ਬਰਨਾਲਾ,20 ਮਈ, (ਨਿਰਮਲ ਸਿੰਘ ਪੰਡੋਰੀ)-
ਅਕਸਰ ਕਿਹਾ ਜਾਂਦਾ ਹੈ ਕਿ ਰਾਜਨੀਤੀ ਵਿੱਚ ਕੋਈ ਕਿਸੇ ਦਾ ਸਕਾ ਸਬੰਧੀ ਨਹੀਂ ਹੁੰਦਾ। ਰਾਜਨੀਤੀ ਇੱਕ ਅਜਿਹੀ ਖੇਡ ਹੈ ਜਿੱਥੇ ਕਈ ਵਾਰ ਆਪਣੇ ਹੀ ਗੋਲ ਕਰ ਜਾਂਦੇ ਹਨ। ਅਜੋਕੇ ਦੌਰ ਦੀ ਰਾਜਨੀਤੀ ਇੱਕ ਅਜਿਹਾ ਯੁੱਧ ਬਣ ਚੁੱਕੀ ਹੈ ਜਿਸ ਵਿੱਚ ਸਿਆਸੀ ਵੈਰੀਆਂ ਦੇ ਅੱਗੇ ਆਪਣੇ ਖੜੇ ਹੁੰਦੇ ਹਨ। ਕਈ ਵਾਰ ਤਾਂ ਹਾਲਾਤ ਇਹੋ ਜਿਹੇ ਵੀ ਬਣ ਜਾਂਦੇ ਹਨ ਕਿ ਸਿਆਸੀ ਵੈਰੀਆਂ ਦੀਆਂ ਤੋਪਾਂ ਆਪਣਿਆਂ ਦੇ ਮੋਢਿਆਂ ‘ਤੇ ਹੁੰਦੀਆਂ ਹਨ। ਨਗਰ ਨਿਗਮ ਬਰਨਾਲਾ ਦੀਆਂ ਚੋਣਾਂ ਦੌਰਾਨ ਅਜਿਹੇ ਹਾਲਾਤ ਬਣੇ ਹੋਏ ਹਨ, ਵੈਸੇ ਤਾਂ ਕਈ ਵਾਰਡਾਂ ਵਿੱਚ ਇਹ ਸਥਿਤੀ ਬਣੀ ਹੋਈ ਹੈ ਜਿੱਥੇ ਆਪਣੇ ਹੀ ਆਪਣਿਆਂ ਦੇ ਸਾਹਮਣੇ ਖੜੇ ਹਨ ਪਰੰਤੂ ਸ਼ਹਿਰ ਦਾ ਵਾਰਡ ਨੰਬਰ 25 ਚਰਚਿਤ ਵਾਰਡ ਬਣਿਆ ਹੋਇਆ ਹੈ ਜਿੱਥੇ ਦੋ ਵੱਖਰੇ ਪਰਿਵਾਰਾਂ ਦੀਆਂ ਦਰਾਣੀਆਂ-ਜਠਾਣੀਆਂ ਆਹਮੋ ਸਾਹਮਣੇ ਚੋਣ ਮੈਦਾਨ ਵਿੱਚ ਹਨ। ਸੱਤਾਧਾਰੀ ਆਮ ਆਦਮੀ ਪਾਰਟੀ ਵੱਲੋਂ ਮਮਤਾ ਕੌਂਸਲ ਚੋਣ ਮੈਦਾਨ ਵਿੱਚ ਹੈ ਜਦਕਿ ਉਸਦੇ ਮੁਕਾਬਲੇ ਉਸਦੀ ਜੇਠਾਣੀ ਰੁਪਿੰਦਰਪਾਲ ਕੌਰ ਰਮਾ ਸ਼ਰਮਾ ਨੇ ਵੀ ਝੰਡਾ ਚੁੱਕ ਲਿਆ ਹੈ। ਆਮ ਆਦਮੀ ਪਾਰਟੀ ਦੀ ਟਿਕਟ ਨਾ ਮਿਲਣ ਦੇ ਰੋਸ ਵਜੋਂ ਰਮਾ ਸ਼ਰਮਾ ਨੇ ਆਜ਼ਾਦ ਚੋਣ ਲੜਨ ਦਾ ਐਲਾਨ ਕਰ ਦਿੱਤਾ ਪ੍ਰੰਤੂ ਇਸੇ ਦੌਰਾਨ ਭਾਰਤੀ ਜਨਤਾ ਪਾਰਟੀ ਨੇ ਰਮਾ ਸ਼ਰਮਾ ਨੂੰ ਵਾਰਡ ਨੰਬਰ 25 ਤੋਂ ਆਪਣੀ ਟਿਕਟ ਦੇ ਦਿੱਤੀ ਹੁਣ ਰਮਾ ਸ਼ਰਮਾ ਤੇ ਮਮਤਾ ਕੌਂਸਲ (ਜੇਠਾਣੀ ਦਰਾਣੀ) ਚੋਣ ਮੈਦਾਨ ਵਿੱਚ ਆਹਮੋ ਸਾਹਮਣੇ ਹਨ। ਦੂਜੇ ਪਾਸੇ ਇਸੇ 25 