ਚੰਡੀਗੜ੍ਹ,15 ਅਕਤੂਬਰ, Gee98 news service-
-ਅਮਰੀਕੀ ਪਾਸਪੋਰਟ ਦੁਨੀਆਂ ਦੇ ਟਾੱਪ-10 ਪਾਸਪੋਰਟ ਦੀ ਇੰਡੈਕਸ ਸੂਚੀ ‘ਚੋਂ ਬਾਹਰ ਹੋ ਗਿਆ ਹੈ। ਅਮਰੀਕੀ ਪਾਸਪੋਰਟ ਜੋ ਕਦੀ ਦੁਨੀਆ ਦਾ ਸਭ ਤੋਂ ਤਾਕਤਵਰ ਪਾਸਪੋਰਟ ਮੰਨਿਆ ਜਾਂਦਾ ਸੀ ਹੁਣ ਹੈਨਲੀ ਪਾਸਪੋਰਟ ਇੰਡੈਕਸ ਸੂਚੀ ਵਿੱਚ ਅਮਰੀਕਾ ਹੁਣ 12ਵੇਂ ਨੰਬਰ ‘ਤੇ ਮਲੇਸ਼ੀਆ ਨਾਲ ਆਪਣਾ ਸਥਾਨ ਸਾਂਝਾ ਕਰ ਰਿਹਾ ਹੈ। ਦੁਨੀਆਂ ਦੇ ਪਾਸਪੋਰਟਾਂ ਦੀ ਸੂਚੀ ਵਿੱਚ ਅਮਰੀਕਾ ਦੇ ਪਾਸਪੋਰਟ ਦੀ ਇਹ ਗਿਰਾਵਟ ਆਲਮੀ ਕੂਟਨੀਤੀ ਤੇ ਵੀਜ਼ਾ ਨੀਤੀਆਂ ‘ਚ ਬਦਲਾਅ ਦਾ ਸਿੱਟਾ ਹੈ, ਜਿਸਨੇ ਅਮਰੀਕੀ ਪਾਸਪੋਰਟ ਦੀ ਤਾਕਤ ਨੂੰ ਘੱਟ ਕਰ ਦਿੱਤਾ ਹੈ। ਟਰੰਪ ਦੀਆਂ ਉਥਲ-ਪੁਥਲ ਭਰੀਆਂ ਨੀਤੀਆਂ ਨੂੰ ਵੀ ਇਸਦੇ ਲਈ ਜ਼ਿੰਮੇਵਾਰ ਮੰਨਿਆ ਜਾ ਰਿਹਾ ਹੈ। ਇੰਟਰਨੈਸ਼ਨਲ ਏਅਰ ਟ੍ਰਾਂਸਪੋਰਟ ਐਸੋਸੀਏਸ਼ਨ (ਆਈਏਟੀਏ) ਦੇ ਡਾਟਾ ‘ਤੇ ਆਧਾਰਿਤ ਹੈਨਲੀ ਪਾਸਪੋਰਟ ਇੰਡੈਕਸ ਅਨੁਸਾਰ ਅਮਰੀਕੀ ਪਾਸਪੋਰਟ ਧਾਰਕਾਂ ਨੂੰ ਹੁਣ 227 ‘ਚੋਂ ਸਿਰਫ 180 ਦੇਸ਼ਾਂ ‘ਚ ਬਿਨਾਂ ਵੀਜ਼ਾ ਯਾਤਰਾ ਦੀ ਸਹੂਲਤ ਹੈ। ਇਹ ਗਿਣਤੀ ਇਕ ਦਹਾਕੇ ਪਹਿਲਾਂ ਦੇ ਟੌਪ ਰੈਂਕ ਦੇ ਮੁਕਾਬਲੇ ਕਾਫੀ ਘੱਟ ਹੈ।
ਵਿਸ਼ਵ ਦੇ ਕਿਹੜੇ ਮੁਲਕ ਦਾ ਪਾਸਪੋਰਟ ਹੈ ਸਭ ਤੋਂ ਤਾਕਤਵਰ
ਸਿੰਗਾਪੁਰ 193 ਦੇਸ਼ਾਂ ‘ਚ ਵੀਜ਼ਾਮੁਕਤ ਯਾਤਰਾ ਨਾਲ ਪਹਿਲੇ ਸਥਾਨ ‘ਤੇ ਹੈ, ਜਦਕਿ ਦੱਖਣੀ ਕੋਰੀਆ (190) ਤੇ ਜਾਪਾਨ (189) ਲੜੀਵਾਰ ਦੂਜੇ ਤੇ ਤੀਜੇ ਸਥਾਨ ‘ਤੇ ਹਨ। ਚੀਨ ਨੇ ਪਿਛਲੇ ਇਕ ਦਹਾਕੇ ‘ਚ ਆਪਣੀ ਪਾਸਪੋਰਟ ਤਾਕਤ ‘ਚ ਜ਼ਬਰਦਸਤ ਇਜ਼ਾਫਾ ਕੀਤਾ ਹੈ। 2015 ‘ਚ 94ਵੇਂ ਸਥਾਨ ‘ਤੇ ਰਿਹਾ ਚੀਨ ਹੁਣ 64ਵੇਂ ਸਥਾਨ ‘ਤੇ ਪਹੁੰਚ ਗਿਆ ਹੈ, ਜਿਸ ਵਿਚ 37 ਹੋਰ ਦੇਸ਼ਾਂ ‘ਚ ਵੀਜ਼ਾਮੁਕਤ ਯਾਤਰਾ ਦੀ ਸਹੂਲਤ ਸ਼ਾਮਲ ਹੋਈ ਹੈ ਤੇ ਕੁੱਲ ਗਿਣਤੀ 82 ‘ਤੇ ਪਹੁੰਚ ਗਈ ਹੈ। ਇਸਦੇ ਉਲਟ ਚੀਨ 76 ਦੇਸ਼ਾਂ ਦੇ ਲੋਕਾਂ ਨੂੰ ਬਿਨਾਂ ਵੀਜ਼ਾ ਆਪਣੇ ਇਥੇ ਆਉਣ ਦੀ ਇਜਾਜ਼ਤ ਦਿੰਦਾ ਹੈ, ਜੋ ਅਮਰੀਕਾ ਤੋਂ 30 ਵੱਧ ਹੈ। ਹਾਲ ਹੀ ਵਿਚ ਚੀਨ ਨੇ ਰੂਸ ਨੂੰ ਵੀ ਆਪਣੀ ਵੀਜ਼ਾਮੁਕਤ ਸੂਚੀ ‘ਚ ਸ਼ਾਮਲ ਕੀਤਾ ਹੈ। ਭਾਰਤ ਇਸ ਸੂਚੀ ‘ਚ 85ਵੇਂ ਸਥਾਨ ‘ਤੇ ਹੈ ਤੇ ਇਥੋਂ ਦੇ ਨਾਗਰਿਕ 57 ਦੇਸ਼ਾਂ ‘ਚ ਵੀਜ਼ਾ ਫ੍ਰੀ ਯਾਤਰਾ ਦਾ ਆਨੰਦ ਲੈਂਦੇ ਹਨ।
ਪਾਸਪੋਰਟ ਰੈਂਕ ਦੇ ਅਨੁਸਾਰ ਮੁਲਕਾਂ ਦੀ ਸੂਚੀ ਵਿੱਚ
1. ਸਿੰਗਾਪੁਰ, 2. ਦੱਖਣੀ ਕੋਰੀਆ, 3. ਜਾਪਾਨ, 4. ਜਰਮਨੀ, ਇਟਲੀ, ਲਗਜ਼ਮਬਰਗ, ਸਪੇਨ, ਸਵਿਟਜ਼ਰਲੈਂਡ, 5. ਆਸਟ੍ਰੀਆ, ਬੈਲਜੀਅਮ, ਡੈਨਮਾਰਕ, ਫਿਨਲੈਂਡ, ਫਰਾਂਸ, ਆਇਰਲੈਂਡ, ਨੀਦਰਲੈਂਡ, 6. ਗ੍ਰੀਸ, ਹੰਗਰੀ, ਨਿਊਜ਼ੀਲੈਂਡ, ਨਾਰਵੇ, ਪੁਰਤਗਾਲ, ਸਵੀਡਨ, 7. ਆਸਟ੍ਰੇਲੀਆ, ਜੇਕੀਆ, ਮਾਲਟਾ, ਪੋਲੈਂਡ, 8. ਕ੍ਰੋਏਸ਼ੀਆ, ਐਸਟੋਨੀਆ, ਯੂਏਈ, ਬ੍ਰਿਟੇਨ 9. ਕੈਨੇਡਾ, ਅਤੇ ਲਾਤਵੀਆ ਤੇ ਲਿੰਚੈਂਸਟਾਈਨ ਦੇਸ਼ ਦਸਵੇਂ ਸਥਾਨ ‘ਤੇ ਹਨ। ਜੇਕਰ ਭਾਰਤ ਦੇ ਗੁਆਂਢੀ ਮੁਲਕਾਂ ਦੀ ਗੱਲ ਕੀਤੀ ਜਾਵੇ ਤਾਂ
ਚੀਨ 64ਵੇਂ, ਭਾਰਤ 85ਵੇਂ, ਭੂਟਾਨ 92ਵੇਂ, ਮਿਆਂਮਾਰ 96ਵੇਂ, ਬੰਗਲਾਦੇਸ਼ 100ਵੇਂ, ਨੇਪਾਲ ਅਤੇ ਪਾਕਿਸਤਾਨ 101ਵੇਂ ਅਤੇ ਅਫ਼ਗਾਨਿਸਤਾਨ ਦੇ ਪਾਸਪੋਰਟ ਦਾ ਰੈਂਕ 106ਵਾਂ ਹੈ।
