ਚੰਡੀਗੜ੍ਹ,26 ਸਤੰਬਰ, Gee98 news service-
-ਬੁੱਧਵਾਰ ਦੇਰ ਰਾਤ ਲੁਧਿਆਣਾ ਵਿਖੇ ਇੱਕ ਅਜਿਹਾ ਹੰਗਾਮਾ ਹੋਇਆ ਜਿਸਨੇ “ਖ਼ਾਕੀ” ਦੇ ਕਿਰਦਾਰ ‘ਤੇ ਇੱਕ ਵਾਰ ਫਿਰ ਸਵਾਲ ਖੜੇ ਕਰ ਦਿੱਤੇ ਹਨ। ਲੁਧਿਆਣਾ ਪੱਖੋਵਾਲ ਰੋਡ ‘ਤੇ ਵਾਪਰੀ ਘਟਨਾ ਅਨੁਸਾਰ ਇੱਕ ਵਿਅਕਤੀ ਨੇ ਆਪਣੀ ਪਤਨੀ ਨੂੰ ਲੁਧਿਆਣਾ ਵਿਖੇ ਤਾਇਨਾਤ ਇੱਕ ਐਸਐਚਓ ਨਾਲ ਫਲੈਟ ਦੇ ਇੱਕ ਕਮਰੇ ‘ਚ ਫੜ ਲਿਆ, ਜਦ ਕਿ ਪਤਨੀ ਨੇ ਉਸਨੂੰ ਕਿਹਾ ਸੀ ਕਿ ਉਹ ਅੱਜ ਰਾਤ ਆਪਣੀ ਇੱਕ ਸਹੇਲੀ ਦੇ ਘਰ ਸਮਾਗਮ ‘ਚ ਜਾ ਰਹੀ ਹੈ। ਸੂਤਰਾਂ ਅਨੁਸਾਰ ਦੁੱਗਰੀ ਵਾਸੀ 24 ਸਾਲ ਦੇ ਨੌਜਵਾਨ ਨੇ ਦਸੰਬਰ 2024 ‘ਚ ਇਕ ਔਰਤ ਨਾਲ ਵਿਆਹ ਕਰਵਾਇਆ ਸੀ, ਜੋ ਉਸ ਤੋਂ ਉਮਰ ‘ਚ 7 ਸਾਲ ਵੱਡੀ ਤੇ ਤਲਾਕਸ਼ੁਦਾ ਸੀ, ਜਿਸ ਦੀ ਇਕ ਧੀ ਵੀ ਹੈ। ਉਸ ਔਰਤ ਨਾਲ ਉਸ ਦੀ ਮੁਲਾਕਾਤ ਦੁਬਈ ‘ਚ ਹੋਈ ਸੀ।ਬੁੱਧਵਾਰ ਨੂੰ ਪਤਨੀ ਨੇ ਉਸ ਨੂੰ ਆਪਣੀ ਸਹੇਲੀ ਦੇ ਘਰ ਜਾਣ ਦੀ ਗੱਲ ਕਹਿ ਕੇ ਚਲੀ ਗਈ, ਜਿਸ ਤੋਂ ਬਾਅਦ ਰਾਤ ਨੂੰ ਉਹ ਵੀ ਆਪਣੇ ਦੋਸਤਾਂ ਨਾਲ ਪੱਖੋਵਾਲ ਰੋਡ ‘ਤੇ ਇਕ ਰੈਸਟੋਰੈਂਟ ‘ਚ ਖਾਣਾ ਖਾਣ ਆ ਗਿਆ ਤਾਂ ਰੈਸਟੋਰੈਂਟ ਦੇ ਨੇੜੇ ਨੌਜਵਾਨ ਨੇ ਆਪਣੀ ਜਾਣ ਪਹਿਚਾਣ ਦੇ ਇੱਕ ਐਸਐਚਓ ਦੀ ਕਾਰ ਖੜ੍ਹੀ ਦੇਖੀ ਜਿਸ ਨਾਲ ਉਸਦੀ ਪਤਨੀ ਨੇ ਹੀ ਉਸਨੂੰ ਕੁਝ ਸਮਾਂ ਪਹਿਲਾਂ ਮਿਲਵਾਇਆ ਸੀ।
ਉਹ ਨੌਜਵਾਨ ਜਦ ਐਸ ਐਚ ਓ ਨੂੰ ਮਿਲਣ ਲਈ ਕਾਰ ਦੇ ਨੇੜੇ ਗਿਆ ਤਾਂ ਉਸਨੇ ਕਾਰ ਵਿੱਚ ਐਸਐਚਓ ਨਾਲ ਆਪਣੀ ਪਤਨੀ ਨੂੰ ਵੀ ਬੈਠੇ ਵੇਖਿਆ ਜਿਸ ਤੋਂ ਬਾਅਦ ਉਹ ਪਿਛਾਂਹ ਮੁੜ ਆਇਆ ਅਤੇ ਇੱਕ ਸਕੂਟਰੀ ‘ਤੇ ਕਾਰ ਦਾ ਪਿੱਛਾ ਕੀਤਾ। ਕਾਰ ਸਵਾਰ ਐਸਐਚਓ ਤੇ ਨੌਜਵਾਨ ਦੀ ਪਤਨੀ ਉਸ ਨੌਜਵਾਨ ਦੇ ਸਾਹਮਣੇ ਹੀ ਇੱਕ ਫਲੈਟ ਦੇ ਕਮਰੇ ਵਿੱਚ ਚਲੇ ਗਏ, ਜਿੱਥੇ ਬਾਹਰ ਖੜ ਕੇ ਨੌਜਵਾਨ ਨੇ ਆਪਣੀ ਪਤਨੀ ਨੂੰ ਫੋਨ ਕੀਤਾ ਤਾਂ ਪਹਿਲਾਂ ਉਸ ਨੇ ਫੋਨ ਨਹੀਂ ਚੁੱਕਿਆ ਤੇ ਬਾਅਦ ਵਿਚ ਸਹੇਲੀ ਨਾਲ ਹੋਣ ਦੀ ਗੱਲ ਕਰ ਕੇ ਫੋਨ ਕੱਟ ਦਿੱਤਾ। ਜਿਸ ਤੋਂ ਬਾਅਦ ਨੌਜਵਾਨ ਨੇ ਨੇੜੇ ਦੀ ਪੁਲਿਸ ਚੌਂਕੀ ਲਲਤੋਂ ਦੀ ਪੁਲਿਸ ਨਾਲ ਸੰਪਰਕ ਕੀਤਾ ਅਤੇ ਪੁਲਿਸ ਨੂੰ ਮੌਕੇ ‘ਤੇ ਬੁਲਾਇਆ, ਜਿਸ ਤੋਂ ਬਾਅਦ ਉੱਥੇ ਖ਼ੂਬ ਹੰਗਾਮਾ ਵੀ ਹੋਇਆ। ਭਾਵੇਂ ਕਿ ਪੁਲਿਸ ਨੇ ਇਸ ਮਾਮਲੇ ‘ਚ ਨੌਜਵਾਨ ਤੋਂ ਲਿਖਤੀ ਸ਼ਿਕਾਇਤ ਲੈ ਲਈ ਹੈ ਪ੍ਰੰਤੂ ਇਸ ਤੋਂ ਅੱਗੇ ਲਲਤੋਂ ਚੌਂਕੀ ਦੀ ਪੁਲਿਸ ਇਸ ਮਾਮਲੇ ‘ਚ ਕੁਝ ਵੀ ਦੱਸਣ ਲਈ ਤਿਆਰ ਨਹੀਂ ਹੈ। ਪ੍ਰਾਪਤ ਜਾਣਕਾਰੀ ਅਨੁਸਾਰ ਸਬੰਧਿਤ ਐਸਐਚਓ ਲੁਧਿਆਣਾ ਵਿਖੇ ਹੀ ਤਾਇਨਾਤ ਹੈ।
