ਚੰਡੀਗੜ੍ਹ 18 ਮਾਰਚ, Gee98 news service-
-ਭਾਰਤ ਵਿੱਚ ਕਿਸੇ ਵੀ ਉਮਰ ਦਾ ਬੱਚਾ ਗੋਦ ਲੈਣ ਵੇਲੇ ਵੀ ਹੁਣ ਮਾਤਾ ਨੂੰ 12 ਹਫ਼ਤੇ ਤੱਕ ਦੀ ਛੁੱਟੀ ਮਿਲੇਗੀ। ਸੁਪਰੀਮ ਕੋਰਟ ਨੇ ਬੱਚਾ ਗੋਦ ਲੈਣ ਸਬੰਧੀ ਛੁੱਟੀ ਦੇਣ ਦੇ ਨਿਯਮਾਂ ਬਾਰੇ ਦਾਇਰ ਪਟੀਸ਼ਨ ਦੀ ਸੁਣਵਾਈ ਦੌਰਾਨ ਉਕਤ ਅਹਿਮ ਫੈਸਲਾ ਸੁਣਾਇਆ। ਜ਼ਿਕਰਯੋਗ ਹੈ ਕਿ ਪਹਿਲਾਂ ਭਾਰਤ ਵਿੱਚ ਸਿਰਫ਼ ਤਿੰਨ ਮਹੀਨੇ ਦੀ ਉਮਰ ਤੱਕ ਦਾ ਬੱਚਾ ਗੋਦ ਲੈਣ ਮੌਕੇ ਛੁੱਟੀ ਦੀ ਵਿਵਸਥਾ ਹੈ। ਹੁਣ ਸੁਪਰੀਮ ਕੋਰਟ ਨੇ ਇਨਾਂ ਨਿਯਮਾਂ ਨੂੰ ਬਦਲ ਕੇ ਨਵੇਂ ਨਿਯਮ ਲਾਗੂ ਕੀਤੇ ਹਨ ਕਿ ਬੱਚਾ ਭਾਵੇਂ ਕਿਸੇ ਵੀ ਉਮਰ ਦਾ ਹੋਵੇ ਗੋਦ ਲੈਣ ਵਾਲੀ ਮਾਂ ਨੂੰ 12 ਹਫ਼ਤਿਆਂ ਤੱਕ ਦੀ ਛੁੱਟੀ ਮਿਲੇਗੀ। ਸੁਪਰੀਮ ਕੋਰਟ ਦੇ ਜਸਟਿਸ ਜੇਬੀ ਪਾਰਦੀਵਾਲਾ ਅਤੇ ਜਸਟਿਸ ਆਰ ਮਹਾਂਦੇਵ ਦੀ ਬੈਂਚ ਨੇ ਉਕਤ ਹੁਕਮ ਜਾਰੀ ਕੀਤੇ। ਇਸ ਦੇ ਨਾਲ ਹੀ ਸੁਪਰੀਮ ਕੋਰਟ ਨੇ ਕੇਂਦਰ ਸਰਕਾਰ ਨੂੰ ਇਹ ਵੀ ਕਿਹਾ ਹੈ ਕਿ ਉਹ ਮੈਟਰਨਿਟੀ ਛੁੱਟੀ ਦੇ ਨਾਲ ਨਾਲ ਪਿਤਾ ਦੀ ਛੁੱਟੀ ( ਪੈਟਰਨਿਟੀ) ਬਾਰੇ ਵੀ ਨਿਯਮ ਬਣਾਵੇ। ਸੁਪਰੀਮ ਕੋਰਟ ਨੇ ਕਿਹਾ ਕਿ ਬੱਚੇ ਦੇ ਸ਼ੁਰੂਆਤੀ ਵਿਕਾਸ ਵਿੱਚ ਮਾਤਾ-ਪਿਤਾ ਭੂਮਿਕਾ ਹੁੰਦੀ ਹੈ ਇਸ ਲਈ ਮਾਤਾ ਦੇ ਨਾਲ ਨਾਲ ਪਿਤਾ ਨੂੰ ਛੁੱਟੀ ਦੇਣੀ ਵੀ ਜ਼ਰੂਰੀ ਹੈ। ਦੱਸ ਦੇਈਏ ਕਿ ਭਾਰਤ ਵਿੱਚ ਅਜੇ ਤੱਕ ਪੈਟਰਨਿਟੀ ਲੀਵ ਦਾ ਕਾਨੂੰਨ ਨਹੀਂ ਹੈ ਜਦਕਿ ਬੱਚੇ ਦੇ ਜਨਮ ਮੌਕੇ ਮੈਟਰਨਿਟੀ ਲੀਵ ਹੀ ਦਿੱਤੀ ਜਾਂਦੀ ਹੈ। ਸੁਪਰੀਮ ਕੋਰਟ ਨੇ ਉਕਤ ਫੈਸਲਾ ਇੱਕ ਅਜਿਹੀ ਪਟੀਸ਼ਨ ਦੀ ਸੁਣਵਾਈ ਕਰਦੇ ਹੋਏ ਸੁਣਾਇਆ ਜੋ ਦੋ ਬੱਚੇ ਗੋਦ ਲੈਣ ਵਾਲੀ ਇੱਕ ਮਾਂ ਨੇ ਦਾਇਰ ਕੀਤੀ ਸੀ ਜਿਸ ਨੂੰ ਸਰਕਾਰ ਨੇ ਸਿਰਫ਼ ਛੇ ਹਫ਼ਤੇ ਦੀ ਛੁੱਟੀ ਦਿੱਤੀ ਸੀ ਕਿਉਂਕਿ ਬੱਚਿਆਂ ਦੀ ਉਮਰ ਤਿੰਨ ਮਹੀਨੇ ਤੋਂ ਜ਼ਿਆਦਾ ਸੀ। ਪਟੀਸ਼ਨ ਕਰਤਾ ਨੇ ਬੱਚੇ ਦੀ ਉਮਰ ਦੇ ਅਧਾਰ ‘ਤੇ ਛੁੱਟੀ ਦੇਣ ਦੇ ਨਿਯਮਾਂ ਨੂੰ ਗ਼ਲਤ ਅਤੇ ਅਸੰਵਿਧਾਨਿਕ ਦੱਸਿਆ ਸੀ।
