ਬਰਨਾਲਾ,18 ਅਪ੍ਰੈਲ (ਨਿਰਮਲ ਸਿੰਘ ਪੰਡੋਰੀ) : ਆਮ ਆਦਮੀ ਪਾਰਟੀ ਨੇ ਸ੍ਰੀ ਮੁਕਤਸਰ ਸਾਹਿਬ ਜ਼ਿਲ੍ਹੇ ਨਾਲ ਸੰਬੰਧਿਤ ਆਪਣੇ ਤਿੰਨ ਆਗੂਆਂ ਨੂੰ ਪਾਰਟੀ ਵਿਰੋਧੀ ਗਤੀਵਿਧੀਆਂ ਦੇ ਦੋਸ਼ ਲਗਾ ਕੇ ਸਸਪੈਂਡ ਕਰ ਦਿੱਤਾ ਹੈ।ਜ਼ਿਲ੍ਹਾ ਪ੍ਰਧਾਨ ਜਗਦੇਵ ਸਿੰਘ ਬਾਂਮ ਦੇ ਦਸਤਖ਼ਤ ਹੇਠ ਜਾਰੀ ਪੱਤਰ ’ਚ ਰਾਜੀਵ ਉੱਪਲ ਬਲਾਕ ਪ੍ਰਧਾਨ ਆਮ ਆਦਮੀ ਪਾਰਟੀ ਮਲੋਟ, ਸਾਹਿਲ ਮੌਂਗਾ ਸਕੱਤਰ ਯੂਥ ਆਮ ਆਦਮੀ ਪਾਰਟੀ ਮਲੋਟ,ਗਰਮੇਲ ਸਿੰਘ ਸਕੱਤਰ ਯੂਥ ਆਮ ਆਦਮੀ ਪਾਰਟੀ ਮਲੋਟ ਨੂੰ ਪਾਰਟੀ ਤੋਂ ਸਸਪੈਂਡ ਕਰ ਦਿੱਤਾ ਗਿਆ ਹੈ। ਜ਼ਿਕਰਯੋਗ ਹੈ ਕਿ ਉਕਤ ਆਗੂਆਂ ਨੇ ਮੰਤਰੀ ਡਾ. ਬਲਜੀਤ ਕੌਰ ਕੈਬਨਿਟ ਮੰਤਰੀ ਦੇ ਘਰ ਅੱਗੇ ਦੂਜੀਆਂ ਪਾਰਟੀਆਂ ’ਚੋਂ ‘ਆਪ’ ’ਚ ਸ਼ਾਮਲ ਹੋਏ ਦਲ-ਬਦਲੀ ਆਗੂਆਂ ਨੂੰ ‘ਆਪ’ ਦੇ ਟਕਸਾਲੀ ਆਗੂਆਂ/ ਵਰਕਰਾਂ ਦੇ ਸਿਰ ’ਤੇ ਬਿਠਾਉਣ ਦੇ ਦੋਸ਼ ਲਗਾਉਂਦੇ ਹੋਏ ਧਰਨਾ ਲਾਇਆ। ਡਾ. ਬਲਜੀਤ ਕੌਰ ਕੈਬਨਿਟ ਮੰਤਰੀ ਧਰਨਾਕਾਰੀ ਆਗੂਆਂ ਨੂੰ ਖ਼ੁਦ ਮਨਾਉਣ ਆਏ ਪਰ ਆਗੂਆਂ ਨੇ ਧਰਨਾ ਜਾਰੀ ਰੱਖਿਆ। ਜਿਸ ਤੋਂ ਬਾਅਦ ਪਾਰਟੀ ਵੱਲੋਂ ਅਨੁਸਾਸ਼ਨੀ ਕਾਰਵਾਈ ਤਹਿਤ ਉਕਤ ਆਗੂਆਂ ਨੂੰ ਸਸਪੈਂਡ ਕਰ ਦਿੱਤਾ ਗਿਆ ਹੈ। ਰਾਜਸੀ ਹਲਕਿਆਂ ’ਚ ‘ਆਪ’ ਦੀ ਇਸ ਕਾਰਵਾਈ ਨੂੰ ਰਵਾਇਤੀ ਪਾਰਟੀਆਂ ਵੱਲੋਂ ਆਪਣੇ ਵਰਕਰਾਂ ਪ੍ਰਤੀ ਅਪਣਾਏ ਜਾਂਦੇ ਰਹੇ ਤਾਨਾਸ਼ਾਹੀ ਰਵੱਈਏ ਵਾਂਗ ਹੀ ਮੰਨਿਆ ਜਾ ਰਿਹਾ ਹੈ ਅਤੇ ਇਸ ਵਿੱਚ ਕੋਈ ਸ਼ੱਕ ਨਹੀਂ ਕਿ ਰਵਾਇਤੀ ਪਾਰਟੀਆਂ ਆਪਣੇ ਟਕਸਾਲੀ ਆਗੂਆਂ/ਵਰਕਰਾਂ ਪ੍ਰਤੀ ਤਾਨਾਸ਼ਾਹੀ ਰਵੱਈਏ ਕਾਰਨ ਹੀ ਅਜੋਕੇ ਦੌਰ ’ਚ ਪੰਜਾਬ ਦਾ ਰਾਜਨੀਤਿਕ ਨਕਸ਼ੇ ਤੋਂ ਹਾਸ਼ੀਏ ’ਤੇ ਹਨ। ਇਸ ਲਈ ਆਮ ਆਦਮੀ ਪਾਰਟੀ ਨੂੰ ਰਵਾਇਤੀ ਪਾਰਟੀਆਂ ਦੇ ਅਤੀਤ ਤੋਂ ਸਬਕ ਸਿਖਦੇ ਹੋਏ ਆਪਣੇ ਅਨੁਸਾਸ਼ਨੀ ਕੁਹਾੜੇ ਦੀ ਵਰਤੋਂ ਕਰਨੀ ਚਾਹੀਦੀ ਹੈ।
Menu
