ਬਰਨਾਲਾ,18 ਅਕਤੂਬਰ, Gee98 news service
-ਪੰਜਾਬ ‘ਚ ਭ੍ਰਿਸ਼ਟਾਚਾਰ ਇੱਕ ਵੱਡਾ ਮੁੱਦਾ ਬਣ ਚੁੱਕਿਆ ਹੈ, ਜੀਹਨੇ ਪੰਜਾਬ ਦੀਆਂ ਵਿੱਤੀ ਜੜਾਂ ਖੋਖਲੀਆਂ ਕਰ ਦਿੱਤੀਆਂ ਹਨ। 2022 ਦੀਆਂ ਵਿਧਾਨ ਸਭਾ ਚੋਣਾਂ ਸਮੇਂ ਆਮ ਆਦਮੀ ਪਾਰਟੀ ਦਾ ਇਹ ਵੱਡਾ ਤੇ ਮੁੱਖ ਵਾਅਦਾ ਸੀ ਕਿ ਸੂਬੇ ਚੋਂ ਭ੍ਰਿਸ਼ਟਾਚਾਰ ਪੂਰੀ ਤਰ੍ਹਾਂ ਖਤਮ ਕਰ ਦਿੱਤਾ ਜਾਵੇਗਾ ਪ੍ਰੰਤੂ ਸੱਚਾਈ ਇਹੋ ਹੈ ਕਿ ਇਸ ਮਾਮਲੇ ਵਿੱਚ ਪਿਛਲੀਆਂ ਸਰਕਾਰਾਂ ਨਾਲੋਂ ਕੋਈ ਫਰਕ ਨਹੀਂ ਪਿਆ ਸਗੋਂ ਲੋਕ ਸ਼ਰੇਆਮ ਆਖ ਰਹੇ ਹਨ ਕਿ ਭ੍ਰਿਸ਼ਟਾਚਾਰ ਪਹਿਲਾਂ ਨਾਲੋਂ ਵੱਧ ਚੁੱਕਿਆ ਹੈ। ਵੈਸੇ ਤਾਂ ਪੰਜਾਬ ਦਾ ਕੋਈ ਵਿਭਾਗ ਹੀ ਬਚਿਆ ਹੋਵੇਗਾ ਜਿੱਥੇ ਕੁਰੱਰਪਸ਼ਨ ਦੇ ਨਾਲ ਲਿਬੜੇ ਹੋਏ ਸਿੱਕੇ ਨਾ ਚੱਲਦੇ ਹੋਣ ਪ੍ਰੰਤੂ ਸੂਬੇ ਦੇ ਵਣ ਵਿਭਾਗ ਵਿੱਚ ਭ੍ਰਿਸ਼ਟਾਚਾਰ ਦੇ ਤੌਰ ਤਰੀਕਿਆਂ ਬਾਰੇ ਜਾਣ ਕੇ ਹੈਰਾਨੀ ਹੁੰਦੀ ਹੈ। ਕੈਪਟਨ ਸਰਕਾਰ ਵਿੱਚ ਵਣ ਵਿਭਾਗ ਦੇ ਮੰਤਰੀ ਸਾਧੂ ਸਿੰਘ ਧਰਮਸੋਤ ਦੇ ਕੁਰੱਪਸ਼ਨ ਦੀ ਕਹਾਣੀ ਸਭ ਨੂੰ ਪਤਾ ਹੀ ਹੈ, ਜਿਸ ਤੋਂ ਸਪੱਸ਼ਟ ਹੁੰਦਾ ਹੈ ਕਿ ਵਣ ਵਿਭਾਗ ਦੇ ਹੇਠਲੇ ਕਰਮਚਾਰੀ ਤੋਂ ਲੈ ਕੇ ਮੰਤਰਾਲੇ ਤੱਕ ਜ਼ਿੰਮੇਵਾਰ ਲੋਕ ਵੀ ਵਿਭਾਗ ਦੇ ਕੀਮਤੀ ਰੁੱਖਾਂ ਨੂੰ ਸਿਉਂਕ ਵਾਂਗ ਖਾ ਰਹੇ ਹਨ। ਜੇਕਰ ਧਿਆਨ ਨਾਲ ਵੇਖਿਆ ਜਾਵੇ ਤਾਂ ਵਣ ਵਿਭਾਗ ਵਿੱਚ ਭ੍ਰਿਸ਼ਟਾਚਾਰ ਦੇ ਅਜਿਹੇ ਹਾਲਾਤ ਹਨ ਕਿ ਵਣ ਵਿਭਾਗ ਦੇ ਹਰੇਕ ਰੁੱਖ ਦੀ ਟਾਹਣੀ ‘ਤੇ ਰਿਸ਼ਵਤ ਦੇ ਫਲ ਲੱਗੇ ਹੋਏ ਹਨ ਅਤੇ ਵਿਭਾਗ ਦੇ ਉੱਚ ਅਧਿਕਾਰੀ ਵਿਭਾਗ ਨਾਲ ਸਬੰਧਿਤ ਪ੍ਰਾਈਵੇਟ ਫਰਮਾਂ ਦੇ ਮਾਲਕਾਂ ਨਾਲ ਰਲ ਮਿਲ ਕੇ ਇਨਾਂ ਫਲਾਂ ਦਾ ਜੂਸ ਪੀ ਰਹੇ ਹਨ। ਪੰਜਾਬ ਦੀਆਂ ਮੁੱਖ ਸੜਕਾਂ, ਸੰਪਰਕ ਸੜਕਾਂ, ਨਹਿਰਾਂ, ਰਜਵਾਹਿਆਂ, ਡਰੇਨਾਂ ਦੇ ਕਿਨਾਰਿਆਂ ‘ਤੇ ਵੱਡੇ ਅਤੇ ਕੀਮਤੀ ਰੁੱਖ ਲੱਕੜੀ ਚੋਰ ਬੜੇ ਆਰਾਮ ਨਾਲ ਕੱਟ ਕੇ ਲੈ ਜਾਂਦੇ ਹਨ ਪ੍ਰੰਤੂ ਵਿਭਾਗ ਦੇ ਅਧਿਕਾਰੀ ਇਹਨਾਂ ਲੱਕੜ ਚੋਰਾਂ ਨੂੰ ਫੜਨ ਦੀ ਬਜਾਏ ਚੋਰੀ ਹੋਏ ਦਰੱਖਤਾਂ ਨੂੰ ਤੇਜ਼ ਹਨੇਰੀ ਅਤੇ ਝੱਖੜ ਦੇ ਕੋਟੇ ‘ਚ ਪਾ ਕੇ ਬੁੱਤਾ ਸਾਰ ਦਿੰਦੇ ਹਨ। ਅਜਿਹੀ ਇੱਕ ਮਿਸਾਲ ਬਰਨਾਲਾ ‘ਚ ਲੱਖੀ ਕਾਲੋਨੀ ਦੇ ਵਿਚਕਾਰ ਦੀ ਲੰਘਦੇ ਛੋਟੇ ਰਜਵਾਹੇ (ਜਿੱਥੇ ਹੁਣ ਪਾਈਪਾਂ ਪਾਈਆਂ ਗਈਆਂ ਹਨ) ਦੇ ਕਿਨਾਰੇ ‘ਤੇ ਖੜੇ ਸਾਗਵਾਨ ਦੀ ਕੀਮਤੀ ਰੁੱਖਾਂ ਦੀ ਚੋਰੀ ਤੋਂ ਮਿਲਦੀ ਹੈ। ਕੁਝ ਵਰ੍ਹੇ ਪਹਿਲਾਂ ਇਸ ਰਜਵਾਹੇ ਦੇ ਦੋਵੇਂ ਕਿਨਾਰਿਆਂ ‘ਤੇ ਸਾਗਵਾਨ ਦੇ ਪੌਦੇ ਲਗਾਏ ਗਏ ਸਨ ਜੋ ਹੁਣ ਵੱਡੇ ਹੋ ਕੇ ਕੀਮਤੀ ਰੁੱਖ ਬਣ ਚੁੱਕੇ ਹਨ ਪ੍ਰੰਤੂ ਵੇਖਣ ਵਿੱਚ ਆਇਆ ਹੈ ਕਿ ਲੱਕੜ ਚੋਰਾਂ ਵੱਲੋਂ ਇਹਨਾਂ ਸਾਗਵਾਨ ਦੇ ਰੁੱਖਾਂ ਨੂੰ ਇੱਕ ਇੱਕ ਕਰਕੇ ਬੜੇ ਆਰਾਮ ਨਾਲ ਚੋਰੀ ਕੀਤਾ ਜਾ ਰਿਹਾ ਹੈ। ਹੈਰਾਨੀ ਇਸ ਗੱਲ ਦੀ ਹੈ ਸਾਗਵਾਨ ਦੇ ਕੀਮਤੀ ਰੁੱਖਾਂ ਦੀ ਚੋਰੀ ਸਬੰਧੀ ਬਰਨਾਲਾ ਜ਼ਿਲ੍ਹੇ ਦੇ ਵਣ ਵਿਭਾਗ ਦੇ ਉੱਚ ਅਧਿਕਾਰੀਆਂ ਨੇ ਅੱਖਾਂ ਬੰਦ ਕੀਤੀਆਂ ਹੋਈਆਂ ਹਨ। ਲੱਖੀ ਕਾਲੋਨੀ ਵਾਲੇ ਰਜਵਾਹੇ ਦੇ ਕਿਨਾਰੇ ਸਾਗਵਾਨ ਦੇ ਰੁੱਖਾਂ ਦੀ ਚੋਰੀ ਦੇ ਮਾਮਲੇ ਵਿੱਚ ਸ਼ੰਕਾ ਹੈ ਕਿ ‘ਕੁੱਤੀ ਚੋਰਾਂ ਨਾਲ ਰਲੀ ਹੋਈ ਹੈ’ ਕਿਉਂਕਿ ਇੱਕ ਇੱਕ ਕਰਕੇ ਕਈ ਕੀਮਤੀ ਦਰੱਖਤ ਚੋਰੀ ਹੋ ਚੁੱਕੇ ਹਨ ਪ੍ਰੰਤੂ ਵਿਭਾਗ ਦੇ ਅਧਿਕਾਰੀਆਂ ਨੂੰ ਇਸ ਦੀ ਭਿਣਕ ਤੱਕ ਵੀ ਨਹੀਂ ਹੈ। ਇਸ ਸਬੰਧੀ ਜਦੋਂ ਬਲਾਕ ਅਫਸਰ ਜਗਸੀਰ ਸਿੰਘ ਨਾਲ ਗੱਲ ਕੀਤੀ ਤਾਂ ਉਹਨਾਂ ਕਿਹਾ ਕਿ “ਚੈੱਕ ਕਰਦੇ ਹਾਂ ਜੇਕਰ ਦਰੱਖਤ ਚੋਰੀ ਹੋਏ ਹਨ ਤਾਂ ਦੋਸ਼ੀਆਂ ਖਿਲਾਫ਼ ਕਾਰਵਾਈ ਕੀਤੀ ਜਾਵੇਗੀ”। ਬਲਾਕ ਅਫ਼ਸਰ ਦੇ ਜਵਾਬ ਤੋਂ ਸਪਸ਼ਟ ਹੈ ਕਿ ਬਰਨਾਲੇ ਦਾ ਬਣਨ ਤੋਂ ਭਾਗ ਕੁੰਭਕਰਨੀ ਨੀਂਦ ਸੁੱਤਾ ਹੈ ਅਤੇ ਲੱਕੜਚੋਰ ਕੀਮਤੀ ਰੁੱਖ ਬਿਨਾਂ ਕਿਸੇ ਡਰ ਤੋਂ ਚੋਰੀ ਕਰ ਰਹੇ ਹਨ। ਹੁਣ ਇਹ ਪੜ੍ਹਤਾਲ ਦਾ ਵਿਸ਼ਾ ਹੈ ਕਿ ਸਬੰਧਤ ਕਰਮਚਾਰੀਆਂ ਵੱਲੋਂ ਉਕਤ ਮਾਮਲੇ ਵਿੱਚ ਅਵੇਸਲਾਪਣ/ਲਾਪਰਵਾਹੀ ਕੀਤੀ ਗਈ ਹੈ ਜਾਂ ਫਿਰ ਲੱਕੜ ਚੋਰਾਂ ਨਾਲ ਮਿਲੀਭੁਗਤ ਹੈ।
ਫੋਟੋ ਕੈਪਸ਼ਨ….ਲੱਖੀ ਕਲੋਨੀ ‘ਚ ਚੋਰਾਂ ਵੱਲੋਂ ਉਪਰੋਂ ਕੱਟ ਕੇ ਚੋਰੀ ਕੀਤੇ ਸਾਗਵਾਨ ਦੇ ਰੁੱਖਾਂ ਦੀ ਤਸਵੀਰ
