ਬਰਨਾਲਾ, 19 ਜਨਵਰੀ (ਨਿਰਮਲ ਸਿੰਘ ਪੰਡੋਰੀ) : ਪੰਜਾਬ ਵਿਧਾਨ ਸਭਾ ਚੋਣਾਂ ਲਈ ਕਿਸੇ ਹਲਕੇ ਤੋਂ ਟਿਕਟ ਨਾ ਮਿਲਣ ਕਰਕੇ ਰਾਜਨੀਤਿਕ ਪਾਰਟੀਆਂ ਵਿੱਚ ਪੈ ਰਹੀ ਫੁੱਟ ਦਾ ਬੀਜ ਚੋਣਾਂ ਲੜ ਰਹੀਆਂ ਕਿਸਾਨ ਜਥੇਬੰਦੀਆਂ ਵਿੱਚ ਵੀ ਪੁੰਗਰ ਚੁੱਕਾ ਹੈ। ਬਰਨਾਲਾ ਜ਼ਿਲੇ ਵਿੱਚ ਬੀਕੇਯੂ ਕਾਦੀਆਂ ਦੇ ਜ਼ਿਲਾ ਪ੍ਰਧਾਨ ਜਗਸੀਰ ਸਿੰਘ ਛੀਨੀਵਾਲ ਨੇ ਸੰਯੁਕਤ ਸਮਾਜ ਮੋਰਚੇ ਵੱਲੋਂ ਵਿਧਾਨ ਸਭਾ ਹਲਕਾ ਬਰਨਾਲਾ ਤੇ ਭਦੌੜ ਲਈ ਐਲਾਨ ਕੀਤੇ ਉਮੀਦਵਾਰ ਕ੍ਰਮਵਾਰ ਅਵੀਕਰਨ ਸਿੰਘ ਤੇ ਗੁਰਨਾਮ ਸਿੰਘ ਸਮਾਉ ਦੇ ਖ਼ਿਲਾਫ਼ ਬਗਾਵਤ ਦਾ ਬਿਗਲ ਵਜਾ ਦਿੱਤਾ ਹੈ। ਇੱਕ ਪ੍ਰੈਸ ਕਾਨਫਰੰਸ ਕਰਕੇ ਸੀਰਾ ਛੀਨੀਵਾਲ ਨੇ ਸੰਯੁਕਤ ਸਮਾਜ ਮੋਰਚਾ ਦੀ ਸਕਰੀਨਿੰਗ ਕਮੇਟੀ ਨੂੰ ਆੜੇ ਹੱਥੀ ਲੈਦਿਆਂ ਬਰਨਾਲਾ ਵਿੱਚ ਉਮੀਦਵਾਰਾਂ ਦਾ ਫੈਸਲਾ ਕਰਨ ਵਿੱਚ ਤਾਨਾਸ਼ਾਹੀ ਵਰਤਣ ਦੇ ਦੋਸ਼ ਲਗਾਏ। ਉਨਾਂ ਕਿਹਾ ਕਿ ਬੀਕੇਯੂ ਕਾਦੀਆਂ ਸੰਯੁਕਤ ਸਮਾਜ ਮੋਰਚੇ ਦੇ ਸ਼ਾਮਲ ਜਥੇਬੰਦੀਆਂ ’ਚੋਂ ਵੱਡੀ ਹੈ ਪ੍ਰੰਤੂ ਮੋਰਚੇ ਦੇ ਆਗੂਆਂ ਨੇ ਉਮੀਦਵਾਰਾਂ ਦਾ ਐਲਾਨ ਕਰਦੇ ਸਮੇਂ ਉਨਾਂ ਨਾਲ ਕੋਈ ਮਸ਼ਵਰਾ ਕਰਨਾ ਜ਼ਰੂਰੀ ਨਹੀਂ ਸਮਝਿਆ। ਉਨਾਂ ਦੱਸਿਆ ਕਿ ਬੀਕੇਯੂ ਕਾਦੀਆਂ ਵੱਲੋਂ ਹਲਕਾ ਬਰਨਾਲਾ ਤੇ ਭਦੌੜ ਲਈ ਕੁਝ ਉਮੀਦਵਾਰਾਂ ਦੀ ਸਿਫਾਰਸ ਕੀਤੀ ਗਈ ਸੀ। ਜਿਸਨੂੰ ਅੱਖੋਂ-ਪਰੋਖੇ ਕਰਕੇ ਮੋਰਚੇ ਦੇ ਆਗੂਆਂ ਨੇ ਪੈਰਾਸ਼ੂਟ ਰਾਹੀਂ ਉਮੀਦਵਾਰ ਉਤਾਰ ਦਿੱਤੇ ਹਨ। ਸੀਰਾ ਛੀਨੀਵਾਲ ਨੇ ਮੋਰਚੇ ਦੇ ਆਗੂਆਂ ਨੂੰ ਸਿੱਧੀ ਚਿਤਾਵਨੀ ਦਿੱਤੀ ਕਿ ਜੇਕਰ ਬਰਨਾਲਾ ਤੇ ਭਦੌੜ ਹਲਕੇ ਲਈ ਐਲਾਨ ਕੀਤੇ ਉਮੀਦਵਾਰ ਨਾ ਬਦਲੇ ਤਾਂ ਇਸਦੇ ਭਿਆਨਕ ਸਿੱਟੇ ਨਿਕਲਣਗੇ। ਜਿਸਦੀ ਜ਼ਿੰਮੇਵਾਰੀ ਮੋਰਚੇ ਦੇ ਆਗੂਆਂ ਦੀ ਹੋਵੇਗੀ। ਇਕ ਸਵਾਲ ਕਿ ‘‘ਜੇਕਰ ਉਮੀਦਵਾਰ ਨਾ ਬਦਲੇ ਗਏ ਤਾਂ ਕਿ ਬੀਕੇਯੂ ਕਾਦੀਆਂ ਸੰਯੁਕਤ ਸਮਾਜ ਮੋਰਚੇ ਤੋਂ ਬਾਹਰ ਆ ਸਕਦੀ ਹੈ’’ ਦੇ ਜਵਾਬ ਵਿੱਚ ਸੀਰਾ ਛੀਨੀਵਾਲ ਨੇ ਕਿਹਾ ਕਿ ਅਸੀਂ ਪ੍ਰਧਾਨ ਹਰਮੀਤ ਸਿੰਘ ਕਾਦੀਆਂ ਨੂੰ ਅਜਿਹੀ ਸਲਾਹ ਦੇਵਾਂਗੇ। ਪ੍ਰੈਸ ਕਾਨਫਰੰਸ ਸਮੇਂ ਬਰਨਾਲਾ ਹਲਕੇ ਤੋਂ ਟਿਕਟ ਦਾ ਦਾਅਵਾ ਕਰਨ ਵਾਲੇ ਐਡਵੋਕੇਟ ਹਰਿੰਦਰਪਾਲ ਸਿੰਘ ਰਾਣੂ, ਬੂਟਾ ਸਿੰਘ ਅਤੇ ਬੀਕੇਯੂ ਕਾਦੀਆਂ ਦੀ ਸਮੁੱਚੀ ਜ਼ਿਲੇ ਦੀ ਲੀਡਰਸ਼ਿਪ ਵੀ ਹਾਜ਼ਰ ਸੀ।
Menu
