ਨਿਰਮਲ ਸਿੰਘ ਪੰਡੋਰੀ…6 ਅਪ੍ਰੈਲ 2026
-2022 ਤੋਂ ਪਹਿਲਾਂ ਪੰਜਾਬ ਅਤੇ ਕੇਂਦਰ ਸਰਕਾਰਾਂ ਦੇ ਖ਼ਿਲਾਫ਼ ਧਰਨਾ ਲਗਾਉਣ ਵਾਲੀਆਂ ਜਥੇਬੰਦੀਆਂ ਨੂੰ ਹਰ ਤਰ੍ਹਾਂ ਦੀ ਮਦਦ ਦੇਣ ਵਾਲੇ ਆਮ ਆਦਮੀ ਪਾਰਟੀ ਦੇ ਆਗੂਆਂ ਨੂੰ ਹੁਣ ਧਰਨੇ ਲਗਾ ਕੇ ਹੱਕ ਮੰਗਣ ਵਾਲੇ ਬਲੈਕਮੇਲਰ ਹੀ ਦਿਸਦੇ ਹਨ। ਇਹ ਜੱਗ ਜ਼ਾਹਿਰ ਹੈ ਕਿ 2022 ਤੋਂ ਪਹਿਲਾਂ ਕੇਂਦਰ ਸਰਕਾਰ ਦੇ ਖ਼ਿਲਾਫ਼ ਤਿੰਨ ਖੇਤੀ ਕਾਨੂੰਨਾਂ ਸਬੰਧੀ ਕਿਸਾਨ ਸੰਯੁਕਤ ਮੋਰਚੇ ਵੱਲੋਂ ਕੀਤੇ ਸੰਘਰਸ਼ ਦਾ ਭਾਵੇਂ ਕਿਸਾਨ ਜਥੇਬੰਦੀਆਂ ਵਾਲੇ ਪਲੇਟਫਾਰਮ ਤੋਂ ਸਿੱਧੇ ਤੌਰ ‘ਤੇ ਰਾਜਨੀਤੀ ਨਾਲ ਕੋਈ ਸਬੰਧ ਨਹੀਂ ਸੀ ਪਰੰਤੂ ਇਸ ਸੰਘਰਸ਼ ਨੂੰ ਆਮ ਆਦਮੀ ਪਾਰਟੀ ਨੇ ਆਪਣੀ ਰਾਜਨੀਤੀ ਲਈ ਵਰਤਿਆ ਤਾਂ ਜੋ ਪੰਜਾਬ ‘ਚ ਕੈਪਟਨ ਸਰਕਾਰ ਅਤੇ ਕੇਂਦਰ ‘ਚ ਮੋਦੀ ਸਰਕਾਰ ਨੂੰ ਹਰ ਪੱਧਰ ‘ਤੇ ਬਦਨਾਮ ਕੀਤਾ ਜਾਵੇ। 2022 ਤੋਂ ਪਹਿਲਾਂ ਮੁਲਾਜ਼ਮ ਜਥੇਬੰਦੀਆਂ ਦੇ ਹਰ ਸੰਘਰਸ਼ ਦੀ ਆਮ ਆਦਮੀ ਪਾਰਟੀ ਨੇ ਮਦਦ ਕੀਤੀ ਅਤੇ ਪੰਜਾਬ ‘ਚ ਸਰਕਾਰ ਬਣਨ ‘ਤੇ ਸਾਰੀਆਂ ਮੰਗਾਂ ਪੂਰੀਆਂ ਕਰਨ ਦੇ ਝੂਠੇ ਵਾਅਦੇ ਕੀਤੇ। ਇਸ ਤੋਂ ਇਲਾਵਾ ਬੇਰੁਜ਼ਗਾਰਾਂ ਦੀਆਂ ਜਥੇਬੰਦੀਆਂ ਨੂੰ ਸਬਜ਼ਬਾਗ ਦਿਖਾਏ ਗਏ ਕਿ ਉਹਨਾਂ ਨੂੰ ਕੋਈ ਧਰਨਾ ਨਹੀਂ ਲਗਾਉਣਾ ਪਵੇਗਾ। 