Sunday Special
ਬਰਨਾਲਾ ,8 ਮਾਰਚ, Gee98 news service-
-ਪੰਜਾਬ ਵਿਧਾਨ ਸਭਾ ਦੇ ਸਪੀਕਰ ਕੁਲਤਾਰ ਸਿੰਘ ਸੰਧਵਾਂ ਵਿਧਾਨ ਸਭਾ ਦੀ ਸੈਸ਼ਨ ਦੌਰਾਨ ਉਂਝ ਤਾਂ ਭਾਵੇਂ ਵਿਰੋਧੀ ਪਾਰਟੀਆਂ ਦੇ ਵਿਧਾਇਕਾਂ ਦੇ ਨਾਲ-ਨਾਲ ਆਪਣੀ ਪਾਰਟੀ ਦੇ ਵਿਧਾਇਕਾਂ ਦੀ ਵੀ ਝਾੜਝੰਬ ਕਰਦੇ ਵੇਖੇ ਜਾਂਦੇ ਹਨ ਅਤੇ ਵਿਧਾਨ ਸਭਾ ‘ਚ ਆਪਣੀ ਅਤੇ ਵਿਰੋਧੀ ਪਾਰਟੀਆਂ ਦੇ ਵੱਡੇ ਤੋਂ ਵੱਡੇ ਆਗੂ ਨੂੰ ਵੀ “ਬੈਠੋ..ਤੁਸੀਂ ਬੈਠੋ ਬੈਠੋ” ਕਹਿ ਕੇ ਆਖ਼ਰ ਬਿਠਾ ਹੀ ਦਿੰਦੇ ਹਨ ਪ੍ਰੰਤੂ ਬੀਤੇ ਕੱਲ੍ਹ ਵਿਧਾਨ ਸਭਾ ਹਲਕਾ ਮਹਿਲ ਕਲਾਂ ਦੇ ਵਿਧਾਇਕ ਦੀ ਰਿਹਾਇਸ਼ ‘ਤੇ ਹਲਕੇ ਨਾਲ ਸੰਬੰਧਿਤ ਆਮ ਆਦਮੀ ਪਾਰਟੀ ਦੇ ਵਰਕਰਾਂ ਅੱਗੇ ਸਪੀਕਰ ਸਾਬ੍ਹ ਵੀ ਬੇਵੱਸ ਬੈਠੇ ਨਜ਼ਰ ਆਏ। ਪ੍ਰਾਪਤ ਜਾਣਕਾਰੀ ਅਨੁਸਾਰ ਸੰਗਰੂਰ ਤੋਂ ਵਿਧਾਇਕ ਨਰਿੰਦਰ ਕੌਰ ਭਰਾਜ ਦੇ ਇੱਕ ਸਮਾਗਮ ‘ਚ ਹਾਜ਼ਰੀ ਲਵਾਉਣ ਤੋਂ ਬਾਅਦ ਸਪੀਕਰ ਸਾਹਿਬ ਹਲਕਾ ਮਹਿਲਕਲਾਂ ਦੇ ਵਿਧਾਇਕ ਦੇ ਜੱਦੀ ਪਿੰਡ ਪੰਡੋਰੀ ਪੁੱਜੇ ਜਿੱਥੇ ਸ਼ੇਰਪੁਰ ਖੇਤਰ ਨਾਲ ਸਬੰਧਿਤ ਪਾਰਟੀ ਦੇ ਆਗੂ ਅਤੇ ਵਰਕਰਾਂ ਨੂੰ ਵੀ ਬੁਲਾਇਆ ਗਿਆ ਸੀ। ਸੂਤਰਾਂ ਅਨੁਸਾਰ ਪਿਛਲੇ ਦਿਨੀਂ ਪੰਚਾਇਤ ਸੰਮਤੀ ਦੇ ਚੇਅਰਮੈਨ ਦੀ ਚੋਣ ‘ਚ ਵਾਪਰੇ ਘਟਨਾਕ੍ਰਮ ਤੋਂ ਬਾਅਦ ਹਲਕਾ ਵਿਧਾਇਕ ਦੇ ਖ਼ਿਲਾਫ਼ ਸ਼ੇਰਪੁਰ ਖੇਤਰ ਦੇ ‘ਆਪ’ ਆਗੂਆਂ ਤੇ ਵਰਕਰਾਂ ‘ਚ ਗੁੱਸੇ ਦੀ ਲਹਿਰ ਹੈ ਜਿਸ ਨੂੰ ਸ਼ਾਂਤ ਕਰਨ ਲਈ ਸਪੀਕਰ ਨੇ ਨਰਾਜ਼ ਆਗੂਆਂ ਨੂੰ ਵਿਧਾਇਕ ਦੇ ਘਰੇ ਬੁਲਾਇਆ ਸੀ ਪਰੰਤੂ ਇਹ ਯਤਨ ਉਸ ਵੇਲੇ ਪੁੱਠੇ ਪੈਂਦੇ ਜਾਪੇ ਜਦੋਂ ਨਾਰਾਜ਼ ਆਗੂਆਂ ਤੇ ਵਰਕਰਾਂ ਨੇ ਸਪੀਕਰ ਦੀ ਹਾਜ਼ਰੀ ‘ਚ ਵਿਧਾਇਕ ਦੇ ਖ਼ਿਲਾਫ਼ ਸਿਰੇ ਦਾ ਗੁੱਸਾ ਕੱਢਿਆ। ਸ਼ੇਰਪੁਰ ਖੇਤਰ ਦੇ ਇਹਨਾਂ ਸੱਤਾਧਾਰੀ ਆਗੂਆਂ ਤੇ ਵਰਕਰਾਂ ਦੇ ਗੁੱਸੇ ਨੂੰ ਵੇਖਦੇ ਹੋਏ ਇਹ ਸਪੱਸ਼ਟ ਕਿਹਾ ਜਾ ਸਕਦਾ ਹੈ ਕਿ ਹਲਕਾ ਵਿਧਾਇਕ ਲਈ ਪਾਰਟੀ ਦੇ ਅੰਦਰ ਹੀ ਚੁਣੌਤੀਆਂ ਖੜੀਆਂ ਹੋ ਚੁੱਕੀਆਂ ਹਨ। ਪਾਰਟੀ ਆਗੂਆਂ ਦਾ ਕਹਿਣਾ ਹੈ ਕਿ ਇਹਨਾਂ ਚੁਣੌਤੀਆਂ ਲਈ ਕੋਈ ਹੋਰ ਨਹੀਂ ਸਗੋਂ ਖੁਦ ਵਿਧਾਇਕ ਸਾਹਿਬ ਹੀ ਜ਼ਿੰਮੇਵਾਰ ਹਨ ਕਿਉਂਕਿ ਵਿਧਾਇਕ ਦੀਆਂ ਨੀਤੀਆਂ 2013-14 ਤੋਂ ਲੈ ਕੇ ਹਲਕਾ ਮਹਿਲ ਕਲਾਂ ‘ਚ ਆਮ ਆਦਮੀ ਪਾਰਟੀ ਦੀਆਂ ਜੜਾਂ ਲਾਉਣ ਵਾਲੇ ਆਗੂਆਂ ਤੇ ਵਰਕਰਾਂ ਦੀ ਬਲੀ ਦੇ ਕੇ ਨਵੇਂ ਆਗੂਆਂ ਨੂੰ ਪਲੋਸ ਕੇ ਸਿਆਸੀ ਰਿਓੜੀਆਂ ਵੰਡਣ ਵਾਲੀਆਂ ਹਨ ਜਿਸ ਕਰਕੇ ‘ਆਪ’ ਦੇ ਟਕਸਾਲੀ ਆਗੂਆਂ ਤੇ ਵਰਕਰਾਂ ਨੇ ਆਪਣੇ ਸਿਆਸੀ ਤੇਵਰ ਤਿੱਖੇ ਕਰ ਲਏ ਹਨ।
ਇਨ੍ਹਾਂ ਨਾਰਾਜ਼ ਆਗੂਆਂ ਵਿੱਚੋਂ ਇੱਕ ਆਗੂ ਨੇ ਗੱਲਬਾਤ ਕਰਦੇ ਹੋਏ ਕਿਹਾ ਕਿ ਅਸੀਂ ਬਹੁਤ ਸਮੇਂ ਤੋਂ ਵੇਖ ਰਹੇ ਹਾਂ ਕਿ ਵਿਧਾਇਕ ਪੰਡੋਰੀ ਆਪਣੀਆਂ ਨੀਤੀਆਂ ਬਦਲਣਗੇ ਪ੍ਰੰਤੂ ਅਜਿਹਾ ਨਹੀਂ ਹੋਇਆ ਜਿਸ ਕਰਕੇ ਅਸੀਂ ‘ਮਰਦਿਆਂ ਨਹੀਂ ਅੱਕ ਚੱਬ ਕੇ ਜੇਠ ਨਾਲ ਲਾਉਣ ਵਾਲੀ’ ਨੀਤੀ ਅਪਣਾਈ ਹੈ। ਦੱਸ ਦੇਈਏ ਕਿ ਹਲਕਾ ਮਹਿਲ ਕਲਾਂ ‘ਚ ਵਿਧਾਇਕ ਦੇ ਖ਼ਿਲਾਫ਼ ਝੰਡਾ ਚੁੱਕਣ ਵਾਲੇ ਇਹਨਾਂ ਆਗੂਆਂ ਵਿੱਚੋਂ ਬਹੁਤੇ ਆਗੂ ਉਹ ਹਨ ਜਿਨਾਂ ਨੂੰ ਆਮ ਆਦਮੀ ਪਾਰਟੀ ਦੇ ਗਠਨ ਮੌਕੇ ਪਿੰਡਾਂ ‘ਚ ਰਵਾਇਤੀ ਪਾਰਟੀਆਂ ਦੇ ਵਰਕਰ ਝੰਡਾ ਤੇ ਪੋਸਟਰ ਲਗਾਉਣ ਤੋਂ ਰੋਕਦੇ ਸਨ। ਇਥੋਂ ਤੱਕ ਕਿ ਇਹਨਾਂ ਨੂੰ “ਆਪ” ਦੇ ਪੋਲਿੰਗ ਬੂਥ ਲਗਾਉਣ ਤੋਂ ਵੀ ਰੋਕਿਆ ਜਾਂਦਾ ਸੀ ਇਹਨਾਂ ਵਿੱਚੋਂ ਬਹੁਤੇ ਆਗੂਆਂ ਉੱਪਰ ਤਾਂ ਰਵਾਇਤੀ ਪਾਰਟੀਆਂ ਦੇ ਆਗੂਆਂ ਨੇ ਪੁਲਿਸ ਕੇਸ ਵੀ ਦਰਜ ਕਰਵਾਏ ਜਿਹੜੇ ਇਹਨਾਂ ਨੇ ਆਪਣੇ ਸਿਰ ‘ਤੇ ਭੁਗਤੇ। ਇਹਨਾਂ ਆਗੂਆਂ ਨੂੰ ਇਹ ਵੀ ਰੋਸਾ ਹੈ ਕਿ 2017 ਦੀਆਂ ਵਿਧਾਨ ਸਭਾ ਚੋਣਾਂ ਤੋਂ ਲੈ ਕੇ ਉਹਨਾਂ ਨੇ ਆਪਣੇ ਪੱਲਿਓਂ ਖਰਚ ਕਰਕੇ ਵਿਧਾਇਕ ਦੀ ਪਹਿਲੀ ਚੋਣ ਲੜੀ ਇਥੋਂ ਤੱਕ ਕੇ ਫੰਡ ਵੀ ਦਿੱਤਾ ਅਤੇ ਇੱਕ ਮਜ਼ਦੂਰ ਪਰਿਵਾਰ ਦੇ ਆਮ ਵਿਅਕਤੀ ਨੂੰ ਵਿਧਾਨ ਸਭਾ ਦੀਆਂ ਪੌੜੀਆਂ ਚੜਾਇਆ ਪ੍ਰੰਤੂ ਹੁਣ ਉਹੀ ਆਮ ਵਿਅਕਤੀ ਐਨਾ ਕੁ ਖ਼ਾਸ ਬਣ ਚੁੱਕਿਆ ਹੈ ਕਿ ਉਹ 2017 ਤੇ 2022 ਦੀਆਂ ਚੋਣਾਂ ‘ਚ ਮਰ ਮਿਟ ਕੇ ਕੰਮ ਕਰਨ ਵਾਲੇ ਆਗੂਆਂ ਤੇ ਵਰਕਰਾਂ ਨੂੰ ਮਿਲਣ ਮੌਕੇ ਪੁੱਠਾ ਹੱਥ ਹੀ ਮਿਲਾਉਂਦਾ ਹੈ। ਬਹਰਹਾਲ !ਇਹਨਾਂ ਆਗੂਆਂ ਨੂੰ ਮਨਾਉਣ ਵਾਸਤੇ ਸਪੀਕਰ ਸਾਹਿਬ ਦੇ ਕੀਤੇ ਗਏ ਯਤਨ ਸਿਰੇ ਨਹੀਂ ਚੜੇ ਅਤੇ ਇਹ ਆਗੂ ਸਪੀਕਰ ਦੀ ਹਾਜ਼ਰੀ ਵਿੱਚ ਵਿਧਾਇਕ ਦੇ ਘਰੋਂ ਇੱਕ ਲਕੀਰ ਖਿੱਚ ਕੇ ਚਲੇ ਗਏ। ਹੁਣ ਵੇਖਣਾ ਹੋਵੇਗਾ ਕਿ ਇਹ ਆਗੂ ਵਿਧਾਇਕ ਸਾਹਿਬ ਨੂੰ ਆਪਣੇ ਵੱਲੋਂ ਖਿੱਚੀ ਲਕੀਰ ਨੂੰ ਕਿਹੜੀਆਂ ਸ਼ਰਤਾਂ ਤੇ ਹਾਲਾਤਾਂ ਵਿੱਚ ਟੱਚ ਕਰਨ ਦਿੰਦੇ ਹਨ ਜਾਂ ਫਿਰ ਇਹ ਲਕੀਰ ਦੇ ਸਿਰਿਆਂ ‘ਤੇ ਖ਼ਤਰੇ ਵਾਲੇ ਲਾਲ ਰੰਗ ਦੀਆਂ ਝੰਡੀਆਂ ਗੱਡ ਕੇ ਰੱਖਣਗੇ।
