ਬਰਨਾਲਾ, 25 ਜੂਨ (ਨਿਰਮਲ ਸਿੰਘ ਪੰਡੋਰੀ) :-
ਪਿੰਡਾਂ ਦੀਆਂ ਕੋਅਪਰੇਟਿਵ ਸੁਸਾਇਟੀਆਂ ਵਿੱਚ ਸਿਆਸੀ ਚੌਧਰ ਵਾੜਨ ਵਾਲੇ ਅਕਾਲੀ ਦਲ ਨੇ ਹੁਣ ਇਨਾਂ ਸੁਸਾਇਟੀਆਂ ’ਚੋਂ ਘੜੰਮ ਚੌਧਰੀਆਂ ਨੂੰ ਬਾਹਰ ਕੱਢਣ ਲਈ ਆਮ ਆਦਮੀ ਪਾਰਟੀ ਨੂੰ ਸਖ਼ਤੀ ਨਾਲ ਐਕਸ਼ਨ ਲੈਣ ਲਈ ਕਿਹਾ ਹੈ। ਵਿਧਾਨ ਸਭਾ ’ਚ ਜਦ ਮੁੱਖ ਮੰਤਰੀ ਭਗਵੰਤ ਮਾਨ ਸਹਿਕਾਰੀ ਸਭਾਵਾਂ ਨੂੰ ਅੱਪਗ੍ਰੇਡ ਕਰਨ ਦੀ ਗੱਲ ਕਰ ਰਹੇ ਸਨ ਤਾਂ ਅਕਾਲੀ ਵਿਧਾਇਕ ਮਨਪ੍ਰੀਤ ਸਿੰਘ ਇਆਲੀ ਨੇ ਆਪਣੀ ਸੀਟ ’ਤੇ ਖੜੇ ਹੋ ਕਿ ਕਿਹਾ ਕਿ ‘‘ ਸੁਸਾਇਟੀਆਂ ਵਿੱਚ ਕੁਝ ਅਜਿਹੇ ਘੜੰਮ ਚੌਧਰੀ ਘੁਸਪੈਠ ਕਰੀ ਬੈਠੇ ਹਨ ਜਿਨ੍ਹਾਂ ਦਾ ਸਹਿਕਾਰਤਾ ਨਾਲ ਕੋਈ ਸੰਬੰਧ ਨਹੀਂ ਹੁੰਦਾ, ਇਨ੍ਹਾਂ ਲੋਕਾਂ ਨੂੰ ਸੁਸਾਇਟੀਆਂ ਤੋਂ ਬਾਹਰ ਕੱਢ ਕੇ ਅਸਲ ਹੱਕਦਾਰ ਮੈਂਬਰਾਂ ਨੂੰ ਸੁਸਾਇਟੀਆਂ ਵਿੱਚ ਲੈਣਾ ਚਾਹੀਦਾ ਹੈ’’। ਇਆਲੀ ਨੇ ਇਹ ਵੀ ਕਿਹਾ ਕਿ ‘‘ਸੁਸਾਇਟੀਆਂ ਦੀ ਚੋਣ ਪ੍ਰਕਿਰਿਆ ਦੌਰਾਨ ਵਿਰੋਧੀਆਂ ਦੇ ਕਾਗਜ਼ ਰੱਦ ਕਰਕੇ ਸਿਆਸੀ ਦਖ਼ਲਅੰਦਾਜ਼ੀ ਨਾਲ ਕੁਝ ਘੜੰਮ ਚੌਧਰੀ ਚੌਧਰ ਸੰਭਾਲ ਲੈਂਦੇ ਹਨ। ਅਕਾਲੀ ਵਿਧਾਇਕ ਇਆਲੀ ਨੇ ਮੁੱਖ ਮੰਤਰੀ ਤੋਂ ਮੰਗ ਕੀਤੀ ਕਿ ਬਦਲਾਅ ਦੀ ਸਰਕਾਰ ਫੇਰ ਹੀ ਮੰਨੀ ਜਾਵੇਗੀ ਜੇਕਰ ਸੁਸਾਇਟੀਆਂ ਦੇ ਪ੍ਰਬੰਧਾਂ ਵਿੱਚ ਵੀ ਬਦਲਾਅ ਲਿਆਂਦਾ ਜਾਵੇ। ਮੁੱਖ ਮੰਤਰੀ ਭਗਵੰਤ ਮਾਨ ਨੇ ਇਆਲੀ ਦੀ ਗੱਲ ਸੁਣਨ ਤੋਂ ਬਾਅਦ ਗ਼ੋਰ ਕਰਨ ਦਾ ਭਰੋਸਾ ਦਿੱਤਾ । ਅਕਾਲੀ ਵਿਧਾਇਕ ਇਆਲੀ ਦੀ ਉਕਤ ਗੱਲ ਭਾਵੇਂ ਸੋਲਾਂ ਆਨੇ ਸੱਚ ਹੈ ਪ੍ਰੰਤੂ ਸੁਸਾਇਟੀਆਂ ਵਿੱਚ ਘੜੰਮ ਚੌਧਰੀਆਂ ਦੀ ਦਖ਼ਲਅੰਦਾਜ਼ੀ ਦਾ ਮੁੱਦਾ ਉਠਾ ਕੇ ਇਆਲੀ ਨੇ ਆਪਣਾ ਝੁੱਗਾ ਚੁੱਕ ਕੇ ਆਪਣਾ ਹੀ ਢਿੱਡ ਨੰਗਾ ਕਰਨ ਵਾਲੀ ਗੱਲ ਕੀਤੀ ਹੈ ਕਿਉਂਕਿ ਪਿੰਡਾਂ ਦੀਆਂ ਸੁਸਾਇਟੀਆਂ ’ਚ ਚੋਣ ਪ੍ਰਕਿਰਿਆ ਵਿੱਚ ਸਿਆਸੀ ਦਖ਼ਲਅੰਦਾਜ਼ੀ ਨਾਲ ਵਿਰੋਧੀਆਂ ਦੇ ਕਾਗਜ਼ ਰੱਦ ਕਰਨ ਦੀਆਂ ਘਟਨਾਵਾਂ ਅਕਾਲੀ ਸਰਕਾਰ ਸਮੇਂ ਜ਼ਿਆਦਾ ਵਾਪਰੀਆਂ ਸਨ। ਇਆਲੀ ਦੇ ਮੁੱਖ ਮੰਤਰੀ ਨੂੰ ਸੁਝਾਅ ਦੀ ਇਬਾਰਤ ਨੂੰ ਜੇਕਰ ਗਹੁ ਨਾਲ ਦੇਖਿਆ ਜਾਵੇ ਤਾਂ ਇਹ ਕੁਝ ਇਸ ਤਰਾਂ ਜਾਪਦੀ ਹੈ ਕਿ ‘‘ਸਾਡੀਆਂ ਹੱਥਾਂ ਨਾਲ ਦਿੱਤੀਆਂ ਤੁਸੀ ਮੂੰਹ ਨਾਲ ਖੋਲੋ’’, ਕਿਉਂਕਿ ਸਰਕਾਰ ਭਾਵੇਂ ਬਦਲ ਚੁੱਕੀ ਹੈ ਫਿਰ ਵੀ ਹਕੀਕਤ ਇਹ ਹੈ ਕਿ ਸਥਾਨਕ ਪੱਧਰ ਦੀਆਂ ਸੰਸਥਾਵਾਂ ਉੱਪਰ ਆਮ ਆਦਮੀ ਪਾਰਟੀ ਦੇ ਆਗੂ ਵੀ ਹਰ ਹਾਲਤ ਵਿੱਚ ਕਾਬਜ਼ ਹੋਣਾ ਚਾਹੁੰਦੇ ਹਨ। ਬਰਨਾਲਾ ਸ਼ਹਿਰ ਦੇ ‘ਬਰਨਾਲਾ ਕਲੱਬ ਅਤੇ ਟਰੱਕ ਯੂਨੀਅਨਾਂ’ ਦੀ ਸੱਤਾ ਤਬਦੀਲੀ ਇਸ ਪੁਖਤਾ ਉਦਾਹਰਨ ਹੈ।
