ਚੰਡੀਗੜ੍ਹ ,2 ਮਈ Gee98 News service-
-ਇੱਕ ਪ੍ਰਾਈਵੇਟ ਸਕੂਲ ਦੇ ਪ੍ਰਿੰਸੀਪਲ ਨੇ ਗਿਆਰਵੀਂ ਜਮਾਤ ਦੇ ਇੱਕ ਵਿਦਿਆਰਥੀ ਨੂੰ ਜਦ ਕਮਰੇ ਤੋਂ ਬਾਹਰ ਖੜਨ ਦੀ ਸਜ਼ਾ ਦਿੱਤੀ ਤਾਂ ਇਸ ਸਜ਼ਾ ਨੂੰ ਆਪਣੀ ਬੇਇੱਜ਼ਤੀ ਮੰਨਦੇ ਹੋਏ ਵਿਦਿਆਰਥੀ ਨੇ ਆਪਣੀ ਜੀਵਨ ਲੀਲਾ ਹੀ ਖ਼ਤਮ ਕਰ ਲਈ। ਇਹ ਮਾਮਲਾ ਹੁਸ਼ਿਆਰਪੁਰ ਜ਼ਿਲ੍ਹੇ ਨਾਲ ਸੰਬੰਧਿਤ ਹੈ ਜਿੱਥੇ ਕੈਂਬਰਿਜ ਇੰਟਰਨੈਸ਼ਨਲ ਸਕੂਲ ਦਸੂਹਾ ਦੇ ਗਿਆਰਵੀਂ ਦਾ ਇੱਕ ਵਿਦਿਆਰਥੀ ਨਵਜੋਤ ਸਿੰਘ ਸਕੂਲ ਦੀ ਫਸਟ ਫਲੋਰ ‘ਤੇ ਚਲਿਆ ਗਿਆ ਜਿਸ ਨੂੰ ਇੱਕ ਮੈਡਮ ਨੇ ਦੇਖਿਆ ਤਾਂ ਇਸ ਤੋਂ ਬਾਅਦ ਇਹ ਮਾਮਲਾ ਪ੍ਰਿੰਸੀਪਲ ਦੇ ਧਿਆਨ ਵਿੱਚ ਲਿਆਂਦਾ ਗਿਆ ਅਤੇ ਪ੍ਰਿੰਸੀਪਲ ਨੇ ਉਸਨੂੰ ਕਮਰੇ ਦੇ ਬਾਹਰ ਖੜਨ ਦੀ ਸਜ਼ਾ ਦਿੱਤੀ। ਇਸ ਮਾਮਲੇ ਸਬੰਧੀ ਪੱਤਰਕਾਰਾਂ ਨੂੰ ਨਵਜੋਤ ਦੇ ਨਾਲ ਹੀ ਪੜਦੇ ਇੱਕ ਹੋਰ ਵਿਦਿਆਰਥੀ ਹਰਮਨ ਨੇ ਦੱਸਿਆ ਕਿ ਇਹ ਘਟਨਾ 27 ਅਪ੍ਰੈਲ ਦੀ ਹੈ ਜਦ ਉਹ ਅਤੇ ਨਵਜੋਤ ਦੋਵੇਂ ਜਣੇ ਫਸਟ ਫਲੋਰ ‘ਤੇ ਚਲੇ ਗਏ ਜਿੱਥੇ ਉਹਨਾਂ ਨੂੰ ਇੱਕ ਮੈਡਮ ਨੇ ਦੇਖਣ ਤੋਂ ਬਾਅਦ ਪਹਿਲਾਂ ਚੇਤਾਵਨੀ ਦਿੱਤੀ ਤੇ ਬਾਅਦ ਵਿੱਚ ਮਾਮਲਾ ਪ੍ਰਿੰਸੀਪਲ ਦੇ ਧਿਆਨ ‘ਚ ਲਿਆਂਦਾ। ਜਿਸ ਤੋਂ ਬਾਅਦ ਪ੍ਰਿੰਸੀਪਲ ਦੇ ਉਹਨਾਂ ਨੂੰ ਬੁਲਾ ਕੇ ਦੋ ਪੀਰੀਅਡ ਆਪਣੇ ਕੈਬਿਨ ਦੇ ਬਾਹਰ ਖੜਨ ਦੀ ਸਜ਼ਾ ਦਿੱਤੀ। 27 ਅਪ੍ਰੈਲ ਨੂੰ ਛੁੱਟੀ ਤੋਂ ਬਾਅਦ ਨਵਜੋਤ ਜਦੋਂ ਆਪਣੇ ਘਰ ਚਲਾ ਗਿਆ ਤਾਂ ਉਸ ਨੇ ਮਹਿਸੂਸ ਕੀਤਾ ਕਿ ਹੁਣ ਉਹ ਦੁਬਾਰਾ ਸਕੂਲ ਜਾਵੇਗਾ ਤਾਂ ਆਪਣੇ ਸਹਿਪਾਠੀਆਂ ਅੱਗੇ ਜ਼ਲੀਲ ਹੋਵੇਗਾ ਇਸ ਲਈ ਉਸਨੇ ਘਰ ਵਿੱਚ ਰੱਖੀ ਕੋਈ ਜ਼ਹਿਰੀਲੀ ਚੀਜ਼ ਖਾ ਲਈ ਜਿਸ ਤੋਂ ਬਾਅਦ ਉਸਨੂੰ ਹਸਪਤਾਲ ਦਾਖਲ ਕਰਾਇਆ ਗਿਆ ਜਿੱਥੇ ਤਿੰਨ ਚਾਰ ਦਿਨ ਜ਼ਿੰਦਗੀ-ਮੌਤ ਦੀ ਲੜਾਈ ਲੜਦੇ ਹੋਏ ਉਸਨੇ 1 ਮਈ ਨੂੰ ਦਮ ਤੋੜ ਦਿੱਤਾ। ਇਸ ਮਾਮਲੇ ਸਬੰਧੀ ਪੁਲਿਸ ਦੀ ਕਾਰਵਾਈ ਬਾਰੇ ਦੱਸਦੇ ਹੋਏ ਡੀਐਸਪੀ ਕੁਲਵੰਤ ਸਿੰਘ ਨੇ ਕਿਹਾ ਕਿ ਮ੍ਰਿਤਕ ਵਿਦਿਆਰਥੀ ਨਵਜੋਤ ਸਿੰਘ ਦੀ ਮਾਤਾ ਦੇ ਬਿਆਨਾਂ ਦੇ ਆਧਾਰ ‘ਤੇ BNS ਐਕਟ ਦੀ ਧਾਰਾ 108 (ਆਤਮ ਹੱਤਿਆ ਲਈ ਉਕਸਾਉਣਾ) ਤਹਿਤ ਐਫਆਈਆਰ ਨੰਬਰ 50 ਸਕੂਲ ਪ੍ਰਿੰਸੀਪਲ ਦੇ ਖ਼ਿਲਾਫ਼ ਦਰਜ ਕੀਤੀ ਗਈ ਹੈ।
ਫੋਟੋ ਕੈਪਸ਼ਨ-ਮ੍ਰਿਤਕ ਵਿਦਿਆਰਥੀ ਨਵਜੋਤ ਸਿੰਘ ਦੀ ਫਾਈਲ ਫੋਟੋ।
