ਬਰਨਾਲਾ,6 ਮਾਰਚ, (Gee98 news service)-
ਉੰਝ ਤਾਂ ਭਾਵੇਂ ਕਿਸੇ ਵੀ ਰਾਜ ਦੀਆਂ ਵਿਧਾਨ ਸਭਾ ਚੋਣਾਂ ਤੋਂ 4-5 ਮਹੀਨੇ ਪਹਿਲਾਂ ਹੀ ਸੱਤਾਧਾਰੀ ਪਾਰਟੀ ਪ੍ਰਤੀ ਲੋਕਾਂ ਦੇ ਰੁਝਾਨ ਆਉਣੇ ਸ਼ੁਰੂ ਹੁੰਦੇ ਹਨ ਪ੍ਰੰਤੂ ਵਿਧਾਨ ਸਭਾ ਹਲਕਾ ਮਹਿਲ ਕਲਾਂ ‘ਚ ਇਹ ਰੁਝਾਨ ਕਰੀਬ ਇਕ ਸਾਲ ਪਹਿਲਾਂ ਹੀ ਆਉਣੇ ਸ਼ੁਰੂ ਹੋ ਗਏ ਹਨ। ਹਲਕਾ ਮਹਿਲ ਕਲਾਂ ਅਧੀਨ ਪੈਂਦੇ ਪੰਚਾਇਤ ਸੰਮਤੀ ਸ਼ੇਰਪੁਰ ਦੇ ਚੇਅਰਮੈਨ ਦੀ ਚੋਣ ਦੌਰਾਨ ਵਾਪਰੇ ਘਟਨਾਕ੍ਰਮ ਨੇ ਇਹ ਸਪੱਸ਼ਟ ਕਰ ਦਿੱਤਾ ਹੈ ਕਿ ਹਲਕਾ ਵਿਧਾਇਕ ਲਈ ਅਗਲੀ ਸਿਆਸੀ ਪਾਰੀ ਉਸ ਦੀਆਂ ਪਹਿਲੀਆਂ ਦੋ ਪਾਰੀਆਂ ਵਾਂਗ ਸੌਖੀ ਨਹੀਂ ਹੋਵੇਗੀ। ਪੰਚਾਇਤ ਸੰਮਤੀ ਸ਼ੇਰਪੁਰ ਦੇ ਚੇਅਰਮੈਨ ਦੀ ਚੋਣ ਵਿੱਚ ਹਲਕਾ ਵਿਧਾਇਕ ਵੀ ਥਾਪੜਾ ਪ੍ਰਾਪਤ ਉਮੀਦਵਾਰ ਨੂੰ ਸੱਤਾਧਾਰੀ ਪਾਰਟੀ ਦੇ ਹੀ ਇੱਕ ਹੋਰ ਉਮੀਦਵਾਰ ਨੇ ਕਾਂਗਰਸ ਅਤੇ ਅਕਾਲੀ ਦਲ ਦੇ ਪੰਚਾਇਤ ਸੰਮਤੀ ਮੈਂਬਰਾਂ ਦੀ ਮਦਦ ਨਾਲ ਹਰਾ ਦਿੱਤਾ। ਇੱਥੇ ਇਹ ਗੱਲ ਜ਼ਿਕਰ ਕਰਨੀ ਜਰੂਰੀ ਬਣਦੀ ਹੈ ਕਿ ਚੇਅਰਮੈਨ ਚੁਣੇ ਗਏ ਚਰਨਾ ਖੇੜੀ ਨੂੰ ਆਮ ਆਦਮੀ ਪਾਰਟੀ ਦੇ ਕਈ ਬਲਾਕ ਪ੍ਰਧਾਨਾਂ ਸਮੇਤ ਹਲਕ ਦੇ ਵੱਡੇ ਪਾਰਟੀ ਆਗੂਆਂ ਦਾ ਵੀ ਪੂਰਾ ਥਾਪੜਾ ਸੀ। ਆਪ ਦੇ ਅੰਦਰੂਨੀ ਸੂਤਰਾਂ ਅਨੁਸਾਰ ਇਹ ਹਾਲਾਤ ਇਸ ਕਰਕੇ ਪੈਦਾ ਹੋਏ ਕਿ ਹਲਕਾ ਵਿਧਾਇਕ ਦੇ ਧੜੇ ਵੱਲੋਂ ਪਹਿਲਾਂ ਚਰਨੀ ਖੇੜੀ ਨੂੰ ਥਾਪੜਾ ਦਿੱਤਾ ਗਿਆ ਸੀ ਪ੍ਰੰਤੂ ਬਾਅਦ ਵਿੱਚ ਦੂਜੇ ਉਮੀਦਵਾਰ ਨੂੰ ਥਾਪੜਾ ਦੇ ਦਿੱਤਾ ਗਿਆ। ਸੂਤਰਾਂ ਅਨੁਸਾਰ ਆਮ ਆਦਮੀ ਪਾਰਟੀ ਲਈ ਕਈ ਵਰ੍ਹਿਆਂ ਤੋਂ ਤਨਦੇਹੀ ਨਾਲ ਨਿਰਸਵਾਰਥ ਕੰਮ ਕਰਨ ਵਾਲੇ ਕਈ ਆਗੂਆਂ ਨੂੰ ਹਲਕਾ ਵਿਧਾਇਕ ਦੀ ਇਹ ਰਣਨੀਤੀ ਚੰਗੀ ਨਾ ਲੱਗੀ ਅਤੇ ਉਹਨਾਂ ਨੇ ਕਾਂਗਰਸ ਅਤੇ ਅਕਾਲੀ ਦਲ ਦੇ ਪੰਚਾਇਤ ਸੰਮਤੀ ਮੈਂਬਰਾਂ ਨਾਲ ਸੰਪਰਕ ਸਾਧਿਆ ਜਿਸ ਦਾ ਨਤੀਜਾ ਇਹ ਨਿਕਲਿਆ ਕਿ ਹਲਕਾ ਵਿਧਾਇਕ ਦਾ ਥਾਪੜਾ ਪ੍ਰਾਪਤ ਪੰਚਾਇਤ ਸੰਮਤੀ ਮੈਂਬਰ ਚੇਅਰਮੈਨ ਦੀ ਕੁਰਸੀ ਤੱਕ ਨਹੀਂ ਪੁੱਜਿਆ, ਸਗੋਂ ਹਲਕਾ ਵਿਧਾਇਕ ਵੱਲੋਂ ਕੱਢੀ ਲਕੀਰ ਦੇ ਦੂਜੇ ਪਾਸੇ ਖੜਾ ਵਿਅਕਤੀ ਸ਼ਾਨਦਾਰ ਜਿੱਤ ਪ੍ਰਾਪਤ ਕਰ ਗਿਆ। ਅੰਕੜਿਆਂ ਮੁਤਾਬਕ ਭਾਵੇਂ ਚਰਨੇ ਖੇੜੀ ਨੂੰ ਸਪੱਸ਼ਟ ਤੌਰ ‘ਤੇ ਅਕਾਲੀ ਦਲ ਤੇ ਕਾਂਗਰਸ ਦੇ ਮੈਂਬਰਾਂ ਦੀਆਂ ਵੋਟਾਂ ਪਈਆਂ ਹਨ ਪਰੰਤੂ “ਪਿਆਰ ਤੇ ਜੰਗ” ਵਿੱਚ ਸਭ ਕੁਝ ਜਾਇਜ਼ ਮੰਨਿਆ ਜਾਂਦਾ ਹੈ।
ਪੰਚਾਇਤ ਸੰਮਤੀ ਸ਼ੇਰਪੁਰ ਦੇ ਚੇਅਰਮੈਨ ਦੀ ਚੋਣ ‘ਚ ਬਣੇ ਇਹ ਸਿਆਸੀ ਸਮੀਕਰਨ ਇਹ ਵੀ ਸਪੱਸ਼ਟ ਕਰਦੇ ਹਨ ਕਿ ਹਲਕਾ ਵਿਧਾਇਕ ਦੀ ਪਕੜ ਆਪਣੀ ਹੀ ਪਾਰਟੀ ‘ਤੇ ਆਗੂਆਂ ‘ਤੇ ਢਿੱਲੀ ਪੈ ਰਹੀ ਹੈ। ਦੂਜੇ ਪਾਸੇ ਪੰਚਾਇਤ ਸੰਮਤੀ ਮਹਿਲ ਕਲਾਂ ਦੀ ਚੇਅਰਮੈਨ ਦੀ ਚੋਣ ‘ਚ ਭਾਵੇਂ ਕੁੱਲ 25 ਮੈਂਬਰਾਂ ਵਿੱਚੋਂ 24 ਹਾਜ਼ਰ ਮੈਂਬਰਾਂ ਨੇ ਸਰਬ ਸੰਮਤੀ ਨਾਲ ਚੇਅਰਮੈਨ ਦੀ ਚੋਣ ਕੀਤੀ ਪ੍ਰੰਤੂ ਇੱਥੇ ਇੱਕੋ-ਇੱਕ ਮੈਂਬਰ ਦੀ ਗ਼ੈਰ ਹਾਜ਼ਰੀ ਨੇ ਵੱਡੇ ਸਵਾਲ ਖੜੇ ਕੀਤੇ ਹਨ। ਪੰਚਾਇਤ ਸੰਮਤੀ ਮਹਿਲ ਕਲਾਂ ‘ਚ ਵੀ ਆਉਣ ਵਾਲੇ ਸਮੇਂ ‘ਚ ਸਿਆਸੀ ਸਮੀਕਰਨ ਬਦਲਣ ਦੀ ਸੰਭਾਵਨਾ ਤੋਂ ਇਨਕਾਰ ਨਹੀਂ ਕੀਤਾ ਜਾ ਸਕਦਾ ਕਿਉਂਕਿ ਇੱਥੇ ਵੀ ਪਹਿਲਾਂ ਹਲਕਾ ਵਿਧਾਇਕ ਨੇ ਹੋਰ ਮੈਂਬਰਾਂ ਨੂੰ ਥਾਪੜਾ ਦਿੱਤਾ ਸੀ ਪ੍ਰੰਤੂ ਐਨ ਮੌਕੇ ‘ਤੇ ਆਪਣਾ ਫੈਸਲਾ ਵਿਧਾਇਕ ਨੇ ਬਦਲ ਲਿਆ। ਪੰਚਾਇਤ ਸੰਮਤੀ ਮਹਿਲ ਕਲਾਂ ਦੀਆਂ ਚੋਣਾਂ ਤੋਂ ਪਹਿਲਾਂ ਉਪ ਚੇਅਰਮੈਨ ਲਈ ਹਲਕਾ ਵਿਧਾਇਕ ਵੱਲੋਂ ਕੀਤਾ ਵਾਅਦਾ ਵੀ ਵਫ਼ਾ ਨਹੀਂ ਹੋਇਆ, ਸੂਤਰਾਂ ਅਨੁਸਾਰ ਵਿਧਾਇਕ ਨੇ ਛੇਵੇਂ ਪਾਤਸ਼ਾਹ ਦੀ ਚਰਨ ਛੋਹ ਪ੍ਰਾਪਤ ਅਸਥਾਨ ‘ਤੇ ਸੰਮਤੀ ਦੇ ਉਪ ਚੇਅਰਮੈਨ ਦਾ ਵਾਅਦਾ ਕੀਤਾ ਸੀ ਪ੍ਰੰਤੂ ਚੋਣ ਮੌਕੇ ਵਾਅਦੇ ਵਾਲੇ ਚਿਹਰੇ ਨੂੰ ਅੱਖੋਂ ਪਰੋਖੇ ਕੀਤਾ ਗਿਆ। ਹਲਕਾ ਵਿਧਾਇਕ ਵੱਲੋਂ ਐਨ ਮੌਕੇ ‘ਤੇ ਆ ਕੇ ਬਦਲਿਆ ਗਿਆ ਫੈਸਲਾ ਹੈਰਾਨ ਕਰਨ ਵਾਲਾ ਹੀ ਹੈ। ਦੱਸ ਦੇਈਏ ਕਿ ਆਪਣੀ ਹੀ ਪਾਰਟੀ ਅੰਦਰ ਇੱਕੋ ਹੀ ਪਿੰਡ ‘ਚ ਦੋ-ਦੋ ਧੜੇ ਤਿਆਰ ਕਰਨ ਦੀ ਇਹ ਰਣਨੀਤੀ ਅਕਾਲੀ ਭਾਜਪਾ ਸਰਕਾਰ ਮੌਕੇ ਅਕਾਲੀ ਆਗੂਆਂ ਵੱਲੋਂ ਅਪਣਾਈ ਜਾਂਦੀ ਸੀ ਜਿਸ ਦਾ ਖਮਿਆਜ਼ਾ ਵੀ ਅਕਾਲੀ ਆਗੂਆਂ ਨੂੰ ਭੁਗਤਨਾ ਪਿਆ, ਉਹੀ ਰਣਨੀਤੀ ਹੁਣ ਸੱਤਾਧਾਰੀ ਵਿਧਾਇਕ ਵੱਲੋਂ ਅਪਣਾਈ ਜਾ ਰਹੀ ਹੈ ਜਿਸ ਦਾ ਨਤੀਜਾ ਵੀ ਅਕਾਲੀਆਂ ਦੀ ਰਣਨੀਤੀ ਵਾਂਗ ਨਿਕਲਣ ਦੀ ਸੰਭਾਵਨਾ ਤੋਂ ਇਨਕਾਰ ਨਹੀਂ ਕੀਤਾ ਜਾ ਸਕਦਾ।
