ਬਰਨਾਲਾ ,15 ਨਵੰਬਰ, (ਨਿਰਮਲ ਸਿੰਘ ਪੰਡੋਰੀ)-
-ਨਗਰ ਕੌਂਸਲ ਬਰਨਾਲਾ ਦੇ ਵਿਹੜੇ ‘ਚ ਭ੍ਰਿਸ਼ਟਾਚਾਰ ਦਾ ਨਾਚਾਰ ਝਾਂਜਰਾਂ ਪਾ ਕੇ ਖੁੱਲ੍ਹ ਕੇ ਨੱਚ ਰਿਹਾ ਹੈ ਅਤੇ ਭ੍ਰਿਸ਼ਟਾਚਾਰ ਦੀ ਇਹ ਛਣਕਾਰ ਸ਼ਹਿਰੀ ਲੋਕਾਂ ਦੇ ਕੰਨ ਤਾਂ ਬੋਲੇ ਕਰ ਰਹੀ ਹੈ ਪ੍ਰੰਤੂ ਸੱਤਾਧਾਰੀ ਪਾਰਟੀ ਨਾਲ ਸੰਬੰਧਿਤ ਸਥਾਨਕ ਆਗੂਆਂ ਨੂੰ ਇਸ ਛਣਕਾਰ ਦਾ ਰੌਲਾ ਗੌਲਾ ਸੁਣਾਈ ਨਹੀਂ ਦੇ ਰਿਹਾ। ਨਗਰ ਕੌਂਸਲ ਵਿੱਚ ਭ੍ਰਿਸ਼ਟਾਚਾਰ ਦੇ ਮੁੱਦੇ ‘ਤੇ ਬਰਨਾਲਾ ਨਾਲ ਸੰਬੰਧਿਤ ਸੱਤਾਧਾਰੀ ਆਗੂਆਂ ਨੇ ਅੱਖਾਂ ਅਤੇ ਕੰਨ ਬੰਦ ਕੀਤੇ ਹੋਏ ਹਨ, ਅਜਿਹਾ ਸ਼ਾਇਦ ਇਸ ਕਰਕੇ ਵੀ ਹੈ ਕਿ ਨਗਰ ਕੌਂਸਲ ਦੇ ਵਿਹੜੇ ਭ੍ਰਿਸ਼ਟਾਚਾਰ ਦਾ ਨਾਚਾਰ ਨੱਚ ਰਿਹਾ ਹੈ ਅਤੇ ਸੱਤਾਧਾਰੀ ਆਗੂ ਢੋਲ ਤੇ ਤਾੜੀਆਂ ਵਜਾ ਰਹੇ ਹਨ ਭਾਵ ਕਿ ਕੁਝ ਸੱਤਾਧਾਰੀ ਆਗੂਆਂ ਦੀ ਨਗਰ ਕੌਂਸਲ ਦੇ ਭ੍ਰਿਸ਼ਟਾਚਾਰ ‘ਚ ਸਿੱਧੀ ਸ਼ਮੂਲੀਅਤ ਵੀ ਹੋ ਸਕਦੀ ਹੈ ਸ਼ਾਇਦ ਇਸੇ ਕਰਕੇ ਬਰਨਾਲਾ ਨਾਲ ਸੰਬੰਧਿਤ ਸੱਤਾਧਾਰੀ ਧਿਰ ਦੇ “ਵੱਡੇ ਨੇਤਾ ਜੀ” ਨੇ ਚੁੱਪ ਵੱਟੀ ਹੋਈ ਹੈ। ਪਿਛਲੇ ਲੰਮੇ ਸਮੇਂ ਤੋਂ ਨਗਰ ਕੌਂਸਲ ਵਿੱਚ ਭ੍ਰਿਸ਼ਟਾਚਾਰ ਦੀਆਂ ਖ਼ਬਰਾਂ ਪ੍ਰਮੁੱਖਤਾ ਨਾਲ ਛਪ ਰਹੀਆਂ ਹਨ ਪ੍ਰੰਤੂ ਪਿਛਲੇ ਦਿਨੀਂ ਨਗਰ ਕੌਂਸਲ ਦੇ ਵਿਹੜੇ ‘ਚ ਇੱਕ ਜੇਈ ਅਤੇ ਠੇਕੇਦਾਰ ਦੇ ਆਪਸ ਵਿੱਚ ਥੱਪੜੋ ਥੱਪੜੀ ਹੋਣ ਦੀ ਕਹਾਣੀ ਨੇ ਸਾਰਾ ਕਿੱਸਾ ਨਗਰ ਕੌਸਲ ਦੀਆਂ ਕੰਧਾਂ ‘ਤੇ ਛਾਪ ਦਿੱਤਾ ਹੈ ਕਿ ਕਿਵੇਂ ਨਗਰ ਕੌਂਸਲ ‘ਚ ਵਿਕਾਸ ਕੰਮਾਂ ਨਾਲ ਸੰਬੰਧਿਤ ਭ੍ਰਿਸ਼ਟਾਚਾਰ ਦੀ ਵੱਡੀ ਖੇਡ ਖੇਡੀ ਜਾ ਰਹੀ ਹੈ। ਹੈਰਾਨੀ ਇਸ ਗੱਲ ਦੀ ਵੀ ਹੈ ਕਿ ਭ੍ਰਿਸ਼ਟਾਚਾਰ ਦੇ ਵੱਡੇ ਸਬੂਤ ਸਾਹਮਣੇ ਆਉਣ ਦੇ ਬਾਵਜੂਦ ਵੀ ਲੰਮੇ ਸਮੇਂ ਤੋਂ ਨਗਰ ਕੌਂਸਲ ਦਾ ਵੱਡਾ ਅਫ਼ਸਰ ਕੁਰਸੀ ‘ਤੇ ਟਿਕਿਆ ਹੋਇਆ ਹੈ ਜੋ “ਵੱਡੇ ਨੇਤਾ ਜੀ” ਦੇ ਅਸ਼ੀਰਵਾਦ ਤੋਂ ਬਿਨਾਂ ਹੋ ਹੀ ਨਹੀਂ ਸਕਦਾ। ਨਗਰ ਕੌਂਸਲ ਬਰਨਾਲਾ ਹੀ ਨਹੀਂ ਸਗੋਂ ਨਗਰ ਕੌਸਲ ਧਨੌਲਾ ਵਿੱਚ ਵੀ ਕਰੋੜਾਂ ਰੁਪਏ ਦੇ ਘਪਲੇ ਦੀਆਂ ਖ਼ਬਰਾਂ ਪ੍ਰਮੁੱਖਤਾ ਨਾਲ ਲੱਗਦੀਆਂ ਰਹੀਆਂ ਪਰੰਤੂ ਇਸ ਦੇ ਬਾਵਜੂਦ ਵੀ ਸੱਤਾਧਾਰੀ ਆਗੂਆਂ ਨੇ ਭ੍ਰਿਸ਼ਟਾਚਾਰ ਦੇ ਮੁੱਦੇ ‘ਤੇ ਚੁੱਪ ਵੱਟੀ ਹੋਈ ਹੈ ਜਦਕਿ ਆਮ ਆਦਮੀ ਪਾਰਟੀ ਨੇ 2022 ਦੀਆਂ ਵਿਧਾਨ ਸਭਾ ਚੋਣਾਂ ਤੋਂ ਪਹਿਲਾਂ ਭ੍ਰਿਸ਼ਟਾਚਾਰ ਨੂੰ ਪੂਰੀ ਤਰ੍ਹਾਂ ਖ਼ਤਮ ਕਰਨ ਦਾ ਵਾਅਦਾ ਲੋਕਾਂ ਨਾਲ ਕੀਤਾ ਸੀ ਪਰੰਤੂ ਜੇਕਰ ਬਰਨਾਲਾ ਦੀ ਗੱਲ ਕੀਤੀ ਜਾਵੇ ਤਾਂ ਬਰਨਾਲਾ ‘ਚ ਆਪ ਸਰਕਾਰ ਬਣਨ ਤੋਂ ਬਾਅਦ ਭ੍ਰਿਸ਼ਟਾਚਾਰੀ ਦੈਂਤ ਦੇ ਦੰਦ ਹੋਰ ਵੱਡੇ ਹੋਏ ਹਨ ਅਤੇ ਇਹ ਇਮਾਨਦਾਰੀ ਨੂੰ ਕੜੱਕ ਕੜੱਕ ਕਰਕੇ ਨਿਗਲ ਰਿਹਾ ਹੈ। ਦੂਜੇ ਪਾਸੇ ਸੱਤਾਧਾਰੀ ਪਾਰਟੀ ਦੇ ਆਗੂਆਂ ਵੱਲੋਂ ਭ੍ਰਿਸ਼ਟਾਚਾਰੀ ਦੈਂਤ ਦੇ ਦੰਦ ਤੋੜਨ ਦੀ ਬਜਾਏ ਚਾਪਲੂਸੀ ਦਾ ਵੱਡਾ ਬੁਰਸ਼ ਲੈ ਕੇ ਇਸ ਤੇ ਦੰਦਾਂ ਨੂੰ ਹੋਰ ਚਮਕਾਇਆ ਜਾ ਰਿਹਾ ਹੈ। ਬਰਨਾਲਾ ‘ਚ ਭ੍ਰਿਸ਼ਟਾਚਾਰ ਦੇ ਮੁੱਦੇ ‘ਤੇ ਪੱਤਰਕਾਰ ਜਦ “ਵੱਡੇ ਨੇਤਾ ਜੀ” ਨੂੰ ਸਵਾਲ ਕਰਨ ਲੱਗਦੇ ਹਨ ਤਾਂ ਨੇਤਾ ਜੀ ਆਪਣੇ ਕਾਲਰ ‘ਤੇ ਲੱਗਿਆ ਪੱਤਰਕਾਰਾਂ ਦਾ ਮਾਈਕਰੋਫੋਨ (ਛੋਟਾ ਮਾਈਕ) ਲਾਹ ਕੇ ਤੁਰਦੇ ਬਣਦੇ ਹਨ। ਵੱਡੇ ਨੇਤਾ ਜੀ ਸ਼ਹਿਰ ਵਿੱਚ ਜਦੋਂ ਕਿਸੇ ਜਨਤਕ ਸਮਾਗਮ ਵਿੱਚ ਸ਼ਾਮਿਲ ਹੁੰਦੇ ਹਨ ਤਾਂ ਉਹਨਾਂ ਦੇ ਸਾਥੀਆਂ ਵੱਲੋਂ ਕੁਝ ਪੱਤਰਕਾਰਾਂ ਨੂੰ ਪਹਿਲਾਂ ਹੀ ਕਹਿ ਦਿੱਤਾ ਜਾਂਦਾ ਹੈ ਕਿ ਇਸ ਸਮਾਗਮ ਨਾਲ ਸੰਬੰਧਿਤ ਸਵਾਲ ਹੀ ਪੁੱਛਿਓ, ਹੈਰਾਨੀ ਇਸ ਗੱਲ ਦੀ ਹੈ ਕਿ ਲੋਕਾਂ ਨੂੰ ਸਵਾਲ ਕਰਨੇ ਸਿਖਾਉਣ ਵਾਲੇ ਹੁਣ ਖੁਦ ਸਵਾਲਾਂ ਤੋਂ ਭੱਜ ਰਹੇ ਹਨ। ਨਗਰ ਕੌਂਸਲ ਬਰਨਾਲਾ ‘ਚ ਵਿਕਾਸ ਕਾਰਜਾਂ ਨਾਲ ਸੰਬੰਧਿਤ ਭ੍ਰਿਸ਼ਟਾਚਾਰ ਦੇ ਹਾਲਾਤ ਇੱਥੋਂ ਤੱਕ ਮਾੜੇ ਹੋ ਚੁੱਕੇ ਹਨ ਕਿ ਜੇਕਰ ਸਮਾਂ ਰਹਿੰਦੇ ਸੱਤਾਧਾਰੀ ਪਾਰਟੀ ਦੇ ਆਗੂਆਂ ਨੇ ਇਸ ਵੱਲ ਧਿਆਨ ਨਾ ਦਿੱਤਾ ਅਤੇ ਜ਼ਿੰਮੇਵਾਰ ਵੱਡੇ ਅਫ਼ਸਰਾਂ ਤੇ ਆਗੂਆਂ ਦੇ ਖ਼ਿਲਾਫ਼ ਬਣਦੀ ਕਾਰਵਾਈ ਨਾ ਕੀਤੀ ਤਾਂ ਆਗਾਮੀ ਕਿਸੇ ਵੀ ਚੋਣ ਵਿੱਚ ਨਗਰ ਕੌਂਸਲ ਦੇ ਵਿਹੜੇ ‘ਚ ਨੱਚ ਰਿਹਾ ਭ੍ਰਿਸ਼ਟਾਚਾਰ ਦਾ ਇਹ ਨਾਚਾਰ ਸੱਤਾਧਾਰੀ ਪਾਰਟੀ ਦੀ ਹਾਰ ਦੀਆਂ ਸਿਆਸੀ ਬੋਲੀਆਂ ਵੀ ਪਾ ਸਕਦਾ ਹੈ। ਨਗਰ ਕੌਂਸਲ ‘ਚ ਭ੍ਰਿਸ਼ਟਾਚਾਰ ਨਾਲ ਸਬੰਧਿਤ ਇੱਕ ਵੱਡਾ ਪੱਖ ਇਹ ਵੀ ਸਾਹਮਣੇ ਆ ਰਿਹਾ ਕਿ ਠੇਕੇਦਾਰ ਅਮਨਦੀਪ ਸ਼ਰਮਾ ਵੱਲੋਂ ਲਿਖਤੀ ਤੌਰ ‘ਤੇ ਵਿਜੀਲੈਂਸ ਬਿਊਰੋ ਨੂੰ ਸ਼ਿਕਾਇਤ ਵੀ ਦੇ ਦਿੱਤੀ ਗਈ ਹੈ, ਹੁਣ ਇਹ ਵੀ ਵੇਖਣਯੋਗ ਹੋਵੇਗਾ ਕਿ ਵਿਜੀਲੈਂਸ ਨਗਰ ਕੌਂਸਲ ਦੇ ਵਿਹੜੇ ‘ਚ ਨੱਚ ਰਹੇ ਭ੍ਰਿਸ਼ਟਾਚਾਰ ਦੇ ਨਚਾਰ ਨੂੰ ਕਾਬੂ ਕਰਦੀ ਹੈ ਜਾਂ ਫਿਰ ਪੜ੍ਹਤਾਲ ਦੇ ਨਾਮ ‘ਤੇ ਇਹ ਮੁੱਦਾ ਠੰਡੇ ਬਸਤੇ ਵਿੱਚ ਪਾ ਦਿੱਤਾ ਜਾਵੇਗਾ ਕਿਉਂਕਿ ਇਹਦਾ ਕੋਈ ਲੁਕਿਆ ਛੁਪਿਆ ਨਹੀਂ ਕਿ ਨਗਰ ਕੌਂਸਲ ਦੇ ਭ੍ਰਿਸ਼ਟਾਚਾਰ ਵਿੱਚ ਇਕੱਲੇ ਅਧਿਕਾਰੀ ਹੀ ਨਹੀਂ ਸਗੋਂ ਸੱਤਾਧਾਰੀ ਪਾਰਟੀ ਨਾਲ ਸੰਬੰਧਿਤ ਕੁਝ ਆਗੂਆਂ ਦੀ ਸ਼ਮੂਲੀਅਤ ਵੀ ਸਿੱਧੇ ਤੌਰ ‘ਤੇ ਸਾਹਮਣੇ ਆ ਰਹੀ ਹੈ।
