਾਂ ਵਿਚ ਅੱਗੇ ਲੈਕੇ ਆਂਦਾ ਉਹਨਾਂ ਅਧਿਆਪਕਾਂ ਨੂੰ ਅੱਖੋਂ ਪਰੋਖੇ ਕੀਤਾ ਗਿਆ ਅਤੇ ਹਲਕਾ ਵਿਧਾਇਕ ਦੀ ਨੇੜਤਾ ਵਾਲੇ ਇੱਕ ਅਧਿਆਪਕ ਦੀ ਸਿਫਾਰਸ਼ ‘ਤੇ ਕੁਝ ਅਧਿਆਪਕਾਂ ਨੂੰ “ਐਵੇਂ” ਹੀ ਸਨਮਾਨਿਤ ਕੀਤਾ ਗਿਆ ਜਦ ਕਿ ਉਹਨਾਂ ਦੀ ਕੋਈ ਖਾਸ ਪ੍ਰਾਪਤੀ ਵੀ ਨਹੀਂ ਹੈ। ਪ੍ਰਸ਼ਾਸਨ ਦੀ ਇਸ ਪੱਖਪਾਤੀ ਨੀਤੀ ਬਾਰੇ ਮੌਕੇ ‘ਤੇ ਹਾਜ਼ਰ ਅਧਿਆਪਕਾਂ ਨੇ ਘੁਸਰ ਮੁਸਰ ਵੀ ਕੀਤੀ। ਇਹ ਵੀ ਪਤਾ ਲੱਗਿਆ ਹੈ ਕਿ ਸਕੂਲ ਵਿੱਚ ਸਟੇਜ ਤਿਆਰ ਕਰਕੇ ਦੇਣ ਵਾਲੇ ਪਰਿਵਾਰ ਅਤੇ ਕੁਝ ਹੋਰ ਵਿਅਕਤੀਆਂ ਨੂੰ ਖੁਸ਼ ਕਰਨ ਲਈ ਉਹਨਾਂ ਦੇ ਕਹਿਣ ‘ਤੇ ਹੀ ਪ੍ਰਸ਼ਾਸਨ ਨੇ ਸਮਾਗਮ ਦਾ ਸਥਾਨ ਤਬਦੀਲ ਕਰ ਦਿੱਤਾ ਜਦਕਿ ਸਟੇਜ ਤਿਆਰ ਕਰਕੇ ਦੇਣ ਦਾ ਆਜ਼ਾਦੀ ਦਿਵਸ ਵਰਗੇ ਨੈਸ਼ਨਲ ਸਮਾਗਮ ਦੇ ਨਾਲ ਕੋਈ ਸਬੰਧ ਹੀ ਨਹੀਂ ਹੈ।
ਫੋਟੋ ਕੈਪਸ਼ਨ- ਮਹਿਲ ਕਲਾਂ ਵਿਖੇ ਆਜ਼ਾਦੀ ਦਿਵਸ ਮੌਕੇ ਮੀਂਹ ਕਾਰਨ ਸਟੇਜ ਦੇ ਸਾਹਮਣੇ ਬੇਤਰਤੀਬੇ ਢੰਗ ਨਾਲ ਖੜੇ ਲੋਕ
