ਬਰਨਾਲਾ, 23 ਦਸੰਬਰ (ਨਿਰਮਲ ਸਿੰਘ ਪੰਡੋਰੀ) : ਚੋਣਾਂ ਦੇ ਨੇੜੇ ਆ ਕੇ ਅਕਸਰ ਸਿਆਸੀ ਪਾਰਟੀਆਂ ਵਿਰੋਧੀ ਨੇਤਾਵਾਂ ਦੇ ਪੋਤੜੇ ਫਰੋਲਦੀਆਂ ਹਨ ਪਰ ਇਸ ਵਾਰ ਪੰਜਾਬ ’ਚ ਮਾਹੌਲ ਕੁਝ ਪਹਿਲਾਂ ਨਾਲੋਂ ਵੱਖਰਾ ਵੇਖਣ ਨੂੰ ਮਿਲ ਰਿਹਾ ਹੈ। ਸੂਬੇ ਦੀਆਂ ਲੱਗਭੱਗ ਸਾਰੀਆਂ ਸਿਆਸੀ ਪਾਰਟੀਆਂ ਅੰਦਰੂਨੀ ਜੰਗ ਦਾ ਸ਼ਿਕਾਰ ਹਨ। ਸਿਆਸੀ ਨੇਤਾ ਆਪਣੀ ਹੀ ਪਾਰਟੀ ਦੇ ਨੇਤਾਵਾਂ ਨੂੰ ਰਗੜੇ ਲਾ ਰਹੇ ਹਨ। ਜੇਕਰ ਕਾਂਗਰਸ ਦੀ ਗੱਲ ਕਰੀਏ ਤਾਂ ਸੂਬਾ ਪ੍ਰਧਾਨ ਨਵਜੋਤ ਸਿੰਘ ਸਿੱਧੂ ਖ਼ਿਲਾਫ਼ ਕਾਂਗਰਸ ਦੇ ਹੀ ਸੰਸਦ ਮੁਨੀਸ਼ ਤਿਵਾੜੀ ਨੇ ਮੋਰਚਾ ਖੋਲ ਦਿੱਤਾ ਹੈ। ਕਾਂਗਰਸ ਦੇ ਹੀ ਸੀਨੀਅਰ ਆਗੂੁਆਂ ਵੱਲੋਂ ਸ਼ਰੇਆਮ ਬਿਆਨਬਾਜ਼ੀ ਕੀਤੀ ਜਾ ਰਹੀ ਹੈ ਕਿ ਨਵਜੋਤ ਸਿੰਘ ਸਿੱਧੂ ਸੂਬੇ ’ਚ ਕਾਂਗਰਸ ਨੂੰ ਖ਼ਤਮ ਕਰਕੇ ਹੀ ਦਮ ਲਵੇਗਾ। ਜੇਕਰ ਕਿਸੇ ਪਾਰਟੀ ਦੇ ਸੂਬਾ ਪ੍ਰਧਾਨ ਦੇ ਖ਼ਿਲਾਫ਼ ਪਾਰਟੀ ਦੇ ਹੀ ਸੀਨੀਅਰ ਆਗੂਆਂ ਵੱਲੋਂ ਮੁਹਿੰਮ ਛੇੜੀ ਗਈ ਹੋਵੇ ਤਾਂ ਯਕੀਨਨ ਇਸ ਦਾ ਅਸਰ ਜੇਕਰ ਸੂਬਾ ਪੱਧਰ ’ਤੇ ਨਹੀਂ ਤਾਂ ਸੰਬੰਧਿਤ ਆਗੂਆਂ ਦੇ ਹਲਕਿਆਂ ਤੱਕ ਤਾਂ ਜ਼ਰੂਰ ਪਵੇਗਾ। ਅਗਲੀਆਂ ਵਿਧਾਨ ਸਭਾ ਚੋਣਾਂ ਲਈ ਸੱਤਾ ਦੀ ਤਕੜੀ ਦਾਅਵੇਦਾਰ ਆਮ ਆਦਮੀ ਪਾਰਟੀ ਵੀ ਅੰਦਰੂਨੀ ਜੰਗ ਦੇ ਸੇਕ ਤੋਂ ਬਚੀ ਨਹੀਂ ਰਹੀ। ਪਾਰਟੀ ਦੇ ਸੂਬਾ ਪ੍ਰਧਾਨ ਭਗਵੰਤ ਮਾਨ ਨੂੰ ਮੁੱਖ ਮੰਤਰੀ ਦਾ ਚਿਹਰਾ ਬਣਾਉਣ ਲਈ ਉਸ ਦੇ ਹਮਾਇਤੀਆਂ ਵੱਲੋਂ ਮੁਹਿੰਮ ਸ਼ੁਰੂ ਕੀਤੀ ਗਈ ਹੈ।
