ਚੰਡੀਗੜ੍ਹ,12 ਦਸੰਬਰ, (ਨਿਰਮਲ ਸਿੰਘ ਪੰਡੋਰੀ)-
-ਪੰਜਾਬ ਸਰਕਾਰ ਵੱਲੋਂ ਹਰ ਤਰ੍ਹਾਂ ਦੇ ਦਸਤਾਵੇਜ਼ਾਂ ਲਈ ਸ਼ੁਰੂ ਕੀਤੀ ਈ- ਵੈਰੀਫਿਕੇਸ਼ਨ ਸੂਬੇ ਦੇ ਅਨਪੜ੍ਹ ਨੰਬਰਦਾਰਾਂ ਅਤੇ ਸਰਪੰਚਾਂ/ਕੌਂਸਲਰਾਂ ਲਈ ਇੱਕ ਪ੍ਰੀਖਿਆ ਦੀ ਤਰਾਂ ਬਣਦੀ ਜਾ ਰਹੀ ਹੈ। ਸੂਬੇ ਦੇ ਅਨਪੜ੍ਹ ਨੰਬਰਦਾਰਾਂ ਅਤੇ ਸਰਪੰਚਾਂ ਨੂੰ ਹੁਣ ਡਿਜੀਟਲ ਦੁਨੀਆਂ ਦੇ ਵਸਨੀਕ ਬਣਨਾ ਪਵੇਗਾ ਅਤੇ ਵਟਸਐਪ ਸਮੇਤ ਮੋਬਾਈਲ ਫੋਨ ਦੀਆਂ ਹੋਰ ਐਪਲੀਕੇਸ਼ਨਜ਼ ਸਿੱਖਣੀਆਂ ਪੈਣਗੀਆਂ। ਦੱਸ ਦੇਈਏ ਕਿ ਸੂਬਾ ਸਰਕਾਰ ਨੇ ਕੁਝ ਸਮਾਂ ਪਹਿਲਾਂ ਪ੍ਰਸ਼ਾਸਨਿਕ ਸੁਧਾਰਾਂ ਦੇ ਨਵੇਂ ਯੁੱਗ ‘ਚ ਪ੍ਰਵੇਸ਼ ਕਰਦੇ ਹੋਏ ਹਰ ਤਰ੍ਹਾਂ ਦੇ ਦਸਤਾਵੇਜ਼ ਤਿਆਰ ਕਰਵਾਉਣ ਲਈ ਈ ਵੈਰੀਫਿਕੇਸ਼ਨ ਸ਼ੁਰੂ ਕੀਤੀ ਹੈ। ਇਸ ਪ੍ਰਕਿਰਿਆ ਤਹਿਤ ਹੁਣ ਸਭ ਤੋਂ ਪਹਿਲਾਂ ਅਰਜ਼ੀ ਸੁਵਿਧਾ ਕੇਂਦਰ ਵਿੱਚ ਜਮਾਂ ਹੋਵੇਗੀ ਅਤੇ ਫਿਰ ਅਰਜ਼ੀ ਸਬੰਧਿਤ ਪਟਵਾਰੀ ਕੋਲ ਵੈਰੀਫਿਕੇਸ਼ਨ ਲਈ ਡਿਜੀਟਲ ਤੌਰ ‘ਤੇ ਹੀ ਜਾਵੇਗੀ। ਪਟਵਾਰੀ ਅੱਗੇ ਵੈਰੀਫਿਕੇਸ਼ਨ ਲਈ ਅਰਜ਼ੀ ਨੰਬਰਦਾਰ, ਸਰਪੰਚ, ਕੌਂਸਲਰ ਦੇ ਵਟਸਐਪ ‘ਤੇ ਭੇਜੇਗਾ ਅਤੇ ਨੰਬਰਦਾਰ, ਸਰਪੰਚ ਅਤੇ ਕੌਂਸਲਰ ਵਟਸਐਪ ‘ਤੇ ਹੀ ਪਟਵਾਰੀ ਨੂੰ ਰਿਪੋਰਟ ਕਰਕੇ ਵਾਪਸ ਭੇਜਣਗੇ। ਇਹ ਪ੍ਰਕਿਰਿਆ ਹੈ ਤਾਂ ਸਲਾਘਾਯੋਗ ਅਤੇ ਸਮੇਂ ਦੀ ਹਾਣੀ ਵੀ ਹੈ ਜਿਸ ਨਾਲ ਕਿਸੇ ਵੀ ਤਰਾਂ ਦਾ ਦਸਤਾਵੇਜ਼ ਤਿਆਰ ਕਰਵਾਉਣ ਲਈ ਲਾਭਪਾਤਰੀਆਂ ਨੂੰ ਘੱਟ ਤੋਂ ਘੱਟ ਸਮਾਂ ਲੱਗੇਗਾ ਅਤੇ ਪਟਵਾਰੀਆਂ, ਸਰਪੰਚਾਂ, ਕੌਂਸਲਰਾਂ, ਨੰਬਰਦਾਰਾਂ ਦੇ ਮਗਰ ਮਗਰ ਨਹੀਂ ਫਿਰਨਾ ਪਵੇਗਾ ਪ੍ਰੰਤੂ ਇਸ ਪ੍ਰਕਿਰਿਆ ਦੀ ਇੱਕ ਵੱਡੀ ਸਮੱਸਿਆ ਇਹ ਹੋਵੇਗੀ ਕਿ ਸੂਬੇ ‘ਚ ਬਹੁਤੇ ਪਿੰਡਾਂ ਦੇ ਨੰਬਰਦਾਰ, ਸਰਪੰਚ ਅਤੇ ਸ਼ਹਿਰਾਂ ਦੇ ਕੌਂਸਲਰ ਪੂਰੀ ਤਰ੍ਹਾਂ ਅਨਪੜ੍ਹ ਹਨ, ਜਿਨ੍ਹਾਂ ਨੂੰ ਮੋਬਾਈਲ ਫੋਨ ਦੀ ਬਿਲਕੁਲ ਵੀ ਜਾਣਕਾਰੀ ਨਹੀਂ ਹੈ ਅਤੇ ਇਹਨਾਂ ਵਿੱਚੋਂ ਬਹੁਤਿਆਂ ਕੋਲ ਤਾਂ ਡਿਜੀਟਲ ਮੋਬਾਈਲ ਫੋਨ ਵੀ ਨਹੀਂ ਹਨ। ਸਭ ਤੋਂ ਪਹਿਲਾਂ ਤਾਂ ਅਜਿਹੇ ਸਰਪੰਚਾਂ, ਨੰਬਰਦਾਰਾਂ, ਕੌਂਸਲਰਾਂ ਨੂੰ ਡਿਜੀਟਲ ਮੋਬਾਈਲ ਫੋਨ ਲੈਣਾ ਪਵੇਗਾ ਅਤੇ ਉਸਨੂੰ ਚਲਾਉਣਾ ਵੀ ਸਿੱਖਣਾ ਪਵੇਗਾ। ਇਸ ਪ੍ਰਕਿਰਿਆ ਤਹਿਤ ਸਰਕਾਰ ਦੇ ਦਿਸ਼ਾ ਨਿਰਦੇਸ਼ਾਂ ਤਹਿਤ ਈ-ਵੈਰੀਫਿਕੇਸ਼ਨ ਲਈ ਨੰਬਰਦਾਰਾਂ,ਸਰਪੰਚਾਂ ਅਤੇ ਕੌਂਸਲਰਾਂ ਦੀ ਈ-ਸੇਵਾ ਕੇਂਦਰ ਪੋਰਟਲ ‘ਤੇ ਆਈਡੀ ਬਣਾਈ ਜਾ ਰਹੀ ਹੈ ਪਰ ਅਨਪੜ੍ਹ ਨੰਬਰਦਾਰਾਂ ਸਰਪੰਚਾਂ ਕੌਂਸਲਰਾਂ ਦੀ ਆਈਡੀ ਬਣਾਉਣ ਲਈ ਸਮੱਸਿਆ ਵੀ ਆਵੇਗੀ। ਈ ਵੈਰੀਫਿਕੇਸ਼ਨ ਦੀ ਇਹ ਪ੍ਰਕਿਰਿਆ ਪੂਰੀ ਤਰ੍ਹਾਂ ਲਾਗੂ ਹੋਣ ਤੋਂ ਬਾਅਦ ਹੁਣ ਜਾਅਲੀ ਸਰਟੀਫਿਕੇਟ ਬਣਨ ਦੀ ਗੁਜਾਇਸ਼ ਵੀ ਘੱਟ ਹੋ ਜਾਵੇਗੀ। ਕੁਝ ਪਿੰਡਾਂ ਵਿੱਚ ਪਤਨੀ ਸਰਪੰਚ ਜਾਂ ਕੌਂਸਲਰ ਹੋਣ ਦੀ ਸੂਰਤ ਵਿੱਚ ਉਹਨਾਂ ਦੇ ਪਤੀ ਅਤੇ ਪੁੱਤਰ ਹੀ ਆਪਣੀਆਂ ਪਤਨੀਆਂ/ਮਾਵਾਂ ਦੇ ਦਸਤਖ਼ਤ ਕਰ ਦਿੰਦੇ ਸਨ ਅਤੇ ਲੋਕ ਜਾਅਲੀ ਮੋਹਰਾਂ ਵੀ ਬਣਾ ਲੈਂਦੇ ਸਨ ਪਰੰਤੂ ਹੁਣ ਈ ਵੈਰੀਫਿਕੇਸ਼ਨ ਤਹਿਤ ਅਜਿਹਾ ਨਹੀਂ ਹੋਵੇਗਾ। ਹੁਣ ਈ ਵੈਰੀਫਿਕੇਸ਼ਨ ਪ੍ਰਕਿਰਿਆ ਤਹਿਤ ਪਿੰਡਾਂ ਦੇ ਅਨਪੜ੍ਹ ਸਰਪੰਚਾਂ, ਨੰਬਰਦਾਰਾਂ, ਅਤੇ ਸ਼ਹਿਰਾਂ ਦੇ ਅਨਪੜ੍ਹ ਕੌਂਸਲਰਾਂ ਨੂੰ ਡਿਜੀਟਲ ਦੁਨੀਆਂ ਦੇ ਵਸਨੀਕ ਬਣਨਾ ਹੀ ਪਵੇਗਾ।
