-ਖਾਲੜਾ ਅਤੇ ਰਾਜੋਆਣਾ ਪਰਿਵਾਰ ’ਤੇ ਵੀ ਪਾਏ ਜਾ ਰਹੇ ਹਨ ਸਿਆਸੀ ਡੋਰੇ
ਬਰਨਾਲਾ, 02 ਜੂਨ (ਨਿਰਮਲ ਸਿੰਘ ਪੰਡੋਰੀ) :-
ਸੰਗਰੂਰ ਲੋਕ ਸਭਾ ਜ਼ਿਮਨੀ ਚੋਣ ਲਈ ਨਾਮਜ਼ਦਗੀ ਪੱਤਰ ਦਾਖ਼ਲ ਕਰਨ ਦੀ 6 ਜੂਨ ਆਖ਼ਰੀ ਤਰੀਕ ਹੈ, 5 ਜੂਨ ਛੁੱਟੀ ਹੋਣ ਕਾਰਨ ਨਾਮਜ਼ਦਗੀ ਪੱਤਰ ਦਾਖ਼ਲ ਨਹੀਂ ਹੋਣਗੇ। ਅਜੇ ਤੱਕ ਇੱਕੋ ਆਜ਼ਾਦ ਉਮੀਦਵਾਰ ਨੇ ਆਪਣੇ ਕਾਗਜ਼ ਜ਼ਿਮਨੀ ਚੋਣ ਲੜਨ ਲਈ ਭਰੇ ਹਨ। ਸ਼੍ਰੋਮਣੀ ਅਕਾਲੀ ਦਲ (ਅ) ਦੇ ਪ੍ਰਧਾਨ ਸਿਮਰਨਜੀਤ ਸਿੰਘ ਮਾਨ ਨੇ ਚੋਣ ਲੜਨ ਦਾ ਐਲਾਨ ਕੀਤਾ ਹੋਇਆ ਹੈ । ਆਮ ਆਦਮੀ ਪਾਰਟੀ , ਕਾਂਗਰਸ, ਅਕਾਲੀ ਦਲ, ਭਾਜਪਾ, ਖੱਬੇ ਪੱਖੀ ਧਿਰਾਂ ਨੇ ਆਪਣੇ ਉਮੀਦਵਾਰ ਦਾ ਅਜੇ ਤੱਕ ਐਲਾਨ ਨਹੀਂ ਕੀਤਾ। ਸੰਯੁਕਤ ਸਮਾਜ ਮੋਰਚਾ ਨੇ ਵੀ ਆਪਣੇ ਪੱਤੇ ਨਹੀਂ ਖੋਲੇ । ਇੰਝ ਲੱਗਦਾ ਹੈ ਕਿ ਸਾਰੀਆਂ ਸਿਆਸੀ ਧਿਰਾਂ ਆਮ ਆਦਮੀ ਪਾਰਟੀ ਵੱਲ ਵੇਖ ਰਹੀਆਂ ਹਨ, ਜਿਸ ਤੋਂ ਬਾਅਦ ਬਾਕੀ ਪਾਰਟੀਆਂ ਆਪਣੇ ਉਮੀਦਵਾਰਾਂ ਦਾ ਐਲਾਨ ਕਰਨਗੀਆਂ । ਸ਼੍ਰੋਮਣੀ ਅਕਾਲੀ ਦਲ ਬਾਦਲ ਦੇ ਫ਼ੈਸਲੇ ਵੱਲ ਸਭ ਦੀਆਂ ਨਜ਼ਰਾਂ ਟਿਕੀਆਂ ਹੋਈਆਂ ਹਨ। ਦਲ ਵੱਲੋਂ ਜਸਵੰਤ ਸਿੰਘ ਖਾਲੜਾ ਦੀ ਪਤਨੀ ਅਤੇ ਬਲਵੰਤ ਸਿੰਘ ਰਾਜੋਆਣਾ ਦੀ ਭੈਣ ਦੇ ਬਤੌਰ ਉਮੀਦਵਾਰ ਚਰਚੇ ਤਾਂ ਜ਼ਰੂਰ ਹਨ ਪ੍ਰੰਤੂ ਉਕਤ ਦੋਵੇ ਪਰਿਵਾਰਾਂ ਵੱਲੋਂ ਸ਼ਾਇਦ ਹੀ ਜ਼ਿਮਨੀ ਚੋਣ ਲੜਨ ਦੀ ਸਹਿਮਤੀ ਦਿੱਤੀ ਜਾਵੇ। ਜੇਕਰ ਅਜਿਹਾ ਹੁੰਦਾ ਹੈ ਤਾਂ ਸ਼੍ਰੋਮਣੀ ਅਕਾਲੀ ਦਲ ਕੋਲ ਵਰਿਆਂ ਤੋਂ ਪ੍ਰਕਾਸ਼ ਸਿੰਘ ਬਾਦਲ ਦੇ ਇਰਦ-ਗਿਰਦ ਰਹਿਣ ਵਾਲੇ ਪਰਿਵਾਰਾਂ ਵਿੱਚੋਂ ਵੀ ਕਿਸੇ ਆਗੂ ਨੂੰ ਮੈਦਾਨ ਵਿੱਚ ਉਤਾਰਿਆ ਜਾ ਸਕਦਾ ਹੈ, ਜੋ ਹਲਕੇ ਤੋਂ ਬਾਹਰਲਾ ਵੀ ਹੋ ਸਕਦਾ ਹੈ। ਦੂਜੇ ਪਾਸੇ ਪੰਥਕ ਰਣਨੀਤੀ ਦੇ ਤਹਿਤ ਸ਼੍ਰੋਮਣੀ ਅਕਾਲੀ ਦਲ ਸਿਮਰਨਜੀਤ ਸਿੰਘ ਮਾਨ ਨੂੰ ਵੀ ਮੱਦਦ ਦੇ ਸਕਦਾ ਹੈ ਪ੍ਰੰਤੂ ਇਸ ਦੀ ਸੰਭਾਵਨਾ ਘੱਟ ਹੈ ਕਿਉਂਕਿ ਆਪਣੇ ‘ਕਾਡਰ’ ਨੂੰ ਜੋੜੀ ਰੱਖਣ ਲਈ ਸ਼੍ਰੋਮਣੀ ਅਕਾਲੀ ਦਲ ਆਪਣੇ ਪੱਧਰ ’ਤੇ ਹੀ ਚੋਣ ਲੜਨ ਨੂੰ ਪਹਿਲ ਦੇ ਸਕਦਾ ਹੈ। ਅਕਾਲੀ ਦਲ ਦੇ ਆਗੂ ਸਿਆਸਤ ਦੇ ਇਸ ਸਿਧਾਂਤ ਤੋਂ ਭਲੀਭਾਂਤ ਜਾਣੂ ਹਨ ਕਿ ਜੇਕਰ ਇੱਕ ਵਾਰ ਪਾਰਟੀ ‘ਕਾਡਰ’ ਆਪਣੀ ਵੋਟ ਸ਼ਕਤੀ ‘ਕਨਵਰਟ’ ਕਰ ਦੇਵੇ ਤਾਂ ਅਗਲੀ ਵਾਰ ਸਾਰੀ ਵੋਟ ਸ਼ਕਤੀ ਵਾਪਸ ਨਹੀਂ ਮੁੜਦੀ। ਹਲਕੇ ਅੰਦਰ ਅਕਾਲੀ ਦਲ ਕੋਲ ਕੋਈ ਵੱਡੇ ਕੱਦ ਦਾ ਆਗੂ ਨਹੀਂ ਹੈ। ਅਜਿਹੇ ਹਾਲਾਤਾਂ ’ਚ ਅਕਾਲੀ ਦਲ ਦਾ ਫ਼ੈਸਲਾ ਜ਼ਿਮਨੀ ਚੋਣ ਦੇ ਨਤੀਜ਼ੇ ਨੂੰ ਪ੍ਰਭਾਵਿਤ ਕਰੇਗਾ। ਅਕਾਲੀ ਦਲ ਵੱਲੋਂ ਖ਼ੁਦ ਚੋਣ ਲੜਨ ਦੀ ਸੂਰਤ ਵਿੱਚ ਆਮ ਆਦਮੀ ਪਾਰਟੀ ਦਾ ਰਾਹ ਸੁਖਾਲਾ ਰਹੇਗਾ ਪ੍ਰੰਤੂ ਜੇਕਰ ਅਕਾਲੀ ਦਲ ਸਿਮਰਨਜੀਤ ਸਿੰਘ ਵਾਲਾ ਪੱਤਾ ਖੇਡਦਾ ਹੈ ਤਾਂ ‘ਆਪ’ ਦੇ ਉਮੀਦਵਾਰ ਲਈ ਦਿੱਲੀ ਦੂਰ ਵਾਲੀ ਸੰਭਾਵਨਾ ਬਣ ਜਾਵੇਗੀ। ਇਹ ਵੀ ਦੇਖਣਯੋਗ ਹੋਵੇਗਾ ਕਿ ਸੰਗਰੂਰ ਜ਼ਿਮਨੀ ਚੋਣ ਲਈ ਸਾਰੀਆਂ ਸਿਆਸੀ ਪਾਰਟੀਆਂ ਨੌਜਵਾਨਾਂ ਦੀ ਰਾਜਨੀਤੀ ਦੇ ਦੌਰ ’ਚ ਨਵੇ ਚਿਹਰੇ ਪੇਸ਼ ਕਰਨਗੀਆਂ ਜਾਂ ਫਿਰ ਪੁਰਾਣੇ ਸਿਆਸੀ ਘੋੜਿਆਂ ਨਾਲ ਸਤਰੰਜ ਦੀ ਸਿਆਸੀ ਦੌੜ ਲਗਾਉਣਗੀਆਂ ।
