ਬੋਲ ਪੰਡੋਰੀ ਦੇ…. ਨਿਰਮਲ ਸਿੰਘ ਪੰਡੋਰੀ
25.5.2026
-ਅਕਸਰ ਅਸੀਂ ਕੁਝ ਗੱਡੀਆਂ ਦੇ ਅੱਗੇ ਪਿੱਛੇ, ਆਸੇ ਪਾਸੇ ਲਿਖਿਆ ਹੋਇਆ ਪੜ੍ਹਦੇ ਆਂ…ਚੱਲ ਰਾਣੀ ਤੇਰਾ ਰੱਬ ਰਾਖਾ…ਨਿੱਕੇ ਹੁੰਦੇ ਸੋਚਦੇ ਸੀ ਇਹ ‘ਰਾਣੀ’ ਕੌਣ ਆਂ…ਫਿਰ ਹੌਲੀ ਹੌਲੀ ਵੱਡੇ ਹੋ ਗਏ ਤਾਂ ਪਤਾ ਲੱਗਿਆ ਰਾਣੀ ਨੂੰ ਕੋਈ ਔਰਤ ਨਹੀਂ ਸਗੋਂ ਇਹ ਕਿਸੇ ਦੀ ਇੱਕ ਭਾਵਨਾ ਹੈ… ਪਰ ਅੱਜ ਕੱਲ੍ਹ ਸਥਾਨਕ ਸੰਸਥਾਵਾਂ ਦੀਆਂ ਚੋਣਾਂ ਦੇ ਮੱਦੇਨਜ਼ਰ ‘ਰਾਣੋ’ ਨੇ ਵੋਟਰਾਂ ਦੇ ਘਰ ਵਿੱਚ ਦਸਤਕ ਦੇ ਦਿੱਤੀ ਹੈ…ਇਹ ਰਾਣੋ ਉਸ ਰਾਣੀ ਦੀ ਭੈਣ ਨਹੀਂ ਅਤੇ ਨਾ ਹੀ ਭੇਜਣ ਵਾਲਿਆਂ ਦੀ ਕੋਈ ਭਾਵਨਾ ਹੈ… ਚੋਣਾਂ ਲਈ 24 ਤਾਰੀਕ ਨੂੰ 5 ਵਜੇ ਪ੍ਰਚਾਰ ਬੰਦ ਹੋਣ ਤੋਂ ਬਾਅਦ ਆਟੋ ਰਿਕਸ਼ਿਆਂ ‘ਤੇ ਲੱਗੇ ਸਪੀਕਰ ਬੰਦ ਹੋ ਗਏ ਅਤੇ ਹੁਣ ਪ੍ਰਚਾਰ ਦੀ ਜ਼ਿੰਮੇਵਾਰੀ ‘ਰਾਣੋ’ ਨੇ ਸੰਭਾਲ ਲਈ ਹੈ…ਚੋਣ ਲੜ ਰਹੇ ਉਮੀਦਵਾਰਾਂ ਜਾਂ ਉਹਨਾਂ ਦੇ ਸਮਰਥਕਾਂ ਨੇ ਵੋਟਰਾਂ ਦੇ ਘਰਾਂ ਵਿੱਚ ਰਾਣੋ ਭੇਜ ਦਿੱਤੀ…ਇਹ ਰਾਣੋ ਹੈ ਬਹੁਤ ਤੇਜ਼…ਚੁੜੇਲ ਬਣ ਕੇ ਚਿੰਬੜਦੀ ਆਂ…ਇਹ ਸਸਤੀ ਹੈ ਹਰ ਕਿਸੇ ਦੇ ਹੱਥ ਵਿੱਚ ਸੌਖਿਆਂ ਹੀ ਆ ਜਾਂਦੀ ਆਂ… ਸੁਣਿਐ…ਕਹਿੰਦੇ ਬਰਨਾਲੇ ਇੱਕ ਉਮੀਦਵਾਰ ਨੇ ਕਿਸੇ ਦੇ ਘਰ ਰਾਣੋ (ਦੇਸੀ) ਭੇਜ ਦਿੱਤੀ ਜਦੋਂ ਸ਼ਾਮ ਨੂੰ ਮੁੰਡਾ ਘਰ ਆਇਆ ਤਾਂ ਘਰਵਾਲੀ ਨੇ ਦੱਸਿਆ ਕਿ ਬਾਪੂ ਨੂੰ ਫਲਾਣਾ ਰਾਣੋ (ਬੋਤਲ) ਦੇ ਕੇ ਗਿਆ…ਮੁੰਡੇ ਨੇ ਰਾਣੋ ਨੂੰ ਚੁੱਕਿਆ ਤੇ ਉਮੀਦਵਾਰ ਦੇ ਘਰ ਪੁੱਜ ਗਿਆ…ਕਹਿੰਦਾ ਸਾਡੇ ਘਰ ਪਹਿਲਾਂ ਹੀ ਮੇਮ (ਅੰਗਰੇਜ਼ੀ) ਪਈ ਆਂ…ਚੁੱਕ ਲੈ ਆਪਣੀ ਦੇਸੀ… ਹੁਣ ਰੱਬ ਜਾਣਦੈ ਕਿ ਉਹ ਲਾਂਭਾ ਦੇਣ ਆਇਆ ਸੀ ਜਾਂ ਫਿਰ ਇਹ ਕਹਿਣ ਆਇਆ ਸੀ ਕਿ ਅਸੀਂ ‘ਦੇਸੀ’ ਨਹੀਂ ਅੰਗਰੇਜ਼ੀ ਪੀਨੇ ਆਂ… ਉਹ ਵੋਟਾਂ ਦੇ ਵਪਾਰੀਆਂ ਦੀ ਯੋਜਨਾ ਦੇਖ ਲਵੋ… ਮਾੜਿਆਂ ਨੂੰ ਦੇਸੀ ਰਾਣੋ ਤੇ ਤਕੜੇ ਨੂੰ ਅੰਗਰੇਜ਼ੀ ਮੇਮ ਰੋਇਲ ਰਾਜਿਆਂ ਵਾਲੀ…ਚਲੋ ਆਪਾਂ ਕੀ ਲੈਣਾ ਕੋਈ ਕੁਝ ਪੀਵੇ…ਜਿਵੇਂ ਮਰਜ਼ੀ ਜੀਵੇ…ਪਰ ਇੱਕ ਗੱਲ ਜ਼ਰੂਰ ਆਂ ਜਿਉਂਦੀ ਜਾਗਦੀ ਜ਼ਮੀਰ ਵਾਲਿਓ…ਰਾਣੋ ਦੇ ਕਹਿਣ ‘ਤੇ ਵੋਟ ਨਾ ਪਾਇਓ… ਬਲਕਿ ਵੋਟ ਦੇ ਲਾਲਚ ਵਿੱਚ ਤੁਹਾਡੇ ਘਰ ਰਾਣੋ ਭੇਜਣ ਵਾਲਿਆਂ ਨੂੰ ਸਬਕ ਸਿਖਾਇਓ…ਇਹ ਰਾਣੋ ਘਰਾਂ ਦੇ ਘਰ ਬਰਬਾਦ ਕਰਨ ਵਾਲੀ ਆਂ…ਇਹ ਰਾਣੋ ਤੁਹਾਡਾ ਭਵਿੱਖ ਤਬਾਹ ਕਰਨ ਵਾਲੀ ਆਂ…ਸੋਚੋ ਜਿਹੜੇ ਸਾਡੇ ਘਰਾਂ ‘ਚ ਰਾਣੋ ਨੂੰ ਭੇਜ ਕੇ ਸਾਡੀ ਵੋਟ ਲੈਣਾ ਚਾਹੁੰਦੇ ਨੇ…ਇਹਦਾ ਮਤਲਬ ਉਹਨਾਂ ਕੋਲ ਕੋਈ ਕਲਾ ਕਰਤੂਤ ਹੀ ਨਹੀਂ…ਉਹਨਾਂ ਕੋਲ ਕੋਈ ਯੋਜਨਾ ਹੀ ਨਹੀਂ ਸਾਡੇ ਲਈ… ਛੱਡੋ ਖਹਿੜਾ ਇਹਨਾਂ ਰਾਣੋ ਰਾਣੀਆਂ ਦਾ…ਰਾਜੇ ਬਣੋ ਰਾਜੇ…ਰਾਜੇ ਭਾਵ ਕਿੰਗ ਮੇਕਰ….!