ਨੰਬਰ ਵਾਰਡ ਵਿੱਚ ਇੱਕ ਹੋਰ ਸਿਆਸੀ ਰੌਚਕਤਾ ਸਾਹਮਣੇ ਆਈ ਹੈ ਜਿਸ ਤਹਿਤ ਟਕਸਾਲੀ ਅਕਾਲੀ ਭੋਤਨਾ ਪਰਿਵਾਰ ਦੀਆਂ ਦੋ ਔਰਤਾਂ ਆਹਮੋ ਸਾਹਮਣੇ ਚੋਣ ਮੈਦਾਨ ਵਿੱਚ ਹਨ। ਟਕਸਾਲੀ ਅਕਾਲੀ ਆਗੂ ਜਰਨੈਲ ਸਿੰਘ ਭੋਤਨਾ ਦੀ ਨੂੰਹ ਜਸਵੀਰ ਕੌਰ ਭੋਤਨਾ ਨੂੰ ਸ਼੍ਰੋਮਣੀ ਅਕਾਲੀ ਦਲ ਨੇ ਟਿਕਟ ਦਿੱਤੀ ਹੈ ਜਦਕਿ ਦੂਜੇ ਪਾਸੇ ਜਥੇਦਾਰ ਭੋਤਨਾ ਦੀ ਨੂੰਹ ਕੁਲਵਿੰਦਰ ਕੌਰ ਭੋਤਨਾ ਆਜ਼ਾਦ ਤੌਰ ‘ਤੇ ਮੈਦਾਨ ਵਿੱਚ ਹੈ। ਜਸਵੀਰ ਕੌਰ ਭੋਤਨਾ ਤੇ ਕੁਲਵਿੰਦਰ ਕੌਰ ਭੋਤਨਾ ਵੀ ਦੋਵੇਂ ਦਰਾਣੀ ਜੇਠਾਣੀ ਹਨ। ਕੁਲਵਿੰਦਰ ਕੌਰ ਭੋਤਨਾ ਦਾ ਪਤੀ ਹਰਵੀਰ ਸਿੰਘ ਭੋਤਨਾ ਕਾਫ਼ੀ ਸਮੇਂ ਤੋਂ ਆਮ ਆਦਮੀ ਪਾਰਟੀ ਵਿੱਚ ਸਰਗਰਮ ਹੈ ਜੋ 25 ਮੈਂਬਰ ਵਾਰਡ ਤੋਂ ਟਿਕਟ ਦਾ ਮਜਬੂਤ ਦਾਅਵੇਦਾਰ ਸੀ ਪ੍ਰੰਤੂ ਅੱਖੋਂ ਪਰੋਖੇ ਕੀਤੇ ਜਾਣ ਦੇ ਰੋਸ ਵਜੋਂ ਉਸਨੇ ਆਜ਼ਾਦ ਤੌਰ ‘ਤੇ ਆਪਣੀ ਪਤਨੀ ਨੂੰ ਚੋਣ ਮੈਦਾਨ ਵਿੱਚ ਉਤਾਰਿਆ ਹੋਇਆ ਹੈ। ਇੱਕੋ ਵਾਰਡ ਵਿੱਚ ਦੋ ਵੱਖਰੇ ਵੱਖਰੇ ਪਰਿਵਾਰਾਂ ਦੀਆਂ ਦਰਾਣੀਆਂ ਜਠਾਣੀਆਂ ਦੇ ਚੋਣ ਯੁੱਧ ਨੇ ਚੋਣ ਪ੍ਰਚਾਰ ਵਿੱਚ ਰੌਚਿਕਤਾ ਬਣਾਈ ਹੋਈ ਹੈ। ਕਾਂਗਰਸ ਪਾਰਟੀ ਨੇ ਵਾਰਡ ਨੰਬਰ 25 ਵਿੱਚ ਮਨਜੀਤ ਸਿੰਘ ਗੁਰੂ ਦੀ ਪਤਨੀ ਮਨਦੀਪ ਕੌਰ ਗੁਰੂ ਨੂੰ ਟਿਕਟ ਦਿੱਤੀ ਹੈ। ਲੋਕ ਚਰਚਾ ਹੈ ਕਿ ਪੰਜਾਬ ਪੁਲਿਸ ਦੇ ਸੀਆਈਡੀ ਵਿੰਗ ਵਿੱਚ ਲੰਮਾ ਸਮਾਂ ਨੌਕਰੀ ਕਰਨ ਕਰਕੇ ਕਾਨੂੰਨੀ ਅਤੇ ਸਿਆਸੀ ਦਾਅ ਪੇਚਾਂ ਦੇ ਮਾਹਿਰ ਮਨਜੀਤ ਸਿੰਘ ਗੁਰੂ ਦੇ ਪਰਿਵਾਰ ਨੂੰ ਆਪਣੇ ਮੁਕਾਬਲੇ ‘ਚ ਚੋਣ ਲੜ ਰਹੀਆਂ ਦਰਾਣੀਆਂ-ਜਠਾਣੀਆਂ ਦੇ ਸਿਆਸੀ ਕਲੇਸ਼ ਦਾ ਫਾਇਦਾ ਮਿਲ ਸਕਦਾ ਹੈ।
