-ਟਿਕਟ ਦੀ ਜੰਗ ’ਚ ਬਰਨਾਲਾ ਦੇ ਕਾਂਗਰਸੀ ਭੁੱਲੇ ਭਾਸ਼ਾ ਦੀ ਮਰਿਯਾਦਾ
— ਗੰਗੂ ਦੀ ਔਲਾਦ ਕਿਹਾ ਤੇ ਜੁੱਤੀਆਂ ਦੇ ਹਾਰ ਪਾਉਣ ਦੀ ਦਿੱਤੀ ਧਮਕੀ
ਬਰਨਾਲਾ, 29 ਜਨਵਰੀ (ਨਿਰਮਲ ਸਿੰਘ ਪੰਡੋਰੀ) : ਵਿਧਾਨ ਸਭਾ ਹਲਕਾ ਬਰਨਾਲਾ ਵਿੱਚ ਕਾਂਗਰਸ ਪਾਰਟੀ ਦੇ ਦੋ ਗਰੁੱਪ ਅਫਗਾਨਿਸਤਾਨ ਅਤੇ ਤਾਲਿਬਾਨ ਵਾਂਗ ਆਹਮੋ-ਸਾਹਮਣੇ ਹਨ। ਦੋਵੇ ਗਰੁੱਪਾਂ ਦੇ ਆਗੂਆਂ ਵੱਲੋਂ ਪ੍ਰੈਸ ਕਾਨਫਰੰਸਾਂ ਕਰਕੇ ਇੱਕ ਦੂਜੇ ਦੇ ਖ਼ਿਲਾਫ਼ ਸ਼ਬਦਾਂ ਦੇ ਗੋਲੇ ਦਾਗ਼ੇ ਜਾ ਰਹੇ ਹਨ। ਬਰਨਾਲਾ ਹਲਕੇ ਲਈ ਟਿਕਟ ਦੇ ਐਲਾਨ ਵਿੱਚ ਦੇਰੀ ਕਾਂਗਰਸ ਲਈ ਗ੍ਰਹਿ ਯੁੱਧ ਦਾ ਮੈਦਾਨ ਬਣਦੀ ਜਾ ਰਹੀ ਹੈ। ਦੱਸਣਯੋਗ ਹੈ ਕਿ ਬਰਨਾਲਾ ਹਲਕੇ ਤੋਂ ਕੇਵਲ ਸਿੰਘ ਢਿੱਲੋਂ ਅਤੇ ਸਾਬਕਾ ਰੇਲ ਮੰਤਰੀ ਪਵਨ ਬਾਂਸਲ ਦਾ ਪਰਿਵਾਰ ਟਿਕਟ ਲਈ ਜ਼ੋਰ ਅਜ਼ਮਾਈ ਕਰ ਰਹੇ ਹਨ, ਪਰ ਦੂਜੇ ਪਾਸੇ ਕੇਵਲ ਸਿੰਘ ਢਿੱਲੋਂ ਦੇ ਸਮਰਥਕ ਅਤੇ ਕਾਲਾ ਢਿੱਲੋਂ ਅਤੇ ਮਹੇਸ਼ ਲੋਟੇ ਦੀ ਅਗਵਾਈ ’ਚ ਬਣਿਆ ਗਰੁੱਪ ਇੱਕ ਦੂਜੇ ਦੇ ਖ਼ਿਲਾਫ਼ ਜੰਮ ਕੇ ਭੜਾਸ ਕੱਢ ਰਹੇ ਹਨ। ਸ਼ਨੀਵਾਰ ਚੇਅਰਮੈਨ ਮੱਖਣ ਸ਼ਰਮਾ ਦੀ ਅਗਵਾਈ ’ਚ ਢਿੱਲੋਂ ਸਮਰਥਕਾਂ ਨੇ ਪ੍ਰੈਸ ਕਾਨਫਰੰਸ ਕਰਕੇ ਹਾਈਕਮਾਂਡ ਨੂੰ ਸ਼ਰੇਆਮ ਚਿਤਾਵਨੀ ਦਿੱਤੀ ਕਿ ਜੇਕਰ ਕੋਈ ਬਾਹਰਲਾ ਉਮੀਦਵਾਰ ਥੋਪਿਆ ਗਿਆ ਤਾਂ ਉਸ ਦੀ ਮੱਦਦ ਨਹੀਂ ਕੀਤੀ ਜਾਵੇਗੀ। ਮੱਖਣ ਸ਼ਰਮਾ, ਗੁਰਜੀਤ ਸਿੰਘ ਔਲਖ, ਰਾਜੀਵ ਲੂਬੀ,ਹਰਿੰਦਰ ਸਿੰਘ ਸੋਢੀ ਆਦਿ ਆਗੂਆਂ ਨੇ ਕਿਹਾ ਕਿ ਢਿੱਲੋਂ ਦਾ ਵਿਰੋਧ ਕਰਨ ਵਾਲੇ ਟਕਸਾਲੀ ਕਾਂਗਰਸੀ ਨਹੀਂ ਹਨ। ਇਸ ਕਾਨਫਰੰਸ ਤੋਂ ਕੁਝ ਸਮਾਂ ਬਾਅਦ ਹੀ ਕੇਵਲ ਢਿੱਲੋਂ ਵਿਰੋਧੀ ਗਰੁੱਪ ਨੇ ਪ੍ਰੈਸ ਕਾਨਫਰੰਸ ਕਰਕੇ ਢਿੱਲੋਂ ਸਮਰਥਕਾਂ ਨੂੰ ਅਤੇ ਕੇਵਲ ਸਿੰਘ ਢਿੱਲੋਂ ਨੂੰ ਰਗੜੇ ਲਾਏ । ਐਡਵੋਕੇਟ ਜਤਿੰਦਰ ਬਹਾਦਰਪੁਰੀਆ, ਸੁਖਜੀਤ ਕੌਰ ਸੁੱਖੀ,ਕਾਲਾ ਢਿੱਲੋਂ, ਮਹੇਸ਼ ਲੋਟਾ , ਅਨਿਲ ਕੁਮਾਰ ਨਾਣਾ, ਸੁਖਵਿੰਦਰ ਸਿੰਘ ਕਲਕੱਤਾ ਨੇ ਕੇਵਲ ਸਿੰਘ ਢਿੱਲੋਂ ਨੂੰ ਟਿਕਟ ਦੇਣ ਦੀ ਸੂਰਤ ਵਿੱਚ ਅਸਤੀਫ਼ੇ ਦੇਣ ਦੀ ਚਿਤਾਵਨੀ ਦਿੱਤੀ, ਜਦ ਕਿ ਇਸੇ ਪ੍ਰੈਸ ਕਾਨਫਰੰਸ ’ਚ ਕੁਝ ਆਗੂਆਂ ਨੇ ਕਿਹਾ ਕਿ ਕਾਂਗਰਸ ਪਾਰਟੀ ਵਿੱਚ ਰਹਿ ਕੇ ਵੀ ਢਿੱਲੋਂ ਦੀ ਵਿਰੋਧਤਾ ਕਰਨ ਦੀ ਗੱਲ ਆਖੀ। ਕੇਵਲ ਸਿੰਘ ਢਿੱਲੋਂ ਵਿਰੋਧੀ ਗਰੁੱਪ ਦੀ ਪ੍ਰੈਸ ਕਾਨਫਰੰਸ ਵਿੱਚ ਸ਼ਾਮਲ ਆਗੂਆਂ ਨੇ ਕੇਵਲ ਸਿੰਘ ਢਿੱਲੋਂ ਦੇ ਸਮਰਥਕਾਂ ਲਈ ‘ਭਾੜੇ ਦੇ ਟੱਟੂ ਅਤੇ ਟੋਭੇ ਦੇ ਡੱਡੂ’ ਜਿਹੇ ਸ਼ਬਦ ਵੀ ਵਰਤੇ। ਇੱਕ ਆਗੂ ਨੇ ਮੱਖਣ ਸ਼ਰਮਾ ਲਈ ਗੰਗੂ ਸ਼ਬਦ ਵਰਤਦੇ ਹੋਏ ਉਸ ਦੀ ਤੁਲਨਾ ਗੰਗੂ ਬ੍ਰਾਹਮਣ ਦੀ ਗਦਾਰੀ ਨਾਲ ਕੀਤੀ। ਇੱਕ ਹੋਰ ਆਗੂ ਨੇ ਕਿਹਾ ਕਿ ਜੇਕਰ ਕੇਵਲ ਸਿੰਘ ਢਿੱਲੋਂ ਨੂੰ ਟਿਕਟ ਦਿੱਤੀ ਗਈ ਤਾਂ ਉਸ ਨੂੰ ਹਰਾ ਕੇ ਜੁੱਤੀਆਂ ਦਾ ਹਾਰ ਪਾ ਕੇ ਭੇਜਾਂਗੇ। ਕੇਵਲ ਸਿੰਘ ਢਿੱਲੋਂ ਵਿਰੋਧੀ ਕਾਨਫਰੰਸ ਵਿੱਚ ਢਿੱਲੋਂ ਸਮਰਥਕਾਂ ਖ਼ਿਲਾਫ਼ ਵਰਤੀ ਗਈ ਇਤਰਾਜਯੋਗ ਭਾਸ਼ਾ ਜੰਗਲ ਦੀ ਅੱਗ ਵਾਂਗ ਸ਼ਹਿਰ ਵਿੱਚ ਫੈਲ ਗਈ ਕਿਉਂਕਿ ਇਹ ਪ੍ਰੈਸ ਕਾਨਫਰੰਸ ਲਾਈਵ ਹੋ ਰਹੀ ਸੀ।
