-ਨਵਜੋਤ ਹੁਣ ਤੈਨੂੰ ਜ਼ਿੰਮੇਵਾਰੀ ਸੰਭਾਲਣੀ ਪੈਣੀ ਹੈ : ਕੈਪਟਨ
–ਨਵਜੋਤ ਸਿੰਘ ਸਿੱਧੂ ਨੇ ਸੰਭਾਲਿਆ ਪੀਪੀਸੀਸੀ ਦੇ ਮੁਖੀ ਅਹੁਦਾ
ਚੰਡੀਗੜ, 23 ਜੁਲਾਈ (ਨਿਰਮਲ ਸਿੰਘ ਪੰਡੋਰੀ) : ਪੰਜਾਬ ਕਾਂਗਰਸ ਦੇ ਨਵ-ਨਿਯੁਕਤ ਪ੍ਰਧਾਨ ਨਵਜੋਤ ਸਿੰਘ ਸਿੱਧੂ ਨੇ ਪੰਜਾਬ ਕਾਂਗਰਸ ਭਵਨ ਵਿਖੇ ਹੋਏ ਇੱਕ ਸ਼ਾਨਦਾਰ ਸਮਾਗਮ ’ਚ ਅਹੁਦਾ ਸੰਭਾਲਿਆ। ਇਸ ਮੌਕੇ ਪੰਜਾਬ ਕਾਂਗਰਸ ਮਾਮਲਿਆਂ ਦੇ ਇੰਚਾਰਜ ਹਰੀਸ ਰਾਵਤ , ਮੁੱਖ ਮੰਤਰੀ ਪੰਜਾਬ ਕੈਪਟਨ ਅਮਰਿੰਦਰ ਸਿੰਘ ਸਮੇਤ ਪੰਜਾਬ ਕਾਂਗਰਸ ਦੇ ਲੱਗਭੱਗ ਸਾਰੇ ਸੀਨੀਅਰ ਆਗੂ , ਸਾਰੇ ਮੰਤਰੀ, ਵਿਧਾਇਕ ਅਤੇ ਵੱਡੀ ਗਿਣਤੀ ’ਚ ਪੰਜਾਬ ਦੇ ਕੋਨੇ-ਕੋਨੇ ਚੋਂ ਪੁੱਜੇ ਕਾਂਗਰਸੀ ਵਰਕਰ ਹਾਜ਼ਰ ਸਨ।
ਇਸ ਤਾਜਪੋਸ਼ੀ ਸਮਾਗਮ ਤੋਂ ਪਹਿਲਾਂ ਨਵਜੋਤ ਸਿੰਘ ਸਿੱਧੂ ਨੇ ਪੰਜਾਬ ਭਵਨ ’ਚ ਕੈਪਟਨ ਅਮਰਿੰਦਰ ਸਿੰਘ ਨਾਲ ‘ਚਾਹ ਦੀ ਪਿਆਲੀ’ ਸਾਂਝੀ ਕੀਤੀ, ਜਿੱਥੋ ਇਕੱਠੇ ਹੋ ਕੇ ਸਾਰੇ ਆਗੂ ਤਾਜਪੋਸ਼ੀ ਵਾਲੇ ਸਮਾਗਮ ’ਤੇ ਕਾਂਗਰਸ ਭਵਨ ਪੁੱਜੇ। ਇਸ ਮੌਕੇ ਆਪਣੇ ਸੰਬੋਧਨ ਦੌਰਾਨ ਨਵਜੋਤ ਸਿੰਘ ਸਿੱਧੂ ਨੇ ਕਿਹਾ ਕਿ ‘‘ਕਾਂਗਰਸ ਦੇ ਸਾਰੇ ਆਗੂ/ਵਰਕਰ ਮੇਰੀ ਪੱਗ ਦੇ ਲੜ ਹਨ, ਸਾਰੇ ਵਰਕਰ ਅੱਜ ਕਾਂਗਰਸ ਦਾ ਪ੍ਰਧਾਨ ਬਣੇ ਹਨ, ਮੈਂ ਵਰਕਰਾਂ ਦੇ ਸਮੁੰਦਰ ’ਚ ਸਮਾ ਗਿਆ ਹਾਂ, ਮੈਂ ਕਿਸੇ ਨੂੰ ਨਹੀਂ ਪਰਖਣਾ ਕਿਉਂਕਿ ਪਰਖ ਕਰਨ ਨਾਲ ਕੋਈ ਆਪਣਾ ਨਹੀਂ ਰਹਿੰਦਾ’’। ਸਿੱਧੂ ਨੇ ਕਿਹਾ ਕਿ ‘‘ਮਸਲਾ ਅਹੁਦਿਆਂ ਦਾ ਨਹੀਂ ਹੈ, ਅਹੁਦੇ ਤਾਂ ਉਨਾਂ ਨੇ ਵਗਾ-ਵਗਾ ਕੇ ਮਾਰੇ ਹਨ, ਕੈਬਨਿਟ ਪਰੇ ਸੁੱਟੀ ਹੈ’’। ਆਪਣੀ ਹੀ ਤਾਜਪੋਸ਼ੀ ਸਮੇਂ ਆਪਣੇ ਭਾਸ਼ਣ ’ਚ ਆਪਣੀ ਹੀ ਸਰਕਾਰ ਨੂੰ ਘੇਰਦੇ ਹੋਏ ਸਿੱਧੂ ਨੇ ਪੂਰੇ ਜ਼ੋਸ ਵਿੱਚ ਮੰਚ ’ਤੇ ਬੈਠੇ ਮੌਕੇ ਦੇ ਜ਼ਿੰਮੇਵਾਰ ਆਗਆਂ ਨੂੰ ਯਾਦ ਕਰਵਾਇਆ ਕਿ ‘‘ਮਸਲਾ ਗੁਰੂ ਦੀ ਬੇਅਦਬੀ ਦਾ ਹੈ, ਮਸਲਾ ਦਿੱਲੀ ਬੈਠੇ ਕਿਸਾਨਾਂ ਦਾ ਹੈ, ਮਸਲਾ ਈਟੀਟੀ ਤੇ ਕੱਚੇ ਅਧਿਆਪਕਾਂ ਦਾ ਹੈ, ਡਾਕਟਰਾਂ /ਨਰਸਾਂ ਦਾ ਹੈ, ਡਰਾਈਵਰਾਂ/ਕੰਡਕਟਰਾਂ ਦਾ ਹੈ’’। ਸਿੱਧੂ ਨੇ ਹਿੱਕ ਥਾਪੜ ਕੇ ਕਿਹਾ ਕਿ ਇਹ ਸਾਰੇ ਮਸਲੇ ਹੱਲ ਕਰਨੇ ਹਨ ਜੇਕਰ ਮਸਲੇ ਹੱਲ ਨਾ ਹੋਏ ਤਾਂ ਪ੍ਰਧਾਨਗੀ ਕੱਖ ਦੀ ਨਹੀਂ। ਆਪਣੀ ਹੀ ਸਰਕਾਰ ’ਤੇ ਹਮਲੇ ਕਰਦੇ ਹੋਏ ਸਿੱਧੂ ਨੇ ਕਿਹਾ ਕਿ ‘ਪੰਜਾਬ ਪੁੱਛਦਾ ਹੈ ਕਿ ਬਿਜਲੀ ਸਮਝੌਤਿਆਂ ਦਾ ਸੱਚ ਕੀ ਹੈ, ਚਿੱਟਾ ਵੇਚਣ ਵਾਲੇ ਕੌਣ ਹਨ’। ਆਪਣੀ ਫ਼ਿਤਰਤ ਅਨੁਸਾਰ ਨਵਜੋਤ ਸਿੰਘ ਸਿੱਧੂ ਨੇ ਬਾਦਲ ਪਰਿਵਾਰ ਬਾਰੇ ਆਪਣੀ ਰਣਨੀਤੀ ਸਪੱਸ਼ਟ ਕਰਦੇ ਹੋਏ ਕਿਹਾ ਕਿ ‘ਜੀਜਾ-ਸਾਲਾ ਰਹਿਣ ਨਹੀਂ ਦੇਣੇ’।
ਸਿੱਧੂ ਨੇ ਕਿਹਾ ਕਿ ‘‘ਮੈਂ ਉਸ ਸੁਤੰਤਰਤਾ ਸੈਨਾਨੀ ਦਾ ਖ਼ੂਨ ਹਾਂ ਜਿਸ ਨੇ ਆਜ਼ਾਦੀ ਦੀ ਲੜਾਈ ਦੌਰਾਨ 2-2 ਮਹੀਨੇ ਸਾਬਣ ਨਹੀਂ ਦੇਖਿਆ ਤੇ ਜਿਸ ਨੂੰ ਅੰਗਰੇਜਾਂ ਨੇ ਮੌਤ ਦੀ ਸਜ਼ਾ ਦਿੱਤੀ’’। ਪਾਰਟੀ ਦੇ ਅੰਦਰ ਅਤੇ ਬਾਹਰ ਆਪਣੇ ਬਾਰੇ ਹੋ ਰਹੀਆਂ ਟਿੱਪਣੀਆਂ ਸੰਬੰਧੀ ਸਿੱਧੂ ਨੇ ਕਿਹਾ ਕਿ ‘ਮੇਰੀ ਚਮੜੀ ਮੋਟੀ ਹੈ, ਮੈਨੂੰ ਕੋਈ ਫਰਕ ਨਹੀਂ ਪੈਦਾ ਪਰ ਮੈਂ ਸਾਰਿਆਂ ਨੂੰ ਨਾਲ ਲੈ ਕੇ ਚੱਲਾਗਾਂ, ਮੇਰੇ ਸਿਰ ’ਤੇ ਹੱਥ ਰੱਖਣ ਵਾਲੇ ਮੇਰਾ ਸੁਰੱਖਿਆ ਕਵਚ ਹੋਣਗੇ’। ਸਿੱਧੂ ਨੇ ਐਲਾਨ ਕੀਤਾ ਕਿ ਉਹ 15 ਅਗਸਤ ਨੂੰ ਪੰਜਾਬ ਕਾਂਗਰਸ ਭਵਨ ’ਚ ਆਪਣਾ ਬਿਸਤਰਾ ਲਗਾ ਲੈਣਗੇ ਅਤੇ ਇੱਥੋ ਕੰਮ ਕਰਦੇ ਹੋਏ ਕਈਆਂ ਦਾ ਬਿਸਤਰਾ ਗੋਲ ਕਰਨਗੇ। ਉਨਾਂ ਮੰਤਰੀਆਂ ਨੂੰ ਸੱਦਾ ਦਿੱਤਾ ਕਿ ਸਾਰੇ ਜਣੇ ਬਣਦਾ ਸਮਾਂ ਪੰਜਾਬ ਕਾਂਗਰਸ ਭਵਨ ਨੂੰ ਦੇਣ। ਨਵਜੋਤ ਸਿੰਘ ਸਿੱਧੂ ਦੇ ਸੰਬੋਧਨ ਤੋਂ ਪਹਿਲਾਂ ਕੈਪਟਨ ਅਮਰਿੰਦਰ ਸਿੰਘ ਨੇ ਸਿੱਧੂ ਨੂੰ ਪ੍ਰਧਾਨ ਨਿਯੁਕਤ ਹੋਣ ’ਤੇ ਅਸ਼ੀਰਵਾਦ ਦਿੱਤਾ ਅਤੇ ਆਪਣੀ ਸਰਕਾਰ ਵੱਲੋਂ ਕੋਵਿਡ-19, ਸਿਹਤ, ਸਿੱਖਿਆ ਦੇ ਖ਼ੇਤਰ ’ਚ ਕੀਤੇ ਕੰਮਾਂ ਦਾ ਜ਼ਿਕਰ ਕਰਦੇ ਹੋਏ ਆਪਣੇ ਮੰਤਰੀ ਬਲਵੀਰ ਸਿੰਘ ਸਿੱਧੂ, ਓਪੀ ਸੋਨੀ , ਵਿਜੇਇੰਦਰ ਸਿੰਗਲਾ ਦੀ ਪਿੱਠ ਥਾਪੜੀ । ਕੈਪਟਨ ਨੇ ਦਾਅਵਾ ਕੀਤਾ ਕਿ ਇਹ ਸਾਡੀ ਸਰਕਾਰ ਦੀ ਪ੍ਰਾਪਤੀ ਹੈ ਕਿ ਬਾਦਲ ਸਰਕਾਰ ਨੇ ਬੇਅਦਬੀ ਕਾਂਡ ਦੀ ਜਾਂਚ ਸੀਬੀਆਈ ਨੂੰ ਸੌਂਪ ਦਿੱਤੀ ਸੀ ਪਰ ਅਸੀਂ ਵਾਪਸ ਇਹ ਜਾਂਚ ਪੰਜਾਬ ਸਰਕਾਰ ਦੇ ਹੱਥ ਲਿਆਂਦੀ। ਉਨਾਂ ਕਿਹਾ ਕਿ ਸਾਰਿਆਂ ਦਾ ਹਿਸਾਬ-ਕਿਤਾਬ ਹੋਵੇਗਾ, ਇੱਥੇ ਨਾ ਬਾਦਲ ਰਹਿਣੇ ਨੇ ਅਤੇ ਨਾ ਕਿਸੇ ਹੋਰ ਨੇ ਰਹਿਣਾ। ਨਵਜੋਤ ਸਿੰਘ ਸਿੱਧੂ ਦੇ ਪਰਿਵਾਰ ਨਾਲ ਆਪਣੀ ਸਾਂਝ ਬਾਰੇ ਦੱਸਦੇ ਹੋਏ ਕੈਪਟਨ ਨੇ ਕਿਹਾ ਕਿ ‘‘ਮੈਂ ਜਿਸ ਵੇਲੇ ਦਾ ਸਿੱਧੂ ਦੇ ਘਰ ਜਾਂਦਾ ਹਾਂ ਸਿੱਧੂ ਉਦੋ ਛੋਟਾ ਜਿਹਾ ਹੁੰਦਾ ਸੀ’’। ਕੈਪਟਨ ਨੇ ਪਾਕਿਸਤਾਨ, ਚੀਨ ਅਤੇ ਤਾਲਿਬਾਨ ਦੀਆਂ ਭਾਰਤ ਵਿਰੋਧੀ ਗਤੀਵਿਧੀਆਂ ਦਾ ਜ਼ਿਕਰ ਕਰਦੇ ਹੋਏ ਸਿੱਧੂ ਨੂੰ ਸਿੱਧੇ ਤੌਰ ’ਤੇ ਮੁਖ਼ਾਤਿਬ ਹੋ ਕੇ ਕਿਹਾ ਕਿ ‘‘ਨਵਜੋਤ ਹੁਣ ਤੈਨੂੰ ਜ਼ਿੰਮੇਵਾਰੀ ਲੈਣੀ ਪੈਣੀ ਹੈ’’। ਪੰਜਾਬ ਅਤੇ ਦੇਸ਼ ਲਈ ਇਕੱਠੇ ਹੋ ਕੇ ਲੜਨ ਦਾ ਸਮਾਂ ਹੈ। ਕੈਪਟਨ ਨੇ ਵਰਕਰਾਂ ਨੂੰ ‘ਨਵੇਂ ਪ੍ਰਧਾਨ’ ਦੀ ਪੂਰੀ ਸਪੋਟਰ ਕਰਨ ਦਾ ਸੱਦਾ ਦਿੱਤਾ।
ਬਾਕਸ ਆਈਟਮ
ਸਮਾਗਮ ਦੌਰਾਨ ਉਂਝ ਤਾਂ ਭਾਵੇ ਨਵਜੋਤ ਸਿੰਘ ਸਿੱਧੂ, ਕੈਪਟਨ ਅਮਰਿੰਦਰ ਸਿੰਘ ਦੇ ਬਿਲਕੁਲ ਨਾਲ ਬੈਠੇ ਸਨ ਪ੍ਰੰਤੂ ਸੰਬੋਧਨ ਕਰਨ ਲਈ ਮਾਈਕ ’ਤੇ ਜਾਣ ਤੋਂ ਪਹਿਲਾਂ ਸਿੱਧੂ ਨੇ ਕੈਪਟਨ ਦੇ ਗੋਡੀਂ ਹੱਥ ਲਗਾ ਕੇ ਅਸ਼ੀਰਵਾਦ ਨਹੀਂ ਲਿਆ ਸਗੋਂ ਬੀਬੀ ਭੱਠਲ ਅਤੇ ਲਾਲ ਸਿੰਘ ਦੇ ਗੋਡੀਂ ਹੱਥ ਲਾ ਕੇ ਅਸ਼ੀਰਵਾਦ ਲਿਆ। ਪੰਜਾਬ ਭਵਨ ਅਤੇ ਕਾਂਗਰਸ ਭਵਨ ’ਚ ਹੋਰ ਵੀ ਬਹੁਤ ਸਾਰੀਆਂ ਅਜਿਹੀਆਂ ਗੱਲਾਂ ਵੇਖਣ ਨੂੰ ਮਿਲੀਆਂ ਜਿਨਾਂ ਤੋਂ ਲੱਗ ਰਿਹਾ ਸੀ ਕਿ ਕੈਪਟਨ ਅਤੇ ਸਿੱਧੂ ਦੇ ‘‘ਮਨਾਂ ਦੀ ਦੂਰੀ’’ ਬਣੀ ਹੋਈ ਹੈ, ਖ਼ਾਸ ਕਰਕੇ ਕੈਪਟਨ ਅਮਰਿੰਦਰ ਸਿੰਘ ਦੇ ਚਿਹਰੇ ’ਤੇ ਉਹ ਨੂਰ ਦਿਖਾਈ ਨਹੀਂ ਦਿੱਤਾ ਜੋ ਅਕਸਰ ਦਿਖਾਈ ਦਿੰੰਦਾ ਹੈ।