ਇਸ ਮੁਹਿੰਮ ਦੌਰਾਨ ਭਗਵੰਤ ਮਾਨ ਦੇ ਹਮਾਇਤੀਆਂ ਵੱਲੋਂ ‘ਆਪ’ ਦੀ ਹਾਈਕਮਾਂਡ ਦੇ ਖ਼ਿਲਾਫ਼ ਰੱਜ ਕੇ ਭੜਾਸ ਕੱਢੀ ਜਾ ਰਹੀ ਹੈ। ‘ਆਪ’ ਦੇ ਜਿਹੜੇ ਵਿਧਾਇਕ ਭਗਵੰਤ ਦੇ ਹੱਕ ’ਚ ਖੁੱਲ ਕੇ ਨਹੀਂ ਬੋਲ ਰਹੇ ਉਨਾਂ ਪ੍ਰਤੀ ਵਲੰਟੀਅਰਾਂ ’ਚ ਮੱਠਾ-ਮੱਠਾ ਰੋਸ ਮਘ ਰਿਹਾ ਹੈ। ਜੇਕਰ ‘ਆਪ’ ਨੇ ਭਗਵੰਤ ਮਾਨ ਨੂੰ ਮੁੱਖ ਮੰਤਰੀ ਦਾ ਚਿਹਰਾ ਨਾ ਬਣਾਇਆ ਤਾਂ ਵਲੰਟੀਅਰਾਂ ਦਾ ਇਹ ਰੋਸ ਭਗੰਵਤ ਮਾਨ ਦੇ ਹੱਕ ਵਿੱਚ ਨਾ ਬੋਲਣ ਵਾਲੇ ਵਿਧਾਇਕਾਂ ਪ੍ਰਤੀ ਭਾਂਬੜ ਵੀ ਬਣ ਸਕਦਾ ਹੈ, ਜਿਸ ਦੀ ਅੱਗ ’ਚ ਸੰਬੰਧਿਤ ਵਿਧਾਇਕਾਂ ਦੀਆਂ ਸੀਟਾਂ ਮੱਚ ਸਕਦੀਆਂ ਹਨ । ਸ਼ੋਮਣੀ ਅਕਾਲੀ ਦਲ ਵਿੱਚ ਭਾਵੇਂ ਪਾਰਟੀ ਸੁਪਰੀਮੋ ਸੁਖਬੀਰ ਸਿੰਘ ਬਾਦਲ ਖ਼ਿਲਾਫ਼ ਕੋਈ ਆਗੂ ਖੁੱਲ ਕੇ ਨਹੀਂ ਬੋਲ ਰਿਹਾ ਪ੍ਰ੍ਰੰਤੂ ਟਿਕਟਾਂ ਦੇ ਐਲਾਨ ਤੋਂ ਬਾਅਦ ਕੁਝ ਸੀਟਾਂ ਦੇ ਤਕੜੇ ਦਾਅਵੇਦਾਰ ਅਕਾਲੀ ਆਗੂ ਟਿਕਟਾਂ ਤੋਂ ਵਾਂਝੇ ਰਹਿਣ ਤੋਂ ਬਾਅਦ ਅੰਦਰੋ-ਅੰਦਰੀ ਜ਼ਹਿਰ ਘੋਲ ਰਹੇ ਹਨ। ਬਸਪਾ ਨਾਲ ਗੱਠਜੋੜ ਤਹਿਤ ਕੁਝ ਟਿਕਟਾਂ ਅਕਾਲੀ ਆਗੂਆਂ ਦੇ ਹੱਥਂੋ ਨਿੱਕਲ ਗਈਆਂ ਹਨ ਜਿਸ ਤੋਂ ਬਾਅਦ ਸੰਬੰਧਿਤ ਅਕਾਲੀ ਆਗੂ ਉੱਚਿਤ ਸਮੇਂ ਦੀ ਉਡੀਕ ਕਰ ਰਹੇ ਹਨ। ਵਿਧਾਨ ਸਭਾ ਹਲਕਾ ਮਹਿਲ ਕਲਾਂ ਇਸ ਦੀ ਪੁਖ਼ਤਾ ਉਦਾਹਰਣ ਹੈ। ਬਹੁਜਨ ਸਮਾਜ ਪਾਰਟੀ ਗੱਠਜੋੜ ਤਹਿਤ ਆਪਣੇ ਹਿੱਸੇ ਆਈਆਂ ਸੀਟਾਂ ’ਤੇ ਉਮੀਦਵਾਰਾਂ ਦੇ ਐਲਾਨ ਕਰਨ ਵਿੱਚ ਟਪਲਾ ਖਾ ਰਹੀ ਹੈ। ਬਸਪਾ ਦੀ ਹਾਈਕਮਾਂਡ ‘ਤੇ ਟਿਕਟਾਂ ਵੇਚਣ ਦੇ ਦੋਸ਼ ਵੀ ਸ਼ਰੇਆਮ ਲੱਗ ਰਹੇ ਹਨ। ਬਸਪਾ ਦੀ ਅੰਦਰੂਨੀ ਜੰਗ ਵੀ ਪਾਰਟੀ ਲਈ ਸ਼ੁਭ ਸੰਕੇਤ ਨਹੀਂ ਹੈ।
ਪੰਜਾਬ ’ਚ ਖੱਬੇ ਪੱਖੀ ਧਿਰਾਂ ਕਿਸਾਨ ਅੰਦੋਲਨ ਦੀ ਜਿੱਤ ਤੋਂ ਬਾਅਦ ਰਵਾਇਤੀ ਪਾਰਟੀਆਂ ਵਿਰੋਧੀ ਲਹਿਰ ਨੂੰ ਆਪਣੇ ਹੱਕ ਵਿੱਚ ਵਰਤਣ ਲਈ ਪੱਬਾਂ ਭਾਰ ਹਨ ਪ੍ਰੰਤੂ ਪੇਂਡੂ ਖੇਤਰ ਦਾ ਕਿਸਾਨ /ਮਜ਼ਦੂਰ ਇਸ ਵਾਰ ਵੋਟ ਪਰਚੀ ਦੀ ਵਰਤੋਂ ਸੰਬੰਧੀ ਪਹਿਲਾਂ ਨਾਲੋਂ ਵੱਧ ਸੁਚੇਤ ਲੱਗ ਰਿਹਾ ਹੈ। ਜਿਸ ਕਰਕੇ ਖੱਬੇਪੱਖੀ ਧਿਰਾਂ ਨੂੰ ਕਿਸਾਨ ਅੰਦੋਲਨ ਦੇ ਪਲੇਟਫਾਰਮ ਤੋਂ ਹਟ ਕੇ ਚੋਣ ਮੈਦਾਨ ਵਿੱਚ ਉਤਰਨਾ ਪਵੇਗਾ। ਇਸ ਵਾਰ ਪੰਜਾਬ ’ਚ ਵਿਧਾਨ ਸਭਾ ਚੋਣਾਂ ਨੂੰ ਵੱਡੇ ਕੱਦ ਦੇ ਕਿਸਾਨ ਆਗੂਆਂ ਦੀਆਂ ਗੁੱਝੀਆਂ ਸਿਆਸੀ ਗਤੀਵਿਧੀਆਂ ਵੀ ਪ੍ਰਭਾਵਿਤ ਕਰਨਗੀਆਂ । ਸ਼੍ਰੋਮਣੀ ਅਕਾਲੀ ਦਲ (ਅ) ਇੱਕੋ ਇੱਕ ਅਜਿਹੀ ਪਾਰਟੀ ਹੈ ਜੋ ਆਪਣੇ ਹੀ ਬਲਬੂਤੇ ਮੈਦਾਨ ਵਿੱਚ ਉੱਤਰੇਗੀ। ਪੰਜਾਬ ਦੇ ਸਿਆਸੀ ਨਕਸ਼ੇ ’ਤੇ ਨਵੀਂ ਧਿਰ ਸ਼੍ਰੋਮਣੀ ਅਕਾਲੀ ਦਲ ਸੰਯੁਕਤ ਦਾ ਸਿਆਸੀ ਪਿੜ ਬੱਝਣ ਤੋਂ ਪਹਿਲਾਂ ਹੀ ਸੁੰਨਾ ਹੁੰਦਾ ਜਾ ਰਿਹਾ ਹੈ। ਦਲ ਦੇ ਬਾਨੀ ਆਗੂ ਰਣਜੀਤ ਸਿੰਘ ਬ੍ਰਹਮਪੁਰਾ ਘਰ ਵਾਪਸੀ ਕਰ ਗਏ ਹਨ।