2022 ਤੋਂ ਪਹਿਲਾਂ ਪੰਜਾਬ ਦੀਆਂ ਸਾਰੀਆਂ ਜਥੇਬੰਦੀਆਂ ਵੱਲੋਂ ਅਤੇ ਪੰਜਾਬ ‘ਚ ਕਿਸੇ ਕੋਨੇ ‘ਚ ਆਪਣੀ ਵਿਅਕਤੀਗਤ ਸਮੱਸਿਆ ਸਬੰਧੀ ਸੰਬੰਧੀ ਲਗਾਏ ਧਰਨੇ ਦੀ ਆਮ ਆਦਮੀ ਪਾਰਟੀ ਦੇ ਹੇਠਲੇ ਆਗੂ ਤੋਂ ਲੈ ਕੇ ਉਪਰਲੇ ਆਗੂ ਤੱਕ ਪੂਰੀ ਮਦਦ ਕੀਤੀ ਜਾਂਦੀ ਰਹੀ ਅਤੇ ਸਮੇਂ ਦੀਆਂ ਸਰਕਾਰਾਂ ਨੂੰ ਪਾਣੀ ਪੀ ਪੀ ਕੇ ਕੋਸਿਆ ਜਾਂਦਾ ਸੀ ਪ੍ਰੰਤੂ ਹੁਣ ਆਮ ਆਦਮੀ ਪਾਰਟੀ ਨੂੰ ਇਹ ਧਰਨੇ ਬਲੈਕਮੇਲਿੰਗ ਲੱਗ ਰਹੇ ਹਨ। ਕੁਝ ਮੰਗਾਂ ਹੁੰਦੀਆਂ ਹਨ ਜਥੇਬੰਦੀ ਦੀਆਂ…ਜਿਹੜੀਆਂ ਸਿੱਧੇ ਤੌਰ ‘ਤੇ ਕੇਂਦਰ ਸਰਕਾਰ ਨਾਲ ਸੰਬੰਧਿਤ ਹੁੰਦੀਆਂ ਹਨ ਪਰੰਤੂ ਉਹਨਾਂ ਤੋਂ ਮੁਨਕਰ ਪੰਜਾਬ ਸਰਕਾਰ ਵੀ ਨਹੀਂ ਹੋ ਸਕਦੀ… ਪਰ ਜਦੋਂ ਖ਼ੁਦ ਕੁਝ ਕਰਨ ਦੀ ਨੀਤ ਹੀ ਨਾ ਹੋਵੇ ਫਿਰ ਮੁੱਖ ਮੰਤਰੀ ਜੀ ਭਾਵੇਂ ਕਿਸੇ ਨੂੰ ਬਲੈਕਮੇਲਰ ਕਹਿ ਦੇਣ ਜਾਂ ਕੁਝ ਵੀ ਕਹਿ ਦੇਣ…ਜਿਵੇਂ ਕਿ ਅਕਸਰ ਸਾਡੇ ਮੁੱਖ ਮੰਤਰੀ ਜੀ ਕਹਿ ਹੀ ਦਿੰਦੇ ਹਨ… ਜਥੇਬੰਦੀਆਂ ਤੇ ਲੋਕਾਂ ਦੀਆਂ ਸਮੱਸਿਆਵਾਂ ਸਬੰਧੀ ਭਗਵੰਤ ਮਾਨ ਜੀ ਇੱਕ ਪੋਸਟ ਪਾ ਕੇ ਸਾਫ਼ ਹੀ ਜਵਾਬ ਦੇ ਦਿੱਤਾ ਕਿ ਉਹਨਾਂ ਦੀ ਕੋਈ ਜ਼ਿੰਮੇਵਾਰੀ ਨਹੀਂ…ਜੇਕਰ ਸਮੱਸਿਆਵਾਂ ਪ੍ਰਤੀ ਬਤੌਰ ਮੁੱਖ ਮੰਤਰੀ ਭਗਵੰਤ ਮਾਨ ਦੀ ਕੋਈ ਜ਼ਿੰਮੇਵਾਰੀ ਨਹੀਂ ਤਾਂ ਫਿਰ ਤਾਂ ਅਜਿਹੀਆਂ ਸਮੱਸਿਆਵਾਂ ਸਬੰਧੀ 2022 ਤੋਂ ਪਹਿਲਾਂ ਵਾਲੇ ਮੁੱਖ ਮੰਤਰੀਆਂ ਨੂੰ ਵੀ ਜ਼ਿੰਮੇਵਾਰ ਨਹੀਂ ਮੰਨਿਆ ਜਾ ਸਕਦਾ ਜਿਨਾਂ ਨੂੰ ਆਮ ਆਦਮੀ ਪਾਰਟੀ ਪਾਣੀ ਪੀ-ਪੀ ਕੇ ਕੋਸਦੀ ਰਹੀ ਹੈ…ਅਤੇ ਹੁਣ ਵੀ ਇਹਨਾਂ ਸਮੱਸਿਆਵਾਂ ਲਈ ਆਮ ਆਦਮੀ ਪਾਰਟੀ ਪੁਰਾਣੀਆਂ ਪਾਰਟੀਆਂ ਨੂੰ ਜ਼ਿੰਮੇਵਾਰ ਠਹਿਰਾਉਂਦੀ ਆ ਰਹੀ ਹੈ… ਓ ਭਾਈ ! ਜੇ ਪੁਰਾਣੀਆਂ ਰਵਾਇਤੀ ਪਾਰਟੀਆਂ ਨੇ ਲੋਕਾਂ ਦੀਆਂ ਸਮੱਸਿਆਵਾਂ ਦਾ ਹੱਲ ਨਹੀਂ ਕੀਤਾ ਤਾਂ ਹੀ ਤਾਂ ਤੁਸੀਂ ਬੰਪਰ ਜਿੱਤ ਪ੍ਰਾਪਤ ਕਰਕੇ ਪੰਜਾਬ ਦੀ ਸੱਤਾ ‘ਤੇ ਕਾਬਜ਼ ਹੋਏ ਸੀ… ਜੇਕਰ ਰਵਾਇਤੀ ਪਾਰਟੀਆਂ ਨੇ ਲੋਕਾਂ ਦੇ ਇਹਨਾਂ ਮਸਲਿਆਂ ਨੂੰ ਅੱਖੋਂ ਪਰੋਖੇ ਕੀਤਾ ਸੀ ਤਾਂ ਲੋਕਾਂ ਨੇ ਉਹਨਾਂ ਪਾਰਟੀਆਂ ਨੂੰ ਹਾਸ਼ੀਏ ‘ਤੇ ਵੀ ਧੱਕ ਦਿੱਤਾ ਸੀ ਪ੍ਰੰਤੂ ਹੁਣ ਉਹਨਾਂ ਮਸਲਿਆਂ ਪ੍ਰਤੀ ਤੁਹਾਡੀਆਂ ਨੀਤੀਆਂ ਤੋਂ ਵੀ ਲੋਕ ਔਖੇ ਹੀ ਹਨ…ਬਾਕੀ ਤੁਸੀਂ ਆਪ ਸਿਆਣੇ ਓ… ਪੰਜਾਬ ‘ਚ ਅਜੇ ਵੀ ਉਹੀ ਲੋਕ ਵੱਸਦੇ ਨੇ ਜਿਨਾਂ ਨੇ ਪੁਰਾਣੀਆਂ ਰਵਾਇਤੀ ਪਾਰਟੀਆਂ ਨੂੰ ਹਾਸ਼ੀਏ ‘ਤੇ ਧੱਕਿਆ…ਚਾਰ ਸਾਲਾਂ ਦੇ ਰਾਜਭਾਗ ਦੌਰਾਨ ਵੀ ਜੇਕਰ ਤੁਸੀਂ ਪੁਰਾਣੀਆਂ ਪਾਰਟੀਆਂ ਨੂੰ ਹੀ ਸਮੱਸਿਆਵਾਂ ਲਈ ਜ਼ਿੰਮੇਵਾਰ ਮੰਨੀ ਜਾ ਰਹੇ ਹੋ ਤਾਂ ਇਹਦਾ ਮਤਲਬ ਹੈ ਕਿ ਤੁਸੀਂ ਤਾਂ ਅਜੇ ਤੱਕ ਕੁਝ ਵੀ ਨਹੀਂ ਕੀਤਾ….ਯਾਦ ਰੱਖੋ ! ਸਮੱਸਿਆਵਾਂ ਵੀ ਉਹੀ ਹਨ ਜਿਵੇਂ ਦੀਆਂ ਤਿਵੇਂ…ਤੇ ਲੋਕ ਵੀ ਉਹੀ ਹਨ…. ਇਹਨਾਂ ਲੋਕਾਂ ਦਾ ‘ਕੱਠ ਬਣ ਕੇ ਲੋਹੇ ਦੀ ਲੱਠ ਰਵਾਇਤੀ ਪਾਰਟੀਆਂ ਦੇ ਸਿਰ ‘ਚ ਵੱਜਿਆ ਸੀ… ਤੇ ਹੁਕਮਰਾਨੋ ! ਇਹ ਲੋਹੇ ਦੀ ਲੱਠ ਜਦੋਂ ਵੱਜਦੀ ਹੈ…ਸਿਰ ਨਹੀਂ ਵੇਖਦੀ…ਇਸ ਦਾ ਕਿਸੇ ਵਿਸ਼ੇਸ਼ ਸਿਰ ਨਾਲ ਕੋਈ ਵੈਰ ਨਹੀਂ…ਸਗੋਂ ਇਹ ਨੀਤੀਆਂ ਵੇਖਦੀ ਹੈ…!
