ਬਰਨਾਲਾ,25 ਜੂਨ (ਨਿਰਮਲ ਸਿੰਘ ਪੰਡੋਰੀ)-
-ਬਰਨਾਲਾ ਵਿਧਾਨ ਸਭਾ ਹਲਕੇ ਦੀ ਜ਼ਿਮਨੀ ਚੋਣ ਦਾ ਰਸਮੀ ਤੌਰ ‘ਤੇ ਐਲਾਨ ਵੀ ਨਹੀਂ ਹੋਇਆ ਪ੍ਰੰਤੂ ਟਿਕਟ ਦੇ ਚਾਹਾਵਾਨਾਂ ਨੇ ਹੁਣੇ ਤੋਂ ਆਪਣੇ ਪਰ ਤੋਲਣੇ ਸ਼ੁਰੂ ਕਰ ਦਿੱਤੇ ਹਨ। ਸੱਤਾਧਾਰੀ ਆਮ ਆਦਮੀ ਪਾਰਟੀ ਅਤੇ ਵਿਰੋਧੀ ਧਿਰ ਕਾਂਗਰਸ ਵਿੱਚ ਟਿਕਟ ਪ੍ਰਾਪਤੀ ਲਈ ਹਲਚਲ ਦੂਜੀਆਂ ਪਾਰਟੀਆਂ ਦੇ ਮੁਕਾਬਲੇ ਕੁਝ ਜ਼ਿਆਦਾ ਵੇਖਣ ਨੂੰ ਮਿਲ ਰਹੀ ਹੈ। ਕਾਂਗਰਸ ਅਤੇ ਆਮ ਆਦਮੀ ਪਾਰਟੀ ਦੀ ਟਿਕਟ ਪ੍ਰਾਪਤੀ ਲਈ ਸਥਾਨਕ ਆਗੂਆਂ ਤੋਂ ਬਿਨਾਂ ਕੁਝ ਬਾਹਰਲੇ ਆਗੂਆਂ ਦੇ ਨਾਮ ਵੀ ਸਾਹਮਣੇ ਆ ਰਹੇ ਹਨ। ਬਰਨਾਲਾ ਜ਼ਿਮਨੀ ਚੋਣ ਲਈ ਕਾਂਗਰਸ ਅਤੇ ਆਪ ਦੀ ਟਿਕਟ ਲਈ ਜਦੋਂ ਬਾਹਰਲੇ ਆਗੂਆਂ ਦੇ ਨਾਮ ਦੀ ਚਰਚਾ ਹੁੰਦੀ ਹੈ ਤਾਂ ਦੋਵੇਂ ਪਾਰਟੀਆਂ ਦੇ ਸਥਾਨਕ ਆਗੂ ਤਕਲੀਫ਼ ਮੰਨਦੇ ਹਨ ਕਿਉਂਕਿ ਦੋਵੇਂ ਪਾਰਟੀਆਂ ਦੇ ਸਥਾਨਕ ਆਗੂਆਂ ਦਾ ਕਹਿਣਾ ਹੈ ਕਿ ਇਸ ਵਾਰ ਟਿਕਟ ਸਥਾਨਕ ਆਗੂ ਨੂੰ ਹੀ ਮਿਲਣੀ ਚਾਹੀਦੀ ਹੈ। ਆਮ ਆਦਮੀ ਪਾਰਟੀ ਦੇ ਵਲੰਟੀਅਰਾਂ ਵੱਲੋਂ ਤਾਂ ਸੋਸ਼ਲ ਮੀਡੀਆ ‘ਤੇ ਪੋਸਟਾਂ ਪਾ ਕੇ ਇਹ ਕਿਹਾ ਵੀ ਜਾਣ ਲੱਗ ਪਿਆ ਹੈ ਕਿ ਆਪ ਕੋਲ ਸਥਾਨਕ ਪੱਧਰ ‘ਤੇ ਚੰਗੇ ਚਿਹਰੇ ਹਨ ਇਸ ਲਈ ਉਹ ਕਿਸੇ ਬਾਹਰਲੇ ਆਗੂ ਨੂੰ ਪ੍ਰਵਾਨ ਨਹੀਂ ਕਰਨਗੇ। ਦੂਜੇ ਪਾਸੇ ਕਾਂਗਰਸ ਦੇ ਕੁਝ ਸਥਾਨਕ ਆਗੂਆਂ ਨੇ ਟਿਕਟ ‘ਤੇ ਦਾਅਵਾ ਵੀ ਠੋਕ ਦਿੱਤਾ ਹੈ। ਕਾਂਗਰਸ ਦੀ ਟਿਕਟ ਲਈ ਬਾਹਰਲੇ ਆਗੂਆਂ ਦੇ ਨਾਮ ਦੀ ਚਰਚਾ ਤੋਂ ਬਾਅਦ ਇੱਕ ਸਥਾਨਕ ਆਗੂ ਨੇ ਕਿਹਾ ਕਿ “ਬਰਨਾਲੇ ਦੀ ਸੀਟ ਕੋਈ ਸ਼ਾਮਲਾਤ ਜ਼ਮੀਨ ਨਹੀਂ ਹੈ, ਜਿਸ ਉੱਪਰ ਕੋਈ ਬਾਹਰੋਂ ਆ ਕੇ ਜਦ ਮਰਜ਼ੀ ਕਬਜਾ ਕਰ ਲਵੇ, ਇਸ ਵਾਰ ਅਸੀਂ ਬਾਹਰਲੇ ਬੰਦੇ ਦਾ ਵਿਰੋਧ ਕਰਾਂਗੇ”। ਆਮ ਆਦਮੀ ਪਾਰਟੀ ਦੇ ਵਲੰਟੀਅਰ ਵੀ ਆਪਣੇ ਸਥਾਨਕ ਕਿਸੇ ਆਗੂ ਨੂੰ ਹੀ ਟਿਕਟ ਮੰਗ ਰਹੇ। ਵੈਸੇ ਤਾਂ ਕਾਂਗਰਸ ਤੇ ਆਮ ਆਦਮੀ ਪਾਰਟੀ ਵਿੱਚ ਟਿਕਟਾਂ ਦਾ ਫੈਸਲਾ ਹਾਈਕਮਾਂਡ ਵੱਲੋਂ ਹੀ ਫਾਈਨਲ ਕੀਤਾ ਜਾਂਦਾ ਹੈ ਪ੍ਰੰਤੂ ਕਾਂਗਰਸ ਅਤੇ ਆਮ ਆਦਮੀ ਪਾਰਟੀ ਦੇ ਸਥਾਨਕ ਆਗੂਆਂ/ਵਰਕਰਾਂ ਦੇ ਤੇਵਰ ਦੇਖਦੇ ਹੋਏ ਲੱਗਦਾ ਹੈ ਕਿ ਕਿਸੇ ਬਾਹਰਲੇ ਆਗੂ ਲਈ ਸਥਾਨਕ ਆਗੂਆਂ/ਵਰਕਰਾਂ ਦੇ ਇਰਾਦੇ ਨੇਕ ਨਹੀਂ ਹੋਣਗੇ।
