ਬਰਨਾਲਾ,04 ਨਵੰਬਰ (ਨਿਰਮਲ ਸਿੰਘ ਪੰਡੋਰੀ) :
ਸ਼੍ਰੋਮਣੀ ਗੁਰਦੁਆਰਾ ਪ੍ਰਬੰਧਕ ਕਮੇਟੀ ਦੇ ਪ੍ਰਧਾਨ ਦੀ 9 ਨਵੰਬਰ ਨੂੰ ਹੋ ਰਹੀ ਚੋਣ ਲਈ ਮੌਜੂਦ ਪ੍ਰਧਾਨ ਹਰਜਿੰਦਰ ਸਿੰਘ ਧਾਮੀ ਅਤੇ ਸਾਬਕਾ ਪ੍ਰਧਾਨ ਬੀਬੀ ਜੰਗੀਰ ਕੌਰ ਆਹਮੋ-ਸਾਹਮਣੇ ਹੋਣਗੇ। ਸ਼੍ਰੋਮਣੀ ਅਕਾਲੀ ਦਲ ਦੇ ਪ੍ਰਧਾਨ ਸੁਖਬੀਰ ਸਿੰਘ ਬਾਦਲ ਨੇ ਸ. ਧਾਮੀ ਨੂੰ ਦੁਬਾਰਾ ਪ੍ਰਧਾਨਗੀ ਲਈ ਉਮੀਦਵਾਰ ਐਲਾਨ ਦਿੱਤਾ ਹੈ, ਦੂਜੇ ਪਾਸੇ ਬੀਬੀ ਜੰਗੀਰ ਕੌਰ ਨੇ ਪਹਿਲਾਂ ਹੀ ਚੋਣ ਲੜਨ ਦਾ ਐਲਾਨ ਕੀਤਾ ਹੋਇਆ ਹੈ। ਚੋਣ ਦਾ ਨਤੀਜਾ ਭਾਵੇਂ ਕੁਝ ਵੀ ਹੋਵੇ ਪ੍ਰੰਤੂ ਇੱਕ ਤਬਦੀਲੀ ਪ੍ਰਧਾਨਗੀ ਦੀ ਚੋਣ ਦੀ ਪ੍ਰਕਿਰਿਆ ’ਚ ਜ਼ਰੂਰ ਹੋਈ ਹੈ ਕਿ ਇਸ ਵਾਰ ਪ੍ਰਧਾਨ ਲਿਫ਼ਾਫੇ ’ਚੋਂ ਨਹੀਂ ਨਿਕਲੇਗਾ। ਇਸ ਚੋਣ ਨਾਲ ਸੁਖਬੀਰ ਸਿੰਘ ਬਾਦਲ ਦਾ ਅਕਾਲੀ ਦਲ ਦੀ ਅਗਵਾਈ ਸੰਬੰਧੀ ਭਵਿੱਖ ਜੁੜਿਆ ਹੋਇਆ ਹੈ ਉੱਥੇ ਦੂਜੇ ਪਾਸੇ ਚੋਣ ਲੜਨ ਦਾ ਐਨਾਨ ਕਰਕੇ ਬੀਬੀ ਨੇ ਵੀ ਅਕਾਲੀ ਦਲ ਵੱਲ ਵਾਪਸੀ ਦੇ ਸਾਰੇ ਰਾਹ ਬੰਦ ਕਰ ਲਏ ਹਨ। ਅਕਾਲੀ ਦਲ ਵੱਲੋਂ ਬੀਬੀ ਨੂੰ ਨੋਟਿਸ ਜਾਰੀ ਕਰਕੇ 48 ਘੰਟਿਆਂ ਦੇ ਵਿੱਚ ਜਵਾਬ ਦੇਣ ਲਈ ਕਿਹਾ ਗਿਆ ਹੈ ਪ੍ਰੰਤੂ ਬੀਬੀ ਨੇ ਨੋਟਿਸ ਜਾਰੀ ਹੋਣ ਦੇ ਕੁਝ ਘੰਟੇ ਬਾਅਦ ਹੀ ਮੀਡੀਆ ਰਾਹੀਂ ਜਵਾਬ ਦੇ ਦਿੱਤਾ ਕਿ ਉਹ ਪ੍ਰਧਾਨਗੀ ਦੀ ਚੋਣ ਹਰ ਹਾਲਿਤ ਵਿੱਚ ਲੜੇਗੀ। ਇਸ ਚੋਣ ਨਾਲ ਭਾਜਪਾ ਨੂੰ ਜੋੜ ਕੇ ਦੇਖਿਆ ਜਾ ਰਿਹਾ ਹੈ ਕਿਉਂਕਿ ਬੀਬੀ ਦੀ ਬਗਾਵਤ ਪਿੱਛੇ ਕੋਈ ਛੋਟੀ ਤਾਕਤ ਨਹੀਂ ਹੋ ਸਕਦੀ । ਸ਼੍ਰੋਮਣੀ ਅਕਾਲੀ ਦੇ ਚੋਟੀ ਦੇ ਆਗੂਆਂ ਨੇ ਪਹਿਲਾਂ ਹੀ ਬੀਬੀ ਬਗਾਵਤ ਪਿੱਛੇ ਭਾਜਪਾ ’ਤੇ ਦੋਸ਼ ਲਗਾਏ ਹਨ । ਭਾਜਪਾ ਆਗੂ ਮਨਜਿੰਦਰ ਸਿੰਘ ਸਿਰਸਾ ਅਤੇ ਇਕਬਾਲ ਸਿੰਘ ਲਾਲਪੁਰਾ ਵੱਲੋਂ ਬੀਬੀ ਨੂੰ ਹਰ ਸੰਭਵ ਮੱਦਦ ਦੀ ਪੇਸ਼ਕਸ ਕੀਤੀ ਗਈ ਹੈ, ਜਿਸ ਤੋਂ ਬੀਬੀ ਦੀ ਬਗਾਵਤ ਦਾ ਕਾਰਨ ਲੱਗਭਗ ਸਪੱਸ਼ਟ ਹੋ ਰਿਹਾ ਹੈ।
