ਬਰਨਾਲਾ 31 ਦਸੰਬਰ (ਨਿਰਮਲ ਸਿੰਘ ਪੰਡੋਰੀ)-ਜ਼ਿਲ੍ਹੇ ਦੇ ਬਲਾਕ ਸ਼ਹਿਣਾ ਅਧੀਨ ਪੈਂਦੇ ਜਗਜੀਤਪੁਰਾ ਟੋਲ ਪਲਾਜ਼ੇ ‘ਤੇ ਆਸ ਪਾਸ ਦੇ ਪਿੰਡਾਂ ਦੇ ਲੋਕਾਂ ਨੂੰ ਹੁਣ ਟੋਲ ਟੈਕਸ ਨਹੀਂ ਦੇਣਾ ਪਵੇਗਾ। ਟੌਲ ਪਲਾਜ਼ਾ ਉੱਪਰ ਬੀਕੇਯੂ ਉਗਰਾਹਾਂ ਵੱਲੋਂ ਲਗਾਏ ਅਣਮਿੱਥੇ ਸਮੇਂ ਦੇ ਧਰਨੇ ਤੋਂ ਬਾਅਦ ਟੋਲ ਪ੍ਰਬੰਧਕਾਂ ਅਤੇ ਬੀਕੇਯੂ ਉਗਰਾਹਾਂ ਦੇ ਆਗੂਆਂ ਚਮਕੌਰ ਸਿੰਘ ਨੈਣੇਵਾਲ, ਜਰਨੈਲ ਸਿੰਘ ਬਦਰਾ,ਸੁਖਦੇਵ ਸਿੰਘ ਭੋਤਨਾ ਸਮੇਤ ਹੋਰ ਆਗੂ ਅਤੇ ਟੌਲ ਪਲਾਜ਼ਾ ਵੱਲੋਂ ਨਵੀਨ ਚੌਧਰੀ, ਮੁਕੇਸ਼ ਚੌਹਾਨ ਵਿਚਕਾਰ ਲਿਖਤੀ ਸਮਝੌਤਾ ਹੋਇਆ। ਸਮਝੌਤੇ ਅਨੁਸਾਰ ਜਗਜੀਤਪੁਰਾ ਟੋਲ ਪਲਾਜ਼ੇ ਦੇ ਆਲੇ ਦੁਆਲੇ 30 ਪਿੰਡਾਂ ਰਾਮਗੜ੍ਹ, ਟੱਲੇਵਾਲ, ਭੋਤਨਾ,ਚੂੰਘਾਂ,ਮੱਲੀਆਂ, ਪੱਖੋਕੇ, ਪੱਖੋ ਕੈਂਚੀਆਂ, ਜੰਗੀਆਣਾ, ਸੰਧੂ ਕਲਾਂ, ਨੈਣੇਵਾਲ ,ਛੰਨਾ ਗੁਲਾਬ ਸਿੰਘ, ਈਸ਼ਰ ਸਿੰਘ ਵਾਲਾ, ਬੁਰਜ ਫ਼ਤਹਿਗੜ੍ਹ, ਤਲਵੰਡੀ, ਅਲਕੜਾ, ਦੀਪਗਡ਼੍ਹ ,ਵਿਧਾਤੇ, ਜਗਜੀਤਪੁਰਾ, ਉਗੋਕੇ, ਚੀਮਾ, ਜੋਧਪੁਰ, ਨਾਨਕਪੁਰਾ, ਸੰਤਪੁਰਾ, ਮੱਝੂਕੇ, ਭਗਤਪੁਰਾ, ਸੋਹਲ ਪੱਤੀ , ਪੱਤੀ ਦੀਪ ਸਿੰਘ, ਪੱਤੀ ਮੋਹਰ ਸਿੰਘ ,ਪੱਤੀ ਵੀਰ ਸਿੰਘ ਦੇ ਵਾਸੀਆਂ ਨੂੰ ਹੁਣ ਇਸ ਟੋਲ ਪਲਾਜ਼ਾ ਤੋਂ ਲੰਘਦੇ ਸਮੇਂ ਟੋਲ ਟੈਕਸ ਨਹੀਂ ਦੇਣਾ ਪਵੇਗਾ ਕਿਉਂਕਿ ਟੋਲ ਪ੍ਰਬੰਧਕਾਂ ਵੱਲੋਂ ਇਨ੍ਹਾਂ ਪਿੰਡਾਂ ਦੇ ਲੋਕਾਂ ਦਾ ਟੋਲ ਟੈਕਸ ਮੁਆਫ ਕੀਤਾ ਗਿਆ ਹੈ। ਇਨ੍ਹਾਂ 30 ਪਿੰਡਾਂ ਦੇ ਪਿੰਡ ਵਾਸੀਆਂ ਦੀ ਸ਼ਨਾਖਤ ਆਧਾਰ ਕਾਰਡ ਤੋਂ ਕੀਤੀ ਜਾਵੇਗੀ ਭਾਵ ਕਿ ਹੁਣ ਆਸ ਪਾਸ ਦੇ 30 ਪਿੰਡਾਂ ਦੇ ਵਸਨੀਕ ਆਪਣਾ ਆਧਾਰ ਕਾਰਡ ਦਿਖਾ ਕੇ ਹੀ ਟੋਲ ਪਲਾਜ਼ਾ ਤੋਂ ਲੰਘ ਜਾਇਆ ਕਰਨਗੇ ਅਤੇ ਉਨ੍ਹਾਂ ਨੂੰ ਆਪਣੇ ਵਾਹਨ ਦਾ ਟੋਲ ਟੈਕਸ ਨਹੀਂ ਦੇਣਾ ਪਵੇਗਾ।ਇਸ ਤੋਂ ਇਲਾਵਾ ਜਿਸ ਵਾਹਨ ਉੱਪਰ ਫਾਸਟ ਟੈਗ ਨਹੀਂ ਲੱਗਿਆ ਹੋਵੇਗਾ ਉਸ ਵਾਹਨ ਤੋਂ ਇਕ ਪਾਸੇ ਦੀ ਟੋਲ ਫੀਸ ਹੀ ਵਸੂਲ ਕੀਤੀ ਜਾਵੇਗੀ ਜਦ ਕਿ ਪਹਿਲਾਂ ਦੁੱਗਣਾ ਜੁਰਮਾਨਾ ਵਸੂਲ ਕੀਤਾ ਜਾਂਦਾ ਸੀ। ਇਸ ਮੌਕੇ ਭਗਤ ਸਿੰਘ ਛੰਨਾ, ਦਰਸ਼ਨ ਸਿੰਘ, ਗੁਰਨਾਮ ਸਿੰਘ ਭੋਤਨਾ, ਗੁਰਮੇਲ ਸਿੰਘ ਚੁੰਘਾਂ, ਗੁਰਚਰਨ ਸਿੰਘ, ਮੱਖਣ ਸਿੰਘ ਭਦੌੜ, ਮਹਿਲਾ ਆਗੂ ਬਿੰਦਰਪਾਲ ਕੌਰ ਭਦੌੜ, ਸੁਰਜੀਤ ਕੌਰ, ਕੁਲਵੰਤ ਕੌਰ, ਕਰਮਜੀਤ ਕੌਰ ਆਦਿ ਹਾਜ਼ਰ ਸਨ।
