ਚੰਡੀਗੜ੍ਹ,23 ਅਗਸਤ-ਪੰਜਾਬ ਸਰਕਾਰ ਵੱਲੋਂ ਹੜ੍ਹਾਂ ਦੇ ਮੱਦੇਨਜ਼ਰ ਸੁਰੱਖਿਆ ਵਜੋਂ ਸੂਬੇ ਦੇ ਸਾਰੇ ਸਰਕਾਰੀ ਅਤੇ ਪ੍ਰਾਈਵੇਟ ਸਕੂਲਾਂ ਵਿੱਚ 26 ਅਗਸਤ ਤੱਕ ਤੁਰੰਤ ਛੁੱਟੀਆਂ ਦੇ ਫੈਸਲੇ ਨੂੰ ਹੈਰਾਨੀਜਨਕ ਤਰੀਕੇ ਨਾਲ ਵੇਖਿਆ ਜਾ ਰਿਹਾ ਹੈ। ਸਕੂਲਾਂ ਵਿੱਚ ਛੁੱਟੀਆਂ ਕਰਨ ਦੇ ਐਲਾਨ ਤੋਂ ਬਾਅਦ ਸੋਸ਼ਲ ਮੀਡੀਆ ‘ਤੇ ਕੁਝ ਇਸ ਤਰ੍ਹਾਂ ਦੀਆਂ ਟਿੱਪਣੀਆਂ ਵੀ ਹੋ ਰਹੀਆਂ ਹਨ ਕਿ “ਆਖ਼ਰ ! ਸਰਕਾਰ ਨੂੰ ਅਜਿਹੀਆਂ ਸਲਾਹਾਂ ਦੇ ਕੌਣ ਰਿਹਾ ਹੈ” । ਸੂਬੇ ਦੇ ਸਿੱਖਿਆ ਮੰਤਰੀ ਹਰਜੋਤ ਸਿੰਘ ਬੈਂਸ ਨੇ ਟਵੀਟ ਕੀਤਾ ਕਿ ਸੁਰੱਖਿਆ ਦੇ ਮੱਦੇਨਜ਼ਰ ਛੁੱਟੀਆਂ ਕੀਤੀਆਂ ਜਾ ਰਹੀਆਂ ਹਨ, ਜਦ ਕਿ ਜ਼ਮੀਨੀ ਪੱਧਰ ‘ਤੇ ਸੱਚਾਈ ਇਹੋ ਹੈ ਕਿ ਸੂਬੇ ਦੇ ਮਾਲਵਾ ਖੇਤਰ ਵਿੱਚ ਹੜਾਂ ਦਾ ਕੋਈ ਖ਼ਤਰਾ ਹੀ ਨਹੀਂ ਹੈ। ਸਰਕਾਰ ਦੇ ਫ਼ੈਸਲੇ ‘ਤੇ ਟਿੱਪਣੀ ਕਰਦੇ ਹੋਏ ਆਪਣਾ ਨਾਮ ਗੁਪਤ ਰੱਖਣ ਦੀ ਸ਼ਰਤ ‘ਤੇ ਇੱਕ ਸਰਕਾਰੀ ਅਧਿਆਪਕ ਨੇ ਕਿਹਾ ਕਿ “ਪੜ੍ਹਾਈ ਦੇ ਮਾਮਲੇ ‘ਚ ਜਦੋਂ ਤੱਕ ਬੱਚਿਆਂ ਦੀ ਗੱਡੀ ਲਾਈਨ ‘ਤੇ ਚੜ੍ਹਦੀ ਹੈ ਉਦੋਂ ਨੂੰ ਸਰਕਾਰ ਅਜਿਹਾ ਕੋਈ ਬੇਤੁਕਾ ਐਲਾਨ ਕਰ ਦਿੰਦੀ ਹੈ”। ਸਰਕਾਰ ਦੇ ਇਸ ਫ਼ੈਸਲੇ ਨੂੰ ਹੜਾਂ ਦੇ ਮਾਮਲੇ ‘ਚ ਆਪਾ-ਵਿਰੋਧੀ ਵੀ ਮੰਨਿਆ ਜਾ ਰਿਹਾ ਹੈ ਕਿਉਂਕਿ ਇੱਕ ਪਾਸੇ ਤਾਂ ਸਰਕਾਰ ਇਹ ਦਾਅਵੇ ਕਰਦੀ ਹੈ ਕਿ ਸਥਿਤੀ ਕੰਟਰੋਲ ਅਧੀਨ ਹੈ। ਹੜਾਂ ਤੋਂ ਖ਼ਤਰੇ ਦੇ ਮੱਦੇਨਜ਼ਰ ਕੀਤੀਆਂ ਛੁੱਟੀਆਂ ਸਬੰਧੀ ਆਮ ਲੋਕ ਆਖ ਰਹੇ ਹਨ ਕਿ “ਸਰਕਾਰ ਨੇ ਬਿਨਾਂ ਪਾਣੀ ਤੋਂ ਮੌਜੇ ਲਾਹੇ ਹੋਏ ਹਨ”। ਲੋਕਾਂ ਦਾ ਇਹ ਵੀ ਕਹਿਣਾ ਹੈ ਕਿ ਜਿਹੜੇ ਜ਼ਿਲ੍ਹਿਆਂ ਵਿੱਚ ਸਥਿਤੀ ਕੰਟਰੋਲ ਤੋਂ ਬਾਹਰ ਹੈ ਉੱਥੇ ਛੁੱਟੀਆਂ ਕਰਨ ਦੀ ਤੁਕ ਬਣਦੀ ਹੈ ਪ੍ਰੰਤੂ ਜਿਹੜੇ ਜ਼ਿਲ੍ਹਿਆਂ ਵਿੱਚ ਲੋਕ ਮੀਂਹ ਪਵਾਉਣ ਲਈ ਧਾਰਮਿਕ ਅਸਥਾਨਾਂ ‘ਤੇ ਯੱਗ ਕਰਨ ਦੀਆਂ ਅਰਦਾਸਾਂ ਕਰ ਰਹੇ ਹਨ ਉਥੇ ਛੁੱਟੀਆਂ ਦਾ ਕੋਈ ਮਤਲਬ ਨਹੀਂ ਬਣਦਾ । ਜ਼ਿਕਰਯੋਗ ਹੈ ਕਿ ਮਾਲਵੇ ਦੇ ਵੱਡੇ ਖੇਤਰ ਵਿੱਚ ਭਾਦੋਂ ਦੀ ਗਰਮੀ ਅਤੇ ਹੁੰਮਸ ਨੇ “ਵੱਟ” ਕੱਢੇ ਹੋਏ ਹਨ ਅਤੇ ਲੋਕ ਮੀਹ ਪੈਣ ਦੀਆਂ ਅਰਦਾਸਾਂ ਕਰ ਰਹੇ ਹਨ । ਸਰਕਾਰ ਨੇ ਪੂਰੇ ਸੂਬੇ ਦੀ ਫੀਡਬੈਕ ਲੈਣ ਤੋਂ ਬਿਨਾਂ ਹੀ ਇਹ ਵੱਡਾ ਫੈਸਲਾ ਕਰ ਦਿੱਤਾ ਹੈ। ਇੱਥੇ ਇਹ ਵੀ ਦੱਸਣਯੋਗ ਹੈ ਕਿ ਵੋਟਰ ਸੂਚੀਆਂ ਦੀ ਸੁਧਾਈ ਕਾਰਨ ਬਤੌਰ BLO ਡਿਊਟੀ ਕਾਰਨ ਬਹੁਤੇ ਅਧਿਆਪਕ ਇੱਕ ਮਹੀਨੇ ਤੋਂ ਸਕੂਲਾਂ ਤੋਂ ਬਾਹਰ ਸਨ, ਹੁਣ ਜਦੋਂ ਇਹ ਅਧਿਆਪਕ ਸਕੂਲਾਂ ‘ਚ ਵਾਪਿਸ ਪਰਤੇ ਹਨ ਤਾਂ ਸਰਕਾਰ ਨੇ ਛੁੱਟੀਆਂ ਕਰ ਦਿੱਤੀਆਂ ।
