ਚੰਡੀਗੜ੍ਹ ,15 ਅਕਤੂਬਰ, Gee98 News service-
-ਪੰਜਾਬ ਪੁਲਿਸ ਦੇ ਇੱਕ ਰੰਗੀਨ ਮਿਜ਼ਾਜ ਪੁਲਿਸ ਅਧਿਕਾਰੀ ਦੀਆਂ ਅਸ਼ਲੀਲ ਹਰਕਤਾਂ ਸਾਹਮਣੇ ਆਉਣ ਤੋਂ ਬਾਅਦ ਪੁਲਿਸ ਫੋਰਸ ਨੂੰ ਨਮੋਸ਼ੀ ਦਾ ਸਾਹਮਣਾ ਕਰਨਾ ਪੈ ਰਿਹਾ ਹੈ। ਜ਼ਿਕਰਯੋਗ ਹੈ ਕਿ ਜਲੰਧਰ ਦੇ ਫਿਲੌਰ ਪੁਲਿਸ ਸਟੇਸ਼ਨ ਦੇ ਮੁਅੱਤਲ ਕੀਤੇ ਐਸਐਚਓ ਭੂਸ਼ਣ ਕੁਮਾਰ ਦੀ ਇੱਕ ਔਰਤ ਨੇ ਪਹਿਲਾਂ ਇੱਕ ਆਡੀਓ ਵਾਇਰਲ ਕੀਤੀ ਸੀ ਜਿਸ ਵਿੱਚ ਐਸਐਚਓ ਉਸ ਔਰਤ ਨੂੰ ਆਪਣੇ ਕਮਰੇ ‘ਚ ਇਕੱਲੇ ਆਉਣ ਲਈ ਕਹਿ ਰਿਹਾ ਹੈ ਅਤੇ ਇਸ ਤੋਂ ਇਲਾਵਾ ਔਰਤ ਨੇ ਦੁਰਵਿਵਹਾਰ ਅਤੇ ਅਸ਼ਲੀਲ ਹਰਕਤਾਂ ਦਾ ਦੋਸ਼ ਵੀ ਲਗਾਇਆ ਸੀ। ਪੀੜ੍ਹਤ ਔਰਤ ਨੇ ਕਿਹਾ ਸੀ ਕਿ ਉਸਦੀ ਬੇਟੀ ਨਾਲ ਹੋਏ ਬਲਾਤਕਾਰ ਸਬੰਧੀ ਜਦੋਂ ਉਹ ਸ਼ਿਕਾਇਤ ਲੈ ਕੇ ਐਸ ਐਚ ਓ ਕੋਲ ਗਈ ਤਾਂ ਐਸਐਚਓ ਨੇ ਸ਼ਿਕਾਇਤ ਦਰਜ ਕਰਨ ਦੀ ਬਜਾਏ ਉਲਟਾ ਉਹਨਾਂ ਨਾਲ ਹੀ ਦੁਰਵਿਹਾਰ ਕੀਤਾ ਤੇ ਅਸ਼ਲੀਲ ਹਰਕਤਾਂ ਕੀਤੀਆਂ ਅਤੇ ਉਹਨਾਂ ਦੀ ਸ਼ਿਕਾਇਤ ਉੱਪਰ ਕੋਈ ਕਾਰਵਾਈ ਨਹੀਂ ਕੀਤੀ। ਇਸ ਮਾਮਲੇ ਨੂੰ ਗੰਭੀਰਤਾ ਨਾਲ ਲੈਂਦੇ ਹੋਏ ਜ਼ਿਲ੍ਹਾ ਪੁਲਿਸ ਮੁਖੀ ਨੇ ਐਸਐਚਓ ਨੂੰ ਪਹਿਲਾਂ ਲਾਈਨ ਹਾਜ਼ਰ ਕੀਤਾ ਅਤੇ ਫਿਰ ਪੰਜਾਬ ਮਹਿਲਾ ਕਮਿਸ਼ਨ ਵੱਲੋਂ ਨੋਟਿਸ ਲਏ ਜਾਣ ਤੋਂ ਬਾਅਦ ਮੁਅੱਤਲ ਕਰ ਦਿੱਤਾ ਸੀ। ਹੁਣ ਇੱਕ ਹੋਰ ਔਰਤ ਨੇ ਐਸਐਚਓ ਭੂਸ਼ਣ ਕੁਮਾਰ ਦੀ ਇੱਕ ਆਡੀਓ ਕਲਿੱਪ ਪੰਜਾਬ ਮਹਿਲਾ ਕਮਿਸ਼ਨ ਅਤੇ ਲੋਕ ਇਨਸਾਫ਼ ਮੰਚ ਨੂੰ ਦਿੱਤੀ ਹੈ ਜਿਸ ਵਿੱਚ ਐਸਐਚਓ ਭੂਸ਼ਨ ਕੁਮਾਰ ਇੱਕ ਔਰਤ ਨਾਲ ਗੱਲਬਾਤ ਕਰਦੇ ਹੋਏ ਕਹਿੰਦਾ ਸੁਣਿਆ ਜਾ ਸਕਦਾ ਹੈ ਕਿ “ਕਿਉਂ ਮੈਨੂੰ ਤਰਸਾਈ ਜਾਂਦੀ ਏ, ਜਲਦੀ ਆਜਾ..। ਪੁਲਿਸ ਅਧਿਕਾਰੀ ਭੂਸ਼ਣ ਕੁਮਾਰ ਦੀ ਦੂਜੀ ਆਡੀਓ ਕਲਿੱਪ ਵਾਇਰਲ ਕਰਨ ਵਾਲੀ ਪੀੜ੍ਹਤ ਔਰਤ ਦਾ ਕਹਿਣਾ ਹੈ ਕਿ ਉਹ ਕਿਸੇ ਸ਼ਿਕਾਇਤ ਨੂੰ ਲੈ ਕੇ ਇੱਕ ਵਾਰ ਪੁਲਿਸ ਸਟੇਸ਼ਨ ਗਈ ਸੀ ਜਿੱਥੇ ਐਸਐਚਓ ਨੇ ਉਸਦਾ ਨੰਬਰ ਲਿਆ ਤੇ ਉਸਨੂੰ ਫੋਨ ਕਰਨਾ ਸ਼ੁਰੂ ਕਰ ਦਿੱਤਾ। ਉਸਨੇ ਕਿਹਾ ਕਿ ਐਸਐਚਓ ਉਸ ਨੂੰ ਇਕੱਲੇ ਆਪਣੇ ਕਮਰੇ ਵਿੱਚ ਬੁਲਾਉਂਦਾ ਸੀ ਤੇ ਉਸਨੇ ਕਈ ਵਾਰ ਜਨਤਕ ਤੌਰ ‘ਤੇ ਜੱਫ਼ੀ ਪਾਉਣ ਦੀ ਕੋਸ਼ਿਸ਼ ਵੀ ਕੀਤੀ। ਇਸ ਰੰਗੀਨ ਮਿਜ਼ਾਜ ਪੁਲਿਸ ਅਧਿਕਾਰੀ ਦੀਆਂ ਆਡੀਓ ਕਲਿੱਪਾਂ ਸਾਹਮਣੇ ਆਉਣ ਤੋਂ ਬਾਅਦ ਇਸਦੀਆਂ ਵਿਭਾਗੀ ਮੁਸ਼ਕਲਾਂ ਵੀ ਵਧਣਗੀਆਂ। ਲੋਕ ਇਨਸਾਫ਼ ਮੰਚ ਫਿਲੌਰ ਦੇ ਆਗੂਆਂ ਨੇ ਕਿਹਾ ਕਿ ਇਸੇ ਐਸਐਚਓ ਦੇ ਖ਼ਿਲਾਫ਼ ਛੋਟੀ ਜਿਹੀ ਕਾਰਵਾਈ ਨੂੰ ਬਰਦਾਸ਼ਤ ਨਹੀਂ ਕੀਤਾ ਜਾਵੇਗਾ ਸਗੋਂ ਇਸ ਦੇ ਖਿਲਾਫ ਸਖ਼ਤ ਕਾਰਵਾਈ ਕਰਵਾਉਣ ਲਈ ਸੰਘਰਸ਼ ਵੀ ਕੀਤਾ ਜਾ ਸਕਦਾ ਹੈ।