ਜਿਸ ਤੋਂ ਬਾਅਦ ਇਹ ਪਾਰਟੀ ਵੀ ਢੀਂਡਸਾ ਪਰਿਵਾਰ ਤੱਕ ਸੀਮਤ ਹੁੰਦੀ ਜਾ ਰਹੀ ਹੈ। ਸ਼੍ਰੋਮਣੀ ਅਕਾਲੀ ਦਲ ਸੰਯੁਕਤ ਦੇ ਵੀ ਕੁਝ ਆਗੂਆਂ ਦੇ ਮਨਾਂ ’ਚ ਢੀਂਡਸਾ ਦੀ ਭਾਜਪਾ ਨਾਲ ਸਿਆਸੀ ਜੱਫ਼ੀ ਉੱਪਰ ਨਿਰਾਸ਼ਤਾ ਹੈ। ਕਿਸਾਨ ਆਗੂ ਗੁਰਨਾਮ ਸਿੰਘ ਚੜੂਨੀ ਨੇ ਵੀ ਪੰਜਾਬ ਦੇ ਸਿਆਸੀ ਪਿੜ ਵਿੱਚ ਬਾਜ਼ੀ ਪਾਉਣ ਦਾ ਐਲਾਨ ਕਰ ਦਿੱਤਾ ਹੈ, ਇਹ ਵੇਖਣਯੋਗ ਹੋਵੇਗਾ ਕਿ ਚੜੂਨੀ ਦੀ ਬਾਜ਼ੀ ਦੇ ਮੈਦਾਨ ’ਚ ਪੰਜਾਬ ਦੇ ਕਿਸਾਨ ਆਗੂ ਚੜੂਨੀ ਦੇ ਸਿਆਸੀ ਢੋਲ ’ਤੇ ਡੱਗਾ ਲਗਾਉਦੇ ਹਨ ਜਾਂ ਨਹੀਂ। ਵੈਸੇ ਕਿਸਾਨ ਆਗੂਆਂ ਨੇ ਬਾਹਰੀ ਤੌਰ ’ਤੇ ਐਲਾਨ ਕੀਤਾ ਹੈ ਕਿ ਸੰਯੁਕਤ ਕਿਸਾਨ ਮੋਰਚੇ ਦਾ ਕੋਈ ਵੀ ਆਗੂ ਚੋਣ ਪ੍ਰਕਿਰਿਆ ਵਿੱਚ ਸਰਗਮਰੀ ਨਾਲ ਭਾਗ ਨਹੀਂ ਲਵੇਗਾ ਪ੍ਰੰਤੂ ਚੜੂਨੀ ਦੀ ਧਿਰ ਦਾਅਵਾ ਕਰ ਰਹੀ ਹੈ ਕਿ ਸੂਬੇ ਦੀਆਂ ਕੁਝ ਜਥੇਬੰਦੀਆਂ ‘ਸੰਯੁਕਤ ਸੰਘਰਸ਼ ਪਾਰਟੀ’ ਦੀ ਝੋਲੀ ਵੋਟਾਂ ਦੀ ਖ਼ੈਰ ਪਾਉਣਗੀਆਂ। ਕੁੱਲ ਮਿਲਾ ਕੇ ਪੰਜਾਬ ’ਚ ਇਸ ਵਾਰ ਅਜੇ ਤੱਕ ਬੇਯਕੀਨੀ ਵਾਲਾ ਮਾਹੌਲ ਬਣਿਆ ਹੋਇਆ ਹੈ, ਇਸ ਵਾਰ ਆਪਣੇ ਹੀ ਆਪਣਿਆਂ ਦੀਆਂ ਲੱਤਾਂ ਖਿੱਚ ਰਹੇ ਹਨ ਭਾਵ ‘ਘਰ ਦੇ ਭੇਤੀ ਹੀ ਲੰਕਾ’ ਢਾਹੁਣ ’ਤੇ ਲੱਗੇ ਹੋਏ ਹਨ। ਵੇਖਣਯੋਗ ਹੋਵੇਗਾ ਕਿ ਕਿਹੜੀ ਪਾਰਟੀ ਦਾ ਕਿਹੜਾ ਆਗੂ ‘ਵਿਭੀਸ਼ਣ’ ਦੀ ਭੂਮਿਕਾ ਅਦਾ ਕਰੇਗਾ।
