ਚੰਡੀਗੜ੍ਹ, 20 ਦਸੰਬਰ, Gee98 news service
-ਯੂਟਿਊਬ ‘ਤੇ ਗੁੰਮਰਾਹਕੁੰਨ ਥੰਬਨੇਲ ਲਗਾ ਕੇ ਜਾਂ ਕੰਟੈਕਟ ਨਾਲ ਵੀਡੀਓ ਅਪਲੋਡ ਕਰਨ ਵਾਲੇ ਯੂਟਿਊਬਰਾਂ ਦੀ ਹੁਣ ਖੈਰ ਨਹੀਂ,ਵੀਡੀਓ ਸਟ੍ਰੀਮਿੰਗ ਪਲੇਟਫਾਰਮ ਯੂਟਿਊਬ ਨੇ ਆਪਣੇ ਵੀਡੀਓਜ਼ ‘ਤੇ ਗੁੰਮਰਾਹਕੁੰਨ ਟਾਈਟਲ ਜਾਂ ਥੰਬਨੇਲ ਦੀ ਵਰਤੋਂ ਕਰਨ ਵਾਲੇ ਕੰਟੈਂਟ ਕ੍ਰਿਏਟਰਾਂ ਦੇ ਖ਼ਿਲਾਫ਼ ਸਖ਼ਤ ਕਾਰਵਾਈ ਕਰਨ ਦਾ ਫੈਸਲਾ ਕੀਤਾ ਹੈ। ਕੰਪਨੀ ਨੇ ਕਿਹਾ ਹੈ ਕਿ ਉਹ ਭਾਰਤ ਵਿੱਚ ਉਹਨਾਂ ਕੰਟੈਂਟ ਕ੍ਰਿਏਟਰਾਂ ਦੇ ਖ਼ਿਲਾਫ਼ ਸਖ਼ਤ ਕਾਰਵਾਈ ਕਰੇਗੀ ਜੋ ਅਸਾਧਾਰਨ ਕਲਿਕਬੇਟ ਥੰਬਨੇਲ ਜਾਂ ਟਾਈਟਲ ਨਾਲ ਵੀਡੀਓ ਅਪਲੋਡ ਕਰਦੇ ਹਨ। ਕੰਪਨੀ ਨੇ ਇੱਕ ਬਲਾਗ ਪੋਸਟ ਵਿੱਚ ਕਿਹਾ ਕਿ ਵੀਡੀਓ ਦੇ ਟਾਈਟਲ ਜਾਂ ਥੰਬਨੇਲ ਦੇ ਖਿਲਾਫ ਸਖਤ ਕਾਰਵਾਈ ਕੀਤੀ ਜਾਵੇਗੀ ਜੋ ਵੀਡੀਓ ਦੀ ਸਮੱਗਰੀ ਨਾਲ ਮੇਲ ਨਹੀਂ ਖਾਂਦੇ। ਇਹ ਖਾਸ ਤੌਰ ‘ਤੇ ਬ੍ਰੇਕਿੰਗ ਨਿਊਜ਼ ਜਾਂ ਮੌਜੂਦਾ ਘਟਨਾਵਾਂ ਨਾਲ ਸਬੰਧਤ ਵੀਡੀਓਜ਼ ਵਿੱਚ ਹੋਵੇਗਾ। ਯੂਟਿਊਬ ਨੇ ਕਿਹਾ ਕਿ ਸਨਸਨੀਖੇਜ਼ ਜਾਂ ਗੁੰਮਰਾਹਕੁੰਨ ਸਿਰਲੇਖ ਅਤੇ ਥੰਬਨੇਲ ਦਰਸ਼ਕਾਂ ਦੇ ਅਨੁਭਵ ਨੂੰ ਵਿਗਾੜਦੇ ਹਨ। ਮਹੱਤਵਪੂਰਨ ਜਾਣਕਾਰੀ ਲਈ ਪਲੇਟਫਾਰਮ ‘ਤੇ ਆਉਣ ਵਾਲੇ ਦਰਸ਼ਕਾਂ ਲਈ ਅਜਿਹੇ ਸਿਰਲੇਖ ਗੁੰਮਰਾਹਕੁੰਨ ਹਨ। ਬ੍ਰੇਕਿੰਗ ਨਿਊਜ਼ ਅਤੇ ਕਰੰਟ ਅਫੇਅਰਸ ‘ਤੇ ਵੀਡੀਓ ਬਣਾਉਣ ਵਾਲੇ ਭਾਰਤੀ ਨਿਰਮਾਤਾ ਇਸ ਸਕੈਨਰ ਦੇ ਦਾਇਰੇ ‘ਚ ਆਉਣਗੇ। ਇਸ ਦਾ ਮਤਲਬ ਹੈ ਕਿ ਹੁਣ ਕ੍ਰਿਏਟਰ ਲੋਕਾਂ ਨੂੰ ਵੀਡੀਓ ਵੱਲ ਆਕਰਸ਼ਿਤ ਕਰਨ ਲਈ ਕੋਈ ਵੀ ਟਾਈਟਲ ਨਹੀਂ ਦੇ ਸਕਣਗੇ, ਜਿਸ ਦਾ ਉਨ੍ਹਾਂ ਦੇ ਵੀਡੀਓ ‘ਚ ਜ਼ਿਕਰ ਨਾ ਕੀਤਾ ਗਿਆ ਹੋਵੇ। ਕੰਪਨੀ ਨੇ ਅਜੇ ਤੱਕ ਇਸ ਫੈਸਲੇ ਦੇ ਖਿਲਾਫ ਅਪੀਲ ਕਰਨ ਲਈ ਕਿਸੇ ਵਿਧੀ ਬਾਰੇ ਕੋਈ ਜਾਣਕਾਰੀ ਨਹੀਂ ਦਿੱਤੀ ਹੈ। ਕਾਰਵਾਈ ਬਾਰੇ ਜਾਣਕਾਰੀ ਦਿੰਦੇ ਹੋਏ, ਯੂਟਿਊਬ ਨੇ ਕਿਹਾ ਕਿ ਇਹ ਸ਼ੁਰੂ ਵਿੱਚ ਗੁੰਮਰਾਹਕੁੰਨ ਟਾਈਟਲ ਅਤੇ ਥੰਬਨੇਲ ਵਾਲੀ ਸਮੱਗਰੀ ਨੂੰ ਹਟਾ ਦੇਵੇਗਾ। ਹਾਲਾਂਕਿ, ਪਹਿਲੀ ਸਥਿਤੀ ਵਿੱਚ ਯੂਟਿਊਬਰ ਵਿਰੁੱਧ ਸਖ਼ਤ ਕਾਰਵਾਈ ਨਹੀਂ ਕੀਤੀ ਜਾਵੇਗੀ ਤਾਂ ਕਿ ਰਚਨਾਕਾਰਾਂ ਨੂੰ ਨਵੇਂ ਨਿਯਮ ਨੂੰ ਸਮਝਣ ਦਾ ਸਮਾਂ ਮਿਲ ਸਕੇ। ਪਹਿਲਾਂ ਅਜਿਹੀਆਂ ਵੀਡੀਓਜ਼ ਯੂਟਿਊਬ ਤੋਂ ਹਟਾ ਦਿੱਤਾ ਜਾਵੇਗਾ ਜਿਸ ਦੇ ਥੰਬਨੇਲ ਜਾਂ ਸਿਰਲੇਖ ਵੀਡੀਓਜ਼ ਨਾਲ ਮੇਲ ਨਹੀਂ ਕਰਦੇ ਹੋਣਗੇ।
