ਬਰਨਾਲਾ, 25 ਦਸੰਬਰ (ਨਿਰਮਲ ਸਿੰਘ ਪੰਡੋਰੀ) : ਪੰਜਾਬ ਵਿਧਾਨ ਸਭਾ ਚੋਣਾਂ ਲਈ ਸੂਬੇ ’ਚ ਲੱਗਭੱਗ ਸਾਰੀਆਂ ਸਿਆਸੀ ਪਾਰਟੀਆਂ ਨੇ ਚੋਣ ਸਰਗਰਮੀਆਂ ਸ਼ੁਰੂ ਕਰ ਦਿੱਤੀਆਂ ਹਨ। ਜੇਕਰ ਬਰਨਾਲਾ ਵਿਧਾਨ ਸਭਾ ਹਲਕੇ ਵਿੱਚ ਕਾਂਗਰਸ ਪਾਰਟੀ ਦੀਆਂ ਸਰਗਰਮੀਆਂ ਉੱਪਰ ਨਜ਼ਰ ਮਾਰੀਏ ਤਾਂ ਮੁੱਖ ਤੌਰ ’ਤੇ ਦੋ ਨਾਮ ਕੇਵਲ ਸਿੰਘ ਢਿੱਲੋਂ ਅਤੇ ਕੁਲਦੀਪ ਸਿੰਘ ਕਾਲਾ ਢਿੱਲੋਂ ਸਾਹਮਣੇ ਆ ਰਹੇ ਹਨ। ਕਾਂਗਰਸ ਹਾਈਕਮਾਂਡ ਨੂੰ ਭੇਜੇ ਜਾਣ ਵਾਲੇ ਪੈਨਲ ਵਿੱਚ ਦੋਵੇ ਢਿੱਲੋਂ ਬੈਠੇ ਹਨ, ਇਸ ਤਰਾ ਬਰਨਾਲਾ ਹਲਕੇ ’ਚ ਕਾਂਗਰਸ ਦੀ ਟਿਕਟ ਲਈ ਦੌੜ ਦੇ ਮੁੱਖ ਦੌੜਾਕ ਕੇਵਲ ਸਿੰਘ ਢਿੱਲੋਂ ਅਤੇ ਕੁਲਦੀਪ ਸਿੰਘ ਕਾਲਾ ਢਿੱਲੋਂ ਬਣੇ ਹੋਏ ਹਨ, ਭਾਵ ਬਰਨਾਲਾ ਹਲਕੇ ਤੋਂ ਢਿੱਲੋਂ ਬਨਾਮ ਢਿੱਲੋਂ ਵਾਲੀ ਤਸਵੀਰ ਸਾਹਮਣੇ ਆ ਰਹੀ ਹੈ। ਉਂਝ ਭਾਵੇਂ ਕੇਵਲ ਸਿੰਘ ਢਿੱਲੋਂ ਦੇ ਖੇਮੇ ਵੱਲੋਂ ‘ਟਿਕਟ ਵੱਟ ’ਤੇ ਪਈ ਆਂ’ ਦਾ ਪ੍ਰਚਾਰ ਵਿੱਢਿਆ ਹੋਇਆ ਹੈ ਪ੍ਰੰਤੂ ਜੇਕਰ ਪੰਜਾਬ ਪ੍ਰਦੇਸ ਕਾਂਗਰਸ ਵੱਲੋਂ ਪਿਛਲੇ ਕੁਝ ਦਿਨਾਂ ਦੌਰਾਨ ਸੂਬਾ ਕਾਂਗਰਸ ਕਮੇਟੀ, ਜ਼ਿਲਾ ਕਾਂਗਰਸ ਕਮੇਟੀ ਅਤੇ ਕਾਂਗਰਸ ਦੇ ਸੂਬਾ ’ਤੇ ਜ਼ਿਲਾ ਪੱਧਰੀ ਵੱਖ-ਵੱਖ ਵਿੰਗਾਂ ਦੇ ਐਲਾਨ ਕੀਤੇ ਨਾਵਾਂ ਦੀ ਘੋਖ ਕੀਤੀ ਜਾਵੇ ਤਾਂ ਪ੍ਰਦੇਸ਼ ਕਾਂਗਰਸ ਕਮੇਟੀ ਨੇ ਕੁਲਦੀਪ ਸਿੰਘ ਕਾਲਾ ਢਿੱਲੋਂ ਨੂੰ ਵੀ ਬਰਾਬਰ ਦੀ ਪ੍ਰਤੀਨਿਧਤਾ ਦਿੱਤੀ ਹੈ। ਕਾਂਗਰਸ ਦਾ ਜ਼ਿਲਾ ਪ੍ਰਧਾਨ ਤਾਂ ਕਾਲਾ ਢਿੱਲੋਂ ਦੇ ਧੜੇ ਦਾ ਹੀ ਮੰਨਿਆ ਜਾ ਰਿਹਾ ਹੈ। ਕਾਂਗਰਸ ਪਾਰਟੀ ਦੀ ਆਪਣੇ ਉਮੀਦਵਾਰਾਂ ਦੀ ਚੋਣ ਪ੍ਰਕਿਰਿਆ ਕਾਫ਼ੀ ਲੰਮੀ ਤੇ ਜਟਿਲ ਹੈ, ਚੋਣਾਂ ਦੇ ਐਲਾਨ ਹੋਣ ਤੱਕ ਉਮੀਦਵਾਰਾਂ ਦੀ ਚੋਣ ਸੰਬੰਧੀ ਕਾਂਗਰਸ ਆਪਣੇ ਪੱਤੇ ਨਹੀਂ ਖੋਲਦੀ ਪ੍ਰੰਤੂ ਬਰਨਾਲਾ ਹਲਕੇ ਲਈ ਬਣੇ ਪੈਨਲ ਦੀ ਭਿਣਕ ਅਨੁਸਾਰ ਬਰਨਾਲਾ ਦੀ ਟਿਕਟ ‘ਢਿੱਲੋਂ ਗੋਤ ਲਈ ਮੁੱਛ ਦਾ ਸਵਾਲ’ ਬਣਦੀ ਨਜ਼ਰ ਆ ਰਹੀ ਹੈ।
Menu
