— ਟਿਕਟ ਦੇ ਐਲਾਨ ਤੋਂ ਪਹਿਲਾਂ ਹੀ ਕਾਲਾ ਢਿੱਲੋ ਦੀ ਰਿਹਾਇਸ ‘ਤੇ ਜੁੜ ਰਹੀ ਵਰਕਰਾਂ ਦੀ ਭੀੜ
ਬਰਨਾਲਾ, 21 ਅਕਤੂਬਰ (ਨਿਰਮਲ ਸਿੰਘ ਪੰਡੋਰੀ)-
-ਵਿਧਾਨ ਸਭਾ ਹਲਕਾ ਬਰਨਾਲਾ ਦੀ ਜ਼ਿਮਨੀ ਚੋਣ ਲਈ ਆਮ ਆਦਮੀ ਪਾਰਟੀ ਵੱਲੋਂ ਟਿਕਟ ਦਾ ਐਲਾਨ ਤੋਂ ਬਾਅਦ ਹਲਕੇ ਦੇ ਸਮੀਕਰਨ ਇਕਦਮ ਬਦਲ ਗਏ ਹਨ। ਆਪ ਵੱਲੋਂ ਐਲਾਨ ਕੀਤੀ ਪਾਰਟੀ ਟਿਕਟ ਦੇ ਖਿਲਾਫ ਜ਼ਿਲ੍ਹਾ ਪ੍ਰਧਾਨ ਗੁਰਦੀਪ ਸਿੰਘ ਬਾਠ ਦੀ ਅਗਵਾਈ ਹੇਠ ਟਕਸਾਲੀ ਆਗੂਆਂ ਵਰਕਰਾਂ ਨੇ ਬਗ਼ਾਵਤ ਕਰ ਦਿੱਤੀ ਹੈ। ਹੁਣ ਸਾਰਿਆਂ ਦੀਆਂ ਨਜ਼ਰਾਂ ਗੁਰਦੀਪ ਸਿੰਘ ਬਾਠ ਦੇ ਅਗਲੇ ਕਦਮ ‘ਤੇ ਟਿੱਕੀਆਂ ਹੋਈਆਂ ਹਨ। ਦੂਜੇ ਪਾਸੇ ਭਾਜਪਾ ਤੇ ਕਾਂਗਰਸ ਦੇ ਉਮੀਦਵਾਰਾਂ ਵੱਲੋਂ ਵੀ ਗੁਰਦੀਪ ਸਿੰਘ ਬਾਠ ਦੀ ਅਗਲੀ ਰਣਨੀਤੀ ‘ਤੇ ਨਜ਼ਰ ਰੱਖੀ ਜਾ ਰਹੀ ਹੈ। ਉੰਝ ਭਾਵੇਂ ਆਪ ਤੋਂ ਬਿਨਾਂ ਅਜੇ ਹੋਰ ਕਿਸੇ ਪਾਰਟੀ ਨੇ ਆਪਣੇ ਉਮੀਦਵਾਰ ਦਾ ਐਲਾਨ ਨੇ ਨਹੀਂ ਕੀਤਾ ਪ੍ਰੰਤੂ ਹਲਕੇ ਦੇ ਬਦਲੇ ਸਮੀਕਰਨਾਂ ਦੇ ਸੰਦਰਭ ਵਿੱਚ ਕਾਂਗਰਸੀ ਖੇਮਿਆਂ ਵਿੱਚ ਜ਼ਿਆਦਾ ਉਤਸ਼ਾਹ ਵੇਖਣ ਵਿੱਚ ਆ ਰਿਹਾ ਹੈ। ਕਾਂਗਰਸ ਦੇ ਜ਼ਿਲ੍ਹਾ ਪ੍ਰਧਾਨ ਕੁਲਦੀਪ ਸਿੰਘ ਕਾਲਾ ਢਿੱਲੋ ਦੀ ਰਿਹਾਇਸ਼ ‘ਤੇ ਟਿਕਟ ਦਾ ਐਲਾਨ ਹੋਣ ਤੋਂ ਪਹਿਲਾਂ ਹੀ ਵਰਕਰਾਂ ਦਾ ਰੋਜ਼ਾਨਾ ਵੱਡੀ ਗਿਣਤੀ ਵਿੱਚ ਇਕੱਠੇ ਹੋਣਾ ਦਰਸਾ ਰਿਹਾ ਹੈ ਕਿ ਕਾਂਗਰਸੀ ਵਰਕਰ ਕਾਲਾ ਢਿੱਲੋ ਦੀ ਟਿਕਟ ਪੱਕੀ ਮੰਨ ਚੁੱਕੇ ਹਨ। ਕਾਲਾ ਢਿੱਲੋ ਦੀ ਰਿਹਾਇਸ਼ ‘ਤੇ ਪੁੱਜਣ ਵਾਲੇ ਕਾਂਗਰਸ ਦੇ ਆਗੂ ਤੇ ਵਰਕਰ ਕਾਲਾ ਢਿੱਲੋ ਨੂੰ ਟਿਕਟ ਦੀਆਂ ਵਧਾਈਆਂ ਤੱਕ ਦੇ ਰਹੇ ਵੇਖੇ ਜਾ ਰਹੇ ਹਨ। ਇਹ ਵੀ ਵੇਖਣ ਵਿੱਚ ਆਇਆ ਹੈ ਕਿ ਕੁਝ ਦਿਨ ਪਹਿਲਾਂ ਤੱਕ ਕਾਲਾ ਢਿੱਲੋ ਨਾਲ ਸਿਆਸੀ ਮਨਮੁਟਾਵ ਰੱਖਣ ਵਾਲੇ ਕੁਝ ਆਗੂਆਂ ਨੇ ਵੀ ਆਪਣੇ ਰਣਨੀਤੀ ਬਦਲ ਲਈ ਹੈ ਜਿਸ ਨੂੰ ਵੇਖਦੇ ਹੋਏ ਲੱਗਦਾ ਹੈ ਕਿ ਬਰਨਾਲਾ ਜ਼ਿਮਨੀ ਚੋਣ ਦੇ ਸੰਦਰਭ ਵਿੱਚ ਭਾਜਪਾ ਤੇ ਆਮ ਆਦਮੀ ਪਾਰਟੀ ਵਾਂਗ ਕਾਂਗਰਸ ਨੂੰ ਖੁੱਲ੍ਹੀ ਬਗਾਵਤ ਦਾ ਸਾਹਮਣਾ ਨਹੀਂ ਕਰਨਾ ਪਵੇਗਾ ਕਿਉਂਕਿ ਕਾਂਗਰਸ ਦੇ ਸੂਬਾ ਪ੍ਰਧਾਨ ਰਾਜਾ ਵੜਿੰਗ ਅਤੇ ਸੀਨੀਅਰ ਆਗੂ ਪ੍ਰਤਾਪ ਸਿੰਘ ਬਾਜਵਾ, ਸੁਖਪਾਲ ਸਿੰਘ ਖਹਿਰਾ ਸਮੇਤ ਵੱਡੇ ਕਾਂਗਰਸੀ ਆਗੂਆਂ ਵੱਲੋਂ ਕਾਲਾ ਢਿੱਲੋਂ ਨੂੰ ਮਿਲ ਰਹੇ ਥਾਪੜੇ ਨੂੰ ਵੇਖਦੇ ਹੋਏ ਕੋਈ ਸਥਾਨਕ ਕਾਂਗਰਸੀ ਆਗੂ ਅੰਦਰੋਂ ਅੰਦਰੀ ਭਾਵੇਂ ਜ਼ਹਿਰ ਘੋਲਦੇ ਰਹਿਣ ਪ੍ਰੰਤੂ ਉਹ ਆਮ ਆਦਮੀ ਪਾਰਟੀ ਦੇ ਟਕਸਾਲੀ ਵਰਕਰਾਂ ਵਾਂਗ ਫ਼ਨ ਚੁੱਕਣ ਦੀ ਸਥਿਤੀ ਵਿੱਚ ਨਹੀਂ ਹੋਣਗੇ। ਚੋਣਾਂ ਦੇ ਪਿਛਲੇ ਲੰਮੇ ਰਿਕਾਰਡ ‘ਤੇ ਜੇਕਰ ਨਜ਼ਰ ਮਾਰੀ ਜਾਵੇ ਤਾਂ ਚੋਣਾਂ ਦੌਰਾਨ ਸੱਤਾ ਤੋਂ ਬਾਹਰ ਬੈਠੀਆਂ ਪਾਰਟੀਆਂ ‘ਚ ਬਗ਼ਾਵਤੀ ਸੁਰਾਂ ਘੱਟ ਵੇਖੀਆਂ ਗਈਆਂ ਹਨ। ਚੋਣਾਂ ਦੌਰਾਨ ਜਦ ਵੀ ਕਿਤੇ ਬਗਾਵਤ ਹੁੰਦੀ ਹੈ ਤਾਂ ਸੱਤਾਧਿਰ ਵਿੱਚ ਹੀ ਹੁੰਦੀ ਆਈ ਹੈ ਕਿਉਂਕਿ ਆਪਣੇ ਰਾਜਭਾਗ ਦੌਰਾਨ ਸੱਤਾ ਧਿਰ ਦੇ ਆਗੂਆਂ ਵਰਕਰਾਂ ਦੀਆਂ ਭਾਵਨਾਵਾਂ ਜਾਗ ਜਾਂਦੀਆਂ ਹਨ ਅਤੇ ਕਈ ਵਰ੍ਹਿਆਂ ਦੀ ਮਿਹਨਤ ਸਦਕਾ ਉਹਨਾਂ ਦੇ ਸਿਆਸੀ ਹੱਕ ਪ੍ਰਬਲ ਹੋ ਜਾਂਦੇ ਹਨ। ਦੂਜੇ ਪਾਸੇ ਜੇਕਰ ਬਰਨਾਲਾ ‘ਚ ਕਾਂਗਰਸੀ ਆਗੂਆਂ ਦੀ ਬਗਾਵਤੀ ਇਤਿਹਾਸ ‘ਤੇ ਨਜ਼ਰ ਮਾਰੀ ਜਾਵੇ ਤਾਂ ਨਵੇਂ ਨਵੇਂ ਬਣੇ ਕਾਂਗਰਸੀ ਹੀ ਪਲਟੀ ਮਾਰਦੇ ਆਏ ਹਨ ਜਦਕਿ ਜੱਦੀ ਪੁਸ਼ਤੀ ਸੁਭਾਅ ਤੋਂ ਕਾਂਗਰਸੀ ਆਗੂ ਤੇ ਵਰਕਰ ਪਾਰਟੀ ਹਿੱਤਾਂ ਨੂੰ ਪਹਿਲ ਦਿੰਦੇ ਦੇਖੇ ਗਏ ਹਨ, ਅਜਿਹੇ ਹਾਲਾਤਾਂ ਵਿੱਚ ਇਹ ਮੰਨਿਆ ਜਾ ਸਕਦਾ ਹੈ ਕਿ ਜ਼ਿਮਨੀ ਚੋਣ ਦੇ ਸੰਦਰਭ ਵਿੱਚ ਆਮ ਆਦਮੀ ਪਾਰਟੀ ਅਤੇ ਭਾਜਪਾ ਦੇ ਮੁਕਾਬਲੇ ਕਾਂਗਰਸ ਨੂੰ ਖੁੱਲ੍ਹੀ ਬਗਾਵਤ ਦਾ ਸਾਹਮਣਾ ਨਹੀਂ ਕਰਨਾ ਪਵੇਗਾ।
Menu
