ਚੰਡੀਗੜ, 03 ਜਨਵਰੀ (ਜੀ98 ਨਿਊਜ਼) : ਭਾਜਪਾ ਵਿੱਚ ਸ਼ਾਮਲ ਹੋਏ ਕਾਂਗਰਸੀ ਵਿਧਾਇਕ ਬਲਵਿੰਦਰ ਸਿੰਘ ਲਾਡੀ ਵੱਲੋਂ ਕੀਤੀ ਘਰ ਵਾਪਸੀ ਦੀ ਸੋਸ਼ਲ ਮੀਡੀਆ ’ਤੇ ਖ਼ੂਬ ਚਰਚਾ ਹੋ ਰਹੀ ਹੈ। ਦੱਸਣਯੋਗ ਹੈ ਵਿਧਾਇਕ ਲਾਡੀ ਇੱਕ ਹੋਰ ਵਿਧਾਇਕ ਫਤਿਹਜੰਗ ਸਿੰਘ ਬਾਜਵਾ ਦੇ ਨਾਲ ਕਾਂਗਰਸ ਛੱਡ ਕੇ ਹਫਤਾ ਕੁ ਪਹਿਲਾਂ ਭਾਜਪਾ ਵਿੱਚ ਸ਼ਾਮਲ ਹੋ ਗਏ ਸਨ। ਅਚਾਨਕ ਹੀ ਵਿਧਾਇਕ ਲਾਡੀ ਨੇ ਵਾਪਸ ਕਾਂਗਰਸ ਵਿੱਚ ਸ਼ਾਮਲ ਹੋਣ ਦਾ ਐਲਾਨ ਕਰ ਦਿੱਤਾ ਹੈ। ਸਿਆਸੀ ਹਲਕਿਆਂ ਵਿੱਚ ਲਾਡੀ ਦੀ ਹਫ਼ਤੇ ਵਿੱਚ ਮਾਰੀ ਪਲਟੀ ਨੂੰ ਸਿਰੇ ਦੀ ਸਿਆਸੀ ਢੀਠਤਾਈ ਕਿਹਾ ਜਾ ਰਿਹਾ ਹੈ। ਚਰਚਾ ਹੋ ਰਹੀ ਹੈ ਕਿ ਕਾਂਗਰਸ ਹਾਈਕਮਾਂਡ ਨੇ ਵਿਧਾਇਕ ਲਾਡੀ ਨੂੰ ਟਿਕਟ ਨਾ ਕੱਟੇ ਜਾਣ ਦਾ ਭਰੋਸਾ ਦਿੱਤਾ ਹੈ, ਕਿਉਂਕਿ ਨਵਜੋਤ ਸਿੰਘ ਸਿੱਧੂ ਤੇ ਚਰਨਜੀਤ ਸਿੰਘ ਚੰਨੀ ਵਿਚਕਾਰ ਚੱਲ ਰਹੀ ਅੰਦਰੂਨੀ ਖਿੱਚੋਤਾਣ ਦੇ ਮੱਦੇਨਜ਼ਰ ਵਿਧਾਇਕ ਲਾਡੀ ਨੂੰ ਅਗਲੀ ਚੋਣਾਂ ਲਈ ਟਿਕਟ ਕੱਟੇ ਜਾਣ ਦਾ ਡਰ ਸੀ। ਇਹ ਵੀ ਚਰਚਾ ਹੈ ਕਿ ਵਿਧਾਇਕ ਲਾਡੀ ਨੂੰ ਇਹ ਭਰੋਸਾ ਦਿੱਲੀ ਤੋਂ ਹੀ ਮਿਲਿਆ ਹੈ ਜਦਕਿ ਪੰਜਾਬ ਕਾਂਗਰਸ ਦੇ ਕਿਸੇ ਆਗੂ ਨੇ ਲਾਡੀ ਤੱਕ ਪਹੁਚ ਨਹੀਂ ਕੀਤੀ। ਦੂਜੇ ਪਾਸੇ ਫਤਿਹਜੰਗ ਸਿੰਘ ਬਾਜਵਾ ਦੇ ਭਰਾ ਪ੍ਰਤਾਪ ਸਿੰਘ ਬਾਜਵਾ ਨੇ ਇੱਕ ਵਾਰ ਫ਼ੇਰ ਠੋਕ ਵਜਾ ਕੇ ਕਾਦੀਆਂ ਹਲਕੇ ਤੋਂ ਹੀ ਚੋਣ ਲੜਨ ਦਾ ਐਲਾਨ ਕੀਤਾ ਹੈ ਇਸ ਲਈ ਫਤਿਹਜੰਗ ਬਾਜਵਾ ਦੀ ਘਰ ਵਾਪਸੀ ਨਾਮੁਮਕਿਨ ਹੈ। ਆਪਣੀ ਘਰ ਵਾਪਸੀ ’ਤੇ ਵਿਧਾਇਕ ਲਾਡੀ ਨੇ ਤਰਕ ਦਿੱਤਾ ਹੈ ਕਿ ਹਲਕੇ ਦੇ ਲੋਕ ਉਸ ਤੱਕ ਪਹੁੰਚ ਕਰ ਰਹੇ ਸਨ ਅਤੇ ਆਖ ਰਹੇ ਸਨ ਕਿ ਹਲਕਾ ਲਾਵਾਰਿਸ ਹੋ ਗਿਆ ਹੈ, ਪ੍ਰੰਤੂ ਵਿਧਾਇਕ ਲਾਡੀ ਨੇ ਕਾਂਗਰਸ ਛੱਡਣ ਮੌਕੇ ਹਲਕੇ ਦੇ ਲੋਕਾਂ ਨੂੰ ਪੁੱਛਣ ਸੰਬੰਧੀ ਸਵਾਲ ਦਾ ਜਵਾਬ ਦੇਣ ਤੋਂ ਟਾਲਾ ਵੱਟ ਲਿਆ।
