-ਦਰਜਾ ਚਾਰ ਕਰਮਚਾਰੀ ਤੇ ਸੇਵਾਦਾਰ ਪਹਿਨਣਗ ਵਰਦੀ
ਚੰਡੀਗੜ੍ਹ-ਪੰਜਾਬ ਦੇ ਇੱਕ ਵਿਭਾਗ ਨੇ ਆਪਣੇ ਕਰਮਚਾਰੀਆਂ ਲਈ ਆਪਣਾ ਪਹਿਚਾਣ ਪੱਤਰ ਗਲ ਵਿੱਚ ਲਟਕਾਉਣਾ ਲਾਜ਼ਮੀ ਕਰ ਦਿੱਤਾ ਹੈ ਤਾਂ ਜੋ ਦਫ਼ਤਰ ਵਿੱਚ ਕੰਮ ਕਰਵਾਉਣ ਆਏ ਲੋਕਾਂ ਨੂੰ ਕਰਮਚਾਰੀਆਂ ਦੀ ਪਹਿਚਾਣ ਦਾ ਸੌਖਿਆਂ ਪਤਾ ਲੱਗ ਜਾਵੇ । ਪੰਜਾਬ ਸਟੇਟ ਪਾਵਰ ਕਾਰਪੋਰੇਸ਼ਨ ਨੇ ਆਪਣੇ ਕਰਮਚਾਰੀਆਂ ਲਈ ਉਕਤ ਹੁਕਮ ਜਾਰੀ ਕੀਤਾ ਹੈ । ਸੂਬੇ ਦੇ ਬਿਜਲੀ ਮੰਤਰੀ ਹਰਭਜਨ ਸਿੰਘ ਨੇ ਇਸ ਦੀ ਪੁਸ਼ਟੀ ਕਰਦੇ ਹੋਏ ਕਿਹਾ ਕਿ ਜਦ ਵੀ ਕੋਈ ਉਪਭੋਗਤਾ ਦਫ਼ਤਰਾਂ ਵਿੱਚ ਕੰਮ ਕਾਰ ਲਈ ਆਉਂਦਾ ਤਾਂ ਉਸ ਨੂੰ ਉਚ ਅਧਿਕਾਰੀਆਂ ਅਤੇ ਕਰਮਚਾਰੀਆਂ ਦੀ ਪਹਿਚਾਣ ਨਹੀਂ ਹੁੰਦੀ ਸੀ, ਇਸ ਲਈ ਸਾਰੇ ਉੱਚ ਅਧਿਕਾਰੀਆਂ ਅਤੇ ਕਰਮਚਾਰੀਆਂ ਨੂੰ ਆਪਣੇ ਪਹਿਚਾਣ ਪੱਤਰ ਗਲ ਵਿੱਚ ਲਟਕਾਉਣਾ ਲਾਜ਼ਮੀ ਕਰ ਦਿੱਤੇ ਗਏ ਹਨ ਤਾਂ ਜੋ ਲੋਕਾਂ ਨੂੰ ਮਿਲਣ ਆਏ ਅਫ਼ਸਰ ਬਾਰੇ ਸੌਖਿਆਂ ਪਤਾ ਲੱਗ ਸਕੇ । ਉਨ੍ਹਾਂ ਦੱਸਿਆ ਕਿ ਪਾਵਰਕੌਮ ਦੇ ਚੀਫ਼ ਇੰਜਨੀਅਰ, ਐਸ.ਈ., ਐਕਸੀਅਨ, ਐਸਡੀਓ,ਲਾਇਨਮੈਨ ਅਤੇ ਸਹਾਇਕ ਲਾਇਨਮੈਨ ਦੇ ਪਹਿਚਾਣ ਪੱਤਰ ਦੇ ਟੈਗ ਵੱਖੋ-ਵੱਖਰੇ ਰੰਗਾਂ ਦੀ ਹੋਵੇਗੀ । ਇਸ ਤੋਂ ਇਲਾਵਾ ਪਾਵਰਕਾਮ ਨੇ ਦਰਜਾਚਾਰ ਕਰਮਚਾਰੀਆਂ ਤੇ ਸੇਵਾਦਾਰਾਂ ਨੂੰ ਪਹਿਚਾਣ ਪੱਤਰ ਸਮੇਤ ਵਰਦੀ ਪਾਉਣ ਦੇ ਹੁਕਮ ਜਾਰੀ ਕੀਤੇ ਹਨ। ਜੇਕਰ ਕੋਈ ਦਰਜਾ ਚਾਰ ਕਰਮਚਾਰੀ ਵਰਦੀ ਨਹੀਂ ਪਹਿਨੇਗਾ ਤਾਂ ਉਸ ਦੇ ਖਿਲਾਫ਼ ਵਿਭਾਗੀ ਕਾਰਵਾਈ ਹੋਵੇਗੀ ਅਤੇ ਉਸ ਦਾ ਵਰਦੀ ਭੱਤਾ ਵੀ ਰੋਕਿਆ ਜਾ ਸਕਦਾ ਹੈ ।
