ਚੰਡੀਗੜ੍ਹ,10 ਅਕਤੂਬਰ-ਆਮ ਆਦਮੀ ਪਾਰਟੀ ਨੇ ਚੋਣਾਂ ਤੋਂ ਪਹਿਲਾਂ ਪੰਜਾਬ ਦੇ ਲੋਕਾਂ ਨੂੰ ਗਰੰਟੀਆਂ ਦਿੱਤੀਆਂ ਸਨ ਕਿ ਰਵਾਇਤੀ ਪਾਰਟੀਆਂ ਵੱਲੋਂ ਕੀਤੀ ਜਾਂਦੀ ਰਾਜਨੀਤੀ ਨੂੰ ਪੂਰੀ ਤਰ੍ਹਾਂ ਬਦਲ ਦਿੱਤਾ ਜਾਵੇਗਾ ਪ੍ਰੰਤੂ ਸਰਕਾਰ ਬਣਨ ਤੋਂ ਬਾਅਦ ਆਮ ਆਦਮੀ ਪਾਰਟੀ ਦੇ ਲੀਡਰਾਂ ਦੇ ਸ਼ਾਹੀ ਠਾਠ ਅਤੇ ਰਾਜਨੀਤੀ ਦੇ ਬਦਲੇ ਤੌਰ ਤਰੀਕਿਆਂ ਨੇ ਆਮ ਲੋਕਾਂ ਨੂੰ ਹੈਰਾਨ ਹੀ ਨਹੀਂ ਕੀਤਾ ਸਗੋਂ ਦਿਨ ਰਾਤ ਮਿਹਨਤ ਕਰਨ ਵਾਲੇ ਵਲੰਟੀਅਰਾਂ ਨੂੰ ਸ਼ਰਮਸਾਰ ਵੀ ਕੀਤਾ ਹੈ। ਭਗਵੰਤ ਮਾਨ ਸਰਕਾਰ ਵੱਲੋਂ 2 ਅਕਤੂਬਰ ਨੂੰ ਪਟਿਆਲਾ ਵਿਖੇ ਇੱਕ ਹਸਪਤਾਲ ਦੇ ICU ਵਾਰਡ ਦੇ ਉਦਘਾਟਨ ਮੌਕੇ ਸੂਬੇ ਵਿੱਚੋਂ ਸੈਂਕੜੇ ਸਰਕਾਰੀ ਰੂਟਾਂ ‘ਤੇ ਚੱਲਦੀਆਂ ਬੱਸਾਂ ਦੀ ਵਰਤੋਂ ਦੀ ਚਰਚਾ ਤਾਂ ਹੋ ਹੀ ਰਹੀ ਹੈ ਸਗੋਂ ਇਸ ਦੇ ਨਾਲ ਹੀ ਪਿੰਡਾਂ ਵਿੱਚੋਂ ਆਪ ਦੇ ਵਲੰਟੀਅਰਾਂ ਨੂੰ ਲੱਦ ਕੇ ਪਟਿਆਲੇ ਲੈ ਕੇ ਜਾਣ ਵਾਲੀਆਂ ਬੱਸਾਂ ‘ਚ ਵਲੰਟੀਅਰਾਂ ਦੀ ਕੀਤੀ ਆਓ ਭਗਤ ਸਬੰਧੀ ਚਰਚਾ ਵੀ ਸਾਹਮਣੇ ਆ ਰਹੀ ਹੈ। ਪ੍ਰਸਿੱਧ ਆਰਟੀਆਈ ਐਕਟੀਵਿਸਟ ਮਾਨਿਕ ਗੋਇਲ ਨੇ ਇਸ ਗੱਲ ਦਾ ਹੈਰਾਨੀਜਨਕ ਖੁਲਾਸਾ ਕੀਤਾ ਹੈ ਕਿ ਸਰਕਾਰੀ ਬੱਸਾਂ ‘ਚ ਜਾਣ ਵਾਲੇ ਪਟਿਆਲੇ ਰੈਲੀ ‘ਤੇ ਜਾਣ ਵਾਲੇ ਵਲੰਟੀਅਰਾਂ ਦੀ ਆਓ ਭਗਤ ਖੁਰਾਕ ਤੇ ਸਿਵਲ ਸਪਲਾਈ ਵਿਭਾਗ ਵੱਲੋਂ ਕੀਤੀ ਗਈ, ਇਸ ਸਬੰਧੀ ਮਾਨਿਕ ਗੋਇਲ ਨੇ ਇੱਕ ਰਸੀਦ ਵੀ ਜਾਰੀ ਕੀਤੀ ਹੈ ਜੋ ਸਰਕਾਰੀ ਬੱਸਾਂ ਵਿੱਚ ਪਟਿਆਲੇ ਰੈਲੀ ‘ਤੇ ਗਏ ਆਪ ਦੇ ਵਲੰਟੀਅਰਾਂ ਦੀ ਆਓ ਭਗਤ ਨੂੰ ਜ਼ਾਹਰ ਕਰਦੀ ਹੈ। ਰਸੀਦ ਦੇ ਮੁਤਾਬਕ ਆਪ ਦੇ ਵਲੰਟੀਅਰ ਨੇ ਖੁਰਾਕ ਤੇ ਸਿਵਲ ਸਪਲਾਈ ਵਿਭਾਗ ਦੇ ਕਿਸੇ ਕਰਮਚਾਰੀ ਨੂੰ ਤਸਦੀਕ ਕਰਕੇ ਦਿੱਤਾ ਹੈ ਕਿ ਉਸਨੇ ਕਰਮਚਾਰੀ ਤੋਂ ਬੱਸ ਵਿੱਚ ਵਲੰਟੀਅਰਾਂ ਦੀ ਗਿਣਤੀ ਦੇ ਮੁਤਾਬਿਕ “ਦੋ ਪਰੌਂਠੇ ਅਚਾਰ ਨਾਲ, ਇੱਕ ਲੱਸੀ ਦਾ ਪੈਕਟ ਤੇ ਇੱਕ ਪਾਣੀ ਦੀ ਬੋਤਲ” ਪ੍ਰਾਪਤ ਕਰ ਲਏ ਹਨ । ਰਸੀਦ ਪੰਜਾਬ ਦੇ ਵਿੱਤ ਮੰਤਰੀ ਦੇ ਹਲਕੇ ਨਾਲ ਸਬੰਧਿਤ ਹੈ । ਮੁੱਖ ਮੰਤਰੀ ਭਗਵੰਤ ਮਾਨ ਭਾਵੇਂ ਅਕਸਰ ਇਹ ਦਾਅਵਾ ਕਰਦੇ ਹਨ ਕਿ ਕੁਰੱਪਸ਼ਨ ਦੇ ਮਾਮਲੇ ‘ਚ ਉਹਨਾਂ ‘ਤੇ ਉਂਗਲ ਨਹੀਂ ਚੁੱਕੀ ਜਾ ਸਕਦੀ ਪ੍ਰੰਤੂ ਸਰਕਾਰੀ ਮਸ਼ੀਨਰੀ ਦੀ ਦੁਰਵਰਤੋਂ ਅਤੇ ਸਰਕਾਰੀ ਖਜ਼ਾਨੇ ‘ਚੋਂ ਵਲੰਟੀਅਰਾਂ ਦੀ ਆਓ ਭਗਤ ਦੀਆਂ ਖ਼ਬਰਾਂ ਭਗਵੰਤ ਮਾਨ ਦੇ ਅਕਸ ਨੂੰ ਵੀ ਖਰਾਬ ਕਰ ਰਹੀਆਂ ਹਨ । ਭਗਵੰਤ ਮਾਨ ਨੇ ਜੇਕਰ ਇਹਨਾਂ ਆਪਹੁਦਰੀਆਂ ਨੂੰ ਨਾ ਰੋਕਿਆ ਤਾਂ ਲੋਕਾਂ ਨੂੰ ਸਵਾਲ ਕਰਨੇ ਸਿਖਾਉਣ ਵਾਲੇ ਭਗਵੰਤ ਮਾਨ ਨੂੰ ਵੀ ਲੋਕਾਂ ਦੇ ਸਵਾਲਾਂ ਦਾ ਸਾਹਮਣਾ ਕਰਨਾ ਪਵੇਗਾ ।
