-ਪਹਿਲਾਂ ਛੁੱਟੀ ਦਾ ਐਲਾਨ….ਫਿਰ ਸਕੂਲ ਖੋਲਣ ਦੇ ਹੁਕਮ
ਬਰਨਾਲਾ 26 ਅਪ੍ਰੈਲ (ਜੀ98 ਨਿਊਜ਼ ਸਰਵਿਸ)-ਪੰਜਾਬ ਦੇ ਸਾਬਕਾ ਮੁੱਖ ਮੰਤਰੀ ਪਰਕਾਸ਼ ਸਿੰਘ ਬਾਦਲ ਦੇ ਦਿਹਾਂਤ ‘ਤੇ ਸਰਕਾਰੀ ਛੁੱਟੀ ਦੇ ਮਾਮਲੇ ਵਿੱਚ ਪੰਜਾਬ ਦੇ ਸਿੱਖਿਆ ਵਿਭਾਗ ਨੇ ਅੱਜ ਬੁੱਧਵਾਰ ਐਨ ਮੌਕੇ ‘ਤੇ ਸਕੂਲ ਖੋਲ੍ਹਣ ਦਾ ਫ਼ਰਮਾਨ ਜਾਰੀ ਕਰ ਕੇ ਅਧਿਆਪਕਾਂ, ਮਾਪਿਆਂ ਅਤੇ ਬੱਚਿਆਂ ਨੂੰ ਕਸੂਤੀ ਸਥਿਤੀ ਵਿੱਚ ਫ਼ਸਾ ਦਿੱਤਾ ਹੈ । ਬੀਤੇ ਕੱਲ੍ਹ ਸਰਦਾਰ ਬਾਦਲ ਦੀ ਮੌਤ ਤੋਂ ਬਾਅਦ ਸਰਕਾਰ ਨੇ ਸੂਬੇ ‘ਚ ਬੁੱਧਵਾਰ ਸਰਕਾਰੀ ਛੁੱਟੀ ਦਾ ਐਲਾਨ ਕੀਤਾ ਸੀ ਜਿਸ ਤੋਂ ਬਾਅਦ ਟੀਵੀ ਚੈਨਲਾਂ ਨੇ ਛੁੱਟੀ ਦੀ ਖ਼ਬਰ ਦੇ ਦਿੱਤੀ ਅਤੇ ਅੱਜ ਬੁੱਧਵਾਰ ਪ੍ਰਿੰਟ ਮੀਡੀਆ ਦੇ ਬਹੁਤੇ ਅਖ਼ਬਾਰਾਂ ਨੇ ਛੁੱਟੀ ਦੀ ਖ਼ਬਰ ਦਿੱਤੀ ਹੈ। ਭਰੋਸੇਯੋਗ ਸੂਤਰਾਂ ਅਨੁਸਾਰ ਬਰਨਾਲਾ ਦੇ ਜ਼ਿਲ੍ਹਾ ਸਿੱਖਿਆ ਅਫ਼ਸਰ ਨੇ ਅਧਿਆਪਕਾਂ ਨੂੰ ਬੁੱਧਵਾਰ ਸਕੂਲਾਂ ਵਿਚ ਛੁੱਟੀ ਦਾ ਸੁਨੇਹਾ ਦਿੱਤਾ ਜਿਸ ਤੋਂ ਬਾਅਦ ਅਧਿਆਪਕਾਂ ਨੇ ਸਕੂਲ ਨਹੀਂ ਖੋਲੇ ਪਰੰਤੂ ਦੂਜੇ ਪਾਸੇ ਸਰਕਾਰ ਵੱਲੋਂ ਬੁੱਧਵਾਰ ਇਕ ਨੋਟਿਸ ਜਾਰੀ ਕਰਕੇ 27 ਅਪ੍ਰੈਲ ਨੂੰ ਛੁੱਟੀ ਦਾ ਐਲਾਨ ਕੀਤਾ ਗਿਆ, ਜਦ ਤੱਕ ਇਹ ਨੋਟਿਸ ਸਰਕਾਰੀ ਦਫਤਰਾਂ ਵਿੱਚ ਪੁੱਜਿਆ ਉਦੋਂ ਤੱਕ ਸਕੂਲ ਲੱਗਣ ਦਾ ਸਮਾਂ ਲੰਘ ਚੁੱਕਿਆ ਸੀ ਫਿਰ ਵੀ ਜ਼ਿਲ੍ਹਾ ਸਿੱਖਿਆ ਅਫ਼ਸਰਾਂ ਨੇ ਅਧਿਆਪਕਾਂ ਨੂੰ ਸਕੂਲ ਖੋਲਣ ਦਾ ਹੁਕਮ ਦਿੱਤਾ ਜਿਸ ਨਾਲ ਅਧਿਆਪਕਾਂ ਵਿਚ ਅਫ਼ਰਾਤਫ਼ਰੀ ਫੈਲ ਗਈ । ਅਧਿਕਾਰੀਆਂ ਦੇ ਹੁਕਮ ਤੋਂ ਬਾਅਦ ਕਰੀਬ 10 ਤੋਂ 11 ਵਜੇ ਤੱਕ ਕੁਝ ਅਧਿਆਪਕ ਸਕੂਲ ਪੁੱਜਣੇ ਸ਼ੁਰੂ ਹੋਏ ਜਦਕਿ ਬੱਚਿਆਂ ਦੀ ਗਿਣਤੀ ਆਟੇ ਵਿੱਚ ਲੂਣ ਬਰਾਬਰ ਰਹੀ । ਕੁਝ ਸਕੂਲਾਂ ਵਿੱਚ ਸਕੂਲ ਦੇ ਨੇੜੇ ਦੇ ਘਰਾਂ ਦੇ ਬੱਚਿਆਂ ਨੂੰ ਸੁਨੇਹੇ ਲਗਾ ਕੇ ਬੁਲਾਇਆ ਗਿਆ । ਹੈਰਾਨੀ ਦੀ ਗੱਲ ਹੈ ਕਿ ਸਿਰਫ਼ ਮੀਡੀਆ ਖਬਰਾਂ ਦੇ ਅਧਾਰ ‘ਤੇ ਹੀ ਸਿੱਖਿਆ ਵਿਭਾਗ ਦੇ ਅਧਿਕਾਰੀਆਂ ਨੇ ਸਕੂਲ ਬੰਦ ਰੱਖਣ ਦੇ ਸੁਨੇਹੇ ਲਗਾ ਦਿੱਤੇ ਜਦਕਿ ਅਧਿਕਾਰਤ ਤੌਰ ‘ਤੇ ਕੋਈ ਪੱਤਰ ਜਾਰੀ ਨਹੀਂ ਹੋਇਆ ਸੀ ਪਰੰਤੂ ਜਦ ਬੁੱਧਵਾਰ ਸਵੇਰੇ 27 ਅਪ੍ਰੈਲ ਦੀ ਛੁੱਟੀ ਦਾ ਪੱਤਰ ਜਾਰੀ ਹੋਇਆ ਤਦ ਤੱਕ ਸਕੂਲ ਲੱਗਣ ਦਾ ਸਮਾਂ ਲੰਘ ਚੁੱਕਿਆ ਸੀ ਅਤੇ ਕੁਝ ਅਧਿਆਪਕ ਹੀ ਅਫਰਾ-ਤਫ਼ਰੀ ਵਿੱਚ ਸਕੂਲ ਪੁੱਜੇ । ਇਸ ਸੰਬੰਧੀ ਜ਼ਿਲਾ ਸਿੱਖਿਆ ਅਫ਼ਸਰ ਬਰਨਾਲਾ ਸਰਬਜੀਤ ਸਿੰਘ ਤੂਰ ਨਾਲ ਫੋਨ ‘ਤੇ ਗੱਲ ਕੀਤੀ ਤਾਂ ਉਨ੍ਹਾਂ ਕਿਹਾ ਕਿ ਸਾਡੇ ਵੱਲੋਂ ਕਿਸੇ ਅਧਿਆਪਕ ਨੂੰ ਬੁੱਧਵਾਰ ਛੁੱਟੀ ਦਾ ਸੁਨੇਹਾ ਨਹੀਂ ਲਗਾਇਆ ਗਿਆ, ਜਦਕਿ ਕੁਝ ਅਧਿਆਪਕਾਂ ਨੇ “ਆਫ਼ ਦੀ ਰਿਕਾਰਡ” ਅਜਿਹੇ ਸੁਨੇਹਿਆਂ ਦੀ ਪੁਸ਼ਟੀ ਕੀਤੀ ਹੈ ।
